عنوان الموضوع : قصة حملي وولادتي بتوأمي الغالي - للحمل و الولادة
مقدم من طرف منتديات نساء الجزائر

قصة حملي وولادتي بتوأمي الغالي



هذا اول موضوع لي في المنتدى وحبيت انه يكون عن
حبايب قلبي أطفالي وعن حملي وودلاتي فيهم .

تزوجت العام قبل الماضي والله سبحانه أراد انه يكون حملي بنفس الشهر إلي تزوجت فيه . بدأت معاي أعراض الحمل بوقت مبكر قبل موعد الدورة بإسبوع وشوي . كانت الأعراض دوووخة فضيييعة كنت أحس الدنيا ظلام وتفتر فيني وأنا واقفة وأنا قاعدة وأنا نايمة مافارقتني الدوخة وبديت احس بالتعب والارهاق من أقل مجهود كان وقتها بداية شهر رمضان وكنت اتعب واضطر افطر . وحسيت بروحي حامل وقبل موعد الدورة بيوم شريت تحليل حمل وحللت ويا مسرع ماطلعوا الخطين وااااضحين . شعوري وقتها منصدمة على مو مصدقة لأنه كنا مجهزين نفسنا عالسفر بعد رمضان في رحلة شهر العسل والحمل فاجأني وخلاني أعيد حسابتي . واذكر بعد ماطلعوا الخطين كتبت لزوجي عالواتساب أنا حامل مع الفييس المصدوم . وهو رد علي بالفيس الفرحان لأنه كان شاك من اول مابدت علي الأعراض . وقتها كان بالدوام ورجع البيت فرحان وقال لي السفر يتعوض اهم شي صحتك انتي والبيبي . وبعد موعد الدورة بإسبوع بدأ الأكشن الوححححححم وآآآه من الوحم كان صعب كل ما آكل شي استفرغه وانتو بكرامة حتى الماي ما كنت أطيق ريحته وبداية الشهر الثاني كنت قاعدة ارتب شوي في البيت وحسيت شي دافي نزل مني خفت وركضت عالحمام والا اجوف دم . خفت وارتعبت وقعدت ابكي وركضت عالتلفون وكلمت امي الله يخليها لي وقلت لها أجهضت طاح البيبي . وهي مسكينة قامت تصيح وتصارخ شلون وهاوشتني لاني ماكنت مريحة نفسي . وكلمت اختي وخبرتها وكلمت زوجي كان بالدوام وطلع وجاني البيت ورحنا المستشفى وبالطريق انا حالتي النفسية زفت وكل شوي اختي تتصل تبي تعرف وصلنا المستشفى وشنو قالوا لنا . المهم وصلنا المستشفى وخبرنا الدكتورة بالموضوع وقالت بتسوي ألتراساوند ونمت عالسرير وحطت الجهاز وأنا دقات قلبي وقتها حسيتها مسموعة للكل وكنت خايفة وفجأة تصرخ الدكتورة وتقول توأاااام . انا انصدمت وطالعت زوجي كان منصدم بعد شي ماكان عالبال . سألها زوجي اثنينهم حيين قالت اي . وسمعتنا النبض فرحت وخفت بنفس الوقت . طلبت منها ربط قالت ما تحتاجين حالتك بدون ربط افضل . وطبعا خليت الموضوع سر لانه امي من النوع الي تخاف وتحاتي خفت عليها من التفكير علي . ومرت الايام وصادني نزيف ثاني وطيران عالمستشفى وقالت الدكتورة هالشي طبيعي بحمل التوأم بس في حالتي كان لازمني الرااااحة التامة . وضاقت فيني الدنيا ورحت قعدت عند امي لا حركة ولاقومة ولا قعدة ولا طلعة . قلت كلشي يهون وحبايب ماما ما يصيدهم شي . ومرت الأشهر ودخلت الشهر الرابع ورحت موعدي وأنا فرحانة عشان اعرف جنس الأجنة . تمنيتهم توأم بنات اموت في البنات . لكن الدكتور اكد لي انهم توأم اولاد . حمدت ربي وقلت كل شي من رب العالمين خير. مرت الشهور وزاد الثقل والتعب وضيق النفس . بالنوم لازم مخدتين كبار عند ظهري ووحده بين رجليني ووحدة تحت القدم عشان ارفعها . كانت حالتي صعبة بس الحمدلله اهون من غيري حوامل الثلاثة توائم وأكثر . كنت خايفة من الولادة المبكرة بس الحمدلله من دخلت السابع خف القلق . وعلى نهاية الثامن بدى معاي طلق خفيف وقالت الدكتورة اذا تبين تولدين بنولدك وحددت لي موعد الولادة القيصرية على اساس ان