عنوان الموضوع : اختي خذت خطيبي وماما عرقلت نصيبي دعواتكم -تم الاجابة
مقدم من طرف منتديات نساء الجزائر

اختي خذت خطيبي وماما عرقلت نصيبي دعواتكم



السلام عليكم ورحمة الله وبركاته

بحكي لكم مشكلتي وياليت ترشدوني لحل وتساعدوني ولاتنسوني من الدعاء بالزوج الصالصج والذرية الصالحة يمكن اطول عليكم بس ابغاكم تفهمون ابعاد الموضوع .


الفصل الاول : أيام الصبا والطفولة


احنا ثلاث بنات انا الصغيرة امي جابت اختي الكبيرة وبعد 17 سنة جابت اختي بعدين انا
اختي تزوجت تقليدي من ولد خالي وانا واختي من واحنا صغار محجوزات لاولاد العم ماعندنا الا عم واحد وعنده ولدين كبار على ان عماتي عندهم بنات وكانوا يبحون اولاد عمي بس هم اختارونا لاننا كنا اجمل الي بوصله لكم اننا من وعينا على الدنيا فلان لفلانه وارتبطت احلامي وحياتي مع ولد عمي وحبيته من كل قلبي وكل مال حبي له يكبر بينما اختي مااهتمت ابد ولافكرت في المفروض يكون خطيبها اللي حصل خطيب اختي جالوه سرطان وعانا ثلاث شهور وتوفى الله يرحموه لما اختي خلصت ثانوي تمت خطبتها رسمي من خطيبي وهذا صدمة كبيرة لي وهي وافقت وهي تعرف قد ايش انا كنت احبه وكرهت الدنيا وكرهت كل شي بحياتي وقتها كنت ثالث متوسط لما صرت اول ثانوي انخطبت كثير لاقاربي بس اهلي كانوا بيقولوا صغيرة وانا مستحيل اوافق لاني كنت افكر في ولد عمي حتى بعد ماتزوج اختي بعدين تخرجت من الثانوي انخطبت بس رفضت ابغى اكمل دراستي ودخلت طب وانقطعت عن العالم ومع ذلك كنت بنخطب واهلي يعرفون رايي ويرفضون علشان الدراسة .

الفصل الثاني : الاحساس بأهمية الزوج في حياتي

وتخرجت وصرت طبيية وبديت بحضر اجتماعات وزواجات لاني حسيت ماصار احد يخطب من اقاربنا واكيد الناس نسيتني طبعا عيب عند ماما بنت تحضر عزايم او جمعات حريم وكلمت اكبر اخواتي وفهمتها وفهمت وكلمت ماما والحمدلله بديت احضر وحضرت اول مناسبة وقالت وحده اهلا باللي تبغى واحد من المريخ شروطها مالقيتها في الارض وتكرر هذا الكلام من اكثر من وحدة من الحريم الكبار واليل تقول لسا ماتزوجت غيرك خلف وش تستنين وانا سكاته مارديت ومقهوووووورة هذا نصيب بيد الله و ماكنت اتشرط ولا فكرت اتشرط بس كنت ابغى اكمل دراستي لاني انصدمت من اللي حصل لي وصارت الجمعات تغث واسمع كلام يسم وكرهت الجمعات عند الاقارب .

وفي زواجات لجيران اوصدقات كنت ارفض احضر لان ماما الله يهديها هي طيبة وحبيبية بس تقهر تعلق على بنات عمي وعماتي انهم يحضرون زواجات الجيران والاصدقاء يدرون على عريس وتدق عليهم بالكلام ها جاكم احد من اللي حضرتوا زواجهم وهذا هم كل البنات اللي بسني واصغر بعشر سنوات متزوجات ومخلفات بعد .



الفصل الثالث : انفجججججججججججرت

كانوا يخطبون ناس من برا العيلة بس اهلي رافضين فكرة من برا نهائي طبعا الخطاب يجوا لاهلي وهم يرفضون بدون مايشاوروني وفي مره وحده معاي بالمستشفى خطبتني لاخوها وافقت كان كويس وحتى لو كان شين وسيء كنت راح اوافق المهم كلمت اهلي ماما انصدمت كيف اقول اني انخطبت عيب وهذا الكلام قلت انا كبيرة مو صغيرة واختي الكبيرة مثل ماما بعد يوم قالت وش رايك بجد قلت موافقة وانا ماعرفه ولسا اهلي ماسألوا ققالت كذا بسرعه قلت ايه انا انسانه عمري 28 وابغا الحق عمري وابغا اتزوج واخلف قالت قليلة ادب وماتستحين وم هذا الكلام قلت لها والله انت تقولين كذا لانك متزوجه وعمرك 16 ماحسيت بالمر اللي فيني وهاوشتني هي وماما وسكت .

