نفسى أوصلك يارب "كلام من القلب للقلب" - الشريعة الاسلامية
عنوان الموضوع : نفسى أوصلك يارب "كلام من القلب للقلب" - الشريعة الاسلامية
مقدم من طرف منتديات نساء الجزائر
نفسى أوصلك يارب "كلام من القلب للقلب"
السلام عليكم ورحمة الله وبركاته
اليوم سأبدأ معكم فى طرح درس بإسم
نفسى أوصللك يارب أو "كلام من القلب للقلب"
وحتى أستطيع الوصول الى قلب كل من قرأ الدرس إسمحولى أن أكتبه باللغة العامية وحتى يتسنى لى التقرب من كل فئات العمر وخاصة الشباب.
إن شاء الله سنقسم الدرس على ثلاثة أجزاء حتى لا أطيل عليكم.
وأسأل الله ربنا ومولانا العظيم الحليم رب كل شئ ومليكة أن ينفعنا وينفع بنا ويرزقنا الثبات عند السؤال ويعتقنا من النار ويرزقنا الجنة بدون حساب ولا سابقة عذاب..اللهم أمين.
والآن مع الجزء الأول من الدرس:
الحمدلله وكفي وصلاه وسلام علي عباده الذين اصطفي
اللهم لك الحمد كله ولك الملك كله وبيدك الخير كله وإليك يرجع الأمر كله
اللهم صلي علي عبدك ونبيك ووليك وحبيبك وصفيك وخليلك ورسولك محمد صلي الله عليه وسلم
ثم أما بعد
أحد الشعراء وقع في غرام فتاه من الفتيات فبدأ يكتب فيها شعر من ضمن الأبيات اللي كتبلها بيقولها
طرقت الباب حتي كلَّ متني
بيقولها أنا فضلت واقف علي بابك أخبط علي الباب عشان تفتحيلي لغايه ما إيدي وقفت!
ياجماعه ده مخلوق وقف علي باب مخلوق كل المده دهيه إنت مستعد تقف علي باب الخالق أد إيه؟؟
إنتي مستعده تقفي علي باب ربنا لغايه ما يفتحلك أد إيه؟؟
تخيلوا واحد بيقف علي باب واحده أد إيه عشان تفتحله
خطيب بيقف علي باب خطيبته أو باب أبو خطيبته أد إيه؟؟
واحد بيقف علي باب واحد عشان يتوسطله عشان يجيبله شغلانه بيقف علي بابه أد إيه؟
إحنا مستعدين نقف علي باب ربنا أد إيه عشان ربنا يفتحلنا؟؟
عايزين نتكلم عن ربنا
لأن الكلام عن ربنا هو أخطر حاجه بتغير القلوب
لو معرفناش ربنا إيه معني حياتنا؟؟؟
إحنا عايشين لييه؟؟...إيه هدف حياتنا؟؟...إيه قيمتنا..
إحنا عرفنا إيه لو معرفناش ربنا؟؟؟
ولكن لو عرفنا ربنا هنثبت صح هنثبت للأخر هنصبر للأخر
لو عرفنا ربنا هنوصل لربنا سبحانه وتعالي
أنا بتكلم عن ربنا ليييه؟؟
مش عشان كلمتين حلوين وخلاص!!
