عنوان الموضوع : خلافي مع امي ' رايكم يهمني مجابة
مقدم من طرف منتديات نساء الجزائر

خلافي مع امي ' رايكم يهمني



السلام عليكم
مشكلتي مع الوالده الله يهديهاا بدايه الموضوع كان وانا بالمتوسط كان والدي يصرف عليا وامي قالت له بدل لاتشتري لها اذا احتاجت اديها كل شهر مبلغ معين وافق ابويا وصار يسلم امي لمبلغ لصغر سني بعدها قالت له انه المبلغ قليل وزيده لها ووافق وانا دخلت الثانوي وكان المبلغ معاها اذا احتجت شيء تديني اشتري ' وصلت الجامعه وصار ابويا يدينني المبلغ ليا انا وصارت جامعتي تديني مكافاه هنا امي قالت هاتي المبلغ اللي ابوكي يصرفه عليكي !! انا اللي طالبت فيه من زمان وذا من حقي وانتي حاليا عندك مكافاه !!! يعني تبغى اصرف على نفسي من المكافاه !! ملابس جوال وفاتورة جوال وايي شيء !! اللي يقهر مو ذا اللي قاهرني هيا موظفه وراتبها عالي وتاخذ مصروف من ابويا اضعاف مصروفي وتاخذ مصروف للبيت للاكل والشرب ومحد يسالها فينه ولا ايش شريتي مقاضي !! وكمان عينها على مصروفي !!! انا مرره متضايقه لاني لمى كان مصروفي معايا ومكافأتي كنت اجيب بيها كلل شيء ولا اطلب ريال من احدد ليش تاخذها !! اذا ابويا موافق يصرف وانا اخذ مكافاه ليش تشيلها هيا!! هيا كمان عندها راتب وبتاخذ مصروف انا اشوف ابويا واجب عليه يصرف علينا بغض النظر انا طالبه او موظفه الا لمى اتزوج يبطل ' ثاني شيء انا ابغى اتوظف بعد الجامعه وامي تقولي اذا ماعجبتني وظيفتك محا اسمح لك !! بالله هيا مالها دحين !! بما انه مو اختلاط ولا وظيفع محرمه وكلها نساء ليه تمنعني !! تقول انا ليا سلطه عليكي وبكيفي اسمح لك او ارفض !! انا اثق في رايكم قولي من حقها تاخذ مصروفي لانها هيا طالبت فيه ! ومن حقها تمنعني عن وظيفه حلال وماقيها اي ضرر عليها او اختلاط !!

>>>>> ردود الأعضـــــــــــــــــــاء على الموضوع <<<<<
==================================


لا مو من حقها تأخذ المصروف خاصة و إنه من أبوك و هذا من واجباته كأب يصرف عليك ..

و فوق هذا أنت محتاجته و كمان هى ما هي محتاجته ..

بس كمان ما يعني هذا إن الحرب العالمية تقوم بينك و بينها لأنه في النهاية امك ..

و برها و إحترامها واااجب عليك ..

لكن حطي نفسك مكانها أنت في سن ممكن يخلي أمك تفكر أن الفلوس معك ممكن ما تكون في صالحك أو تخاف أنك تضيعينها على الفاضي ..

فمستحيييييييل أن أمك بس تبي تنكد عليك ..

أكيد الخوف عليك هو إللي دافعها ..

أما الوظيفة فأمك من حيث المبدأ و الفكرة ما هى رافضته وهذا هو المهم أما نوعية الوظيفة فهذا الموضوع سابق لآوانه و على العموم مستحيل ترفض الشئ إللي يناسبك ..

و سواء قصة الفلوس أو قصة الوظيفة مالك إلا الحوار المؤدب مع أمك ..
و أنت الحين ركزي الفلوس ووضحي لها احتياجاتك و إذا أصرت فخلاص نفذي إللي تبيه..

بس قولي لها إذا نقصك شئ ملزومين يلبونه لك لأني أنا أعرف إحتياجات بنات الجامعه ..

و أعرف إن المكأفاة و الله ماتكفي ..


__________________________________________________ __________

السلام عليكم فلوسك كلها لامك وانتى بعد كلك لامك انا حاليا مسافرة واتخانق مع امى قد شعر راسى لكن اقلك الشوق والحب يعترينى لها سعات اقول ممكن اتنفس واشوفها ولا تقبض روحى خلى بالك منها اكسبى قلبها وحبيها تقربى منها قولى لها امرى يا امى يصير خير اللى تبى والفلوس تروح وتجى وامك ادرى بمصلحتك ربى يسخرها لكى ويلين قلبها عليكى ويؤلف بين قلوبكم ربى يسخر لكى زوجا صالحا ويقر عينك بذرية صالحة ربى يجعل مثواكى وامك وابوك الفردوس الاعلى تقبلى مرورى اختى الفاضلة


