عنوان الموضوع : ازاي نجهز حاجات البيبي لوانتي ام لاول مرة
مقدم من طرف منتديات نساء الجزائر

ازاي نجهز حاجات البيبي لوانتي ام لاول مرة



لسلام عليكم يا حلوين ان شاء الله انا هكتب الحاجات الاساسية اللي بنجبها لاول ولي عهد يعني نجهز شنطة البيبي ازاي
اولا: لازم تحطي فاعتبارك ان البيبي بيكبر بسرعة اوي يعني لما اجي اجيب لبس لازم اجيب مقاسات مريحة كبيرة شوية عشان مضطرش كل شوية اني انزل اجيب لبس عشان اللبس اللي عندي صغر
ثانيا :حطي فاعتبارك ان الالوان اللي هتجبيها يعني بلاش نكتر الوان فاتحة عشان بتتوسخ اوي وكمان ممكن تبقع وتبقي خسرتي القطعة يبقي الافضل اني اميل للالوان الغامقة مش اوي يعني بس مايكونش كله فاتح
وخللي بالك لازم لو جبتي الوان فاقعة زي الاحمر لازم تجربيها على ايدك الاول غسيل تشوفيها بترمي لون ولا لا عشان انا اتبهدلت بسبب الموضوع دة وهدوم جديدة خالص باظت وبهتت
ثالثا:كمية اللبس اللي بتجبيه بيتحدد على اساس ايه على اساس مواردك المادية وخروجاتك يعني بتخرجي كتير ولا قليل
رابعا:حاولي تكوني مقتصدة بمعني انك تجيبي حاجة تنفع بنت وولد عشان مش تاني بيبي تضطري انك تغيري كل اللبس وتجيبي غيره ....خلاص كدة احنا اتفقنا علي حاجات يالا بينا بقي
اولا اللبس بينقسم لاربع اقسام
اللبس الداخلي
اللبس الخارجي(لبس بيت،لبس خروج)
البافتات والمستلزمات الاخري(هنتكلم عليها ...)
الاغطية
المرفقات الاخرى
اولا:اللبس الداخلي ..بتجيبي ايه ...بصي
عدد 6 فانلة كت وياريت يكون عريض مش حمالة عشان ينفع ولد وبنت
عدد 6 فانلة نصف كم
عدد 6 فانلة كم
عدد6 بنطلونات داخلية
طيب واحدة هتسأل انا هجيب دة كله مرة واحدة الافضل عشان اللبس الداخلي بصراحة هو اللي بياخد فلوس كتير وهو الاساسي لكن الخروج والبيت ممكن واحدة واحدة على مهلي
طيب واحدة تانية هتقول المقاس اجيب مقاس ايه هقولك الافضل انك تجيبي مقاس سنة اول حاجة يعني متجبيش مقاس زيرو اللي هو حديث الولادة لان البيبي زى ما قولنا بيكبر بسرعة،طيب وحدة محندقة زي حالاتي هتقولي البيبي هيبقي اهبل وشكله مبهوأ هقولك لااااااا لان دة من جوة مش بيبان ....ماشي لحد كدة
طيب بالمرة بقا ايه الانواع الكويسة هقولك انا جربت بيبي جونيور حلو جميل اوي وسعره يعني مناسب ،وفيه بيبيى كوكا بس دة غالي وفيه نوع حلو اسمه فاني باني دة برضه جميل ....ماشي نخش بقا علي لبس البيت
شوفي بقا مش اقل من 6 قطع بردو طب نجبهم اية...اقولك
بيجامات،سلوبتات,جلاليب بيتي ودي لذيذة اوي وكميلة وانصحك بيها هي والسلوبتات لكن بلاش بيجامات في السن الصغير دة عشان ما تهريش في البيبي قلع ولبس
طيب المقاس اقولك لا هنا ماينفعش البس بيبي عندو يوم حاجة سنة لانها هتبقى فعلا مبهوأة اومال اجيب مقاس ايه 6 شهور يا قمر هيبقى مناسب وبردو اقول خدي بالك انه بيختلف من بيبي للتاني حسب النمو لكن ان شاء الله 6 شهور انا بنتي ما شاء الله كانت تختوخة وعملت معاها كدة والانواع بردو جونيور حلو وفاني باني وفي لومكس وياريت متكتريش عن ست قطع واعملي حسابك اللي داخلة تباركلك ممكن يكون معاها لبس عشان ميبقاش اوفر....ماشي
