عنوان الموضوع : معاناة مطلقة مظلومة!!!! -لصحتك
مقدم من طرف منتديات نساء الجزائر

معاناة مطلقة مظلومة!!!!



السلام عليكم ورحمة الله وبركاته

اعتبروا موضوعي فضفضة او اي شي

لكن ابغاكم تقولون لي انا وش سويت غلط؟

علشان يحصل لي كل هذا؟؟؟

وش سويت يرحم والديكم قولوا لي وش سويت حتى تموت كل احلامي بغمضه عين؟؟

من بلغت ال15 سنة وانا احلم واحلم واحلم بالحب والحياة الزوجية الجميلة

كنت ولا زلت عاطفية رومانسية حساسة

كنت احترق عند مشاهدتي لمسلسل رومانسي واموت الف مرة

فتركتها لانها كانت تعذبني بشدة وتدمر نفسيتي

وانتظر اللحظة التي اتزوج فيها على احر من الجمر

انتظر اللحظة التي اضم فيها زوجي وانام بحضنه

كنت افكر بهذه الامور اكثر من عشرين مرة باليوم

تقدم لي واحد عمره 29 سنة وانا كان عمري 24 سنة

تساءلت وقتها ليش تاخر كل هالسنين؟

انا تاخرت و وصلت 24 لقله اللي خطبوني

هو رجال ليش يتأخر؟؟؟

وسألت اخواني قالوا عادي كل الشباب ويكون نفسه الخ

قلت طيب

تواصلوا الاهالي وجاء الخاطب وابوه لزيارتنا

بعدها قال لي ابوي واخوي الكبير

شكله عاقل وفاهم ورجال ومن هالكلام

وانه موظف وراتبه عالي مرة

مرت الايام واهلي قصروا في السؤال عنه مررة

اقولهم روحوا اسألوا امام مسجدهم

اسألوا عنه بالشغل اسألوا جيرانه

قالوا جلسنا معه وماعليه كلام وموظف كبير وش تبغين اكثر!!!

