عنوان الموضوع : باركولي تزوجت !!! بس انهار طموحي وطاح فوق راسي خخخ -لحياة سعيدة
مقدم من طرف منتديات نساء الجزائر

باركولي تزوجت !!! بس انهار طموحي وطاح فوق راسي خخخ








--------------------------------------------------------------------------------

بسم الله الرحمن الرحيم والصلاة والسلام على اشرف الانبياء والمرسلين سيدنا ونبينا محمد عليه افضل الصلاة والتسليم
من يهده الله فهو المهتد ومن يضلل فلن تجد له ولياً مرشداً

اما بعد :d

ترا الموضوع طويل ويبي له نفس طويل للقرايه
ونفس قصير للرد << ياحبي لي ماابي اخليكم تطولون بالردود << لانك داري محد بيقرا هالمعلقة اصلن :d


ملابسي محذفة بكل مكان افصخ الهاف بغرفتي وتاخذه الشغاله وتغسله وتحطه بغرفة اخوي واللي عند اخوي يجيني بغرفتي
حالتي حالة واصبحت انسااان ملخبط لدرجة مزرية
حتى الغدا مااتهنى فيه، لأنهم يسوونه من الظهر وانا اطلع من العمل الساعة اربع العصر وماارجع البيت الا والرز صاير كتل متجمعة ومتراصة يبي لك مطرقة تضرب فيها الرز عشان تتفرق حبات الرز ويصير نثري بين الحبة والثانية مسافات واميال
ناهيك عن الدجاجة اللي كن المكرويف زعلان عليها ولا يوصل لها حراره
يجيك الرز نار الله الموقدة والدجاجة بااررردة
واشوا تجيني على الصحن مفصخة بدون بالطوو او جاكيت يدفيها :d

^
^
هذا كلام واحد بائس قاعد يشتكي لعجوزة
قالت له امه البيت مليان ولاحد اشتكى الا انت؟!!
تلايط واحمد النعمة وترا غيرك مووب لاقين هالنعمة اللي انت فيها

(إنا لله وإنا إليه راجعون ،، وش هالام اللي ماتفهم ذي)

يمه سمعتي بالبنت ذيك اللي تبي تعرس عشان تركب قدام ؟

قالت ايه شفيها
قلت انا مثلها :d
قالت :هوووو!!! شلون مثلها ياولدي
قلت ابي اتزوج عشان مايروح علي بدل الاثاث لانهم يفكرون انهم يلغونه وتراه مبلغ جامد يمه ويساعد الواحد بمصاريف العرس يعني بالعربي هذيك تبي تركب قدام وانا ابي بدل الاثاث :d

قالت الوالده اجل الحين الحين الحين اروح واشوف لك وحده تصبر عليك وتتقبل خشمك اللي كل ماله ويكبر مع إني سامعه ان الاذن هي الوحيده اللي مايوقف نموها عند الانسان مووب خشم اللهم ياكافي :d

انا شكيت انها تقصد شي ثاني غير خشمي
ويقالك مسوية اسقاط الوالدة بس هي شدراها عنه

ماعلينا ...

نسيت هالسالفة لاني قلتها بيوم كنت طفشان فيه وكنت اعاني من نقص مؤقت بالاحتياجات البشرية الاسرية مثل كوي الملابس والاكل اللي يفتح النفس واللي يكون مسوى ومخصص لك انت بس مووووب قدر ياكل منه الكل وحتى السواق والجيران يضربون بالخمس منه هذا بالاضافة الى بعض الاحتياجات السريرية :d

وبعد اسبوع جاتني الوالده وقالت ياولدي لقينا لك خووش مرة
حرمتن سنعة وخايفه ربها وكل الشباب اللي عندها بالماسن (بلوك)!!

قلت انعم واكرم هذي البنت السنعة اللي يتمناها كل شاب
بس عساني مااكون بلوك مع اللي بلكتهم
ويكون لي تجارب معها اون لاين قبل لانكون اون سرير :d

مين هذي يمه ؟ هذي منور بنت جارنا مطلق

ابوها رجالً عافً كاف وراعي صلاة وذكر وتراي سالت عنه وقالوا لي خوش رجال، قلت يمه عسى ماشر انتي ليه تسالين عنه المفروض هم يسألون عني ويطالعون وش انا من لحية عيني بعينك يمه، استحت امي ودريت انها قاطة العين على مطلق ومخليتني جسر عبور ومنور هي الضحية وشكل الوالده اللي بتطلع الجلاااد << خبركم عاد شغل الحماوات ههههههه

قلت للوالدة خلاص انا موافق بس ابي اشوفها قبل لانروح نخطب وترا هالشوفة مهيب محسوبة هذي بس عشان اجزم امري وأأكد الحجز وبعد ماانروح نطلبها رسمي ابي اشوفها شوفتن ثانية
نقز واحد من اخواني وقال انا عندي لها صورة بالجوال مرسلها لي واحد من العيال بلوتوث، انا طرت من الفرحة وقلت ورني اياها
صراحة البنت طالعه حلوه بالصورة بس مخرب عليها الولد اللي كانت معاه :d

