عنوان الموضوع : انواع الكبب العراقية تفضلوووووووو -من مطبخي
مقدم من طرف منتديات نساء الجزائر

انواع الكبب العراقية تفضلوووووووو



السلام عليكم
طبعا هاي ثالث مرة دااحمل الموضوع كلما اسويه يروح
اني منزلة قسم منهن قبل وبمواضيع سابقة بس الصور راحن وكلت اجمعهن بملف وحتى البنات اللي تفشل عدهم الكبة هم يستفادون
نبدي بسم الله

كبة البتيتة جاب لعيون بغدادية
المواد اللي تحتاجوهن بتيتة ونشا وملح وطبعا الحشوة اللي هي عبارة عن لحم مفروم وبصل السر اللي يخليها متتفلش عدكم انوا انتوا تسلكون البتيتة قبل بيوم تسلكوها كامل وحطوها بالثلاجة بصحن ناشف ولاتغطوه وورى يوم تعالوا ابرشوها وحطولها نشا تصير تخبل ولاترقون العجينة كلش هي طيبة من تكون شوية بيها ثخن واترككم ويا الصور
ومقدار النشا مثلا اذا كيلوا بتيتة 3 ملاعق كبار نشا



اني اكور المقدار كله حتى لاتطلع وحدة جبيرة ووحدة صغيرة وللسرعة همين




كليتها




كبة حلب او كبة التمن
مواد العجينة
تمن مطبوخ, بيضة , بطاطا وحدة وملح وتعجنوهن سوة وحاولوا من تطبخون التمن لاتخلوه يلين كلش لان صعب يصير باللف انتوا خلوه مي بس شوووووية كلش اكثر عن تمنكم العادي اللي تاكلوه لان البتيتة هي راح تخليه بيه شوية هشاشة
ولفوها وحاولوا ترقون جوانبها لان كلش طيبة تصير ومن تكلوها لازم بزيت غزييييييير وبالبداية حموه الزيت زين وحطوا الكبة وثواني على نار عالية وبعدها نزلوا النار ولاتكلبوها ولاتحركوها الى ان تشوفوها تحمرت
وهسه للصور












كبة البرغل
مواد العجينة
برغل ,وبكف الايد تمن منقوع ,بيضة,ملح

حضروا كاسة برغل وبكف ايدكم تمن وغسلوه مرتين 3 بمي بارد وبعدها للجدر ووياه مي وكمون وتعاملوا وياه مثل من تسوون كبة التمن يعني ينشف مية وتهدروه ومن يبرد ضيفوله البيضة بس راح تحتاجون ست البيت حتى العجينة تطلع حلوة وملزلزة
وبعدها حشوها وكلوها
وهاي الصور








هاي العجينة بعد ماانثرمت






هاي اللي لونها اطوخ الكبة النابلسية وهسه راح اشرحها بس اللي لونها فاتح هي كبة البرغل تخبل وطعمها طيب ومقرمشة


لاتردون حبايب بعدني ماكملت

التوقيع :

















الملف الشخصي









تم شكره 103 مرة في 16 مشاركة
الحالة





اوسمة العضو



مجموع الاوسمة: 0 (أكثر»
الأوسمه)

اخر مواضيعى

0 منو تعرف ؟؟؟؟؟
0 اجفتوا كل الكبب اللي اعرفهن (بتيتة جاب,حلب,البرغل,النابلسية,الجريش,كبة حامض)
0 هلموا السينامون بالفروستنغ وبالكراميل طعمه رووووووعة
0 معكرونة بالبشاميل بخلطة الدجاج والاعشاب
0 كبة حلب او كبة التمن من مطبخي
0 شاورما دجاج خيال بالصور
0 طرطات روعه
0 لبيتفووووووووور الهش وبالصورة
0 كيكة عيد ميلاد بالخطوات المصورة + صور كيكات
0 بس للي يحبون الثلج قبل وبعد لعيون ام الزوز



النابلسية
هي شوية شغلها طويل بس نتيجتها تحفة وطعمها روعة تستاهل التعب
مواد العجينة
350 غرام برغل ,350 لحم شرح خالي,بصلاية صغيرة ,1ونص ملعقة صغيرة ملح
1 م ص بهار حلو ,ربع ملعقة صغيرة فلفل ابيض,ربع ملعقة صغيرة ريحان او نعناع مجفف او مردقوش بكيفكم


للحشوة
بصلاية متوسطة مفرومة ناعم
300 غرام لحم مفروم
1 ملعقة صغيرة بهار حلو
نص ملعقة صغيرة هيل مطحون
ربع ملعقة صغيرة دارسين
نص ملعقة صغيرة فلفل اسود
1 ملعقة كبيرة سماق
مكسرات محمصة ربع كوب
زيت للقلي

بهارات الحشوة


بالبداية اخذوا البرغل واغسلوه بمي بارد فد 3 مرات وصفوه زين وحطوه بكاسة وغلفوها بالنايلون واتركوه ساعة


هسه بين مايتنكع البرغل تعالوا للحشوة
كلوا البصل وضيفوله اللحم المفروم ومن ينشف مية ضيفوا البهارات ماعدا السماق
كلبوها زين وبعدها حطوا السماق والمكسرات اني استخدمت لوز شرايح محمص انتوا بكيفكم واذا ماعدكم مو مشكلة يمشي الحال
خلصت الحشوة اتركوها تبرد


وارجعوا للعجينة راح يكون شغلكم هنا كله بست البيت او مثرامة اللحم
حطوه البصلاية بست البيت ووياها نص كمية البهارات مال العجينة واثرموها بحيث تصير كلش ناعمة


