عنوان الموضوع : رجعتلكم بقصة حملي ولادتي ببنتي ساره
مقدم من طرف منتديات نساء الجزائر

رجعتلكم بقصة حملي ولادتي ببنتي ساره



بسم الله الرحمن الرحيم ...
رجعتلكم بدي احكيلكم قصه حملي ولادتي بالتفصيل بحبيبتي ساره الله يحفظها إلي .......
قبل الحمل والصدمات :
بدايه زواجي وحتى قبل زواجي كان شبح اني ما كون ام مرافقني ، وهاذ الشبح كان وراي من بدايه بلوغي لانه دورتي مش منتظمه ابدا يعني شهر تجي وشهر شهرين ما تجي ، طبعا حتى لما كنت صغيره امي الله يسامحها ما عرضتني ع دكتوره ، طبعا بس كبرت وصرت بالجامعه قررت راجع دكتوره لحالي وفعلا راجعت وحكت انو اموري طبيعيه بس غريب ما بتجي كل شهر ونبهت انه ممكن يكون وراثه بالموضوع وانه ما في داعي للقلق لانه رح احمل ع طول ، بقى هﻷ انه اتزوج مشان اعرف وفعلا خطبت وخبرت ابو الشباب بمشكلتي قبل الخطبه لحتى لو ما حملت ما كون ظلمته معي ، وفعلا اعتبر الحمل والذريه رزقه من رب العالمين وانه ما اقلق بالنسبة للموضوع ، وفعلا تم الزواج لكن قبل زواجي الدورة من 3 شهور ما إجت إلا اخذت حبوب تنزيل إله قبل عريسي باسبوع ، وبعد الزواج الدورة تاخرت علي تقريبا شهر ونص وما احكي شو النفسيه لانه مرضت اول زواجي واضطر اعمل فحص حمل منزلي كل اسبوع ( التهابات مسالك بوليه ورشح وفلونزا وغير الصداع ) يعني كنت خاف اخذ حبوب طول الوقت ولازم اعمل فحص كل اسبوع يعني عدم انتظامها عذبني ، بالاخير اخذت موعد عند الدكتورة فداء ذكر الله بمستشفى الجامعه الاردنية وصدف عندي الدورة وكانت خامس يوم ، لما راجعت حكت إلي في شي بالرحم عندك واحتمال كبير تكيسات ويمكن يكون هوا وطلبت اعمل فحوصات ع الدورة الجاي ، انا طلعت من العياده منهاره شو بدي احكي لزوجي طلعت والدمعه بعيني ومكسوره لانه العلاج رح يكون صعب إلي بعد زواجي نقلت ع محافظه جديده وهي العاصمه عمان يا ويلي رح ضيع بعمان ومين بدو يساعدني ، اهلي واهل زوجي بمحافظه ثانيه بالجنوب ....
يتبع ......

>>>>> ردود الأعضـــــــــــــــــــاء على الموضوع <<<<<
==================================


تلقي خبر حملي :
طبعا طلعت من عند الدكتورة بعالم ثاني لكن شي بعقلي حكالي بس اوصل البيت انسي كلام الدكتوره وتوكلي ع الله واكيد ما رح ينساني بغربتي ، وفعلا نظفت من الدورة وبلشت من جديد وما يئست من حكي الدكتوره نسيته تماما بفضل رب العالمين ، وكان عندي يقين واحساس اني رح احمل لانه طول عمري ما صار معي مثل ما صار بعد هذيك الدورة ، ايام التبويض عندي كانت فضيعه افرازات كثيرة ولزجه لاول مره يصير معي هيك حسيت انه انا بفتره تبيويض وفعلا كنت كل يوم يصير جماع وظلي نص ساعه ع ظهري مش بسرعه اغتسل ، ومر شهر كامل واجى موعد الدورة الجاي يعني كان في احتمال ما تجي وظليت راقب وضعي وقبل موعدها باسبوع صرت حس بوغزات يعني بدها تجي ومر موعد ولسا ما إجت بس اعرضها موجوده وقررت اعمل فحص منزلي بعد 3 ايام من تاخيرها ، وبنفس اليوم إلي كنت بدي اعمل التحليل ما نمت كنت خايفه وطول الليل ببكي ، يالله شو شعوري كان وقتها كنت تعبانه خايفه من الفحص ، خايفه انصدم رغم احساسي ويقيني اني حامل خفت اقضي ع حلم حتى لو كان كذب حبيت عيش معه لو شوي زياده قبل لا اتحطم لكن زوجي اصر ع اعمل فحص منزلي ، وفعلا اجى الصبح وانا مش نايمه بدي اعمله وكنت حس بدوخه من الخوف والتعب لانه طول الليل سهرانه ، وعملته ع الساعه 7:15 الصبح تاريخ 18/6/2013 وهون كانت الصدمه طلع خطين ، يالله شو شعوري وقتها صرت ابكي من الفرحه مثل الاطفال رحله العلاج الطويله إلي خفت منها تلاشت بدي كون ام معقول شبح الطفوله راح اخ يا دنيا ، الحمد لله رب العالمين ع هذيك النعمه والله يرزق جميع المتمنين الذريه الصالحه ، طبعا زوجي ما صدق وطار من الفرحه ، وسبحان الله قبل اعمل الفحص بيومين عملت تعزيل للبيت رفعت الكنب والمرس والسجاد يعني الله سلم إلي ببطني ، طبعا رحت لدكتوره ع موعدي وحكيت إلها شو صار معي بس ما صدقت ابدا واخذتني من ايدي وحطتني ع الجهاز وبين معها كيس الحمل والجنين ، بجد كانت اسعد لحظه بحياتي ، وطبعا حكينا ل اهلنا بدو يجيكم حفيد جديد ، طبعا جنوني بسؤال علما حملت بعد شهر ونص من الزواج يعني لو تأخرت شو بيصير في ....
يتبع .......


