عنوان الموضوع : الحقن المجهري : سحب و ترجيع الاجنة و الاعراض بعدها part2 -للحوامل
مقدم من طرف منتديات نساء الجزائر

الحقن المجهري : سحب و ترجيع الاجنة و الاعراض بعدها part2



السام عليكم مرة تانية و هي تتمة قصتي و انشالله يكون عجبكون ال part 1

يوم سحب البويضات كان يوم الاربعاء 3\11\2017 رحت عالمركز على الريق الساعة التاسعة صباحا انا و زوجي و اعطوني مريول للتجهيز لغرفة العمليات و كنت خايفة كتير من التخدير العام و قريت كتير انو بعدها بتوجع كتير و صرت ادعي ربي و اقرأ قرآن قد ما بقدر طبعا شلحت كل تيابي كل شي و طلبوا افراغ المثانة تماما و طلبوا من زوجي عينة السائل المنوي

بعدها اخدوني ع غرفة العمليات و حطولي السيرون طبعا في المخدر و ما بيوجع بالمرة و بعد نص ساعة صحيت و ما حسيت بشي كان الالم بسيط كتير بالبطن يعني وجع الدورة اكتر بكتير توقعت يكون اكتر بكتير

سحبولي 15 بويضة و طلبوا مني الراحة و الاستلقاء بس بنفس اليوم و ما ابذل و لا مجهود مع اكل خفيف لتجنب خربطة المعدة بعد التخدير و اهم شي شرب كتير سوائل و عطوني نوع جديد من الادوية
كل يوم ابرة تحت الجلد بس مو هرمون هي ابرة مميعة للدم ليوصل الدم و الغذاء للاجنة اسمها كليكسين و سعر كل ابرة كمان 350 سوري
كل 3 ايام ابرة تثبيت بالعضل اسمها hyprogen
و حبوب ميني سبيرين و هي كمان لتمييع الدم كل يوم حبة
مع المتابعة بادافول حمض الفوليك حبة كل يوم
وحب مضاد حيوي عبارة عن عبوة من عشر حبات كل يوم حبتين و لا تعاد العبوة

تحدد يوم ترجيع الاجنة السبت في 6\11\2017 طبعا بعد السحب تم اعطاء الدفعة التانية للمشفى و هي عبارة عن 25000 سوري يعني 2017 درهم اما الدفعة الاولى فكانت 10000 سوري و الدفعة الاخيرة هي 15000 سوري يوم الترجيع و هاد شامل كل المعاينات بالمركز وكنت كل يوم روح لاخد الابر و السحب و الترجيع يعني كان المبلغ كامل عبارة عن 50000 سوري يعني 4000 درهم
بس لا يشمل الادوية و التحاليل اللي كلفت تقريبا ليوم التحليل 35000 سوري

رحت يوم السبت بعد ما اجاني اتصال يوم الجمعة مساء لتأكيد الموعد بان صار في انقسامات ممتازة بالاجنة و الحمدلله و كنت طبعا كل مرحلة على اعصابي بهاد الوقت كان باقي بس مرحلة وحدة هي انو يقبل جسمي الاجنة و يثبتوا

رحت السبت الساعة التاسعة صباحا عالمركز و طلبوا مني ملئ المثانة بالاكل و الماء ليبين للدكتور افضل الاماكن في الرحم لوضع الاجنة بعدها اعطوني ابرة مخدرة موضعية بالعضل مو الغاية منها ما حس بالوجع لانو اصلا عملية الترجيع متل الفحص النسائي ما بتوجع ابدا بس هي لحتى ما اتشنج و ضل مسترخية

دخلوني ع غرفة العمليات وحطوني ع كرسي الفحص المخصص طبعا مع رفع الرجلين و كنت تقريبا نايمة بس قدرت قاوم و شفت الدكتور كيف عم يدخل البويضة داخل الرحم بحفرة غميقة و صار يدخلها لجوا حتى وصلت للقعر طبعا انا كنت عم شوف ع شاشة الايكو و البويضة كانت متل راس الدبوس و صرت ادعي الله يحفظلي ياها و يثبتلي ياها و بعدها نمت و ما عدت حسيت و لما فقت حسيت نمت 10 دقايق و كنت على نفس الوضعية الرجلين لفوق طبعا كانو مغطييني ببطانيات مشان ما ابرد بس ما كان الوقت 10 دقايق كان الي ساعة و نص ع هي الوضعية و بعدها نزلتني الممرضة و طلبت فرغ المثانة بعدهااخدتني ع غرفتي و طلبت ضل متسطحة ع ضهري لمدة 3 ساعات بالمشفى

