عنوان الموضوع : مشكلة جذرية مع زوجي.. لا اعرف ان كان علي الاستمرار حياة اسرية
مقدم من طرف منتديات نساء الجزائر

مشكلة جذرية مع زوجي.. لا اعرف ان كان علي الاستمرار






السلام عليكم و رحمة الله و بركاته

عسى الجميع بخير يا رب

في الحقيقة و بدون مقدمات عندي مشكلة جذرية مع زوجي.. و لازم اخذ بيها قرار حاسم لان صرت احس ان التفاهم و الاستمرار صار كل يوم اصعب من الثاني.. المشكلة اني ما عندي اي شخص ممكن استشيره و راسي وجعني من التفكير و الحيرة و صعوبة اتخاذ القرار

ففكرت اني اخذ راي السيدات الفاضلات الموجودات بهالمنتدى المميز .. عسى و لعل ان تسعفني وحدة منكن بحل

راح احاول اختصر قدر الامكان

من سنة تقدملي شخص,, هالشخص يعرفوه اهلي من 10 سنوات بس ولا مرة كنت مفكرة فيه و لا هوة كان مفكر فييه
انا ما كنت مفكرة فيه لان كنت صغيرة و بعدني بالمدرسة و هو اكبر مني ب 19 سنة و هو مو مفكر فيه لانه كان مو مفكر بالزواج من جهة و لاني اخت صديقة من جهة ثانية

المهم انا سافرت لدولة ثانية للدراسة و انقطعت الاخبار لمدة سبع سنوات .. بهالفترة انا كملت دراسة و هو تزوج و صار عندة بنت عمرها 3 سنوات و انفصل عن زوجته ..قبل سنة تقدملي و ما اعرف كيف وافقت عليه بالرغم من انه اقل من مستوى اهلي المادي و الاجتماعي و اكبر مني ب 19 سنة و مطلق و عنده بنت و مستواه المادي و العلمي و الاجتماعي اقل بكثير مني

يمكن اكثر شي خلاني اوافق عليه انه رجل رزن و موزون و واضح و حبني (على حد قوله)
و طلبت منه ان بنته تعيش معي و انا اربيها ...

بعد خطوبة سريعة جدا استمرت شهر واحد بس ... تزوجنا و رحنا شهر عسل.. الغريب بالموضوع انه صار بيناتنا نوع غريب من الالفة و المودة و التجانس و الانسجام خلال هالفترة القصيرة... و الامور كلها صارت على احسن ما يرام

شيئا فشيئا صارت الامور تتغير ... صار ما يسمح بشكل او باخر ان اتدخل بتربية بنته او توجيهها .. صار يتحسس اذا انا او اي احد من اهلي يتعامل ويا البنت باي شكل .. و صار يحاول يتعامل مع غيرة البنت بطريقة نتيجتها اني صرت مهمشة و كان راحتي او رضاي درجة ثانية...و كل ما مر الوقت صارت غيرة البنت اكبر و تصرفاتها اسوء و طلباتها مبالغ فيها جدا جدا جدا... و مع ذلك اني مطولة بالي لاني مقتنعة بفكرة انو اي بنت لابيها عاشقة .. و هذا موضوع الغيرة حا يلتغى شوي شوي و كمان علشان خاطر عيونه لانه طيب و محترم و مو غلطان بحقي.. بس تخميناتي كانت كلها خاطئة و جرت الامور بشكل عكسي تماما.. كما ان ام البنت صارت تطالب بالمحكمة بحضانة البنت و صارت مشاكل الها اول ما الها اخر.. و مع ان اهلي صارو مو مرتاحين كوني صرت محطوطة بظرف المحاكم و الشرطة معاه و هو يواجه طليقته ..

طولت بالي على وضعه المادي المتدني ومشاكله مع طليقته و مزاجيات بنته و ماضيه اللي مازالت ترسباته ماثره على حياتنه الحاضرة...

المشكلة الاكبر حاليا ... انه بعد كل هذا اكتشفت انه عنده مبلغ مجمعه على اساس للظروف الطارئة .. بس اللي بان انه طلع يخاف على فلوسة مني و حاطهم بحساب مصرفي انا ما اعرف عنه شي و اكتشفته بالصدفه.. و يوم ورا يوم صار يتعامل معاي كاني وحدة غريبة و اي شي مادي بهالبيت يخصة وحده هو و انا ما اعرف عنه اي شي و كمان انا ما الي اي صلاحيات باتخاذ اي قرارات الها علاقة بالماديات مهما كانت تافهة.. بالرغم من انه انسان مبذر بكل معنى الكلمة..

