عنوان الموضوع : أّسفه ياحماتى لانى ظلمتك .. **
مقدم من طرف منتديات نساء الجزائر

أّسفه ياحماتى لانى ظلمتك .. **






أرجو التثبيت لما للموضوع من عبر وعظات



السلام عليكم ورحمه الله وبركاته

احبتى فى الله .. ربنا يبلغنا واياكم رمضان بكل فرحه ورحمه وحب وخير وبركه ورضا من الرحمن يارب

طبعا كل اللى متزوجين عندهم مشاكل زوجيه كذا شكل وكذا نوع ومفيش بيت بيخلى من النزاعات احيانا او المناوشات او حتى التصادمات
وهكذا انا طبعا حتى لو كان السبب فى النهايه سوء تفاهم لا اكثر

بعد فتره من الزواج وبعد معرفتى باهل زوجى اكتر وبعد مابقيت اهدى والامور بدئت تبقى اوضح وفكرت فى حاجات كنت بعملها لقتنى انى انا عملت حاجات تزعل يمكن اكتر مانا كنت بزعل من حاجات هما بيعملوها

هتقولولى ازاى هقولكم نصنف المشكلات اللى بتواجهنا الاول واقولكم حلتها ازاى

اولا كنت بتضايق لما حماتى تدخل عندى تفتح التلاجه وازعل جدا واتخانق مع زوجى واقوله ازاى تفتح التلاجه من غير اذنى واحنا معندنش ابدا حد يعمل حاجه زى دى وهيا كدا بتتدخل فى حياتى الشخصيه وعاوزه تعرف عندى ايه ودا مش من حقها

طبعا فيكم ستات بيحصل معاها نفس الشئ وبتضايق جدا وهتقولى انتى عندك حق تزعلى وزوجى الله يرضى عنه كان بيراضينى ويقولى متزعليش وطبعا هيا حست انى اتضايقت قللت جدا فى طلوعها عندى
وتدور الايام والاقيها رجعت تفتح التلاجه تانى وانا حامل واقول فى نفسى رجعنا للعاده دى تانى ربنا يتوب عليا بقى واتاريها كانت بتفتح التلاجه علشان تشوف عندى اكل ولالا فتروح تشترى لى وتقولى انا عارفه انك هتنكسفى تطلبى حاجه علشان كدا بفتح التلاجه واعرف اذا كان عندك اكل ولالا واذا كان عندك طيور فى الفريزر ولالا والاقيها لما لقت معنديش حاجه فى الفريزر من غير كلام بعتت لوحده جابت لى طيور مدبوحه ومتنضفه ومتكيسه وبعتت لى لحمه وخضار علشان لقت الفريزر عندى فاضى وانا مش من طبعى انى بطلب حاجه وزوجى مسافر

شوفتوا انا كنت بفكر فيها ازاى وهيا كانت بتعمل دا بقصد ايه ...


ثانيا كنت بتضايق لما حماتى تتصل بيا الصبح وتقولى انزلى اعملى الاكل معانا وكنت بقول هيا عارفه انى حامل وتعبانه وينام الصبح من التعب ليه يعنى لازم انزلوطبعا انا فضلت ييجى سنه مش برضى انزل اكل معاهم تحت وبعمل اكل لنفسى فوق مع ان زوجى بييجى يومين بس كل اسبوعين بس كنت بقول لو نزلت وعملت معاهم خلاص هيستعبدونى وكل شويه لازم اعمل علشان اكل لكن لوحدى محدش هيبص لى ولا يقولى عملتى او معملتيش

