عنوان الموضوع : {ابشركم انخطبت }
مقدم من طرف منتديات نساء الجزائر

{ابشركم انخطبت }






كنت قاعدة عالتلفزيون .. متابعة مسلسل ..وجا مشهد زواج وحدة من الشخص اللي تحبه من زماااان .. قلبت القناة علي قناة ثانيه .. لقيت عرض أزياء فساتين عرايس .. قلبت القناة .. لقيت خطوات وضع مكياج العروس .. سكرت التلفزيون وجريت الونة " تنهيدة كبيرة " تشقق الصدر التفت على ابوي اللي نسيت تماما انه كان جنبي .. قال لي ابوي ; خير ان شاء الله يابنتي ؟!وش فيك ؟!عسى ماشر ؟! انا تلخطبت ساعتها وفتحت له التلفزيون وقعدت ساكته ... ايه اكيد بسكت وش اقول ؟ اقول له ودي أعرس؟؟؟{ يعني اتزوج بالعربي } اقول له ان صاحباتي اغلبهم تزوجوا ؟؟؟ والا أقول له اني تمنيت أكون مكان بنت خالي في كوشتها وفي الزفة أمس ؟ يقطع الدراسة وسنينها ياشيخ اوف والله عثا .. يابخت جداتنا ماتطق الوحدة العشر سنين الا هي مخطوبة .. وعلي الثنعش اعرست .. وان وصلت البنت عشرين سنه ماعرست قالوا عانس !!! هذوليك البنات اللي عايشين صح مب حنا اللي نعجز ونوصل سن اليأس مااعرسنا ... أخخخ .. يبه الله يفتح عليك وتخليني اعرس .. وتفكني من الدراسة .. وساعة انا غارقة في قاع هذي الهواجيس ويرن التلفون ويقطع حبل افكاري .. طالع الرقم ابوي وقال رقم غريب .. رد بلهجه رسميه : وعليكم السلام .. الله يسلمك ... الحمدالله بخير ... اية انا ابو فلانه {منيب قايلة لاحد عشان محد يعرفني ويضحك علي }... لامنت غلطان انا هو ... ماعليك زود الله يسلمك ... من معاي ياخوي ماعرفتك ... والنعم ... تفضل وش السالفه اللي تبيني فيها ؟ ... لاماني مشغول .. لها لدرجه الموضوع مهم ؟!... تفضل تكلم شغلتني ... والتفت ابوي علي وعطاني نظرة غريبة ... انا ساعتها قرصني قلبي مو من ردود ابوي بس من نظراته الغريبة .. رد ابوي علي المتصل : وش فيك زود طيب ؟.. لابس مافيها أي ميزات عن الباقي ... اقول في نفسي .. ودي ارجفك يبه واخد السماعة منك واكلم الرجال ناشر غسيلي حتي عند الرجاجيل .. رد ابوي علي المتصل : طيب وبعدين ... ايوه ... طيب وش اسمك الكامل ؟ وش تشتغل بالضبط ؟ طيب من دلك علي وعطاك رقمنا ؟ لاالموضوع ياابني مو بها البساطة .. العمليه مش بيع وشرى وبس ... الواحد لازم يسأل كثير ويحرص قبل يقدم علي أي خطوة ... لاموضوع انك تجي لبيتنا خليها بعدين ... لين أسال عن كل صغيرة وكبيرة ... لا لما اكتفي من السؤال وأخذالمعلومات اللي تكفي .. باتصل عليك تجي ونتفاهم ويكون خير ان شاء الله .. انا كنت اتابع حركات ابوي وانا متشققة من الفرحة .. أخيرا انخطبت وبتزوج مثلي مثل غيري .. يوووو أخيرا بلبس فستان أبيض منفوووووش أخيرا بطلع أجهز واتقضي للزواج .. بسوي زواج كبير مرررة وبحط زفة ريميكس وطرحتي مابيها خليجيه بخليها مبتكرة ... منيرة منيب عازمتها هي وخواتها .. ماعزموني الاسبوع اللي فات علي الدي جي اللي سووه .. وحصة صديقة امي منيب عازمتها بعد مطوعه مالي خلقها تحوسني لو حطيت اورج .. وبشتري أغراض واشيل واحط واخطط .. بيصدع راسي بس ولو لذيذ هالصداع .. يوم قفل الخط ابوي التفت علة وهو مبتسم ابتسامه تعجب وهو ساكت .. قلت : هاه يبه ؟ متي بيجي يشوفني ؟ _منهو _ هذا اللي خطبني توو _ وشو ؟ ! _ خطبني اللي تو " تموووونين انتي ووجهك صار خطيبك علي طول ماعندك وقت .. ايه يبه ترا احذرك هالمرة شف تكرش العريس .. مثل ماكرشت ولد ام مساعد العام الماضي . للحين تراها حازة في نفسي ترا هالمرة بضرب عن الدراسه .. والا الاكل مقدر اضرب عنه .. وجع يبه بعنس من تحت راس فعايلك بخطاطيبي .. والرسول صلي الله عليه وسلم حث علي تزويج من ترضون دينه وخلقه .. وهذا الخاطب قايل قلبي انه أجودي .. ترا مااعرفه بس اتوقع انه كذا .. وترا العرس أهم من الدراسة عشان الجنس البشري ماينقرض .. وبعدين من قال لك اني منيب مكملة دراستي والله بكمل . حسيت ان عيون ابوي بتطلع من شدة علامات التعجب اللي في وجهه .. بعدين انفجر من الضحك .وقال هي انتي وين رحتي .. حدك حدك لاتشطحين !!! وش اشطح ؟ هذي الحقيقة ماتزعل .. وانت الله يطول لنا بعمرك علمتنا علي الصراحه وحب الحقيقة . وقال أي عريس وأي هم ؟؟ !! انتي مصخنة ؟؟ هذا المتصل مندوب شركة يبي يجي يوريني المكنسة الكهربائية العجيبة علي قولته اللي تغسل وتنفخ ووتطبخ .. قومي نامي يابنتي .. ولاتكثرين قعدة قدام التلفزيون .. الحين بس عرفت ليه سكرتيه تو .. انا لاتسألون عن وجهي .. الله يقطع أم العجلة اللي تعرفونها ... مشكلتي اني أجزم علي طووول قبل أتاكد استروا ما واجهتوا النهــــــــــــــــــــــــــــــــــــــــاية

>>>>> ردود الأعضـــــــــــــــــــاء على الموضوع <<<<<
==================================



__________________________________________________ __________


__________________________________________________ __________


__________________________________________________ __________


__________________________________________________ __________