اهلي كانوا مو مهتمين مرة ويبغوني اتزوج

لان عمري 24 والبنات بعمري متزوجات

وانا خطابي قليلين تمر الشهور ما انخطبت

مع اني اجتماعية مرة ومافيه عرس ما حضرته

ومهتمه بنفسي وجسمي وشكلي اهتمام مو طبيعي

على اي حال .. انا ما كان بيدي شي

لو ما وافقت عليه وخطبني بعده واحد

نفس الشي اهلي ما راح يسألون كثير

خفت انها فرصة واضيعها من يدي

تمت الملكة وياليتها ما تمت

اسلوبه همجي وجلف وخشن

ويطلع مشاكل من راسه ويهاوشني كثير

كنت مرنه معه واعتذر وامشي

الناس في الملكة يسولفون بالساعات

وكان ما يسولف معي ولا يبيني اسولف ولا اكلمه

بعد الفرح كنت فرحااانه

شهر عسل بأوروبا

وبيت حلو وكبيير واثاث فخم مرة

ويعطيني مصروف شهري كبير

بس ما مر ايام الا طلعت لي مصااايب مو مصيبة

اول شي عرفت انه يدخن

وانا ما اطيقه ولا احد من اهلي يدخن

يشيش ويشرب معسل ومادري ايش

ما اعرف الامور هاذي بس بسببها ريحه فهمه ونفسه ما تنطااااق

مرة نام في السطح يوم جيت اصحيه حصلت طيور ميته حوله

لانه كان نايم وفمه مفتوح وكل ما مر طير طاح ميت من ريحة فمه

هههههههههههههههه امزح

طبعه واخلاقه من اسوأ ما يكون

لسانه اوصخ منه مافيه

يسبني ويسب اهلي يوميا

عصصصصبي جدا

كل لياليه سهران بالاستراحة مع اصحابه

ولا يعرف المسجد ولا الصلاة

ما عمري شفته يتوضى او يقرا او مشغل قرآن

غير اللي شفت بجهازه

اكتشفت له ماااضي اسود جددا

سفرات برى وسهرات ومغازل اسواق وترقيم

كلها شفتها بالصور والمحادثات

انهرت اصيح وابكي وانشل جسمي كله ايام

كيف خليت مثل هالانسان يقربني

كيف صار زوجي اصلا

عرفت ليش عنده ضعف جنسي وبارد معي

عرفت ليش ينتقد جسمي وينتقد ادق التفاصيل

اشياء انا نفسي ما اعرفها عننا الحريم

وليش ما رضى فيني ولا عجبته

عرفت ليش تاخر عن الزواج اصلا كل هالوقت وهو موظف

عصب ليش افتش جهازه وضرربني ضرب ما انساه

وانا ما فتشت احتجته ضروري ويوم فتحته

حصلته جالس ينسخ ذكرياته الوصخه لهاردسك

يعني حصلتها قداامي صور ومحادثات

ومن بعدها صار يضربني دايم لاتفه الاسباب

عيشتي معه كانت جحيم من قبل ما اشوف اللي جهازه اصلا

اجل احد يصحي زوجته من النوم ب قومي ياحيوانه؟؟؟

احلاااامي كلها بالزواج والحب والحياة الجميلة الرومانسية انتهتتت

اصلا نسيتها صرت اتمنى بس يعاملني زين

مابي كلمة حلوة مابي رومانسية مابي يضمني

مابي وسامته مابي فلوسه مااابي يدلعني بفلوسه

تمنيت لو بس يعاملني زين وما يضربني

تمنيت احس اني زوجته واني اهمه لو مرة وحده

تمنيت لو انه يخاف الله فيني

ما كملت معه ثلاث شهور وتطلقت

واحمد ربي ما حملت

مافيه مخلوق يقدر يستمر معه مادري كيف اصحابه متحملينه

ما ذكرت كل شي عنه لان لو باتكلم فيه ما خلصت

اهلي يقولون لي اصبري وحاولي فيه ومن هالكلام

بس يوم شافوا علامات الضرب علي وقفوا معي وتطلقت منه وعمري 25

وهنا بدأت معاناتي

كل اللي يتقدمون لي متزوجين

طيب لييش لييششش انا مظلووومة

انظلمت من اهلي ما سألوا عنه زين

ثم انظلمت من طليقي الله لا يوفقه ويذيقه مما اذاقني

ثم اللحين انظلم من المجتمع

وانا ما سويت اي شي غلللللللط

حتى تفهمون شعوري

تخيلي يا بنت انك انخطبتي

وكل شي كان حلو بس بعد الزواج اكتشفتي المصايب

مصايب ما تتعدل تزوجتي واحد مريض وتطلقتي بشهرين

واللحين محد يطق بابك لانك مطلقه!

واذا حصل وانخطبتي صار واحد متزوج!!

متخيله كيف؟؟

والله محد يفهم شعوري الا وحده عايشه بنفس الوضع

والجمرة ما تحرق الا رجل واطيها

حاولت اشغل نفسي وغيره بس لا نلعب على انفسنا

الزواج اهم شي بالحياة ولا فيه اهم منه

بعض النساء المطلقات مثلي يكابرون ويقولون بنعيش حياتنا

بس انا مو منهم

كيف يعني اعيش حياتي كلها بدون زوج؟ ولا عيال؟؟؟

انا احتاج حنان احتاج حب احتاج واحد يشاركني حياتي

هذي طبيعة بالبشر ولا ينكرها الا غبي او غبية

انا مكسوره وتركت الاهتمام بنفسي واحس اني مت قبل يومي

وصل عمري 28 سنة يعني لي ثلاث سنوات مطلقه

مادري هل استسلم واتزوج متزوج؟

وانسى الحياة الزوجية اللي دايم من مراهقتي احلم فيها للآن؟؟

او انتظر؟؟ بس وش انتظر

انا مادري المطلقين وين يختفون احس المجتمع مافيه مطلقين

على اي حال انا كتبت مشكلتي ابغى اعرف شي واحد

انا سويت شي غلط حتى اصير كذا؟؟

وكتبته علشان انصح كل بنت تنخطب

اسالي عن خطيبك بكل مكان

اعرفي اخلاقه زييييين وطبايعه ومع مين يمشي

اسألوا عنه في المسجد واسألوا جيرانه

اذا كان يصلي واخلاقه حلوة ويمدحونها

لو عاطل نصيحة مني تزوجيه


كتبت مشكلتي وانا محيوسه كثير ومشتته سامحوني

خاصة الاخطاء الاملائية مع الدموع ما اشوف زين

>>>>> ردود الأعضـــــــــــــــــــاء على الموضوع <<<<<
==================================