بعدها اجا الدكتور و قلي انو رجعلي اربع اجنة من الدرجة الاولى و سالني اذا بدي جمد الباقي قلت لا و متوكلة ع الله و قلي يفضل تضلي متسطحة ع ضهري بس اول 3 ايام لانو اكتر شي بيصير فيهون تعشيش و ممنوع النوم عالطرف اليمين او اليسار طبعا مع الراحة التامة و الاستمرار بكل الادوية السابقة و طبعا ممنوع الخروج من البيت منعا باتا و صارت ماما تعطيني الابر بالبيت و لحد هاد الوقت كنت مستمرة بالدوستينكس دوا هرمون الحليب لانو بينظم الهرمون بكل الجسم

رحت عالبيت بالسيارة و رجعت المقعد على الاخر يعني كنت تقريبا متسطحة و مشينا كتير عالبطيء و كان لازم ضل مرتاحة طول فترة هالاسبوعين و وقت التحليل كان 20\11\2017

انا قريت من قبل انو مو اول 3 ايام اول خمس ايام هي ايام التعشيش و طبعا اول يومين بيكون الواحد مو متعود ف بيحس الوقت ما عم يمشي و كنت ع اعصابي
بس طبعا كان اهم شي اني متوكلة على الله و رضيانة بحكمو شو ما كان و كنت دائما حط ايدي ع بطني و قول : اللهم اني استودعتك اجنتي اللتي في بطني يا من لا تضيع عنده الودائع اللهم و كما امسكت السماء ان تسقط على الارض امسك ما في رحمي

و اسمع سورة مريم كل يوم و ادعي و اهم شي الاستغفار كنت حاول كل يوم عالقليلة 5000 مرة
و بقيت نام ع ضهري كل اليوم ما قوم الا للحمام و الصلاة و صلي انا و قاعدة
وما تحممت الا بعد اسبوع و بماء فاتر مو سخن كتير بعد اليوم الخامس يعني صباح اليوم السادس اجتني نوبات برد و سخونة قعدت متل المجنونة و صرت ابكي لانو انا كل ما بتجيني هي النوبات بتجيني الدورة بعد اسبوع و كنت بعرف انو كل اعراض الدورة متل الحمل الا نوبات البرد و السخونة يعني دورة

اتصلت بالدكتور و قلي عادي بس راقبي حرارة جسمك و باليوم التاني رجعت اجتني النوبات مع اني بهي الفترة كنت دائما مدفية حالي و لابسة تياب كأني بالاسكيمو و عم اتغطى كل الوقت ب4 بطانيات مع انو الجو لسا مو كتير برد بعدها صرت ادعي ربي يخترلي الخير و يهونها عليي و دائما سبح :حسبي الله و نعم الوكيل
و توكلت على الله و سلمت امري لله

بعد خامس يوم صار ممكن المشي الخفيف بالبيت و النوم على الطرف الايمن او الايسر و صارت تجيني هبات حرارة خلال اليوم ما مزعجة بس حس جسمي حمي لفترة و بعدها تروح باليوم السابع حسيت بألم بالبطن نفس الم الدورة و الم بالضهر لا يحتمل و كنت كل يوم اقرا الرقية الشرعية للاسقاط و بعد خامس يوم اتوكلت على الله و صرت صلي عادي

باليوم التامن استمرت المعاناة من الام الضهر مع قلة شهية و احساس بالوهن الشديد بس كنت كل الوقت عم قول انو هاد مو وحام مجرد تعب و ما بدي اتوهم حتى ما انصدم بعدين

اما عن موضوع الاكل بهي الفترة كنت حاول اكل اكل مفيد و بس بدون فاست فود و اكلت كتير خيار و خس لانون بيثبتو الاجنة مع اني حسيت حالي شبه الخاروف بس معلش و اهم شي حليب حليب حليب و كتير ماء – جبنة عربي مو مثلثات و دهن لا –لبن –بيض –فواكه-لحم بكل انواعه و خاصة السمك و بعدت عن الشوكولا و التمر و القرفة و الكمون و اي شي بيسبب مغص او اسهال شديد و كان لازم ضل بعيدة عن الامساك بس شرب الحليب كان كفيل بهاد الشي

