قريبا من السنه ولم يلتئم جرحي مجابة
عنوان الموضوع : قريبا من السنه ولم يلتئم جرحي مجابة
مقدم من طرف منتديات نساء الجزائر
قريبا من السنه ولم يلتئم جرحي
السلام عليكم ورحمة الله وبركاته
صباحكم سعيد باذن الله
لا اعلم هل هي مشكله ام فضفضه ام ماذا
لكن م اعرفه جيدا انني بحاجة لأن ابكي او اتحدث
ويشهد الله علي كل اللي راح اقوله حقيقي
يوم كنت صغيره بعمر ال 15 تقريبا سمعت امي واهي تكلم وحده من صاحباتها
وتقولها ان خالتي تبيني لولدها احب اسميه مثلا ياسر ! وامي ردت انو انا لسى صغيره ومن هالكلام
المهم كنت طفله وحسيت هالشيء ابد مو حلو وانعكس هالاحساس على معاملتي لخالتي كرهتها وكرهت ياسر بشكل فضيع
وتصرفاتي كانت طفوليه جدااا وغبيهه
وطبعا بعد مامليت كلمت امي قلت لها اذا تبيني احب خالتي خليهم يشيلوني من راسهم
امي انكرت وانو مافيه شي ومادري ايش وكلام عجزت اصدقه
المهم مرت الايام وكبرت شوي صرت بال17 ماعدت طفله وياسر تقريبا بالـ 26
وبدت تلميحات اخوات ياسر لي من طقة*زوجة اخويي*تغطي لايشوفك اخوي وينجن*ياسر قال وياسر فعل
او يتكلمون عنه ويطالعون فيني يعني يجسون النبض
اشياء كثيره يسوونها يعني يحاولون يعلقوني فيه بس انا كنت اكرهه مادري ليش
حتى كرهت نفسي من شدة كرهي له وهو مريض واحيان يدخل العناية المركزه
لكن قلبي كان حجر تعرفون شلون حجر ! يعني اقول وش عاد اذا دخل ؟ زي كل مره بيطلع
كنت اكرهه نفسي كثثثيير على هالتفكير والشعور تجاهه واللي قاهرني ليه انا اكرهه !
ماقد ضرني ولاقد سوا شي يضايقني باالعكس كانت نظراته لي \طبعا نتغطى لكن بالصدف اقصد
تبين شيء كبير بقلبه لي بس مع ذلك كله بس احاول اطلع عيوبهه
مادري وش احس فيه ذاك الوقت كان من الافضل اخليه بحاله لاا احبه ولا اكرهه !
المهم قبل حوالي سنه كان بيوم العيد كان يوم جميل جداا ويوم جا المغرب
الا اجي اجلس مع امي وزوجة عمي توني توازنت بجلستي
الا اسمعهم يتكلمون بصوت واطي زوجة عمي تقول (مادري يقولون ياسر توفى )
شعوري كان مادري شلون كنت ابين لهم العكس اكرهني يعني حتى بهالخبر بعد اكابر !
كنت اقول بنفسي لا يمكن بس دخلوه العنايه زي كل مره وهذولا ماصدقو خبر
المهم رحت اخذت جوالي بكلم خواته بَ البي بي يوم فتحته الا اشوف خواته كلهم يدعون له بالجنه !
رحت وكلمت وحده منهم وجلست اتكلم معاها قالت ادعي له وانا قمت اقول تكذبين ومن هالكلام
قالت م اكذب ادعي له يافلانه , تقطع قلبي صياح زي المجنونه كنت اصيح بس للحين ماني مصدقه
شلون توفى وهو امس جاي لبيتنا ! يعني اصيح بس من الفكره ولازلت مو مصدقه
وتكلمني اخته الثانيه بالجوال قلت يافلانه والله يكذبون وهي بس تهدي فيني تخيلو اخواته
كانو ماشاء الله قويات بدل ما اواسيهم واهديهم صار العكس كانو يحاولون يهدوني
واللي ف بالي حقارتي وكرهي له ندمت كثييييير وطول الفتره قبل يدفنونه كنت اتخيل
واقص للناس اللي حولي قصص ناس جاتهم غيبوبه وظنو انهم ماتو ثم صحو
يعني كنت اتخيل ان ياسر خلاص بغيبوبه زي كل مره وبيصحى وقت مايغسلونه
اول يوم وثاني يوم كنت عايشه على الماء بس !
وبس ابكي يعني جزعت جزع الله يتوب علي ويغفرلي بس
لين جو يصلون عليه انتظرت وقت طويل بعد ماصلو انتظر خبر انه كان بغيبوبه وصحى !
ولما غابت الشمس خلاص يأست
وطول ايام العيد كنت حابسه نفسي بغرفة طول النهار بس اصلي وانسدح وابكي
وعشان خاطر امي بخامس ايام العيد تقريبا لبست ملابس العيد ومن لبستها وانا احسها
نار تحرقني
مرت الايام وانا احاول اتناساهه واعيش حياتي بس كل م اذكر كرهي له يوم كان عايش
ارجع الوم نفسي وابكي وهذا حالي
وبثالث يوم او ثاني يوم من العزا
اصريت على امي اروح معاها للعزا ! كنت بشوف العزا واقنع نفسي
طبعا رحت وكانو خواته ماشاء الله هادين كثير عكسي انا اللي حتى (عظم الله اجرك)عجزت اطلعها من الخنقه
والكل كان يلومني يعني يوم مات بكيتي عليه ويوم كان حي وانتي تكرهينه!
