عنوان الموضوع : قصة حمل بعد عقم ست سنوات لتأخر الحمل
مقدم من طرف منتديات نساء الجزائر

قصة حمل بعد عقم ست سنوات



السلام عليكم
اليوم جبت لكم قصة حمل بعد عقم ست سنوات من احدي المنتديات
بقولكم قصتي انا صارلي من تزوجت 5 سنوات ولي سنتين بالمنتدى طبعا قسمي اهو قسم تأخر الانجاب
والحمدلله ماخليت ولا دكتوره الا رحت لها برتبهم من الاول الى الاخير منى موسى طيبه كلينك و مهجة البدر
نصر هيبه وعالية الفضلي وماجده اليتامى واخرهم فوزية القطان ..
وكل الدكاتره مشوارهم واحد بالتحاليل والحمدلله انا وزوجي سليمين وكلهم اقروو علي التلقيح الصناعي وكنت انحاش
لاني خايفه وابي طبيعي ماكنت اعرف شنو التلقيح الصناعي ويوم وصلت لماجده اليتامى اقنعت زوجي
وشرحت له التلقيح وسويناه عندها والحمدلله ماكو حمل ويوم رجعنا لها عقب التلقيح قالت ان فيني هرمون حليب
حيل مرتفع وقلت لها ليش سويتي التلقيح وانتي تدرين ان الهرمون مرتفع .. قالت حريم وايد يحملوون وفيهم حليب
قلت لها لو انا من هذولا الحريم اللى قلتي عنهم جان حملت طبيعي على الاقل .. وطبعا زعلت عليها ورحت لفوزيه القطان
في شهر 3 اللى طاف اول مراجعه عند شيماء طلبت مني تحليل الهرمونات ويوم سويته طلع عندي هرمون الحليب مرتفع
بالالاف يعني حيييل مرتفع وقالت لي ابي تسوين لي رنين مغناطيسي للغده النخاميه .. وسويت الرنيين
بمستشفى الهادي بــ 160 دينار وطلع عندي تضخم بالغده النخاميه بسيط 2*2 اهو اللى مسئول عن هرمون الحليب
وعقبها رجعت لفوزيه وشافت لتقرير وقالت لي علاجج بطول عطتني نص حبه لهرمون الحليب اكلها كل اسبوع
وقالت لي كل ثلاث اشهر سوي تحليل الحليب اذا طلع كل شي اوكي تعاليلي ..
والحمدلله استمريت عليهم ولا نسيتهم ..وكل ثلاث اشهر كنت اروح اي مختبر اسوي تحليل للهرمون الحليب فقط
كان وقته الحمدلله في نزول بالهرموون .. ويوم من شهر 10 نزل هرموني الحمدلله والشكر لك ياربي
رحت لفوزيه ويوم شافت تحليلي قالت اوكي وسوت لي عينه للرحم والحمدلله سليم
وبعدين قالت لي انتي تأخرتي حيل بالحمل خلينا نبتدي اطفال انابيب لان عمرج صغير ونجاحها 50% وقعدت تقنع
فيها انا وزوجي قلنا لها بنفكر ونرجع لج ..وطالعنا منها ..
ومر شهر لا انا ولا زوجي يبنا الطاري كلش ونزلت الدوره بتاريخ 7/11/2017 حيل ضاق خلقي
وكنت بالمزرعه عند اهلي وعماتي وقالت لي وحده من عماتي " نينا " ودي انصحج قالت لها قولي