لاحظت بهي الفترة انو معدتي صارت كتير حساسة و توجعني ع اهون سبب و قبل ب 4 ايام من التحليل صرت اتدايق من طعمة معجون السنان مع اني كل عمري بستعملو و حس شو ما اكلت ما تروح طعمتو من تمي بس يعني بهي الفترة كان بس الاكل الصحي مسموح علما انو الدكتور قلي كلي شو ما بدك و ما حرمني من شي بس انا كنت خايفة و قريت كتير عن هالموضوع يعني نقرشات و عصاير صناعية و شيبس و كولا و اندومي و فاست فود كلو ممنوع عندي

اجا يوم التحليل يوم 20\11\2017 و رحت عالمركز و اخدوا عينة دم لاجراء فحص الحمل و كانت الساعة 9 صباحا و طلبوا مني ارجع عالبيت و استمر بالراحة التامة و ممنوع الخروج برا البيت و انتظر اتصال منون عالساعة وحدة ليقلولي النتيجة

و كان مدة الاربع ساعات كأنها اربع سنين يعني ال15 يوم بكفة و ال4 ساعات بكفة تانية و لما صار الوقت اتصلوا فيي و قالولي اني حامل و الحمدلله و قالوا انو نسبة الهرمون عالية عالغالب حامل بتوأم و بعدها ما عدت افهم شي و صرت ابكي و احمد ربي و لحد الان ماني مصدقة انشالله يكون معي توأم بنت و صبي يا رب و طلب الدكتور مني المتابعة بنفس الادوية و مراجعتهم بعد 10 ايام يعني بيكون تاريخ 30\11\2017لاعرف كم جنين معي مع اني بالليلة اللي قبل يوم التحليل عملت تحليل بول و طلع سلبي و اهم شي انو طلعت معلومة البردية و السخونة المرتبطة بالدورة خطأ و هلأ عم تابع بالادوية كلها و عم اشعر بفقدان شهية واحيانا الم بالبطن متل الدورة و قلي الدكتور هاد تعشيش و صداع و الله يرزق كل محرومة و لا يحرمون لحدا يا رب

شغلة صغيرة حابة انصح فيها كل حدا بيضطر يبقى بالبيت للراحة لاي ظرف كان انا بالفترة الاولى كنت كتير حس الوقت بطيء بس بعدين بلشت احفظ قرآن بما اني قاعدة و قاعدة و الحمدلله قدرت بفترة ال15 يوم احفظ سورة مريم وطه يعني تقريبا جزء كامل و الله يقدرني اقدر كفي و احفظ اكتر

انشالله كون فدتكون باي معلومة من تجربتي و انشالله كل محرومة بتحمل طبيعي و ما تحتاج تعملها بس اجمالا كانت كتير سهلة كنت متوقعتا اصعب بكتير و اهم شي التوكل على الله و اذا ما زبطت ما تيأسوا من رحمة ربكم و انا جاهزة لاي استفسار

>>>>> ردود الأعضـــــــــــــــــــاء على الموضوع <<<<<
==================================


يعطيك العافيه


__________________________________________________ __________

مشالله تبارك الله الحمدالله علي نجاح العملية الله يثبتة لشهر التاسع ويرزققك الذرية الصالحة

بس كم عمرك انتي ؟؟؟
وماهي حاله زوجك بضبط ضعف في الحركة او العدد وكم نسبة الحركة
لاني عملت تلقيح قبل بس ماستمر الحمل ؟؟؟


__________________________________________________ __________

انا عمري هلأ 24 سنة و عمر زوجي 35 سنة والمشكلة بالحركة عنده النسبة 5% و التعداد ما كتير عالي بس الحركة بالحقن المجهري ما مهمة و نطفة وحدة بتكفي


__________________________________________________ __________

الله يعطيك العافية ومشكورة لقصتك
والله يتمملك على خير ويكونوا اكتر من اتنين ويا رب تبشرينا فيهم


__________________________________________________ __________

ماشاءالله تبارك الرحمن
الله يتمم لك على خير يا حبيبتي
وياااااااااااارب عقبال ما تكتبي لنا قصة ولادتك باذن الله
ومبروووووووووووك الحمل ان شاءالله تبشرين بخبر حملك بتوأم آآآآآآآآمين يارب