مالكم بالطويلة

جهزت عمري وتهيأت نفسياً للروحة لبيت مطلق عشان اجس النبض واتأكد من امكانية القبول بي كزوج << اجل موظف ياجنط خخخخ
وبعدها اروح لهم الروحة الرسمية مع الاهل
كلمت واحد من الشباب يخاويني يقالك معاي حاشية تقف معي بالسراء وتنحاش بالضراء :d

انا كنت متحمس ومشتط وبحياتي مامريت بحالة مثل ذي، احس اني مستلج بدون لاآآكل ولا حبة وذلك بفعل الادريالين الذي يسري في عروقي فرحاً وبهجةً لدرجة إني خفت لاحد يشوف هالادريالين الفايض بدمي ويسوي لي تحليل وانشقل للمخدرات وانا على وجه عرس وزواج وتسدح وتبطح مع منور خصوصاً وإني عارف ان قبل بيتهم نقطة تفتيش

رحنا لهم انا والخوي وكنت لابس بشت من زود الحماس والشفاحة

وصلنا عند بيتهم ولبقنا ولاحظت ان بيتهم ماعنده الا سيارة وحده واللي هي سيارة مطلق، قال خويي ياولد خلهم يولون الظاهر ان سوقهم طايح ومافيه خطاطيب غيرك يعني واضحة ان البنت مهيب شي ولو فيها خير ماعافها الطير، قلت ياثور احسن شي ماتلقى احد قدامك ومافيه الا انت عشان تجلس على البست بسعر آآخر طاولة عند الجدار

طقينا الجرس وقال ترم ترم ترم ترم ترم << يامصلك

فتح مطلق وقال مرحبا ومسهلا ياهلا والله بالشيخ
ابرك الساعات ياشيخ انك شرفت بيتي اقلط اقلط المجلس قدامك
قلت شدعوه يابو منور أي شيخ واي بطيخ انا عبيّد ولا يغرك هالبشت وريحة العود قال والله احسبك امام المسجد لانه املط وانا مااشوفه الا من بعيد لاني اجي المسجد متأخر وقلت اكيد جاي ينصحني الشيخ

افا يابو منور طلعت من رواد الصفوف الاخيرة بالمسجد وانا كنت متعشم فيك خير وانك راعي صلاح ودين (ايييييييييييه الله يهديها الوالده عشان تقرب من مطلق حطته اطلق الناس وزين ماقالت امام المسجد الحرام مطلق) << تبون الصراحة يطلع من مرتادي الصفوف الاخيرة بالمسجد اشوا من مرتادي الحانات واماكن الخنا والفجور :d

المهم يابو منور انا طالبن القرب منك في بنتك منيرة ومنيب لاقي احسن منكم اناسبه ومنيب لاقي احسن منك جد لعيالي ومنيب لاقي اغبى من عيالك خوال لعيالي خلهم اذا قالوا (الصبي ان طاب طيبة من خواله وان تردى فاادر انهم خايبيني):d يصير على سنع المثل لاني واثق تمام الثقة من دلاخة عيالي وابي الزقها فيكم وفيه سبب ثاني جعلني افكر ببنتكم المصون منيرة
قال وشهو ؟ قلت سمعت بيت شعر لبندر بن سرور يقول فيه :

يابنت ياللي صوتوا لك بمنور ،، نادوك يامنور واسمك منيرة
لولا الجديل اللي على المتن منثور ،، ولا لريم الصيد صرتي خشيرة

التفت علي وقال سمعت الشاعر اللي يقول ياعبيّد كل تبن << افا يابو منور
قلت ايه قال اجل اكل عشاك وتوكل، افا يابو منووور اعتبرها طردة يعني ؟
قال لا مهيب طردة بس وين اهلك ماجوا معك وجايب معك هالزلابة ذا اللي لو تسأله الحين وتقوله وش عندك هنا قال مدري

تعال انت واهلك وابوك لايجي لاني ادري انه متوفي ولا يكلف الله نفساً الا وسعها (اقول بقلبي ايااا الهيس يامطلق ماضبطت لك السالفة الا ان الوالد متوفي) اذا جيتوا جيه رسمية اقدر اسأل البنت وامها وااخذ رايها مهوب سرسري وخويه جايين تقول رايحين تيوتا واحد بيشتري والثاني كفيل :d

رحت للوالده وعلمتها بالعلم وقلت لها ان مطلق يبيك تجين تخطبين البنت من امها وانا اقعد وياه بالمجلس نلعب بليستيشن

وافقت الوالده على استحياء ووجها ينطق ويقول مشتهية بس مستحية
قلت يمه وش سالفة اهلك صدززز ماتستحين الحين انا اللي بعرس على بنت مطلق والمفروض منيرة هي اللي تكون مستحية
انتي شدخلك عشان تبولعين بريقك وتصددين بعينك عني




يتبع

>>>>> ردود الأعضـــــــــــــــــــاء على الموضوع <<<<<
==================================


ياريت الكتابة تكون بالعربية ليس بالعامية كي نفهم

تقبلي مروري


__________________________________________________ __________

بانتظار البقيه ..................


__________________________________________________ __________

فى الانتظار على نار----------------------


__________________________________________________ __________

أين البقية؟؟؟
بانتظارك حبيبتي
تحياتي


__________________________________________________ __________

بصراحه من الآخر
بانتظار البقيه ....