أنا بتكلم عن ربنا عشان قلوبنا تزلزل لما تسمع كلمه الله
عشان قلب العاصي يتزلزل وينسف أي معصيه في حياته
عشان اللي في قلبه مرض ينزع أي مرض من قلبه بإذن الله
عشان أي إنسان ياجماعه يعرف إيه هدفه في الحياه وإيه طريقه في الحياه؟؟
عشان الملتزم يعرف إن الركض إلي الله هو الحاجه الوحيده اللي ليها قيمه في الحياه وإلا فكل شئ تاني سرااب
أنا بتكلم عن ميين؟؟
أنا بتكلم عن اللي لما سيدنا إبراهيم عرفه دخل النار وهو بيقول
حسبي الله ونعم الوكيل
كفايه عليا إنت يااارب
تسيب الدنيا كلها وتقول أنا سايبها وكفايه عليا إنت ياااب
تقف في وش الدنيا كلها وتقول كفايه إنك معايا يااارب
تنطلق إلي الله وتقول كفايه إن أنا أخرج من الدنيا بيك يااارب؟
أنا بتكلم عن اللي لما عرفه الحجر جبل الطور إتفت من معرفته
أنا بتكلم عن اللي لما عرفته الملائكه آلاف السنين ساجده في ملكوت السموات ..يوم القيامه ترفع رأسها تقول سبحانك ماعبدناك حق عبادتك
أنا بتكلم عن اللي واحد قتل 100 نفس
كل نفس جدار مظلم حوالين قلبه
ولما جيه شعاع من نور الله شق ال100 جدار
لما جيه شعاع من حب الله وجلال الله شق ال100 جدار ودخل قلبه
بقي ملك الموت بينزع روحه من عرق عرق وعصب وعصب
وهو بيزحف وبيقول أنا نفسي أوصلك
بقي ملك الموت متخيلين المنظر ياجماعه وهو لوحده في الصحراء والصحراء حواليه والسماء فوقيه وملك الموت بينزع روحه وهو بيزحف ويزحف ويزحف وقلبه بيصرخ منايا أوصلك..
منايا أوصلك ياااااااارب..
مناكي توصلي لربنا؟؟...مناك توصل لربنا سبحانه وتعالي؟؟؟..
ياجماعه ياجماعه لو شوفنا جلال ربنا بقلوبنا هيحصل إيه ؟؟
هنعمل إيه؟؟ نفسك مش نفسك يرضي عنك؟؟
مش نفسك يقبلك؟؟
مش نفسك تتفتح أبواب السماء لدعائك؟؟
مش نفسك تحس إنك ماشي في الدنيا وربنا سبحانه وتعالي معاك؟؟
مش نفسك تتصالح مع ربنا سبحانه وتعالي؟؟
مش نفسنا ياجماعه لو متنا دلوقتي نقابل ربنا سبحانه وتعالي وهو راضي عننا؟؟
عايزين نقوله منانا نوصلك ياارب
يبقي شعار حياتنا منايا أوصلك يااااااااارب
هأقف علي بابك بس أوصلك بس إقبلني إقبلني يااارب
ياارب هأعمل كل حاجه توصلني ليك بس إقبلني
هأسيب كل حاجه تعطلني عنك بس إقبلني
هأقف علي بابك طول عمري بس إقبلني
منايا أوصلك منايا أوصلك
منايا أوصلك هو ده الشعار بتاعنا
إنتوا عارفين إحنا عاملين زي إييه؟؟
عارفين عربيه ماشيه علي طرف جبل طريق علي جبل العربيه فجأه حودت نصفها بقي علي المنحدر بقي في الهواء ونصفها ثابت علي الأرض أقل زقه ولا حاجه هتوقعها تهوي
إحنا قلوبنا عامله كده ومالناش إنقاذ غير معرفه ربنا
مفتاح تغيير حياتك وتغيير حياتِك هو معرفه ربنا سبحانه وتعالي
ياجماعه عايزين نقف علي باب ربنا أكثر مانستطيع
سبحان الملك الجليل
آآآه لو عرفناه
آآآآآآه لو عرفنا هو رحيم أد إيه؟؟
آآآآآآآه لو عرفنا بيحبنا أد إيه؟؟؟
آآآه لو عرفنا هو فرحان بينا دلوقتي وإحنا بنسمع عنه وبنتكلم عنه أد إيه؟؟
آآآآآه لو عرفنا نعمه علينا أد إإيه؟؟
آآآآه لو عرفنا قدرته وعظمته وحكمته؟؟
إحنا جهلنا بالله هو سبب كل مشاكل حياتنا
جهلنا بحكمته هو اللي خلانا نسخط في الإبتلاءات لما يبتلينا
جهلنا برحمته هو اللي خلانا مش قادرين نحبه سبحانه وتعالي أو كتير مننا مش قادر يحبه
بقي ياجماعه التوبه عندنا توبه بارده ..إلتزام باارد
زي إبن ساب أبوه من عشرين سنه وأخيرا راجع لأبوه فأبوه مشتاق وفرحان بيه وبيجري عليه الإبن قام مادد إيده كده وسلم سلام وخلاص!!
