عنوان الموضوع : هل انا عند الله عاقة ؟؟ -تم الاجابة
مقدم من طرف منتديات نساء الجزائر

هل انا عند الله عاقة ؟؟



السلام عليكم ورحمه الله وبركاته

بدايه اطلب من كل العضوات الرد على مشكلتي باحترام وبدون اهانات

انا مشاكلي مع امي ،، احس كل مالي تزيد المسافه بيننا ،، لحد يهين امي بالردود ، ولحد يهينني بالردود ، يعلم الله اني احب اتقي ربي فيها ، وحجيت السنه هذه تكفيرا لكل ذنوبي تجاهها وتجاه اي شيء بيني وبين ربي .

اول شيء لازم تعرفو اني انا زوجي تركني من سنتين بسبب تحريضات اهله وبسبب حبه للدشره وعدم المسؤوليه ، زوجي ماحب يكمل حياته معي ، طلب مني ارجع لبيت اهلي بولدي لما كان عمره 3 شهور فقط

ورجعت لبيت امي ،، وما ادراكم مابيت امي !! بيت امي هو نفسه بيت ابوي ، ولكن لان ابوي طلقها قبل 9 سنوات اخذ لنا بيت شعبي هي ونحن ساكنين تحت وزوجه ابوي واخواني منها ساكنين فوق ، بيتنا عباره عن ثلاث غرف ومطبخ وحمام وداخل المطبخ حوش صغير وداخل احدى الغرف حوش صغيرر ثاني .

امي الله يحفظها تعرضت في حياتها مع ابوي الله يرحمه لحرمان واسع ، كان حارمها كثير اشياء وامور تافهة ، ولكن لما كبر ابوي بالسن وتوفي فقط من شهرين ، وبعض عوايد امي السيئة بسبب هذا الحرمان لا استطيع ابدا ابدا مكافحتها ،

امي الله يهديها تجمع كل شيء في البيت ، الي له لزمه والي ماله لزمه ( ملابس - فراش - اغراض مطبخيه - اكياس مدري ايش فيها ، دواليب قديمه مكدسه بالاحواش - فرن غاز قديم - ادوات كهربائيه مهجوره - اخشاب - خرق للمطبخ كميه هائله )

وفيه غرفه من الغرف مليااااااااااااااااااااااااااااااااااانه ملابس كثيره ، تكدست من بعض الجيران يشوفون امي مسكينه يعطونها ملابسهم الزايده وتتكدس

عاد اش الي سبب الخلافات بيني وبين امي طوال تواجدي ببيتها ,

اني كل ما ابغى ارمي الاغراض الزايده عشان نوسع ع نفسنا بالبيت امي تخلق جو توتر ومشاكل وكلام وصراخ كثير الين تستفزني واصير ارفع صوتي واصرخ وابكي قدامها ،،

انا يكون مقصدي النظافه وهي تعاملني كاني وحده تعاندها !

من اسبوع طلع لنا في المطبخ ام اربع واربعين وبعدها اختفت وللحين مدري فينها ، والام اربع واربعين ذي جات من جهة الخرابه المكدسه تحت الدرج اشياء كثيره جدا وما ادري ايش هي !!

صارت امي تقول عني ( عقربه ، قليله ادب ، مو محترمه ، مسويه عليا زوج ثاني ، وغير انها تدعي علي وتقول عني - ملعونه )

هذا صار واخوي قاعد يرمي بالاغراض الي شفتها انا واختي مالها داعي ، ماشاورت امي لأنه لو عليها ماترمي ولا شيء !

عجزت اقدر افهمها اني ابغا النظافه ونيتي سليمه ومو نيتي ازعلها ، لكن استفزتني بكلامها السيء عني بعد كل شيء سويته بالبيت ،

والله من يوم سكنت عندها وضعي المادي اسوأ من السيء ماكان بالبيت فيه كهرب ، كنا ع توصيله للجيران ، لكن جتني 6 الاف ريال من شخص لوجه الله اعطاني اياها ولكن بدل ما اخبيهم لولدي الوحيد صرفتهم ع البيت مديت كهربا ، ولا سمعت مديح منها ولا حتى دعوى
ام
صلحت المطبخ وغيرت فرشته ونظفته وكلفني جهد كبير مع 700 ريال كنت بامس الحاجه لهم عشان ولدي والله ما قالت لي حتى شكرا ,

رمضان الي فات اشتغلت بالمفرزنات للزباين وطلعت حوالي 2017 ريال غيرت فرشه الصاله وصلحت جدرانها عن طريق مليس ودهنت الجدران بويه بيدي انا ، وماشفت ذره مديح

ماكنت مهتمه بمدحها او ذمها اهم شيء اوفر مكان نظيف لولدي الصغير الي صار عمره 3 سنوات

