عنوان الموضوع : محشى ورق عنب للمبتدئات من مطبخ الشيف مونى بالصور أكلة سهلة
مقدم من طرف منتديات نساء الجزائر

محشى ورق عنب للمبتدئات من مطبخ الشيف مونى بالصور



السلام عليكم ورحمة الله
دى ايام ورق العنب فقلت استغل الفرصة دى واعمل محشى ورق عنب واخلى الموضوع ده للمبتدئات فى المحاشى
المكونات:
نصف كيلو ورق عنب
وللخلطة هنحتاج:
3 كوب ارز مصرى
7 طماطم
3 معالق كبار صلصة
2 حزمة كسبرة خضراء
حزمة بقدونس
حزمة شبت
ربع كوب زيت بصلة كبيرة
توابل الخلطة:
فلفل اسود-رشة شطة-بهارات-كمون-كسبرة ناشفة
وللتسوية هنحتاج:
2 كوب شوربة فراخ او لحمة
2 ملعقة كبيرة سمنة
الطريقة:
هنسلق الورق بعد مانوضبه ونشيل منه العناقيد ونستبعد الورق اللى مينفعش يتحشى
هنسلقه لمدة اقل من دقيقة عشان ميتقطعش معانا واحنا بنلفه وممكن ننزله فى مياه مغلية ونطلعه

لازم نسيبه يبرد خالص وممكن نحطه فى التلاجه وممكن نسلقه قبل الحشو بيوم وطبعا هنحطه فى مصفاة
وهنحضر الخلطة
هنبشر البصل ونحطه على النار مع الزيت ونقلبهم


وهنضرب الطماطم فى الخلاط ونصفيها ونحطها على البصل لما لونه يصفر لغاية ماتتسبك

هنطفى النار ونقطع الكسبرة والبقدونس والشبت ونحطهم على البصل والطماطم ونقلبهم


ونحط عليهم الرز بعد مانغسله كويس ومعاه التوابل

ونقلبهم كويس ونسيبهم يبردوا وكده الخلطة تبقى جاهزة

وخلطة المحشى دى هى اللى بنستخدمها فى مصر فى جميع أنواع المحاشى والممبار
وهنجيب اى ورقة من ورق العنب اللى سلقناه قبل كده والعروق الخشنة اللى فى الورقة هى اللى هتبقى مواجهة لينا وهنحط عليها الخلطة


ونحط فى اول الورقة كمية الخلطة المناسبة حسب حجم الورقة


وهنطوى جناب الورقة على الخلطة



وهنمسك الخلطة بالورقة ونضغط عليهم واحنا بنلف عشان المحشى يبقى متماسك

ونكمل لف


فيه طريقة تانية
هنحط الخلطة على الورقة زى قبل كده وهنطوى الأول الجزء اللى قبل الخلطة يعنى هيكون حوالى ربع الورقة

وهنطوى عليها الجناب


ونلف ونضغط واحنا بنلف عشان المحشى يبقى متماسك


ونكمل لف


مفيش فرق بين الطريقتين غير انكم تختاروا الأسهل بالنسبالكم
وفيه ناس مش بتلف على الطبق بتلف على ايديها طبعا اللى يريحكم
بالنسبة للحلة اللى هنرص فيها المحشى بنحب نحط فى القاعدة الورق اللى منفعش يتسلق وعيدان الورق عشان بيعطوا للطعم حموضة وفيه ناس بتحط بطاطس طبعا بردو اللى يريحكم

ونرص المحشى بشكل دائرى


ولازم نسيب مسافة فى الحلة من فوق عشان لسه هنحط الشوربة وحجم المحشى هيتضاعف
بالنسبة للسواء هنسخن الشوربة اللى هنسقى بيها المحشى وقبل مانحط الشوربة هنحط الحلة على النار وعلى وشها معلقتين كبار سمنة ونغطيها ونسيبها على النار لمدة 10 دقايق وبعد كده نحط الشوربة بعد ماتكون غليت وطبعا الشوربة هتغطى ورق العنب ونجيب طبق يكون على قد الحلة ونحطه فوق المحشى والخطوة دى مهمة لأن الطبق ده بيضغط الشوربة مع البخار ويخلى المحشى يستوى كويس

ونسيبه على نار هادية لغاية مايستوى وطبعا كل فترة هنختبر سواه
وممكن بعد مايستوى نعصر ليمونة على الوش بتعطى طعم حلو بس طبعا ده على حسب مانتو متعودين
وده الشكل النهائى


طبعا انا عارفة ان الكلام ده معظم الستات عارفينه بس زى ماقلتلكم فى البداية موضوعى للمبتدئات مش للمحترفات
وبالهنا والشفا

يارب موضوعى البسيط ده يكون عجبكم

>>>>> ردود الأعضـــــــــــــــــــاء على الموضوع <<<<<
==================================


شـكـرا ي متميزة


__________________________________________________ __________

يعطيك العافيه


__________________________________________________ __________

تسلم ايدك محشي لذيذ تم التقييم



__________________________________________________ __________

صحيح وبصراحة جوعة الله يعطيك العافية


__________________________________________________ __________

شرح رائع شيف موني
ما ننحرم من تواجدك بالقسم
فعلا الطريقة مفصلة للمبتدئات
وان شاء الله الكل يستفاد منها

احلى تقييم وخمس نجوم لعيونك