وكنت بنزل ضاربه البوز التمام ويادوب كل اللى بعمله مثلا انى اقشر البطاطس او انى اضرب الطماطم ورب الكعبه يابنات عمرى فى الفتره دى ماوقفت قدام بوتجاز ولا عملت طبيخ ولاعملت اى حاجه غير حاجات معينه انى اقطف الملوخيه او اقشر التوم او اقشر البطاطس او اضرب الطماطم فقط لا غير . ومع ذلك كنت بنزل وانا فى وشى غضب ربنا - الله يسامحنى - وكنت لما بنيجى ناكل اقوم واخده معلقه واحده واقوم علشان احسسهم ان اكلهم مش عاوزاه وياريت ميتصلوش بيا تانى لانى مش هاكل , وفضلت كدا كام مره واخر مره عملت معاهم ولما جم يحطوا الاكل والكل اتجمع روحت انا طالعه على شقتى وكلهم ينادوا عليا علشان اكل ويحلفوا عليا وانا قولتلهم لا مش هاكل وروحت طالعه , وطبعا بقى واضح انى مش عاوزه لا اعمل معاهم ولا اكل معاهم ومن وقتها لحد قبل مااولد وانا باكل مع نفسى

والاقى حماتى فى الاخر بعد ماخدنا على بعض قالتلى يابنتى انزلى كلى معانا تحت علشان توفرى فلوسك لنفسك لو عاوزه تشترى حاجه وكلى معانا وكمان يابنتى ليه تتعبى نفسك وتعملى اكل كل شويه وغسيل مواعين ووجع دماغ ماانتى تنزلى معانا واقعدى متعمليش حاجه بس يبقى شكلك قدام سلايفك انك موجوده علشان محدش يشيل فى قلبه زعل منك وهما مش عاوزينك تعملى حاجه بس تحسسيهم انهم مش خدامين وهما هيفرحوا لما يشوفوكى بس قاعده جنبهم وتاكلى براحتك من غير تعب ومن غير تكاليف

بردو شوفوا انا فكرت ايه وهيا مكنتش عاوزه تزعل حد منى ولا حد يشيل فى قلبه منى وعاوزانى متعبش واعمل اكل ولا اغسل مواعين وكمان اوفر فلوس الاكل اشترى بيها حاجه لنفسى واكل تحت من فلوسهم .


ثالثا : بردو فى الفتره دى كنت بكره كلمه انزلى اقعدى تحت شويه , كان دايما حمايا يتصل بيا ويقولى انزلى شويه وحماتى تتصل وتقولى منزلتيش ليه النهارده وكل ماحد يشوف وشى يقولى مبتنزليش وقاعده طول النهار لوحدك ومش بنشوفك وكل الكلام دا وانا كنت اتفرس واقولهم انا بحب اقعد لوحدى ياجماعه مش متضايقه واقول ياربى انا مش عارفه هما غاويين يضايقونى ليه وكل شويه انزلى انزلى وكنت بنزل اقعد الساعه اعدها ستين دقيقه وكل دقيقه ستين ثانيه وما اصدق حمايا يروح يصلى اطلع جرى علشان ميقوليش طيب اقعدى شويه واصدق التليفون يفصل شحن علشان اطلع اشحنه واقول لزوجى اقولهم انى مرتاحه كدا ومحدش يقولى انزلى
وكنت بنزل يمكن مره كل 3 ايام مثلا وكنت فعلا مش متضايقه يعنى كنت بتفرج على التليفزيون وافتح النت وانام واكل وخلاص هيا دى حياتى بين اربع حيطان

لحد ماجيت فى يوم نزلت ولقيتهم كلهم متجمعين وقعدين يضحكوا ويهزروا وقعدت معاهم واشركونى فى الكلام والتريقه والنكت والضحك وقاموا علموا حاجه حلوه وكلنا منها كلنا وجبنا حاجه ساقعه وشبسى ولب وقعدنا نتفرج على التليفزيون وحمايا راجل عنده ييجى سبعين سنه كنت انا قاعده وهوا من فرحته واقف جنبى عمال يتكلم معايا ويهزر معايا وعامل زى الطفل اللى لقى لعبه بيحيها وفرحان بيها

وقاللى يابنتى انا ببقى اقولك انزلى علشان انا بحبك وببقى نفسى اشوفك كل يوم وبزعل لما يبقى اخواتك تحت وسلايفك واولادهم وكلهم فرحانين مع بعض وانتى لوحدك فى شقه مقفوله فبخاف عليكى وبزعل انك لوحدك وببقى عاوزك تضحكى وتتفسحى معاهم وتاكلوا وتشربوا وتلعبوا مع بعض وكلمه منك على كلمه منهم هلتاقى نفسى اليوم خلص وانتى فرحانه معاهم