__________________________________________________ __________

مرحله حملي ومعاناتي :
طبعا لما شافتني الدكتورة ع الجهاز كنت بالاسبوع الخامس يعني ببدايه الشهر الثاني وكنت مبسوطه انه ما في وحم كنت هيك متوقعه ، إلا بلشت الصدمه بلش الوحم معي من نهايه الثاني وتقريبا استمر لنهايه حملي ، اخ شو احكي كنت شم لبيتي ريحته الخاصه ما حبه ابدا ابدا وبصراحه قصرت كثير من ناحيه شغل يعني كنت ما نظف الجلي إلي بعد يومين ما لازم شم ريحت اكل ، بالنسبة للأكل ما حب ولا اكله ابدا وكمان الدجاج ما اكلته طول حملي علما كنت حبه صراحه كرهت كل الاكل ومن كرهي إله صرت ولا كاني بحياتي طبخت سبحان الله بجد زوجي صبر علي كثير ، تقريبا ما حبيت شي إلا ورق العنب والمحاشي طول حملي ، عفت الشاي القهوه بس اشمهم بصير بعالم ثاني وطول تقريبا اربع الشهور الاولى ما عملت شاي بالبيت تخيلو بس كنت نام كان زوجي يعمل قهوه ويا ويلي بعز النومه اصحى من ريحتها وعصب عليه ، ههههههه، والمشكله عز الوحم إجى برمضان يعني انا ما عشت رمضان الماضي بكامل طقوسه صمته كامل إلا يومين افطرت فيه ، وكنت يوم اعمل اكله يوم لا وكنت تقريبا عايشه ع اللبن والسلطة واحاول نام بعد صلاه العشى حتى ما استفرغ ، وطبعا زوجي لآخر شهر بالحمل كان لو يتعطر بعطور الدنيا كلها ، مستحيل إله ريحه خاصه شمها بالبيت وع مخدته سبحان الله كنت اقرفها واقرف منه و بمجرد ما خلفت اختفت، العلاقه الجنسية كرهتها بالحمل إلا بالشهر التاسع تغير الوضع للافضل ، يعني بحملي ما ساندني حدا اهلينا بعاد عنا ،كل المسؤوليه علي زوجي يرجع تعبان وكان قرفان العزوبيه وهو عاش 6 سنين عزابي لحاله يغسل ويطبخ وما صدق يتزوج ليرتاح مش ليرجع يخدم عليه ، هو فقط تحملني بجد الله يخليه يا رب ، تقريبا ع نهايه الرابع خف الوحم بس ما انتهى ، تعبت اكثر شي بالشهر السابع لانه ضربتتي لفحه هوا بظهري موتتني ....
يتبع .....


