السلام عليكم و رحمة الله
انا ودي افتحلكم قلبي على الاخر وربي ليا 3 شهور وانا ابغى اكتب و متردده انكم تحكموا عليا زي باقي الناس اللي حواليني ..
انا مشكلتي الاساسيه ماما
ومشكلتي طول بعرض استحملووني بليييز
انا عمري 20 سنه و الى يومكم هدا و انا انضرب من ماما .. ادري بتقولون ماكلنا انضربنا وهادي امك و استحملي .. لكن ربي يشهد عليا مو قادره استحمل اكتر من كدا احس فيني اكتئااااب بشكل مو طبيعي ..
بدايت مشكلتي من زمان امي و ابويا ف مشاكل و يتصالحو يوم و 10 يتخاصمو وانا وسطهم و تروح تقول لاقاربي اني انا ادخل بينهم واني انا سبب المشاكل و تقولي انتي مو بنتي انتي طبينتي و دايم تسبني سب وربي استحي اقولو و تقول اني حق رجال وكدا
وربي اكتب وانا ابكي من القهرررر
امي عمرها ماحسستني لا بحنان ولا اي شي وربي حتى ناسيه اخر مره حضنتني حتى لما انجح وكدا تصافحني و تسلم ع خدودي بابتسامه واضح بدون نفس
و ابويا يحبني وانا ادري لكن كل ما تشوفو يمزح معايا او انا امزح مع اخواني تقلب وجهها و تسوي مشكله كبيره مررره ولما اكون خارجه عزومه و متكشخه تجي تطالع من فوق لتحت و تشمق
قبل 3 سنين ام صحبتي كلمتها انو تبغاني لولدها بس بعد ما انا و هو نخلص دراساتنا
قالتلها ان شاءالله و كلمتني وقالت انها رافضه وانا قعدت ابكي و اقولها ابغاه بما اني اعرف اخلاقو و اعرف صفاتو من كلام صحبتي عنو
وبعدها رضيت وقالت طيب لدرجة مره ف السوق كنت اقولها ابغا كدا و كدا لزواجي وقعدت تقول دي الاشياء عليه هوا < يعني موافقه
وانا اخر سنه ثانوي اتقدملي واحد عمرو 35 وانا 18 وهو مو سعودي و انا سعوديه وانا بدخل جامعه و هو حتى م اخد دبلوم بس اللهم عندو محلين وربي اللي شاهد عليا انها ضربتني لما تعبت لما رفضت و قابلت امو و اختو غصب عني والحمدلله ماصار نصيب ولا شافني ولا شفتو .. ومن بعدها صارت تعايرني لاني ابغا اخو صحبتي بالحلااااال ليش الحلال صار صعب بدل ما انها تغصبني ع واحد ما ابغاه و اسوي شي حرام
المهم السنه اللي فاتت كانت بتطلع تحج وقبل ماتروح سوت انها طيبه و قالتلي انا و ابوكي موافقين لو جاكي هدا اللي تبغيه وانا عندي علم من اول انهم بيرجعو يتقدمو رسمي بداية السنه بس ما اتكلمت .. بعد ما رجعت من الحج رحنا ملكه وشافوني ناس وقعدو يسألو عني رحعت البيت ابكي من القهر ما ابغا لكن هيا عرفت انو مرتاحين و ضربتني لين جا بابا بعدها عني و بعدها اتصلت جدتي وقالت في ناس بيجوكم وما ادريي ايه و كان قبل اختباراتي بالجامعه ب 3 ايام < م اهتمو انو نفسيتي بتتأثر واني م حركز ودا اللي صار وجبت معدل سيء جو الناس و قالو في شوفه انا قلت اللي ربي كاتبو بيصير ..
بعدها بكم يوم اتصلت ام صحبتي تقول لماما انو نبغا بنتكم تخيلو اش تقولها تقولها بنتي مايلتلكم لكن ابوها مو راضي و في ناس متقدمين يبغاهم انا قعدت ابكي و كلمت جدتي تتوصتلي و قعدت تهديني و قالت بكلم الناس يكنسلو و بتاخدي اللي تبغيه ههههههههه اللي يضحك بعدها بكم يوم قعدت تقول لماما انا ما انزل كلمتي زي ما انا جبت الناس لكم بيكون في شوفه وربي شاهد عليا دخلت على الادمي وعيني مورمه من البكا لكن كنت اضحك غصب عني و لما خرجت من الغرفه ورايحه ع غرفتي منهاره بجد ومو قادره اكلم احد جدتي نادتني و طنشتها صارت تصيح بكل صوتها و تسبني و الناس سمعوها
(
و راحو و قعدت تقول لماما بنتك مهي متربيه تقولي انقلعي و ربي وربي ينقطع لساني ادا انا قلتلها كدا بجد و مام صارت تضربني وبابا ماكان في ولا احد فكني من يدها و اليوم اللي بعدو نفس الشي بابا جا و شافني وداني المستشفى ركبتي انجرحت و التهب الجرح و رجلي التانيه ورمت وما صرت اقدر امشي تمام شهر كامل و حرمتني اني اروح عند صحباتي او حتى اني اخرج مع بنات خالتي و بالنهايه الناس دول كمان قالو مافي نصيب
وربي جسمي معلم من كل مكان و جروح بكل مكان و استحي لما احد يسألني اش دا و بس اقول اطيح او خبطت بشي ..
اخر مره وهيا تضربني اتصلت على الشرطه لاني بجد حسيت بموت لكن سحبت السماعه قبل ما اقول العنوان وربي اكرررررررههها لا تقولو امك وما ادري ايه هيا ما تطييقني ولا انا اطيقها انسانه منافقه قدام الناس اطيب منها مافي و تسوي انها تدلعني و لما نوصل البيت تقعد تخاصمني ع كلام تافهه يكون بيني وبين بنات خالتي او اي احد ثقتي بنفسسسيي مررره اتهدت وماصرت اثق بأحد و نفسيتي مرررره تعبانه ومو عارفه اش اسوي .. اقاربي شايفيني مدلعه لاني البنت الوحيده لكن مايدرو بشي لاني بس امزح و اضحك و جدتي صصايره حتى لما اسلم عليها تقعد تقلب وجهها و ما ادري ايش و زوجة خالي بس تقعد تدقق عليا بأشياء غريبه و توسوس لماما و ماما تجي تسويلي مشاكل لدرجة انها تقول لخالتي لا تخلي بنتك تمشي معاها لانوو هدي وراها اسرار مو كويسه
.. انا مو عارفه انا اللي غلط ولا هما غلط و لا اش اسوي لا تقولي اتقربي لامك تعبت وانا اتقربلها و اجي اسويلها مساج ولا اشتريلها هدايا ولا اي شي و لما تعبت ف المستشفى بيت عندها و كل ما تطلب شي اسويه و اخر شي تقولي انتي جيتي معايا المستشفى عشان تبعدي من اخوانك
جربت كل شي لكن والله مانفع
..
اذا مارديتو عليا ولا عندكم كلام تقولوه بس ادعولي دعوه وحده على الاقل ان ربي يريحني وراح ادعي لكل من رد عليا وشكرا للي لسا يقرووا ههههههه بالكم طويل
تكفيني دعوه بس .. :) الطبيب يجيب
الطبيب يجيب
رد مع اقتباس