وفعلا بعد يومين من نزولى بقيت اقول امتى النهار ييجى علشان انزل اقعد معاهم وبقيت اول واحد تنزل تقول يلا نعمل الغدا وبقيت انزل كمان الساعه 7 الصبح علشان افطر معاهم ودلوقتى بقول فضولى سرير علشان انزل انا وابنى ننام تحت وزوجى مش موجود
والله اللمه حلوه والوقت حلو وبيعدى احلى واحلى وانتى بتضحكى وفلان يقول كلمه تضحكك وفلان يلاقيكى تعبانه يجرى يكشف عليكى وفلانه تلاقيكى زعلانه تطبطب عليكى
والله اخوات زوجى اللى تعمل لى شاى واللى تحكيلى عن حاجات حصلت وبتحصل ونضحك ونهرج واللى تفضفض معايا واللى ادخل انا وهيا نخترع اكله معرفش اسمها بس ناكلها علشان جعانين


انتظروا منى باقى المواقف فى المشاركات القادمه واسفه للاطاله ..
ارجو لو الموضوع عجبكم تقيموه يمكن يكون سبب فى اصلاح بيت وانقاذه من الخراب ,, جزاكم الله خيرا .


يـــتـــــــبع

>>>>> ردود الأعضـــــــــــــــــــاء على الموضوع <<<<<
==================================


عندى لسه مواقف كتييييييييييير بتحصل معايا ومع ناس كتير فى بيوت كتير بس للاسف مش بندى نفسنا فرصه اننا نفهم غيرنا او نحط نفسنا مكاننا
لكل ام انتى بكره تبقى حماه . اتقى الله فى زوجه ابنك او زوج بنتك
لكل بنت امك زى حماتك لان امك انجبتك وحماتك انجبت الرجل الوحيد اللى اتضيتيه زوج بالله عليكى اتقى الله فيها لانها ام مع عدوه
ام ربت ابنها وشقيت وسهرت وتعبت وخلته انسان عنده دين واخلاق ومستقبل علشان تجهزهولك انتى وتاخديه على الجاهز , وكانت عارفه انك هتاخديه ومع ذلك مزعلتش فبلاش تحسسيها انك ضيعت عمرها فى الهوا اصلك بكره هتبقى ام

لكل زوجه حطى نفسك مكان حماتك واللى ترضي ان زوجه ابنك تعمله فيكى اعمليه فى حماتك واعرفى ان الوحش بيترد قبل الحلو ودمعه العين هتترد لك ولو بعد حين وربنا يكفيكى شر عقاب حزن ام واحساسها بخيبه الامل والله ربنا ما يراه كدا ابدا وهتدفعى تمنه عاجلا وليس اجلا

لكل زوجه وام شايفه ان عذابها وافتراها عليها لحماتها بيديها متعه واحساس بالانتصار .. بكره اللى بتعمليه فى حماتك هيتعمل فى والدتك .

لكل واحده حسه انى بكتب كلام من الخيال والله والله احماتك فى الاول والاخر ام واللى هيعمل معروف مره على مره على مره هيتقابل بالمعروف واللى بحكيه مش نسيج خيال ومش اهل زوجى فقط لكن اهالى ازواجنا كلهم كدا ويمكن احنا الى مش شايفين او فاهمين صح

وطبعا فيه اختلاف كل موقف عن التانى وكل بيت عن التانى وكل حماه عن التانيه وعارفه ان ظروفى غير ظروفك لكن نبتغى من الله الاجر والثواب حتى لو هنعطى بلا مقابل .


انتظروا منى باقى المواقف فى المشاركات القادمه واسفه للاطاله ..
ارجو لو الموضوع عجبكم تقيموه يمكن يكون سبب فى اصلاح بيت وانقاذه من الخراب ,, جزاكم الله خيرا .