إلتزام باارد...إلتزام بااارد
مفيش لقاء حب حار صادق في قلبك تجاه الله وإنت راجع إليه
جهلنا بقدرته هو اللي بيخلي واحده مخلفتش بقالها 5 سنين تقول هو معقول أخلف هو معقول أتجوز بعد ماكبرت...هو معقول تفرج بعد ماقفلت ..جهلنا بقدرته
جهلنا بعقابه هو اللي خلانا نتجرأ عليه في المعصيه
جهلنا بعظمته هو اللي خلانا نستكتر ركعتين سرحانين في تلاتربعهم لما نصليهم لربنا في جوف الليل
معرفه الله هي اللي هتقلب حياااتنا
عشااان كده الليله
منانا نوصل لربنا ...منانا نوصله بقلوبنا للملك الجليل سبحانه وتعالي
النهارده ياجماعه
آآه لو عرفتي أد إيه هنكلم عن عظمه ربنا أد إيه؟؟أد إيه ربنا عظيم؟؟
أد إيه ربنا رحيم؟؟
أد إيه ربنا كريم؟؟
أد إيه ربنا غني؟؟
آآآآه لو عرفتي أد إيه عقوبه ربنا بالعاصي؟؟
آآآه لو عرفتي أد إيه رحمه ربنا بالطائع؟؟
آآآه لو عرفتي أد إيه فرح ربنا بالتائب؟؟
آآآآآآآه لو عرفنا ياجماعه ؟؟
إنت عارف فرح ربنا بيك أد إيه؟؟
فرح ربنا بيه أنا؟؟
ده حديث يزلزل القلب يزلزل أي قلب حي
(( إهتز العرش لموت سعد بن معاذ))
لقيت زياده صحيحه في صحيح الجامع
يقول النبي صلي الله عليه وسلم((إهتز العرش لموت سعد بن معاذ من فرح الرب عز وجل))
ربنا فرحان...ربنا ممكن يحب عبد للدرجه دي
ربنا ممكن يفرح بيك يوم لقائك بيه للدرجه دي
اللي يفرح بلقائك لدرجه إن أضخم مخلوق في الكون يهتز من الفرح
اللي بيفرح بتوبتك لدرجه إن الرسول صلي الله عليه وسلم يقول:
(( الله أفرح بتوبه أحدكم من رجل كان معاه بعير ومعاه الزاد وفي الصحراء لوحده الزاد كله راح والبعير ضل وخلاص هلك نام تحت شجره شويه وبيفتح عينيه لقي الزاد أدامه والبعير أدامه الرجل مقدرش))
العلماء بيقولوا لو كان فيه فرحه في الدنيا أكتر من دي كان النبي صلي الله عليه وسلم عبر بيها عن فرح ربنا لو رجعتله...عن فرح ربنا بيكي لو رجعتيله
إنتي مين وإنت مين عشان ربنا يفرح بيك كده؟؟؟؟؟
إحنا مييييييين؟؟؟؟؟؟
ده إحنا عبيد منسواش حاجه ...ولكن شوف اللي بيفرح بعبادتك لدرجه انك لما تعبده صح ولا تسجدله وتبكي يجمع الملائكه ويباهي بك الملائكه
اللي يفرح بنجاتك في الأخره لدرجه إن سيدنا علي لما فهم هذا الأمر قال
((لو خيرت أن يحاسبني أمي و أبي يوم القيامه وبين أن يحاسبني الله لاخترت الله))
ليييييييييييييييه؟؟
يعني إنت ياللي في ثانويه عامه ربنا اللي يصححلك ورقتك ولا أمك وأبوك..أمك وأبوك لأ ربنا ...ليييييييه؟؟؟
ربنا أرحم بيك من أمك وأبوك
إنت عارف فرح ربنا؟؟طب إنت فرحان بيه إنت فرحان بيه؟؟
بلال بن رباح وهو بيموت مراته بتقول واااحزناه قالها قولي وااااافرحتااه
إنت لو جالك ملك الموت دلوقتي هتقول وااافرحتااه
رسول الله صلي الله عليه وسلم وهو بيموت أبوبكر بيبكي ..عائشه بتبكي ..كله بيبكي والرسول صلي الله عليه وسلم بيقول:
((بل الرفيق الأعلي بل الرفيق الأعلي))
إني خيرت بين لقاء ربي وبين الدنيا والخلد فيها فاخترت لقاء ربي والجنه
فرحاااااان وهو رايح لربنا سبحانه وتعالي
طب ربنا فرحاان بيك..إنت مشتاااااق ليه؟؟..مشتااق لربنا نفسك تشوفه؟؟..