المهم بعد شهر تقريبا او اكثر رحنا زياره لبيتهم وهذي اول مره ادخل بيتهم بعد العزا
كنت بس انتظره يدخل او يتنحنح او يسوي اي شيء يدل على وجودهه
والكل كان يسألني وش فيك ؟ وش مضايقك؟ويحاولون يونسوني بَ اي طريقه
مرت الايام والشهور وعديت مرحلة الندم وصرت بس ادعي له كل ماذكرته
واللحين افكر ان كرهي له كان خيره ! يمكن ربي حط هالكرهه له بقلبي عشان م اتعلق فيه
وقبل كم يوم كنا بجمعه احنا وخوالي وطبعا معنا اهله
لما جينا نطلع مالقينا احد يودينا
قالت امي بنروح مع خالتي قلت انا مين يوديناا فلان!!!(اقصد زوج خالتي)
طالعتني خالتي بنظرهه مافيها ملامح قالت لا ياسر !
انا مادري وش اقول وقتها انربط لساني او مادري شلون
قلبتها لمزح قلت بسم الله علي ! >>يعني كيف بنروح مع ميت !
المهم هي قالت مادري عنك يعني من فيه غير فلان(زوجها) بيودينا
اانا عجزت اتكلم لو بتكلم كنت ببكي لذلك عطيتهم ظهري وطلععت
جلست افكر يعني يمكن هي بس جابتها مزح يمكن ويمكن
بس احس انجرحت كثيييرر احس رجعت لَ اول ايام وفاته
صح هي امه وحزني مايجي ذره من حزنها بس طريقتها كانت جداا موجعهه
اسفه طولت عليكم بس لاشعوري صرت اكتب ودموعي تحرقني
مادري وش اسوي ابي انساهه انا ماحبه لكن طاريه غصب يخليني ابكي
غصب الوم نفسي ليه اكرهه وليه وليه كأن لي يد بالمحبه او الكره
كلها من الله بس عجزت اقنع نفسي
انا والله مابي غير لما اذكره ادعي له وبس ليه اعذبه بالبكا وهو ماراح يرجعه اصلا
لو ماكان عندكم حل يكفيني اللي بيرد بدعوه لهه بيكون اسعدني جدا : )
>>>>> ردود الأعضـــــــــــــــــــاء على الموضوع <<<<<
==================================
اسال الله لك بالصر والثبات
__________________________________________________ __________
انت كنت من اول يوم بتحبيه بس كنتي تكابري وبس مات اظهرتي هاد الحب
الله يصبرك
__________________________________________________ __________
يالله قلبي تقطع من هالكلام...
ذكرتيني ببنت خالي نفس القصه تقريبا بس هي ملكت وحددو الزواج وهي بعد تكره خطيبها اللي هو ولد خالتي
لدرجه كل ماياخذ رقمه ويتصل عليها تروح تغير رقمها لرقم جديد كان يعاتب امه وخواته يقول مين غاصبها علي
لان ابوها يصير خاله وامها تصير عمته..
المهم تعب بالكلى وراح يتعالج خارج المملكه وهي ولا على بالها عاااادي جدا وعايشه حياتها بالطول والعرض
ويوم من الايام جات المصيبه علينا بخبر وفاته وهو يتعالج والله ماتتصورون هي اللي انجنت اكثر من اخواته وامه
وطلبت تروح له تسلم عليه لكن الجنازه جات للمملكه علشان الدفن يالله يابنات ماتتصورون المنظر اللي صار
تبوس رجوله علشان يسامحها بحكم انه خطيبها وانها مو معطيته وجه في حياته..
والحين مسكينه مثل الهستريا فيها مو راضيه تقتنع باللي صار لانها تشوف انها السبب..
لكن مثل ماقلتي ياقلبي انه فعلا خيره من الله ان قلبها ماتعلق فيه وحبته بس عسى الله يشفيها ويعوضها خير يارب
__________________________________________________ __________
بس حبيت اسال يا اختي ايش كان مرضه؟؟ اذا ما عليكي امر تجااوبي...
سبحان الله وبحمده سبحان الله العظيم
__________________________________________________ __________
صاحبة المشكلة
ركزي معايا عشان الحزن لا يقتلك و يسيطر عليك و الموضوع تافه و بسيط
هذا الشخص رجل غريب عنك سمعتي و شفتي من أهلك و أخواته و منه شخصيا تلميحات إنه يباكِ زوجة
و إنتِ رافضته و تكرهيه لكنك - و حطي تحتها مليون خط - ما أسأتي له لا بقول و لا بفعل
يعني لا سبيتيه و لا تكلمتي عنه بشيء سيء ..
كونك ماحبيتيه فالحب من الله و منتي مجبرة تحبيه و لاااااا تعامليه بحب مادمت إنه رجل غريب عنك
لو كنتِ مملكة نقول إنه زوجك و له حق عليكِ .. لكنه لا زوجك و لا شي فليش تلومي نفسك لهذي الدرجة ؟
هذا كله من الشيطان يباكِ تعيشي في دوامة من الحزن , كل ماتخرجي منها يرجعك فيها
خليكِ قوية وقرري إنك تنسيه و حطي في بالك مادامت كرهك ماتعدى قلبك و جرك لأشياء سيئة
فإنتِ مو غلط .. لأنه مو بيدك و لا بإرادتك تحبيه و لا تكرهيه هذا شي غصب عنك
و الزواج مهو بالغصب .. رفضتيه و يعني ؟ كرهتيه و يعني ؟
رد مع اقتباس