رابعا : كنت لما بروح عند اهلى وانا متزوجه فى محافظه تانيه بعيد عن اهلى وكنت لما بروح بقعد اسبوعين وساعات شهر سليم وهما بردو مكانوش بيقولوا حاجه ابدا مع انى من ساعه مااتجوزت وانا بقعد اسبوعين فى بيت زوجى واسبوعين فى بيت اهلى لحد ماحبيت بيت زوجى وبقيت اقعد شهر او شهر ونص واروح عند ماما اسبوعين مثلا وطبعا الكلام دا بعد حوالى 8 شهور جواز وهما والله ما نطقوا بكلمه مره ولا قالولى متروحيش ابدا

المهم لما كنت بروح عند اهلى كنت ساعات لما برجع الاقى حد كان عندى فى الشقه

اوباااااااااااااااااااا طبعا دى كارثه فى بيوت كتير ازاى حد يطلع شقتى وانا مش موجوده وطبعا مش هقولكم انى بهدلت الدنيا وازاى دا يحصل ودى مهزله وساعتها زوجى كلمها انه مينفعش حد يدخل الشقه من غير اذن صاحبتها وحماتى الله يباركلها تفهمت الموقف وقالت له عندك حق انا غلطانه
والمره اللى بعدها اتصلت تستأذن منى قبل ما حد يطلع فوق عندى مع انى لما شكيت لماما قالت لى بكل بساطه دى شقه ابنها اللى شقيوا وتعبوا علشان يعملوها وجيتى انتى بكل بساطه قولتى لها مش من حقك تطلعيها وهيا جت بكل اخلاق وقالت لك حاضر انا اسفه

قولتلها حاجتى تبوظ .. قالتلى اللى هيبوظ زوجك هيجيبلك غيره لانه فى بيته وهما مستحيل هيبقى هدفهم يبوظوا حاجه تعبوا فيها او يخربوا حاجه ابنهم

ومع انى فى الاول سافرت ومرضيتش حتى اسيب لهم نسخه مفتاح ويشاء الله ان الحنفيه تسيب فى الشقه وهما مش معاهم مفتاح وكان لازم يكسروا الباب علشان يدخلوا واضطروا ينزلوا اخو زوجى من الشباب علشان ميكسروش الباب وقفلوا الحنفيات

وساعتها حسيت انى صغيره اوى لانى مرضيتش اسيب لهم نسخه وهما حتى معتبونيش على كدا لكن نظره عيونهم بتقول لو كان معانا مفتاح كنا دخلنا من غير مانسمع الناس بينا ونجيب عامل يفتح الشباك والناس حوالينا يقولوا فى نفسهم دى خايفه على شقتها منهم

وبردو تدور الايام وابقى راجعه من عند ماما حامله هم ترويق الشقه اللى مليانه تراب ومش نضيفه واجى الاقى اخت زوجى بتقولى , ماما قالتلى اطلعى يابنتى نضفى الشقه لمرات اخوكى اصلها لسه والده وتعبانه .. قالتلى معليش احنا استخدمنا غسالتك وغسلنا فيها من غير اذانك

قولتلها لو استخدمتيها مليون مره هينقص منها ايه وكفايه انك نضفتيلى شقتى من غير حتى مااطلب .. وبعدها حماتى قالت لزوجى يابنى احنا كنا بندخل الشقه مش علشان عاوزين نزعل مراتك لكن علشان والدك كان عنده ضيوف وعاوز يستضيفهم فى شقه ابنه لانه فرحان بيها ومكنش ينفع اقوله لا واكسفه

وقتها فكرت شويه وقلت فيها ايه لما دخلوا الشقه واستضافوا فيها حد شرب كوبايه حاجه ساقعه او استعملوا حاجه فيها ورجعوها زى ماهيا طالما انهم حافظوا عليها ومبهدلوش حاجه ومتعدوش على خصوصيتى

وبعدها بقيت اقفل غرفه نومى واسيب الكفتاح عادى معاهم لاى ظرف طارق


فى يوم كنت معزومه عند واحده قريبتى ولقيتها مطلعه الطقم الصينى غارفه فيه فوالدتها قالت لها ,, ايه دا يامروه انتى مطلعه الطقم الصينى تستخدميه وتغرفوا فيه للضيوف ومش خايفه ينكسر .. قالتلها ياأمى على ايه اخاف الخوف دا كله على شويه اطباق , دا عمر الانسان بيخلص فى لحظه يبقى مش عاوزه عمر الاطباق يخلص ..