شوف الرسول عليه الصلاه والسلام بيقول للصحابه:
((إنكم سترون ربكم..الصحابه طبعا فرحوا ...الرسول قالهم إستنوا..إييه؟؟فإن إستطعتم ألا تغلبوا علي صلاه قبل طلوع الشمس اللي هي الفجر وصلاه قبل غروبها اللي هي العصر فإفعلوا......))
الرسول صلي الله عليه وسلم ربط النظر لوجه الله بصلاه العصر والفجر
ليييييييييييييه؟؟..
لأن الفجر اللي هو بييجي في الليل الناس نايمه بالليل الليل ده وقت الشهواات اللي سهران مع مراته واللي سهران مع حبيبه واللي نايم واللي سهران أدام مسلسل وقت الشهواات فاللي بيعطل عن صلاه الفجر الشهووات
إنما النهار اللي فيه العصر وقت الشبهاات الاسباب ده في شغله وده في تجارته وده في محله
وده في درااسته فاللي بيعطل عن صلاه العصر الاسباااب
كأن الرسول صلي الله عليه وسلم بيقول عايز متحجبش عن ربنا ..عايزه متحجبيش عن ربنا ..إوعي الاسباب والشهوات تحجبكوا عن ربنا إوعوا حاجه تحجبكوا عن ربنا
إنت عارف رحمه ربنا بيك أد إيه؟؟
رحمته بيك وإنت لسه متخلقتش قرأت في كتاااب إسمه الكون مؤلف أجنبي بيقول تخيلوا لو كانت الجاذبيه الارضيه اكتر مما هي عليه الأن فبيتخيل
بيقول كان الانساان بقي مش طويل كده ورفيع بقي عريض وقصير مبطط يعني بالعرض كده وكان بقي حجم الانسان أد الفار وكان طلوع السلم بقي عمليه مستحيييييله محدش يقدر عليها وكان كوبايه ماء لو أدامك وأنا هاموت من العطش عشان أمد إيدي مش قادر الجاذبيه قاعده تشد إيديوكان الواحد لو وقع وقعه يموت فيها ليه؟؟؟
لأن الجاذبيه دلوقتي ضعيفه فبتقع بالراحه لو الجاذبيه شديده أول ماتقع الأرض تشدك تقوم الدماغ تتقسم أو العظم يتكسر......
يا إخوانا ربنا رتب لنا كل حاجه قبل مانيجي.. دي حاجه من مليوووووووووون حاجه وحاجه ربنا رتبها لنا
زي ما الأم بتلبس أولادها خفيف في الصيف أحسن يحترروا ...وتلبسهم لبس تقيل في الشتاء أحسن يبردوا..
ربنا رتب لك كل حااااااااجه
ده ربنا رحمته بيك من قبل ماتتوب.....