نيجي بقا للبس الخروج اجيب ايه بصي لحد تلات شهور البيبي مش هيلبس الا سلوبتات بعد كدة للبنت فساتين والولد قميص وبنطلون فا بردو لازم تعملي حسابك انك تجيبي لحد ست شهور يعني من زيرو لتلاته سلوبتات ومن 3ل6 حسب نوع البيبي ...ماشي طب اجيب كام قطعة دة بقا انتي حرة بس بردة اقولك رقم 6 يكسب
طيب في سؤال مايبفعش اجيب اللبس لاكتر من ست شهور ؟...الافضل لا، لان خلي بالك كل موسم صيف وشتاء اول سنة هتضطري تجيبي لبس يبقي ست شهور كويس...ماشي ايه تاني
البافتات هاتي اربعة 2 بيت و2 خروج او عوزة تزودي براحتك
طيب ايه تاني ....
عندك لازم تجيبي كاب عشان الحر
ولازم لكلوك للبرد
وشرابات بيت وخروج
ولو بنوتة يبقي كولونات
وممكن جوانتي بس دة يعني مش مهم اوي
وممكن الجزم الصغنونة دي بردو لذيذة وجميلة بس بعد3شهور
ماشي....بالنسبة للاغطية هتجيبي 3 لفات اتنين للبيت وواحدة للخروج
ولازم تجيبي بطانية بس دي للبيت ماتمشيش بيها في الشارع...اوعي ازعل منك
طيب ممكن اجيب لحاف؟... براحتك
طيب امشي في الشارع بأيه ....اقولك
في بطانية شيك اوي بتبقي عبارة عن لفة مقفولة من تحت وليها دراعات دي بتجبيها من اماكن زي سيف ستورز وأور كيدز ....ماشي كدة
في حاجة تاني خربتي بيت ابونا .....اه معلش بس الحاجات دي اختياري يعني براحتك زي اية ...اقولك
عجلة البييبي
شنطة البيبي(من رايي مش مهمة اوي لانك مش هتشيلي غيارات النونو كلها معاكي وبتغني عنها شنط اليد الحجم الكبير)
حمالة البيبي
المشاية
السرير(وانا من رايي لو عندك اوضة اطفال بلاش نيميه جنبك اريح وافضل لكن لو عايزاة لك حريه الاختيار)
طيب الاماكن منين اجيب حاجات بأسعر حلو اقولك بصي
التوحيد والنور حاجتة جميلة اوي والله
عندك ارت شيك في الجيزة
عندك سيف ستورز
اور كيدز
بعض محلات ملابس التصدير انا بقول بعض مش كل
طب لازم اجيب الحاجة غالية بصي انا من رايي ان الغالي تمنه فية لكن لو مش اقدر اجيب كله غالي اعمل ايه اجيب الحاجت اللي هتعيش معايا غالية زي ايه زي البس الداخلي والحمالة لو هتجبيها والشنطة بردو لو هتجبيها طب ايه الحاجت الماركات عندك انضف حاجات ديزني وشيكو ايطالي....بس كدة انا خلصت
ياريت متنسوش التقييم ويارب اكون افدتكم وتقوموا بالسلامة يارب

>>>>> ردود الأعضـــــــــــــــــــاء على الموضوع <<<<<
==================================




__________________________________________________ __________

المشاركة الأصلية كتبت بواسطة ريحان الشام

اشكرك علي التقييم حبيبتي


__________________________________________________ __________

يعطيكي العافيه بس ياليتك حطيتي صور للعجازات الي مثلي لوووووول

مشكووورة حبيبتي


__________________________________________________ __________

بارك الله فيكي


__________________________________________________ __________