المشكلة الان انه قالها و بصراحة و اكثر من مرة انه فلوسه تخصه وحدة و انا ما الي علاقة فيها و ما من حقي حتى اسال او افتح الموضوع مع انه المبلغ على وشك يخلص على المحامي والمحاكم يللي بينه و بين طليقته .. بس فكرة انه ما عنده ثقة فيني بالرغم من كل المساعدات الماديه و المعنوية اللي انا و اهلي عملناها معاه هي فكرة مربكة بحد ذاتها

ما اعرف اذا انعدام ثقته فيني شي ينفع الاستمرار معاه ولا لاء.. علما اني حاولت ان اتركه كذا مرة و هو يتمسك فيني و يصر على انه ما يقدر بلاي
و اخيرا و ليس اخرا موضوع الثقة اتطور و صار انسان شكاك بشكل غريب .. حتى اذا اتفرج على فلمين لنفس البطل يصير يشك اني احب الممثل بشكل شخصي

صرت ما اقدر اخذ قرار من جهة اني اذا انفصلت مستحيل ارجع اعيش مع اهلي ..و اعيش انا و بنتي اللي عمرها شهر لحالنه ... و من جهة ثانية احس انه فعلا يحبني و مو رايد يتخلى عني .. و من جهة انا مو حابة اتخلى عنه و هو لسة بعز مشكلته مع طليقته و بنته ... بس الاهم من كل هذا اني احس بالاهانة كل ما اذكر انه ما يثق فيني و يستهتر برضاتي و راحتي النفسية ..

ملاحظة انه اهلي ما يعرفون اي شي عن اي تفصيلة من تفاصيل حياتنه بالبيت لان اعرف اهلي صعبين و لمجرد يشمون خبر راح يطالبون بانهاء الموضوع فوراااااااااا

ما تتخيلون يا سيداتي الفاضلات كم انا محتاجة احد يشور عليه

اسفة عالاطالة .. و مقدما ممنونة لكل من يعطيني رايه

>>>>> ردود الأعضـــــــــــــــــــاء على الموضوع <<<<<
==================================


حبيبتي الله يعينج بس اني من قريت رسالتج شفت ان زوجج فيه ايجابيات اكثر من السلبيات لان هو باين عليه يحبج وانت اكدتي هذا الشي بكلامج ..
ادعي من الله سبحانه وتعالى ان يهديه ويجمع بينكم دائما على خير وحاولي لا تفكرين هوايه بموضوع انو ما عنده ثقة بيج طبعا اني حاسه بيج بس احنا العراقيات مشكلتنا (اذا انت عراقية ) هوايه ندقق بالكلمة وندقق ورى الرجال صدكيني اني شفت وسمعت هواي مشاكل واطباع وخيانات من الزوج والزوجة المسكينة ساكتة ومتحملة لخاطر اطفالها .انت اصبري واتحملي واعذريه لان هو بعد الله يعينه على مشاكله ولازم انت توكفين وياه بهالظروف ..
الله يسعدكم ويهنيكم ..


__________________________________________________ __________

طيب شو كان سبب طلاقة من زوجته الاولى .


__________________________________________________ __________

شكرا حبيبتي درة عالرد ...
الايجابيات اللي بيه انه شخص طيب .. هذه الصفة الوحيدة اللي اقدر اجزمها فيه بالوقت الحاضر للاسف
لان تصرفاته مؤخرا وصلتني لمرحلة شك و اعادة تفكير بكلشي
حتى موضوع المحبة صار عندي شك فيه
المشكلة... اني صرت احس بخيبة امل خصوصا وانه مو باين بعينه كل اللي تحملته عشانه خلال هالسنه الماضية و هو مع ذلك يتصرف بهالطريقة المادية معاي.. صار صعب اتجاهل موضوع عدم الثقة و خوفه على فلوسه و على بنته مني.. اني تقريبا واصلة لقناعة اذا مافي ثقة ما في داعي للاستمرار
بس ما اعرف اذا صار لازم ادخل اهلي يحطوله حد لو لا

حبيبتي شروق رياض... شكرا على ردج
بس هو انسان كتوم جدا.. و كثير تفاصيل عن حياته قبل الزواج مو مكلمني عنها و كل ما اساله عن شي من هالقبيل يتوتر و يقول انه موضوع انتهى

نتيجة تصرفاته معاي صرت احس انه الموضوع صار يتعلق بالكرامة.. يعني لما الرجل ما يثق بقدرة زوجته انها تدير حياته باحسن شكل من كل النواحي.. ما اعتقد لازم تبقى على ذمته

بعدني محتارة


__________________________________________________ __________

صحيح يا بنات شي ثاني

صاير انسان بقمة اللامبالاة.. يعني ببساطة لو اقعد مقهورة اسبوع ما يهمه .. يتبع سياسة التطنيش حتى لو يشوفني باليوم ابكي 3 مرات و يكون هو سبب بكاي كمان ما يهمه او على الاقل يبين انه مو مهتم
و ما عنده استعداد يعمل اي شي لحتى اكون مرتاحة او رضيانه
!!!!!!!!!!!!!!!!!!!!!!!!


__________________________________________________ __________

الله يكون بعونك ويفرج همك الاهل اذا اتدخلوا بتكبر القصة واذا تصالحتوا رح تضل صورة زوجك القديمة حتى لو نسيتي انتي فشوفي انتي شو بيناسبك واذا ما عد حسنتي تعيشي معه بس حرام بنتك تعيش بعيدة عن ابوها واستخيري الله وادعي وحطي صورة البقرة بالبيت بتهدي النفوس كتير وانا جربتها