بيأمر ملك الحسنات إنه يكتب الحسنه فور عملها ...إنما ملك السيئات 6 ساعات ميكتبهاااااش ليييييه؟؟؟
لعلك تتوب لعلك ترجع لله سبحانه وتعالي...فما بالك برحمته بيك سبحانه وتعالي ..رحمته باللي جايله باللي بيقوله عاوزك ياارب
حديث قاتل المئه نفس ..مئه نفس.. ده مش سرق.. ده مش زني.. ده قتل ..ده مش قتل نفس.. ده قتل 100 نفس واللي قتل 100 نفس ده مقتلهمش في يوم ده بالتأكيد قعد طول عمره يقتل يعني الرجل ده صحيفته متخيلين شكلها إيه؟؟
بس لما جاله وقاله عاوزك يااارب وجاله بقلبه ربنا فتحله الأبواااب كلها..
بس ده أنا مفيش عضو فيه معصيتش بيه ربنا ..الأبواب كلها مفتوحه ..
بس ده أنا مفيش مكان معصيتش فيه ربنا ..الابواب كلها مفتوحه..
بس ده أنا مفيش معصيه معملتهاش في حق ربنا..الابواب كلها مفتوحه..
راح لراهب من الرهبان قاله ملكش توبه قتله ايوة إرتكب نفس الجريمه اللي راح يتوب منها..
راح لعالم من العلماء قاله ومن يحول بينك وبين التوبه..بس إنطلق للأرض الفلانيه اللي فيها الصحبه الصالحه وسيب الارض بتاعه المعاصي اللي إنت عايش فيها
الرجل انطلق ياجماعه وهو في الطريق ملك الموت نزل مااااات
نزلت ملائكه الرحمه وملائكه العذاب ميين اللي هيأخذه؟؟
فأوحي الله لهذه الارض اللي بينه وبين أرض المعاصي أن تباعدي ..ولهذه الأرض اللي بينه وبين أرض الطاعه أن تقااربي فربنا عمله المعجزه دي لييه ؟؟؟
لانه جاله لأنه ساب بلده ووطنه وأهله وأحبابه وجاله سبحانه وتعالي
لأنه وهو بيموت بدل مايحود ظهره ويرجع تاني يدور علي حد ينقذه فضل مكمل لأنه عاااااااااوز يوصل لربنا
فربنا عمل له المعجزه دي سبحانه وتعالي
الناس دي لما بتتوب بتبقي حرقه قلب لأهل الباطل
الناس دي لما بتتوب زي الفنانين أما بيتوبوا والمغنيين لما بيتوبوا لأنه أدامه الدنيا وشهواتها وفتنتها أما بيسيب كل ده عشان ربنا ......
فضييييييحه للدنيا
إن الدنيا كلها متستاهلش سجده واحده بين إيدين ربنا في الثلث الاخير من الليل تنزل من عينيك الدموع وانت بتقوله
اقبلني يااااااااااااارب....عااااااوزك يااااارب...
الرجل ده ياااجماعه لما قاسوا المسافه مابين أرض المعصيه وأرض الطاعه مابين جثته والأرضين وجدوه أقرب إلي أرض الطاعه بشبر فقبضته ملائكه الرحمه ..
خطوه...كانت فرق بين ان تقبضه ملائكه العذاب أو الرحمه
خطوه.. كانت فرق بين ان قبره يبقي روضه من رياااض الجنه او حفره من حفر النار ......
كانت الفرق بين انه يدخل ناار تلظي طعامه الزقوم واليحموم وبين انه يدخل جنااات فيها فااكهه مما يتخيرون ولحم طير مما يشتهون
خطوووه..كانت بينه وبين انه يصب من فوق رأسه الحميم وبين إنه يسكن في الفردوس الأعلي في جوار عرش الله سبحانه وتعالي
خطووووووووووووه..!!
ممكن يكون بينك وبين عطااااااااء ربنا وفتح ربنا وقبول ربنا
خطووووووووووووه
خديها عشاان تقربي منه....ممكن يكون بينك وبين النجاه في الآخره من كل المعااصي اللي عملتها ..
خطوه.. في التزامك تاخدها جديده........
انت عارف رحمة ربنا أد إيه؟؟؟
...إنتوا عارفين رحمته أد إيه ياااااجماعه رحمته
أعظم رحمه لربنا هى الجنه .....