__________________________________________________ __________

الشهر التاسع من الحمل والولاده :
طبعا مرت الشهور بسرعه إلا وصلت بالشهر التاسع وبلشت حدد وين بدي اولد ، تقريبا ل شهر التاسع الاسبوع الثاني منه وانا براجع عند الدكتورة فداء بمستشفى الجامعه وهي بجد كثير شاطرة ورائعه جدا بس حكوا إلي هي مش رح تولدني المقيمين هما إلي بيولدوا ، لذلك قررت شوف دكتورة خاصه وناس مدح لزوجي الدكتورة سمر الحلواني بالبيادر هي ، وفعلا راجعت عندها بجد قمه الرقي بالتعامل كانت رائعه وكثير كثير شاطرة وتعامها مثل العسل ومريحه بالتعامل صراحه ندمت انه ما كنت عندها من الاول وفعلا اول مراجعه كان تعارف وطمنتني عالبيبي وإجى وقت المراجعه الثانيه وهون كانت الصدمه كان باقي اسبوع ع موعد ولادتي لكن البيبي وين البيبي فوق فوق مرتفع راسه ل تحت بس مش بالحوض ،حكتلي بدك تشتغلي ع حالك تمر وجماع ومشي ل ينزل ولا كأني بالتاسع كنت وانا بكريه مش عارفه شي يعني بالمره ما كان يجيني تحاسيس واوجاع نهائي بعد ما ولدت بس شوف ناس بالتاسع بجد غير عني تماما ما نزلت البنوته لذلك ما حسيت بوجع نهائي ، طبعا حكي الدكتورة كان 16/2/2014 وحكتلي معك وقت وسوائل منيحه ع البيبي بس إذا بظل وضعك هيك قيضريه ، بس انا طمنت انه سوائل منيحه معي وقت يعني ، وهذاك اليوم طلعني زوجي مشي من الدوار الثامن لعند حدائق الحسين تقريبا مشيت 4كيلو من الصدمه بصراحه خفت حكت إلي الخيار وين يعني شو قيصريه ما هو راسها تحت ، صح تحت بس مش نازل بالحوض ،وثاني يوم صرت العب تمارين اوقف واقعد ولاول مره بحملي صلي وانا واقفه إلا وميه الراس نزلت مني وانا بصلي ، ما بعرف بس حسيت انه تمارين غلط ، وكمان وانا بصلي وانا ساجده بالتحديد ضغط ع بطني يمكن ل هيك طقت ميه الراس طول حملي كنت صلي ع كرسي ، سبحان الله حان موعد ولادتي ، رحت ع مستشفى الخاص اول ما شافتني الممرضه يا الله شو شاطرة علقت ع بطني وحكت مرتفع احتمال قيصريه ، طبعا انا بضحك وزوجي متوتر خايف يستنى اصرخ وانا ولا حاسه بشي ابدا غير انه بحر وفتح عندي والمي بتنزل بجد سوائل كثيره ما شاء الله كان ع البيبي ، وطبعا اتفقنا مع الدكتوره إذا عمليه ما رح نعملها بخاص وإذا طبيعي رح اولد بالخاص لانه تكاليف العمليه كثيره ، وشاء القدر ارجع ع مشفى الجامعه ودخلوني من 2 الظهر وحطولي طلق صناعي وظل في ل ساعه 2 بس ما جاب نتيجه وما في توسع والاخت إلي ببطني عملت كاكا بالاخر ونبض بلش يقل ، طبعا الفحص الداخلي مع الطلق اكثر شي صعب بولادتي الفحص الداخلي ، هون قررولي عمليه طبعا انا اخترت نصفي وعشت جميع الاجواء بغرفه العمليات وهون شفت حبيبتي ساره اول ما طلعت مني يا الله ما كنت حس بشي من ابر إلي اخذتها كنت حس حال بحلم ، دخلت ع ساعه 2 وطلعت ع ساعه 3 من العمليه وخلوني ع المراقبه ساعتين بعدين طلعوني بغرفتي ، بجد تعاملهم جميعا كان رائع طول وقت التحريض كان يعملوا الفحص دكتورات مش دكاترة ، بالعمليه دخل معي دكتورتين و3 دكاترة وممرضه كانت عمليه رائعه وسهله جدا ، العنايه رائعه جدا ، اول ما طلعت ع غرفتي جابولي ساره وحطوها ع صدري ، ومباشره بلشت شرب سوائل وجابولي الفطور ، بجد الحمد لله ولاده سهله والحمد لله انه اخترت بنج نصفي ، وطبعا عرف الكل اني خلفت بعد ما طلعت من العمليه ، وطبعا هاي اكثر لحظة حقيرة لانها بعدت عني الاحباب بعز الحاجه إلهم هي الغربه ....
وهاي هي نهايه قصتي بعرف انه طولت عليكم وبتمنى انكم تقييموني .....


__________________________________________________ __________



__________________________________________________ __________

حبيبتي

حمدا لله على سلامتك واجر وعافية على كل الي عانيتي منه في حملك والله يعين زوجك المسكين .

مبروووك عليكم سارة وربي يحفظها ويبارك فيها .

الحمدلله انت مو في غربة ما دامك في بلدك

انا ولدت اولادي 2 وعملت عمليتين وانا في بلد واهلي في بلد والحمدلله

ودي وتقييمي لك عزيزتي