وقتها قولت لو انا كنت مت وانا مانعه حماتى تدخل شقتى ومنعاها تستعمل حاجه عندى ومحرمه على حد يدخل بيتى فى غيابى ورافضه اديهم كوبايه ولا طبق ولا هدوم زياده عندى وفجاه مت !!!!

انا بقى استفدت ايه من بيتى وشقتى وهدومى اللى خايفه عليها وعماله اكنز فيها

على راى اللى قال ( مال الكنزى للنزهى )

والله ياحبيباتى الدنيا ما تستاهل كل الحرص والخوف دا ,, ووالله انتى لو سبتيها لله هتلاقى اللى يروح يترد اضعاف , وياريت لو عندك حاجه زياده متبخليش بيها تساعدى حد او تهديها لاى حد محتاج اصل الدنيا مش محتاجه تكنيز . وكفايه نظره سعاده تغنيكى عن الدنيا واللى فيها وكفايه فرحه قلب انتى اسعدتيه . هتلاقى نفسك ملكتى الدنيا

معليش لو فيه حاجه مضايقاكى عديها ماهى الدنيا مش كلها حلوه ولا كلها وحشه .

امى قالتلى يابنتى انا كان عندى قد كدا عفش وقد كدا اطباق واطقم وشئ وشويات وكلها راحت . انتى شوفتينى قاعده بشحت . طبعا لا . اشتريت غيرهم وبقى عندى احسن من اللى كان

اوعى تبقى الماده عندك اغلى من الاشخاص واوعى تخافى على حاجاتك اوى لدرجه انها تبقى اغلى حاجه عندك . سواء اشياء ماديه او فلوس

خليكى دايما معطائه لان العطاء بيجلب حب وخليكى دايما حسنه الظن لان سوء الظن اخرته وحشه اوى عليكى قبل ما يكون على غيرك

عدى وفوتى وهونى على نفسك .
يتبع


__________________________________________________ __________

خامسا : على ذكر ذهابى لبيت اهلى .. انا بعد ولادتى روحت بيت اهلى وابنى عنده 10 ايام فقط وحماتى كانت زعلانه زعل عمرها انى ماشيه بالبيبى ولسه صغير وخايفه عليه من مواصلات خمس ساعات فى عز الحر

وانا وقتها اتضايقت جدا وزعلت انها قابلتنى مكشره وانا مسافره وقولت انا حقى اروح عند ماما هيا عاوزانى افضل قاعده عندها بس علشان بتحب البيبى طيب ماهى ماما بردو بتحبه وحقها تفرح بيه مع ان ماما كانت عندى وقعدت معايا اسبوع

المهم انى سافرت ومتصلتش بيها ولا مره وفضلت عند ماما حوالى 20 يوم ولما رجعت استقبلتنى احسن استقبال واثناء وجودى عند ماما هيا اللى اتصلت بيا وكانت بتطمن عليا

ولما رجعت اخت زوجى قالتلى ماما كانت زعلانه وانتى ماشيه علشان خايفه عليكى من الحسد انك تبقى والده وتسافرى فخافت لحسن حد يحسدك وتتعبى وبقت قاعده تدعيلك ربنا يحفظك ويحفظ ابنك

وهكذا هوا سوء الظن مع انها والله ماقالتلى ابدا متروحيش لكن كانت زعلانه بس ومكشره فى وشى مع انى والله كنت عاوزه اروح علشان بر امى واهلى اللى مقدروش ييجوا فى السبوع ومع انى فعلا كنت تعبانه اوى بس والله كنت بفكر فى غيرى وعلشان كدا ربنا حفظنا ( فالله خير حافظا وهوا ارحم الراحمين )

* انتى زعلانه علشان حماتك بتعاملك وحش . بكل بساطه انتى بتعاملى ربنا مش حماتك

* زعلانه انها بتميز بنتها عنك . على فكره ممكن والدتك تكون بتعمل نفس الشئ بس القلب بيغفر للام لكن مش بيغفر للحماه

