عنوان الموضوع : كسر قلبي وربي كسر حوض أبوه أتمنى ينزل موضوعي يالإدارة -لصحتك
مقدم من طرف منتديات نساء الجزائر

كسر قلبي وربي كسر حوض أبوه أتمنى ينزل موضوعي يالإدارة



أنا بنت عمري 20سنه أدرس بالجامعة , من كنت طفلة وأنا أحب ولد خالتي حب بريئ جدًا يعني مابيننا مكالمات ولا رسائل أللي بيننا فقط خالتي الثانية يعني كانت تطمني عليه وطمنه علي , المهم في الإجازة الصيفية أللي بين ثاني وثالث ثانوي كلمته بجوال خالتي بين فترة وفترة وكانت المكالمة مختصرة إما أتطمن عليه أو أخليه يجي يودينا السوق أنا وأهلي , بعد فترة قصيرة جاءني رقم غريب ع جوالي ومارديت بعدين أرسل (يابنت فلان ردي) أنا خفت وليتني مت ولا رديت بعدين طلع " ولد خالة أمي " ومتصل يقولي (ترى ولد خالتك موزع رقمك ع الشباب بالإستراحة , وإذا دريت أنك تكلمينه بقول لأبوك) جلست أبكي وقلت وش تستفيد من تهديدك؟ قال أنتي قريبتي وعرضي ولزوم أخاف عليك (عً العلم أن مابيننا معرفه سابقة يعني قرابة بالاسم وبس للآسف) ومشت الأيام وبين فترة وفترة يدق علي مرات يكون قاسي ويهددني ومرات يكون حنون ويحسسني بخوفه علي بعد شهر من مكالمته الأولى أرسلي (ياجعل يومي قبل يومك) استغربت وطنشت وبعد يومين اتصل فيني وقالي ودي أصارحك , قلت تفضل , جلس يبكي وقال أحبــك , أنا ماعرفت أرد عليه كل أللي سويته جلست أضحك بصوت عالي كأني خبله (وأنا فعلاً خبله) قلت بعدين أكلمك وبعدها بيومين دق علي ومدري وش جاءني حسيت أني محتاجه له خصوصًا بعد ماكرهنيّ بـً ولد خالتي , ومشت الأيام واستمرينا مع بعض سنتين ونص وأكثر شوي [السنه الأولى كنّا مثل العسل بس ماكنت متعلقة فيه مره] [السنه الثانية تعلقت فيه لدرجه نسيت من أنا وكانت بيننا مشاكل كثيرة] يوم حس أني حبيته وتعلقت فيه صار كل مازعل يقفل بوجهي ويصارخ علي حتى لو غلط لازم أنا أللي أبادر وأصالحه وأن كنت أتنازل عن كرامتي وخليته يتمادى في اهاناته , وللآسف أكتشفت أن يشرب خمر ومع كذا سكت ودعيتله بكل صلاه أنه يتركه وشجعته أنه يتوظف وسجلت بياناته بالعسكرية وقبلوه وبعد ماتخرج من التدريب جمعت ماوراي وجبتله هدية تشجعه أكثر وسويتله مقطع من تصميمي بمناسبة تخرجه عاليوتيوب , وكلم أهله وحط عندهم علم أنه يبغاني , بعد فترة عرفوا أهله أني أكلمه وأمه دقت علي وهددتني بأهلي وأخته ترسلي دعاوي وتتحسب علي , وقالي لاتخافين مستحيل أتنازل عنك وإذا ماأخذتك ماراح أخذ غيرك والله يخوني في خواتي وجعلي أفقد أبوي وأمي والسرطان أللي يسري بدمي أن تخليت عنك (وكل يوم أسمع هالموال) , قبل شهر تقريبًا دق علي الظهر وكان صوته مو طبيعي (ع العلم أنه قبلها بليله كان مكلمني عااادي) سألته وشفيك؟ قال اسمعي يابنت الناس أهلي مايبغونك وأنا مستحيل أكسر بكلمتهم , قلت وين حلفك وكلامك؟ قال أنا فكرت فيها وعرفت أني مقدر أخذك وبالنسبة للمكالمات أنا تبت وعاهدت أمي أني أقطع مكالماتي معك , جلست أبكي وأترجاه شوي حسيت أن صوته حنّ علي وقال طيب دقيقه وأكلمك , بعدها اتصل فيني بس للآسف كان المتصل أمه بس من جواله وقالتلي (أنتي بنتنا ومانرضى عالغلط أللي جالسه تسوينه مع ولدنا وهالطريق حرام ومثل ماكلمتيه بتكلمين غيره) أنا تملكني البكاء والصمت وماقدرت أرد ولا بكلمة وقفلت الخط بعدين دقيت على رقمه الثاني وقلتله (حرام عليك ليش تسوي فيني كذا) قال: أنا لي معاك حديث طويل بس أمهليني لحظه بعطي رجال غرض عند الباب وأجيك , وأنتظرت وماأتصل دقيت عليه إما يعطيني مشغول أو مايرد , قلت ليه ماترد لاتخوفني , أرسلي النذل (أنا جبت رقم أمك من عند أختي باأتصل ألحين فيها وأسمعي جوالها) أنا خفت وكان هالكلام الظهر , يوم صار العصر صارحت أمي بكل حاجه عشان تكون ع علم لو دق عليها , وفعلاً الحقير دق عليها المغرب وقالها ( الله يستر ع بنتكم وكلن يروح بطريق ويأخذ نصيبه وأنا تبت وخايف ع خواتي) .
مــلاحظــة {أنا أللي قاهرني مو لأنه تاب بالعكس هذا شيء طيب , أللي قاهرني ليش يتخلى عني بسهولة بعد كل أللي سويته له وبعد ماكان يحلفلي ويدعي ع نفسه وأهله}
الفــاجعة: بعد صلاة العشاء جلست أرسله وأدعي عليه , يوم صارت الساعة تقريبًا 10بالليل أرسلي (كافي كافي حرام عليك أبوي بالمستشفى بسبب دعاويك) , رحت لأمي وقلتلها تأكدي وأتصلت فيه وطلع الخبر صحيح , بعدين يوم صارت الساعة 12منتصف الليل أرسلتله [ الله يمهل ولا يهمل أنت كسرت قلبي وربي كسر حوض أبوك , وش ذنبه هالمسكين يدفع ثمن خطأ ولده ياويلك من ربي الله يوريني فيك يوم أنت وخواتك ] بعدها لا أرسل ولا أنا أرسلت .
أمس كنت أكلم خالي وبالصدفة قالي أن فلان يقصد النذل (ع العلم أنه مايدري عن حاجه) دق علي قبل أسبوع وكان سكران وكان يبغى رقم واحد وعطيته (مع أنه قبل لا يتركني كان تاركه لأني كنت دايم أدعيله وتأكدت بطريقتي أنه صادق , بس سبحان الله ربي نكس حاله ورجعله) قلت لخالي طيب هو مو ناوي يتزوج؟ قالي مدري عنه لأني مره كنت راكب معه بالسيارة وكان يكلم وحده وأتوقع أن بينهم علاقة وشكلها يبغاها , قلت ليش هو يكلم بنات؟ قال أووووه من زمان , أنا جاءتني حاله صمت رهيب حسيت كأن قلبي يبكي وعيوني مو قادرة تنزل منها دمعة وحده لدرجة أني فتحت على اليوتيوب وجلست أرقص رقص مو طبيعي وكأني جالسة أطلع قهري بالرقص , كرهت نفسي وحسيت أني غبيه وطموحي تحطم وكل شيء فيني تغير حتى شخصيتي تغيرت من قوة وثقه إلى ضعف وتبلد مشاعر وصديقاتي معاد صرت أكلمهم زي أول حتى الدراسة ماعاد لي خاطر فيها , أبيكم تفسون لي عمايله وليش يقول لأمي ويفضحني قدامه , تعبت أدعولي وردو علي " بالتي هي أحسن " لاتعاتبوني لأني معترفة أن أللي سويته غلط , وأنا مانزلت موضي ألا حتى يكون عبرة لك بنت تمشي بهاالطريق ولكل ظــالم وأتمنى أنكم تعذروني ع الإطـااالة وتردون علي لو بدعوة صادقة أن ربي يرزقني زوج يملي فراغي العاطفي ..
" اللهم لا تجعل في قلبي أحدًا سواك , ولا تجعل الدنيا أكبر همي "