الجنه لما دخلت في قلوب الصحابه عملووووووووا إييه؟؟؟
مقالووش ده فرض ولا سنه؟؟؟
ابن عمر لما النبي قاله نعم العبد أبا عبد الله لو كان يقوم من الليل مقالوش ليه يارسول الله؟؟هو قيام الليل فرض ولا إيه؟؟؟؟
لأ طبق على طول..
لأنه عايز الجنه ..عايز الجنه ياااجماعه
معاذ بن عفراء رضي الله عنه كان كل ما يجيله فلوس يتصدق..أكل يتصدق..
فزوجته خلفت فكلمت اخواتها يكلموه.. يكلموه يترك حاجه لأولاده فقالهم.....
قالهم إييييييه؟؟؟
((أبت نفسي إلا أن أستتر بكل شئ أجده من النار))
الله..الله..الله..
أبت نفسي مش قادر دي عاطفه قهريه مش قااادر
الشاب دلوقتي بيقول أبت نفسي إلا أن أفعل كل شئ يوديني جهنم ((أعوذ بالله))
إنما معاذ بيقول أنا مش قادر.. أنا أي حاجه هالأقيها هأقفل بيها باب االنار عني..
أنا مش قادر.. أي حاجه هالأقيها هأعملها ستار بيني وبين جهنم ربنا ينجيني بسببها شااااايفين يا إخوانا الناس دي فكرت إزاااااااي؟؟؟؟؟
شايقين أحلام اليقظه بتاعتهم بقت إييه؟؟؟
لما صحابي راح للنبي صلي الله عليه وسلم وقاله لبس الجنه بييجي منين ياارسول الله؟؟
بيتعمل ولا بيطلع بييجي منين ياارسول الله؟؟
أحلام اليقظه بتاعتهم نفسها اتغيررت..
إنت مره قعدت تحلم؟؟
إنتي مره قعدتي تحلمي؟؟
هتبقي في الجنه شكلك إيه؟؟
مره قعدت تحلم لما تبص من بلكونه القصر بتاعك في الجنه هتشوووووف إييه؟؟؟
الناس دي عاشت ياجماعه دين.. عاشت دين فعلا في علاقتها بالله سبحانه وتعالي
عشان كده الصحابي كان يروح للنبي صلي الله عليه وسلم يقوله:
أي الصدقه أفضل عايز احسن حاجه؟؟
إنتي تروحي للنبي صلي الله عليه وسلم تقوليله أي الحجاب أفضل؟؟ ..
حجاب أمهات المؤمنين مهما كنتي جميله ..مهما كانت الناس بتبصلك..مهما كنتي هتتحاربي في حجابك لو لبستيه ..
وانت تقول يارسول الله اي الالتزام افضل؟؟ انك تلتزم وانت شاب صغير لسه بصحتك ولسه تقدر تعبد ربنا وتخدم دين ربنا سبحانه وتعالي طبعا أو كبير المهم إنك تقبل علي ربنا بصدق بصدق..صدق في الاقبال علي الله سبحانه وتعالي
إنت عارف؟؟
إنت عارف رحمته بيك قد إيه؟؟؟
ونستكمل الدرس فى الجزء الثانى والثالث..فانتظرونا أحبكم الله.
أتمنى أن أكون بالفعل خاطبت قلوبكم، وأتمنى أن يكون الدرس نفعكم.
وأسأل الله العظيم لنا ولكم الثبات وأسأل الله الجنة إنه ولى ذلك والقادر عليه.
أستودعكم المولى وأترككم فى رعاية الله وحفظه.
سبحانك اللهم وبحمدك اشهد ان لا اله الا انت استغفرك واتوب اليك.
والسلام عليكم ورحمة الله وبركاته
>>>>> ردود الأعضـــــــــــــــــــاء على الموضوع <<<<<
==================================
__________________________________________________ __________
__________________________________________________ __________
__________________________________________________ __________
__________________________________________________ __________
رد مع اقتباس