راس البيبي الاول كان فوق . بس انا ماوافقت لاني خفت عليهم من الحضانة قلت بتحمل الطلق دامنه خفيف. ومرت الايام ودخلت التاسع ونزل راس البيبي وصاروا الراسين تحت . وبأول اسبوع من التاسع صحيت من نومي ورحت عالحمام وفجأة وأنا عند باب الحمام حسيت بشي دافي يتدفق وشفته كان ماي وعرفت انه ماي الجنين وبكل هدوء دخلت أخذت دوش وجهزت الشنطة وجهزت نفسي والالم كان خفيف لانه كان ملازمني من نهاية الثامن نفس ماخبرتكم . وصل زوجي من الدوام ونسيت اخبركم اني من دخلت التاسع رجعت بيتي عشان اولد بعيد عن امي لاني مثل ماخبرتكم تخاف من هالمواقف . المهم رجع زوجي من الدوام وكان توه بيرتاح قلت لا تقعد بنروح المستشفى . قالي ليش . قلت له بولد . وركبنا السيارة وبدأ الطلق الحقيقي في السيارة . ووصلنا ودخلنا وجات الممرضة وكشفت جافت الرحم فاتح واحد سانتي . وحطت علي جهاز التخطيط وجات الدكتورة وشافت الطلق قووووي جدا والغريبة انه الرحم مو راضي ينفتح أكثر . قررت الدكتورة ولادة قيصرية لانه قالت ان الماي قل عالاجنة والنبض قاعد يقل ولأنهم توأم لازم نسرع بالولادة . تضايقت والدنيا لفت فيني قيصرية ما ابيها لااااا . بس وافقت عشان خاطر اجنتي لا يصيدهم شي . دخل زوجي عشان يوقع على اوراق العملية ويسأني اوقع؟ قلت له اي خلصني . ووقع . وجات الممرضة شالت عني جهاز التخطيط وانا اصرخ من الم الطلق وحطت لي القسطرة كانت مؤلمة . واخذوني على غرفة العمليات وجا دكتور التخدير وعطاني ابرة الظهر التخدير النصفي . وبدأت العملية كنت اسمع اصوات المقصات وكنت خايفة . ودكتور التخدير كان على راسي ويشوف العملية ويقول لي التفاصيل هههه .وفجأة قال الحين طلع الولد الاول وبعده طلعت البنت . انا فرحت جدا . اقول له متأكد بنت قال اي بنت . قلت له ما سمعت صوتهم ليش ما يصيحون . قال الحين بنظفونهم وبجيبينهم لك وبتشوفينهم وبتسمعي صوتهم . وفعلا بعد شوي سمعت صوت بكاء . وقال لي الدكتور سمعتي صوتهم؟ فرحتي؟ قلت له اي الحمدلله وجابوهم لي وبستهم بخدهم . وكنت فرحانة بسلامتهم . وكملوا لي العملية وطلعوني من غرفة العمليات وكل الي كانوا بالممر كانو يباركو لي وماكنت اعرف احد فيهم هههههه . وكلمت امي واختي واصدقائي وخبرتهم بولادة توأمي الغالي وكانت مفاجأة للجميع اني جبت توأم . وكانت مفاجأة من رب العالمين لي ان جبت بنوتة . الله جبر بخاطري ماعطاني بنوتتين بس كتب لي وحدة الحمدلله . ادري انه موضوعي مخربط بس اعذروني هذا اول موضوع بحياتي انزله . واتمنى ما اكون مللتكم بموضوعي وان شاء الله يعجبكم . وتوأمي عمرهم سنة الحين ربي يحفظهم ويخفظ اولادكم .

>>>>> ردود الأعضـــــــــــــــــــاء على الموضوع <<<<<
==================================


ربنا يخليهملك ويصونهم ان شاء الله
بالتوفيق


__________________________________________________ __________

الله يخليلك ياهم وتفرحي فيهم وهمة دكاترة وعرسان يا رب
وادعيلي الله يبعتلي بنصيبي ويشفيني


__________________________________________________ __________

ماشاء الله قصة رووعة ربي يحفظهم ويحماهم وتخاويهم يارب


__________________________________________________ __________

مشاء الله
الله يحفظهم لك ويرزق كل من تتمنى


__________________________________________________ __________

ماشاءالله ربي يحفضهم ويحميه ويخليهم لك وبالعكس قصتك حلوه ومشوقه