>>>>> ردود الأعضـــــــــــــــــــاء على الموضوع <<<<<
==================================


اختي صعبه احد يفسر لك تصرفاته انتي ادرى لاي درجه هو كان صادق
لكن غلطتك انتي عارفه انه يشرب وتبين تهدينه هالشي لو مايجي من نفسه ماراح يتم ابد بيسمع لك يومين يتركه ويرد في الثالث
يكلم غيرك اكيــــــد لكن المميز فيك كنتي غيـــــر لانك طيبه وكل همك نجاحه
خيـــــــره لك كل اللي صار
لان الطيبون للطيبات والخبيثون للخبيثات
مايستحق دمعه منك ولا هذا قدرك
اتفاءلي وربي يعوضك بالزوج الصالح بس خلك واثقه في ربك ومحسنه الظن فيه


__________________________________________________ __________

هذا حال الشباب
يكلـــــــــــــــــــــــــــــــمون البنات ويحلف ايمان مغلظه
ويعيشها با احلام ورديـــــــــــــــــــــــــــــه

وبالاخير يسحــــــــــــــــــــــــــــب عليها بدقيقه ولا كانه عرفها----
ويقعد يخترع قصص وانه تاب
ولا امه وابوه غاصبين عليه
وهو نصـــــــــــــــــــــــــاب
بس لانه مستحيل يتزوج وحده كان يكلمها---------
البنات طيبات ويفكرن بقــــــــــــــــــلوبهن
والشباب خبيــــــــــــــــــــــثين ويفكرون بعقولهم

الله يرزقك بالزوج الصالح ويسعدك بالدنيا والاخرة ولاتفكرين وتتعبين نفسك
انسيه ولاتفكرين فيه
خليه يولي


__________________________________________________ __________

يآبنت النآس الكتآب وآضح من عنووووآنه هذآ وآحد طااااايش
ودآمه رآعي سكآآآآآآآآآر اغسلي ايدينك
بررربك تدرين أنه يسكر وبتآخذذذينه ؟؟؟؟؟؟ عجبي
وش تبين أكثرررر
وراااااااعي بناااااااااااااااااااااااات > يالهوووي

أصلآ دآم آهله مآيبغوووونك هذي أكبر مصيبه كيف بتعيشين معهم
تبين تجيبين القلق والهم لقلبببببك كل يوم بمشكله معهم

بصراحه مدري شلون تفكرين
بلآ ااااحبه بلآ خرآآآآآآآآآآآآآآبيط اصلا لو فيه خييير ويحبك صدق مايقفل بوووجهك ويسب ويهين
هذا مآخذك يتسلى بكـ وآنتي مصدددقه عمررررك
ارمييييه ورى ظهرك نصيحه لوجه الله ,,,,, ولعد ترسلين له ولاتستقبلي منو اي شي لو يرسل مية رساله
او يدق مية اتصآآآل حتى لو ترجى وقال وقال بصراحه اشوووفه مو كفوووو ابد
والباب اللي يجيك منه ريح صكه واستريح لاتجيبين لنفسك مشاكل وانتي بغنى عنها ورب العالمين بيعوضك باللي احسن منه وهو بيتندم صدقيني .....
لاتحاولين ابد تضعفين له وهو اللي اهااااااانك وماراعى مشاااعرك يابنت الناس ....
تجلسين تسمعين له اخرتها يرميك وتسمعين بخبر خطوووبته ثم تموووتين صدددق ...
اسمعي نصيحة اختك وخلى كررررررررامتك فوق اي شي لاتنزلي نفسك لشخص مايستاهلك ولاتخلين امه وخواااته يغلطون عليك وعلى اهلك حررراااام ....

انتبهي لنفسسسك


__________________________________________________ __________

حبيبتي والله الشي الي سويته من البداية كان غلط يوم انخضعتي له.. المهم الي راح راح

ياعمري مالج الا ربج.. ربج ماينسى عباده..صدقيني قومي توضي وصلي ركعتين وحمدي ربج ع النعمة الي صرتي فيها بعد ماكشفتيه قبل لا يتقدم لج وتعيشي معاه حياة زاااااائفة ربج انقذج من بلية..
ولاتفكري فيه ابد هذا المفروض مايهز شعرة منج وانتي أقوى من هالشي لاتخلي الشيطان يلعب براااسج تعوذي دايما من الشيطان واقري سورة البقرة والله راح يفرجها عليج ولاتعيدي نفس الغلطة لان هالتجربة أكيد فتحت راسج وعقلج..

الله يوفقج


__________________________________________________ __________

لا إله إلا الله
الله يصبرك ياقلبي انا بنت بعمرك وادري انها صدمه عاطفيه لك
وكلام خواتي صحيح الغلط يوم انك عارفه وش الطريق اللي يمشي فيه وسايرتيه
اول شي تسوينه غيري شريحتك واظن امرها بسيط دام امك ع علم بالموضوع قوليلها ماعاد ابي شريحتي
وانسسسسسسسيه خيتو عيشي حياتك صح وابعدي عنه
وانتبهي تفكري ترجعي لولد خالتك اللي كرهك فيه >> اتركي هذا والثاني
خليك مع ربك واشغلي وقتك مع صديقاتك وامك دامها متفهمه الموضوع
لاتخلين جرح مثل هذا يكسرك وتصيرين بلا مشاعر
بالعكس خليه دافع انك تفهمين النوع هذا من الذئاب
وحاولي ماتفتحين مواضيع فيها اسمه سواء مع امك او خالك او اي حد من خالاتك
وادعي الله في صلاتك انه يجبر قلبك ويعوضك بخير ويعوضك بالحلال
دعواتي لك ياقلبي