هسه تعالوا للبرغل اخذوه نص الكمية لان كلها تكون ثكيلة على المكينة وضيفوه للبصلاية واثرموه ناعم انتوا شوية راح تشوفوه قاسي بالبداية بس بعد الثرم راح يلين حطوه بكاسة البرغل المفروم وتعالوا للقسم الثاني هم افرموه زين فد مرتين ثلاثة كلما هواي كلما احسن
بعدين فرغوا ست البيت وجيبوا اللحم وافرموه وحطوه وياه بعد الفرم نص كمية البرغل وشغلوا ست البيت


هسه تعالوا اخبطوا اللحم والبرغل المفرومين وويا القسم الثاني من البرغل بايدكم اعجنوا تقريبا 6 او سبع دقايق وضيفوله الباقي من البهارات وربع كوب مي باااااااارد


وورى متخلصون هم ارجعوا لست البيت وافرموه هم مرتين 3 حتى يصير نااااااااعم بحيث مكوناته كلها تختفي ويصير عجينة


بعدين غلفوها وللثلاجة تكعد شي نص ساعة وبعدها تعالوا لفوها وراح تحتاجون للف مي بار ووياه ثلج اذا شفتوا العجينة وانتوا جاي تلفون تشققت لاتخافون امسحوها بمي بارد وهي شكلها يرجع
هاي الصورة بالخطوات بلكت تكون واضحة لان قسم من البنات سألوني شلون تكون شكلهاطويلة
واعذروني حبايب لان بعدني مبتدئة بالفوتو


واذا تحبون تشوها
حضروا بايركس مدهون بزبدة وافرشوا طبقة من العجينة وبعدها الحشوة وبعدها العجينة بعد مترقوها بين طبقتين نايلون بالضبط شلون من نتعامل ويا كبة الموصل
وكصكصوها بالحجم والشكل اللي تحبوه وللوجه حطوا 2 ملعقة كوب زيت زيتون و2 ملعقة كوب زيت
ودخلوها الفرن تبقى تقريبا 15 دقيقة بالرف الوسط وبعدها شيلوها لاعلى رف بالفرن بين ماتشوفون لونها تغيير يعني استوت
وهاي الخطوة ماصورتها الكم اعذروني







طبعا تخبل وطعمها رووووووووووعة لايعلى عليه

كبة الجريش
جريش اني استخدمت كوبين
برغل واستخدمت منه كوب واحد
كمون مطحون
فلفل أسود
ملح
ماء دافئ


للحشوة
لحم مفروم
بصل
(لوز مسلوق ومقشر وكشمش او البعض منا يسموه الزبيب ) وهذا بالطبع أختياري
ملح
فلفل أسود
كمون
هيل مطحون


طريقة العمل


بالبداية لازمنا نحضر العجينة وهي كالاتي
نخلط الكل اقصد الجريش والبرغل والملح والبهار معا وابدأ أضيف الهم مي دافي الصراحة ماكو مقياس عندي عيني ميزاني وأضافة المي يكون تدريجيا يعني أضيف كوب واخلطه واغطيه وارجع بعد فترة قليلة اقلبه وهم احط مي بس طبعا مو كوب واعجن واتركها وهكذا مرات الى ان الاحظ العجينة تبدي تتشكل عندي يعني تكون سهلة بالتعامل بس مو لينة ورأي كلما كانت العجينة بيها نوع من القوة كلما كان أحسن اتمنى انوا اكون وصلت الفكرة حبايب
اتركها جانب وهذا شكلها
واحيانا من تزود عندي عجينة احتفظ بيها بالفريز وارجع استخدمها وقت الحاجة
هسه نجي للحشوة وهي عادية يعني نثرم البصل ونحمسه بشوية زيت وبعدها أضيف البهارات واحمسه شوي وبعدها اللحم ومن يتغير لونه وينشف ميه ابعده عن الطباخ واضيفله اللوز المقشر المسلوقوالكشمش واضيف الهيل المطحون واقلبه واغطيه الهيل ينطيه طعم ورائحة زاكية جدا
وهاي صورة الحشوة

بعد ان تبرد الحشوة ابدئ بلف الكبة طبعا قسم من البنات ممكن الكبة تنفل عدهم بالسلق اكو نصيحة قدمتلياها خالتي وهي انوا لازم من افتح العجينة تكون خفيفة وابدي احط الحشوة بداخلها واحاول ارصها من اسدها اقصد افرغها من الهوى مااترك مجال بعملية الغلق حتى اكون مطمئنة من اسلقها

وهسه نسلقها بمي مضاف اله حبات هيل وورق غار وملح

وهذا المقدار بعد السلق

اترككم ويا الصور












كبة الحامض
مواد العجينة
طحين تمن , مقدار كف جريش , بهارات برياني,ملح حسب الرغبة
هسه تعالوا اخبطوهن سوة واعجنوهن بمي العجينة شوية راح تكون قاسية نوعا ما افتحوها وحشوها واكيد الكل تعرف الشوربة مالتها
حجة خخخ اريد افلت لان متت من العتب
وماصورت الخطوات كاملة اعذروني حبايب بس حطيتلكم النتيجة النهائية


وخلص والف عافية واي سؤال اجاوب واني الممنونة لان دوختكم وياي يكفي راح تمرون وتقرون موضوعي
اخ يمة راسي يوجعني وميتة جوع همزين رضا نايم جان منا لبعد سنة يلة اخلص
اندعولي اشوف اهلي وهمة بأتم صحة وعافية عيوني

>>>>> ردود الأعضـــــــــــــــــــاء على الموضوع <<<<<
==================================




__________________________________________________ __________

تسلم ايديج على هيك وصفه


__________________________________________________ __________


__________________________________________________ __________


__________________________________________________ __________