عنوان الموضوع : ساعدوني . اختار زعل أمي ولا رضا حماتي؟
مقدم من طرف منتديات نساء الجزائر

ساعدوني . اختار زعل أمي ولا رضا حماتي؟



السلام عليكم ورحمة الله وبركاته
يا جماعة انا واقعة بمشكلة كتير كبيرة وبدي مساعدتكون
انا مخطوبة من 5 شهور تقريبا وانكتب كتابي من حوالي شهرين
وخطيبي عين الله عليه ووالله ما في منو والحمدلله انا بعتبر انو إن شاء الله اتوفقت باختياري لأنو على خلق ودين ومتعلم ومثقف وطريقة تفكيرنا وحدة وأهدافنا وحدة

بس المشكلة هيي أهلي وأهلو , أنا أمي وأبي منفصلين ولما هالجماعة أجوا اتقدمولي أجوا لبيت ستي وعن طريق رفيقتي , انا الجدبة عطيتها رقم بيت ستي بما أني عايشة عند أبي وأبي مو متزوج بعد أمي فأنا بستقبل الخطاب ببيت ستي
لذا عطيتها للبنت رقم ستي مشان تبعتلي قريبها
واتصوا الجماعة لبيت ستي وأجوا شافوني وما خطرلون أنهم يتعرفوا على أمي , بس سألوا ستي شو سبب الطلاق بجاوبتهم أنو انقطع نصيبهم .

وبعدين تمت الخطبة بيني وبين هالشب بعد ما اتأكد أني على تواصل مع امي من خلال رفيقتي .

المهم وأثناء فترة الخطبة اتفقنا انا وخطيبي أنو ما بدنا عرس للأسباب التالية :
1- ما يرتكب في الأعراس من محرمات .
2- التكاليف التي نحن الآن بغنىً عنها وخصوصاً في فترة بناء أنفسنا وهو بصراحة حالتو المادية مو مريحة كتير حالياً .
3- أمي : ستي وعماتي (يلي هنن الكل بالكل وأبي ما ألو دور أبدا) مستحيل يرضوا أمي تنعزم عالعرس .

وانا يا جماعة حطيتو بالصورة وشرحتلو وضعي كاملاً والله على ما أقول شهيد
وضلت القصة بيناتنا ومشان البيت كنا متفقين نسكن بحي معين نوعاً ما مو غالي الأجار فيه , ومو كتير بعيد عن مكان سكن اهلو ومنظم كعمار .


وطبعا متفقين انا وياه ومزبطين امورنا وكل شي
والكتاب ما انكتب غير بعد ما تمت كل هالاتفاقات بيني وبينو .


بعد ما كتبنا الكتاب وبلشت امو تفتح سيرة العرس والبيت وهالأمور , وطبعا هيي مرتبة على كيفها كل شي حصل التالي :

1- من شان البيت : لا بتستأجروا قريب عليي علماً أنو المنطقة يلي قريبة عليها اجاراتها أغلى من المنطقة الي نحنا مقررينها مع انها مو بعيدة عنها , وكمان مو منظمة , وانا قبلت مع انو كان خيار كتير صعب بالنسبة ألي بس مع هيك قبلت مشان المشاكل .

2- العرس العرس العرس : وهون يا جماعة مشكلتي العويصة يلي بدي تساعدوني فيها , أمو بدها عرس وبدها تفرح فيه , طبعا حقها , بس انا كمان حقي امي تتواجد معي بهالليلة صح؟
حاول خطيبي مع امو بدون عرس فكان الجواب الرفض المطلق ولا بد أنو يصير عرس , طيب ماشي بصير عرس , عطيناها حلول بديلة متل المباركة بعد العرس , متل أنو نعمل عرس من دون ما يعرفوا بيت جدي ونعزم امي , لا ما وافقت وهيي بدها تعزم ستي وعماتي وتبيض وش قدامهون , طيب ماشي على راحتك منعزمهم , بس أنتو بتقولوا أنو نحنا بدنا نعزم امها , ولما أنتو تجيبوا أمي وتكون من معازيمكم ستي وعماتي ما رح يعملوا مشكلة بالصالة , كمان ما وافقت وخايفة يعملوا مشكلة .
وبدها ياني أتنازل , وعلى كلمة مشيلنا هالليلة وكلها ساعتين , يا جماعة هنن عنجد بس ساعتين بس مو معقول أمي ما تحضر عرسي , والمعازيم كلهم رح يقولوا مقاطعة امي لأنو بيت جدي هيك عم بقولوا قدام كل العالم .
وعم تهددنا انا وخطيبي أنو اذا ما بدو يسمع كلمتها بدها تغضب عليه كل العمر وما تدوس بيتو .


مشان الله عطوني حل

>>>>> ردود الأعضـــــــــــــــــــاء على الموضوع <<<<<
==================================


حبيبتي هذي امك خليها تشوفك عرووس وتفرح فيك وتقر عينها بشوفتك بالفستان الابيض

حاولي مع خطيبك ياخذ امه ويفهمها انو مافي بنت ماتتمنى وقفة امها معها ..وتتخيل بنتها لو انحطت بنفس

الموقف لأن الله بيقدر يقلب الحال ..

وكل شي ان شاء الله بيجي بالتفاهم ..وانتي كمان كلمي امك عن العرس وانها لما تحضر تتفادى المشاكل

وكمان عماتك وستك زوريهم وهيك تفاهمو ويارب ييسر لك ويوفقك ويسعدك ..
ان شاء الله افدتك لو بشئ بسيط..


__________________________________________________ __________

خطيبي ما بدو عرس
بس ما عم يقدر على أمو و وقلتلها هالحكي أنو امي أكيد حقها تحضر
قالتلي حقها بس انا بخاف تزعل ستك
هيي حبتها لستي
حتى مو راضية تتعرف على امي مشان ما تزعل ستي
مع أنو خطيبي اتعرف عليها لأمي وحبها كتير
شو اعمل كل ما عم نتناقش معها عم نوصل لطريق مسدود


__________________________________________________ __________

والله مشكلتك مرره صعبه والله يكون في عونك


بس انا راي من راي اختي وفيه لزوجها كل شي بالتفاهم تنحل ان شاءالله


يبغالها طوله باال والله يكون بعونك يااعسل


__________________________________________________ __________

تسلمي
بس مع العلم صرلنا أكتر من شهر عم نحاول معها بأسلوب التفاهم وما مشي الحال
وشكلو هاد الأسلوب ما اجدى نفعاً
حتى حاولنا نلاقي شخص قريب منها يفهمها لقينا الكل صافف معها


__________________________________________________ __________

كلش ولا زعل الوالدين وذكر بال قران والله اسئلي مجربين قبل على زعل الوالدين وحسيت لمن زعلوانىوحيده