والحين ابفضي الاحواش وانظفهم والله بدل ماتشكرني تدعي علي ،، والحين لها 3 ايام ماتكلمني وتدف العاب ولدي برجلها كنوع من التنفيس عن غضبها علي ، وماتتكلم مع احد بالبيت بسبب الزعل ،، وقاعده تفهم الجميع اني انا عاقه لها ،، وانا ما انكر اني رفعت صوتي عليها وقلت لها انها ظالمتني واني ما اهمها وانها ماعمرها احترمتني بحياتها ، وهذه الحقيقه ، زوجي واهله رموني بدون سبب وماطلعو اوراق الولد وزوجي للحظه ما اعطاني ورقتي وهي حتى اتصال عليهم مافكرت ،، حتى تجي تسألني عن وضعي ماحدث ،،

متضايقه من تخليها عني بشكل عام ، ومن وقوفها بوجهي بشكل خاص ، هذا عدا اشياء كثيره غلط فيها اولها عدم استحمامها نهائيا

وياويل الي يكلمها فينا نحن بناتها الاربع او اولادها الست ، وبالاخص انا لاني اكون صريحه معها واحيانا عصبيه

قولولي هل انا الان محسوبه عاقه ،، هل ربي حيعاقبني بعقوق ولدي علي جزاء لي لاني اغضبتها ؟؟

>>>>> ردود الأعضـــــــــــــــــــاء على الموضوع <<<<<
==================================


الله يفرج همك يا اختي ويرزقك بزوج صالح ان شاء الله
اسئل شيخ ما اعرف صراحة
للرفع


__________________________________________________ __________

رفع ..


__________________________________________________ __________

الْسَّلامُ عَلَيْكُمْ وَرَحْمَةُ الْلَّهِ وَبَرَكَاتُه
الْكَلِمَةُ الْطَّيِّبَةُ صَدَقَةٌ


الله يفرج همك ويهدي امك
بس وين زوجك عن ابنك انتي قلتي تركني يعني طلقك او تركك بيت اهلك ومعد سأل
لان في فرق وين النفقه المفروض يعطيكِ فلوس اذا مازلتي على ذمته ولا اذا طلقك لازم يعطيكِ فلوس للولد اذا عندك اخ كبير متفهم حتى ولو اخوكِ من ابوكِ خليه يتدخل
تقبلي ردي مع اني تطرقت لموضوع غير المشكله
بالتوفيق


__________________________________________________ __________

من وجهة نظري انا ما اشوفك عاقه..

سبحان الله مهما كان بس الناس عقليات و تختلف الافكار..
امك من النوع العنيد مع احترامي الشديد هي شايفه ان
كل حاجه بالبيت لها حاجه على مرور الوقت و ما حابه تتخلى عنها
و يمكن هي حاستك عبئ عليها "كمطلقه" لان هذا المرض اللي منتشر
بينا المطلقه مالها وجود، مالها مكان، على الهااااامش بإختصار و للاسف..

والله فيك الخير يوم انك حسنتي احوال اهلك و الله يآجرك
على اللي سويتيه و عساه تكفير لك عن اللي حصل بينك و بين امك
بس سبحان الله في اهل ما يبان في عيونهم لو سويتي ما سويتي..
نصيحتي لك خلك على ما انتي عليه مع شوية تطنيش لكلام امك وردات فعلها

لا تتركيها زعلانه مهما كان هي امك و بوسي راسها
و تأهبي لردة فعل سلبيه منها يمكن ترفضك وترفض اعتذارك
و يمكن ربك يسخر بقلبها و ترضى عليك ...بإذن الله..


بإذن الله راح تكوني ام ناجحه طالما دبرتي امورك من حيث
الماده و اليوم الماده شي مهم لتعيش، و بنت باره لانك مازلتي
تناظري للورا في موضوع امك و تجتهدي لترضيها ....



تحياتي لك


__________________________________________________ __________

ماشاء الله تبارك الله عليك .. الله يسعدك يارب
أحب الناس اللي همتهم عالية ماشاء الله ..
والله انت بنت حلال و مكافحة وقاعدة تبذلي أقصى جهد عشان توفرين بيئة نظيفة تعيشون فيها
الموضوع الحين مو عقوق أو بر بقد ما ان المسافة بينكم كبيرة والموضوع يبغاله انك تعاملين امك ب لين وصبررر لأنها وااضح عنيدددة وصعبة التعامل وهذا اختبار من الله لك ولغيرك لان فيه كثير كذا من الاهالي
واتجنبي دعواتها ابدددا لا تخلينها تدعي عليك ولا تنتظرين شكر او مدح سوي كل هذا لوجه الله وعشان مستقبلا تشوفينه من ولدك ولأن الله قرن رضاه برضى الوالدين ولا تخلينها تزعل وتتحسس و تحس بتهميش دورها بالعكس داريها وعامليها بإحسان والباقي على الله
والله والله اني حاسة فيك واعرف انه شي مرررهق ومتعب لكن تأكدي اننا كلنا مبتلين ..
الله يرفع قدرك ويرفع عنك البلاء لا تنسين الاستغفار مفتاح لكل الاقفال