يا عمري انتي والله حاسه بالقهر والألم ومبين من أسلوبك بالكتابة
أختي الحبيبه اول شي تجربتك اللي راحت انسيها واحمدي ربك طلعتي
بدون أطفال من هالانسان الواطي وكل اللي صار لك والله على اجر لأنك
كنتي مظلومه معه هالشخص اللي مايخاف الله وربي بعوضك احسن منه
حبيبتي بسالك سؤال وجاوبي نفسك بصراحه وبدون عاطفه
البيوت متروسه بنات بالعشرينات
والثلاثينات وما تزوجوا إلى الآن هل تتوقعين اللي تفكر تخطب لوالدها تخطب
وحده مطلقه لوالدها والا بتخطب له بنت ماتزوجت حبيبتي مؤ معاناتها تقدم لك واحد
متزوج يعني معاناتها انك ناقصه ولا فيك عيب والله لا بس فكري لو تزوجتي
شاب اول مرا يتزوج ماتخافين يعايرك كل شوي ويقول احمدي ربك رضيت فيك غير أهله
ونظرتهم لك حبيبتي انتي تبين تبديد حياه جديده
وعمرك الحين 28 سنه يعني مؤ صغيره ليش اعتراضك على الزواج
من رجال عنده مره اهم شي اذا الرجال طيب
ويخاف الله وقادر يفتح بيت ثاني واهم شرط تشرطون عليه بيت بروحك استخري
الله وتوكلي عليه لأتكابرين وتقولين مابي رجال متزوج ترى الحياه فرص يالغاليه
والبيوت والله متروسه بنات وانتي بوضعك وحاطه شروط انا مااقلل من قدرك
بس والله صرنا بزمن الزواج قليل والبنات كثير والعنوسه في زياده غير المطلقات
وعددهم كل يوم يزيد والله يرزقك بالزوج الصالح ويريح قلبك


__________________________________________________ __________

قلبي معك حبيبتي و الله يعوضك خير,و انت لم تخطئي باي شئ لانه اهلك ما سالوا عن الخاطب جيدا,و لكن اقول لك انه قدر قد عشتيه فلا تياسي و لا تبكي على الماضي,و اكيد انك تجدين الزوج المناسب سواء كان متزوج او غير دلك,و نصيحتي لك الا ترفضي كل المتزوجين فمن يدري يكون فارس احلامك بينهم؟وفقك الله و اهتمي بنفسك و احمدي الله انه ليس لك منه اطفال.


__________________________________________________ __________

الله يفرج همك ويرزقك الزوج الصالح ويعطيك أجر الصابرات

أختي ليش ما فينك تبني أسرة حلوة وسعيدة مع رجل متزوج ؟؟؟ قد تكوني زوجة ثانية صحيح ولكنك سعيدة وهذا ما تطمح له النفس البشرية

مثل ما قالت الأخت بسمة الشوق تتوقعي اللي بدها تخطب لأبنها تخطب
وحده مطلقه والا بتخطب له بنت ماتزوجت ؟؟؟

وبالتوفيق أختي.


__________________________________________________ __________

ي قلبي وروححححي انتي 3>
وربي كسسرتي خآطري وبودي كذا أضممممك لين مدري :''
والحمدالله انكك كفشتييييه بالبدايهه قبل لاتحملي ! وربي نعممممهه
والي صار صار ي قلبي ، كل شي مقدر ومكتووب .. وماتدرين وين الخير ووش كاتب لكك ربي ؟
أما عن الي يتقدموون لك متزوجين.. ترى عادي ي عسل وانتي مو اول تتزوج كذا ي الغللا
وربي يمكن تعيشين مع متزوج احححححلى عيشه وتشوفي السعاده والهنا الي تتمنيه ي حياتي :'') !
ربكك كريييييييم وراح يعووضك بواحد احسن منه ان شاء الله بس انتي تقربي له.. ادعي بصلاتكك
ولاتحطين ع اهلكك اللوم ي روحي يمكن مو قصدهم بس كانوا بحسن نيه ويبون يفرحووووون فيكك ي قلبي !
ع العمووم ي حلوة اهتمي بنفسك لكك انتي اهتمي بشخصيتكك وصيري أقوا من كذا .. لا تخربي نفسكك عشان واحد مايستاهلك ولايستاهل ظفرككك بعد وهدم احلامكك.. وترى كلنا مثلكك نححححلم ونتمنى !
لكن لعلها خييييره ي عسل لاتيأسي من روح الله ولاتقنطي رحمة الله وااااااسعه.. ربكك كرييييييييييم !
ونصييييحهه لك ي قمر اذا تقدم لك واحد ولو متزوج استخييييييري مرتين وثلاث وادعي بالصلاه من قلبكك !
ولا تضغطين على اهلكك كثيييير بس هي كلمه ولاتكررينها : ما ابي التجربه تكرر علي لوسمححتوآ
واذا فيه خيييير ربي راح يكمل حياتكم وييسرها واذا فيه شر راح يصرفه عنكك فلا تيأسي وتخنقي نفسكك ي سكره
وياااااااارب يعووضك بأحسسسن زوج وتنبسطططين معآه وتتهنوآ وتخلفوآ احححلى أطفال :'')))
موووووفقه ي عيني .. احبتسسسس


__________________________________________________ __________

الله يفرج همك يارب
ويرزقك بالزوج الصالح عاجلاً فير بأجل وجميع بنات المسلمين
الله يسعدك ويزيح همك




سبحان الله وبحمده سبحان الله العظيم
استغفر الله ربي واتوب اليه