المهم وصلت لهم رسالة اني بتزوج لا توقفون نصيبي .

اللي حصل ان ماما طلعت في الولد عيوب الدنيا وكرهته ورفضته وجلست ابكي على حظي وبعدين اكتشفت كلامها مو مزبوط وانقهرت منها واستمر مسلسل رفض الخطاب .

وصرت المح اكثر من مره لامي واخواتي وكله اتهزا ويقارنوني باختي الصغيرة واننها ماقالت كذا ومؤدبة وافهمهم انهعا تزوجت بعد الثانوي وانا ذقت المر والحرمان بس مايفهمون .


في مره كنا جالسين بالبيت جاء بابا وقال انعرضت علينا اسماء بنات بالحي طالبين الزواج تبع جمعية خيرية وعلقت ماما انه مايستحون وعيب ماباقي الايعرضون بنتهم هي فعلا تشوفه عييييييييييييييب ومصيبة وهي خطا نضرتها بس مين يفهمها انقهرت قلت لاتنسون ان عندكم بنت ماتزوجت الا عنست وقمت واتذكر بكيت بحرقة في غرفتي ولازلت ابكي قهر.

وبعد كذا اي خاطب يجي من اي طرف يرفض الا اللي يجوا من طرفي المهم وانخطبت مره ثانية لواحد سيء سيء سيء طبعا اخته مدحته بس بابا لما سأل اكتشف مابيصلي ومو كويس المهم رغم كل العيوب وافقت وصارت ماما تعلق وقلت لها لو سمحتي ياماما اطلعي من موضوعي وراح تتم واتزوج والله يابنات اني ماانسى كيف وجهها تغير وبكيت وانقهرت
وقالت هذا جزاي ومن هذا الكلام قمت بكل قسوة ورحت لغرفتي وانا احس اني صح .


اللي حصل من اول اسبوع اكتشفت انه مدمن وكان سيء وفض وتطلقت منه وهو مادخل علي يعني انا بنت وقلت هذي حوبة ماما وعقوبة الله والحمدلله على كل حال .

على فكرة ماعندنا خبر قبل انه مدمن بس انه سيء الطباع وبابا حذرني واصريت على رايي

طبعا ماراح احكي هنا عن كلام الناس .

الفصل الرابع : تغيييييييييرت


بعد طلاقي طلع كلام كثير واكيد العيب صار علي انا وتحملت وسكت وماعاد صرت اكلم اهلي ابد بموضوع الزواج ولا عاد ارفع صوتي على ماما ووكلت امري لله وكتمت رغبتي في قلبي

وصلت الثلاثين وتجاوزتها وانا انتظر فارس احلامي من الاقارب ومن خارج الاقارب .

ولما عمري 33 جاني الفرج الحمدلله خطبوني بنفس السنة 2 دكاترة متزوجين وفرحت وانرفض واحد ورى الثاني اصلا ماتقدموا رسمي اهلي رفضوا الفكرة .
مادري ايش يبغوا بالضبط .؟

قلت لازم اعمل شي دخلت على مواقع التواصل الاجتماعي والله ما اتشرط ابغى الستر بس واول واحد كان صادق وجاد رجل خمسيني فقير ومديون وحالته حاله وافقت عليه واعطيته بياناتي وهو من مدينة غير مدينتي وجاء وخطب وانا اعرف اليوم اللي بيجي فيه وكنت انتظر جيته لما جاء بابا مستغرب يقول رجل ماتعرفه ؟ وماما قلقانه وش السالفة واضح اهلي مرتبكين لان مو بالعادة يجي رجل غريب ومن خارج المدينة
وانا ساكته وعارفة اللي حصل انرفض ولما جاء بابا قال شايب جاي يدور سلف ؟ وانا عارفة انهم يقولوا هذا الكلام قدامي بس مايدرون اني ادري بالقصة وانا اللي جبته طبعا هو قال اهل الخير دلوني .