* زعلانه انها بتدخل فى خصوصياتك مع زوجك . يبقى بكل ادب تحطى خطوط فاصله وحدود فى نطاق الادب
واوعى فى يوم تغلطى ويحملوكى غلطه او ياخدوا عليكى عتاب . انتى لازم تبقى واجهه مشرفه للبيت اللى انتى منه ولازم ترفعى راس اهلك وتربيتهم ليكى . اوعى باعمالك تهينى اهلك وتصغريهم وتوطى راسهم قدام الناس
استحملى علشان ترفعى راس اهلك واصلك
* اللى هتعمليه النهارده ومش هيتحسبلك او مش هيترد معروفك بكره هتلاقى ابنك بيرده وهتلاقى زوجه ابنك بترده ليكى بكل حب

* فاكره ان حياه الناس كلها ورود واحلام وضحك ولعب وحب تبقى غلطانه . كل بيت مقفول على اللى فيه . بس فيه ناس بتعرف تخبى وتظهر حياه متوازنه للناس . وناس تانيه للاسف متحبش الستر وتلاقيها فى كل كمكان مقضياها هرتله وتسويئ فى سمعه اهل زوجها

* اوعى تطلعى سرك ب را . اللى هتسمعك النهارده وتقول ياعينى انتى مظلومه . فى اول موقف بينكم واول زعله هتلاقى سرك على لسان الاشهاد والناس بتاخدك عبره وعظه . اتقى الله فى اهل بيتك واوعى تطلعى سرك لحد

* بلاش كل حاجه تحكيها لاهلك . امى كانت دايما تقولى النسب عامل زى اللبن الحليب لو اتعكر مش هيفى تانى ابدا . يعنى لو اشتكيتى مره لامك او اهل بيتك هتلاقى بعد كدا انتى وزوجك واهله اتصالحتكم لكن هما لسه شايلينها فى دماغهم ومش هينسوها . بلاش تزرعى الكره فى قلوب اهلك تجاه زوجك

* لو فاكره انى شخصيا حياتى وردى ومفيهاش مشاكل هقولك بردو غلطانه . بس لما بقارن بين المحاسن والمساوئ بلاقى المحاسن تغلب لانى عاوزاها تغلب . وطول مافى خير فى الانسان يبقى نغفر له هفواته وسقطاته يمكن عملها بدون قصد

* المشكله كل ماتكبر كل ما هيصعب حلها . اقفلى عليكى باب شقتك على مشاكلك ومتفتحيهاش وخلى كل كلامك مع زوجك فقط الا لو احتجتى نصيحه من شخص صاحب حكمه مش اى حد وخلاص

*اتقوا الله فى حياتكم واسئله العظيم الكريم ان يصلح ذات بيننا جميعا اللهم امين

يتبع


__________________________________________________ __________

هحكيلكم قصه عايشتها

جارتى ست كويسه جدا بس للاسف كانت ام زوجها قعيده وهيا مكنتش بتحب تنزل تخدمها لاهيا ولابناتها لا فى اقل الحدود وكانت بنتها هيا اللى بتخدمها
فكانت الست العجوزه ام الزوج تقعد طول اليوم تنادى باسم بنتها وتقول ( ياكريمه ) وطبعا دا بسبب مشكلات حصلت والزوجه مغفرتش للست حماتها ومحترمتش عجزها

المهم الست ماتت وابنها بنى بيت كبير وجمع فلوس بس للاسف اللى كان منغص عليه حياته انه عنده بنتين ومفيش ولد هيورث اللى تعب فيه

وطبعا كل اللى وصل له كان بمساعده مراته واتفق معاها يكتب لها شقه باسمها ويكتب الباقى للبنتين

وفضلت حياتهم قمه فى السعاده والنجاح بس بردو فضل جواه وسواس انه عاوز ولد

لحد ماقرر انه هيتجوز وفعلا اتجوز وقال لمراته انه اتجوز وهيجيب مراته فى الشقه بتاعته وانها لو مش عاجباها تتطلق وتمشى

قالتله انت كذا وكذ وكذا وفضلوا يتخانقوا لحد مقالها انه كمان مش هيكتب لها ولا هيديها اى حاجه

وقالها بكره بناتك هيتجوزوا وتقعدى لوحدك تقولى ( ياكريمه )

شوفتوا ان الموضوع دا هو اللى قسى قلبه ولو كانت اكرمت امه وراعت عجزها وشيخوختها وتناست المشكلات اللى كانت بينهم كان هوا دا اللى غفر لها عند زوجها

لكن والله ربنا ليردها ولو بعد حين

عاملوا ربنا سبحانه وتعالى فقط وارموا الدنيا كلها من ورا ضهركم . هتكسبوا ان شاء الله


قصه للعظه ...