__________________________________________________ __________

الله يهديها
لل فع


__________________________________________________ __________

حبيبتي مرة حاسة فيكي وفاهمتك ومريت باللي مريتي فيه واكثر!!!
وحتنصدمي من كلامي.. بس حتشوفيه بعينك يوم وتتذكريني..
عشان كذا حبيبتي اقري كلامي بتمعن عشان ماتندمي زيي انا اصلح وضعي ذحين وابر امي قمااقدر ويارب يغفر لي ويرضي امي حبيبتي عني..
شوفي ياستي في السنتين الاولى من الجامعه كانت امي تاخذ مكافاتي وتشتريلي وتشتري لاخواني وللبيت كنت مرة ازعل واعصب ليش هاذي مكافاتي حقتي!!
وامور كثيرة كانت امي تمنعني وتخاصمني دايما ..يالله كنت ازعللل واتناكف معاها وارد عليها استغفرالله ..وتحرمني وتعاقبني..وكان ابويا دايما يذكرني بفضل امي وانو واجب برها ومن ذا الكلام.. اللي كنت اقول بنفسي امي قاسية ماتفهموني..
خلصت السنتين الاولى من الجامعه الثالثة تزوجت .. وهنا عرفت قد ايش كنت وحده استغفرالله اسوأ كلمة تنقال عنها عرفت قد ايش كنت جاحده وماعندي قلب..
امي حبيبتي كان هذا المظهر مظهر القسوة كان من حب ومو اي حب حب عميق جدا وخوف حقيقي عليا..
امهاتنا ياحبيبتي عاشوا تربية قاسية ّ...مايعرفو يعبرو عن حبهم تعبيرهم عن حبهم بالافعال مو بالاقوال يظهروا الشدة والقسوة وهما بيتقطعوا علينا..
وذحين اوضحلك اكثر بمثال واقعي ..
المهم ياستي اتزوجت وامي سوت المستحيل عشاني عشان تقضيلي وطلعني احلى عروسة والله دفعت لما قالت بس كلو عشاني ولا عندها راتب ولا شي ..
حتى اشياء مالها داعي ودلع زايد مني مثلا روحنا سوق وحفيت رجولنا عشان نلقى صندل اشتريت واحد في الاخير قلت مو عاجبني!!كذا دلع ومجاغه بنات امي حبيبتي اشترتلي من عندها صندل ثاني وسعرو اضعاف الاول ونفس الشي حصل مع اكسسوار الفستان من عندها واضعاف سعر الاول تعبت تعبت ونسقت عشان يطلع كل شي تمام ومو بس كذا مرة كانت تحن عليا كل يوم تتصل تتطمن ترسل شغالتها تنظفلي ولا ترضى اديها فلوس مرت الايام وحملت شفت الوجه الحنون الرحيم الحقيقي لامي يالله مااقدر اوصف المواقف كيف
وفي ولادتي ولدت بعملية وامي جابتنا كلنا بعملية وامها متوفيه ماكان احد يهتم فيها حبيبتي ذقت كيف العمليه متعبه ذقت تعب الحمل ذقت كيف الاهتمام بطفل رضيع ولسه الايام توضحلي فضل امي اكثر في المستشفى ماكانت تنام تهتم فيا طول الوقت تساعدني عشان اوقف توديني الحمام الله يكرمكم وحتى وقت العملية زوجي يقولي كانت تبكي وتدعي وتقرا قرآن خايفه عليا .. شي والله يبكي حتشوفي وحتحسي انو مهما سويتي مح تقدري تردي فضل امك .. حتا لما ولدت كانت ترحمني وتشيل النونو عني وتخليني انام وارتاح وبعدين عرفت لما كانت تاخذ مكافاتي كانت بازمة مادية وكانت تحاول توازن تجبلي وتجيب لاخواني والله ماعمرها اشترت لنفسها كلو لنا في العيد اشيك واحلا ناس انا واختي والكل يقول مو اتفاخر واشطر ناس امي كانت مهتمه اشد الاهتمام بدراستنا وخاصه انا بكرها حسيت كيف اني جاحده ومسكثرة استغفرالله المكافاة ع امي تفداها ويفداها كل شي غالي ..والله لو تتفكري بوضعك حتشوفي كيف امك حريصة وتحبك بافعالها ولو اظهرت القسوة لكنها تحمل قلب عطوف وحنون جدا عليكي احذرررري تزعليها وصدقيني لو تبغي شي بتديكي مو لازم بيدك المصروف مكافاة بيدك نعمه تبغي كمان قوليلها ولا حتقول لا او قولي يماما ياحبيبتي احتاج كذا اشتريلي مح ترفض ا هم نقطة احسني لها تذكري كيف كنتي ضيعفه ماتقدري تهشي ذبانه وكيف شالتك وربتك وصبرت وتحملت عشانك


__________________________________________________ __________