بعدها فترة ندردش انا وماما خصوصا انت بنت عمتي معاي دكتورة وانخطبت من طبيب شاب مو متزوج والله اني احلى منها بمراحل وابيض منها وجسمي احلى بس هي اصغر وهو اصغر مني حتى وكنت احكي وخانقتني العبرة وضايق صدري ودمعتي نزلت وقلت اني بضاعة بايرة قالت لاتقولين كذا الزواج تعب واحنا نحبك ونبغاك عندنا ولانتخيل نعيش من غيرك واصلا قبل اسبوعين خطبتك فلانه لاخوها انا رفضت لانه متزوج قلت ليش ترفضين
انا كبيرة ومطلقة من تبين ياخذني ؟؟؟ وسكتت وسكت .


الفصل الاخير : سلمت امري لله والحمدلله على كل حال متفائلة رغم الالم
الان عمري 36 سنة بعد كل اللي حصلي عرفت اني مهما اعمل ماراح اقدر اغير قدري اللي كتبه الله لي سلمت امري لله ولكن اعرف امر مهم وهو ان الدعاء يرد القضاء ويمكن يكون فيكم من لو اقسم على الله لابره تكفون ادعوا لي واذكروني في ساعات الاجابة وقت المطر وبين الاذان والاقامة باخر ساعة من الجمعة وبرمضان عند الفطر
وجزاكم الله خير.

>>>>> ردود الأعضـــــــــــــــــــاء على الموضوع <<<<<
==================================


الله يستر عجميع بنات المسلمين


__________________________________________________ __________

الله يرزقك الزوج الصالح
اذا انتي من الرياض وﻻ تمانعي بالتعدد ودين وخلق ومشهور كمان يعني مو تعبانه تسالي عنه راسليني على الخاص واذا ماتبغين تعدد
لكي دعوه في سجودي بإذن الله


__________________________________________________ __________

ان شاء الله يرزقك برجل صالح وعوضك بحياة جميلة


__________________________________________________ __________

اجد ان موضوع حجز موضوع مو لازم يكون اصلا يما بنات ماتزوجت بسبب هذا موضوع منهم اختي الان عندها 40 سنه حجزت لابن خالتي وهو تزوج باخره وهي بحصرتها ترفض كل ليقدمها ... يارب يفرجها عليك وعلى اختي وعلى الجميع


__________________________________________________ __________

اختي العزيزه 36 سنه ليست بالكبيره وانتي لست عانس بل خطبك الكثيرين فاهم شي انك على درايه بمستواك العلمي والجمالي


وانا اقرأ موضوعك كل مابدر في فكري حل وجدتك عرضتيه واعظم حل هو ماتفضلتي به في نهاية موضوعك

لن اقول سوف ادعي لك لااا بل سأقول الحي بالدعاء اقرئي عن اداب الدعاء والدعاء المستجاب ( وهي ادعيه مأثوره عن الرسول في احاديث صحيحه من السنه النبويه لايرد بعدها الدعاء) وادعي في اوقات الاجابه وانتي ساجده( فاقرب مايكون العبد الى ربه في موضع السجود)

واجتهاد شخصي:
من المعلوم انه اذا دعا المسلم فان الله يستحي ان يرد يد عبده صفرا خائبتين فاما ان يستجيب له هذا الدعاء او يكفر به ذنب له او يخبئه له في الاخره،، وانتي تريدين الاولى ان يستجيب لك لذلك ادعي الله في سجودك قبل دعائك بالزوج الصالح بان يغفر لك ذنوبك من حيث لاتحتسبين ولايسلط ذنوبك على دعائكوقولي سيد الاستغفار وادعيه باسمائه الحسنى الغفور الرحمن
وادعي الله كذلك انه الكريم ليس ككرمه كرم جواد ليس كجوده جود فيعطيك الاجابه فالدنيا والاجر في الاخره ( اللهم اتني في الدنيا حسنه والاخره حسنه وقني عذاب النار)
وادعي الله ان يكتب لك الخير في الزواج( اللهم اعدل الامور لصالحي واجعل الزواج خيرا لي)
واذهبي عمره وفي مواضع الاجابه ادعي الله صدقيني عن تجربه لن ترجعي خاااائبه لو طرقنا باب انسان الله سبحانه وتعالى منحه صفة الكرم وطلبناه حاجه لن يردنا فمابالك لو طرقتي باب الله الذي منح هذا الشخص صفة الكرم الذي ليس ككرمه كرم وليس كجوده جود ادعيه وناجيه بانك ضيفته في بيته وهو الكريم الجواد فاكرمني باني لا ارجع من مكه الا متملكه واطمعي فالدعاء رجل صالح يخاف الله فيني واعيش معه بسعاده بين ذريه صالحه



وبالتوفيق اختي العزيزه