قصة الحكيم والعقرب ....
جلس عجوز حكيم على ضفة نهر ..
وراح يتأمل في الجمال المحيط به ويتمتم بكلمات ..
وفجآة لمح عقرباً وقد وقع في الماء ..
وأخذ يتخبط محاولاً أن ينقذ نفسه من الغرق ؟!
قرر الرجل أن ينقذه ..
مدّ له يده فلسعه العقرب ..
سحب الرجل يده صارخاً من شدّة الألم ..
ولكن لم تمض سوى دقيقة واحدة حتى مدّ يده ثانية لينقذه ..
فلسعه العقرب ..
سحب يده مرة أخرى صارخاً من شدة الألم ..
وبعد دقيقة راح يحاول للمرة الثالثة ..
(ستقولون ما هذا الغباء الذي يتمتع به هذا الحكيم .. يعني حكيم وغبي!!)
على مقربة منه كان يجلس رجل آخر ويراقب ما يحدث ؟؟
فصرخ به الرجل: أيها الحكيم
لم تتعظ من المرة الأولى ولا من المرة الثانية ..
وها أنت تحاول إنقاذه للمرة الثالثة؟
لم يأبه الحكيم لتوبيخ الرجل ..
وظل يحاول حتى نجح في إنقاذ العقرب ..
ثم مشى باتجاه ذلك الرجل وربت على كتفه قائلاً:
يا بني .. من طبع العقرب أن "يلسع" ومن طبعي أن "أُحب وأعطف"
فلماذا تريدني أن أسمح لطبعه أن يتغلب على طبعي !!!
الحكمة
عَامِل النَاس بطبعِكْ لا بطباعهِمْ ،
مَهْمَا كَانوا ومهما تعدَدَت تصرفاتهمْ التيّ تجرحكْ
وتُؤلمكْ في بعضْ الأحيّان ،
ولا تَأبَه لتلكْ الأصْوَات التي تعتليّ طَالبة منكْ
أن تتْرك صفَاتكْ الحسنةْ لأن الطرفْ الآخرْ
لا يستحقْ تصرفَاتك النَبيلة ؟




* القصه دى انا سمعتها زمان بس حفظتها عن ظهر قلب
يعنى فيه ناس بتقول انها بتعمل وبتسوى لاهل زوجها بس مش بتلاقى المقابل
هقولك على حاجه
من حقك تزعلى ومن حقك تتمنى تشوفى تقدير ومن حقك تحسى بجرح لما يتقابل حسنك بسوء لكن لو خيرتك بين جزاء الدنيا وجزاء الاخره هتختارى ايه

طبعا هتقولى اختار الاخره بس كمان اتمنى تقدير فى الدنيا . هقولك انتى مقامك اكبر من اللى خد جزء من حقه فى الدنيا ويمك لما تعملى زى الحكيم فالعقرب يتخلى عن طبعه السئ ويتصف بطبع الحكيم الحسن

طيب لو متغيرش نقتله ؟؟ لا هنحتسب الاجر عند الله واللى عند ربنا والله ما بيروح وهتلاقيه مردود فى ابنك وبنتك وفى زوج بنتك وزوجه ابنك وربنا هيطرح البركه فيهم ويعوض جفاء الناس حنان فى قلب زوجك واولادك

جربى وهتتأكدى ^_^



__________________________________________________ __________

ررووووووووووووعه
جزاك الله خير
.
.
.
تم التقييم
تقبلي حبي


__________________________________________________ __________

تسلمي حبيبتي عالمرور العطر
وين المشاركات التانية