قالت ابيج تستغفرين باليوم 1000 مره بالمعني بعد كل صلاة 200 مره ويصير المجموع باليوم 1000
وقالت لي هذي الايه
((فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا يُرْسِلِ السَّمَاء عَلَيْكُم مِّدْرَارًا وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا))
سبحان الله وقتها حسيت بهزه بجسمي موطبيعيه
وقالت لي بعد ان الله ينزل بالثلث الاخير من الليل الى السماء ويقول لعباده هل من داعى استجيب له وقالت لي الثلث الاخير بين 1 بليل الى 3 ...وقالت ادعي ربج والحي عليه بالحمل
وقالت لي اقري سورة البقره قد ماتقدرين وتصدقي بنية الحمل ..
من قالت لي هذا الكلام جزاها الله الف خير وانا حاسه ان الله بيرزقني قريب وقعدت انطر نهاية الدوره لاني ببلش بحملة الاستغفار بنية الحمل ان شالله ..
ودق على زوجي بنفس هذا اليوم وقال لي انه ضايق خلقه وخلينا باجر نروح فوزية نسوي الحقن المجهري
ترجيته وطلب منه بس هذا الشهر يخليه لي والشهر الجاي نروح استغرب وقال ليش حطيت عذري عرس اخته بأول شهر 12
ماقلت له عن الاستغفار.. قال لي مو مشكلة دوره شهر 12 نروح قالت له اوكي ...
وبعدها بجم يوم اخذت ماي زمزم من امي وشريت الرقيه الشرعيه كتيب صغير
وغيرت اشرطة سيارتي بقران سورة البقره احمد العجمي صوته يريح ..
ووقتها طق مطر قووي على الساعه 2 بليل وقعدت ابجي وادعي والح ان ربي يرزقني بهذا الشهر واستمريت على هذا الحال
تقريبا 28 يوم والله يابنات كنت ما اطلع وكنت دايم ادعي وحتى وانا قاعده تحت عند حمولتي حاطه سورة البقره بتلفوني وسماعات وقاعده اسمعها .. وكانو يسألوني ليش حاطة سماعات قلت لهم جذي كاشخه ..ماقلت لهم اني اسمع سورة البقره
وكنت اشرب ماي زمزم وقبل لا اشربه كنت ادعي اذا كان فيني مرض الله يشفيني
ويوم دورتي المقرر اهو نفسه عرس حماتي وياي بالبيت وبنفس اليوم اختي دقت علي وبشرتني انها حامل وماشاء الله واهي توها عروس قامت تدعي لي وتسألني سوي حقن مجهري اتذكر تسولف وياي واهي مخنوقه ما الومها ..طبعا نسيت الدوره والله لهيت بالعرس وناسه وثاني يوم
هم استقبال لها ومرت الايام ..تقريبا بالضبط 4 ايام من تأخر دورتي للعلم من تزوجت ماشاء الله تبارك الرحمن ماعمره تخربطت دورتي كانت تمشي وياي بالايام .. وصار يوم 9/12/2017 قعدت الصبح وكان معدتي ثقيله واحس بعوار صوب
ظهري وصوب المبايض قعدت زوجي قلت له احس بعوار قال لي هذي دورتج صبري وبتنزل ..قمت من نومي قلت قبل لاتنزل بصلي صلاة الضحى وبدعي ربي.. وقعدت اقرا سورة البقره ووصلت الى نصها وجاني احساس اني لازم اسوي تحليل منزلي وقمت وترجيت زوجي وطلبته انه يروح يجيب لي تحليل منزلي قام وكان متنرفز واتذكر انه قال بروح اجيب بس اوعديني اذا مافيه حمل ما تتعقدين قالت له وعد ..
وراح شرا اثنين قالت له ليش اثنين قال واحد الحين وواحد حق الحقن المجهري علشان لاتطرشيني بعدين ..سبحان الله..
المهم رحت للحمام وسويته وماشفته لاني قاعده اقوول انا كل مره اسويه واشفح نفسي بخلي زوجي اهو اللى يشوفه يمكن يكون وجه خير ...
واخذت التحليل ورحت له وقلت له وراسك عندي اني ماشفته .. ويوم شافه كان ملامح وجهه عاديه بس ابتسامه خفيفه ..
وقتها ضاق خلقي ضنيت ان الابتسامه يتطنز علي .. ويوم حطه بالارض وانا وقتها كنت واقفه والا اشوف بالتحليل خطيييين وقتها انصدمت والله يابنات انصدمت رحت بسرعه وصليت صلاة شكر وانا ابجي وابجي والله ماقدرت اتحكم بصوتي
وجاني زوجي وكانت عيونه حمرا مبين عليه ان دمعت عيونه وقالي امشي نسوي تحليل دم
ورحت للمختبر وطلبت هرموني وبعدها بساعتين طلع الحمدلله 1099 نسبة حلوووه
وهم قعدت ابجي بالمختبر وكنت دايم اقوول وقتها الحمدلله والشكر الحمدلله والشكر
وهم عدت التحليل بعدها بيومين صار دبل الحمدلله .. حمل سليم ..
ودقيت علي امي وانا بالسياره رايحه عند اهلي وكلمتني اهي وكانت توها قاعده قالت لها يمه ادعليلي الله يثبته ..
قالت الله يثبته .. ان شالله بس شنووو .. قالت لها انا حااامل وبعدها بجيت ماقدرت اكلمها اخذ التلفون مني زوجي وقال لها احنا جاينكم وامي تسأله شلون وشنو سويتووو .. قال لها زوجي من الله سبحان الله ..
ووقتها اختي العروس عند اهلي تعبانه من الحمل وراحت امي لها تبشرها ويوم وصلت عند اهلي الا الكل يستقبلني
والدمووع قبل السلااام من خواتي وامي وابووي واخواني وحريمهم ..
وتعالوو شوفوو ماشاء الله البشارات اللى تطير مناك ومناك ..
يعني انا واختي مابينا الا اسبوع واحد الله يعين امي على الانفاااس ..
بنات بالامانه ادعولي الله يثبته واني اشووفه
وعسى الله يرزق جميع بنات تأخر الانجاب طبيعي ..
والله يابنات انا ماقلت قصتي االا عبره وعلشان تدروون الله اللى يقدر على كل شي والاطباء مايقدروون
لا تنسووون الاستغفااار ... ولازم يكوون بنية صافيه ولاتنسوون تكونون لحوحات على الطلب واذا دعيتي قوولي ربي
انا عندي علم انك لن تردني ..

>>>>> ردود الأعضـــــــــــــــــــاء على الموضوع <<<<<
==================================


أستغفر الله العلي العظيم
سبحان الله وبحمده

فالإنسان لا يجب أن يتعجل بقضاء الله الذي هو آت
بل يحسن الظن فيه فالقرآن والإستغفار والذكر هي أدوية ناجحة
لكل همٍ وغمٍ وكدرٍ وضيق

بارك الله فيك على القصة
ما شاء الله الله يثبت لها حملها ويرزقها بالولد الصالح
الله يرزقني ويرزق كل المنتظرات بالذرية الصالحة يا رب


__________________________________________________ __________

مشكوره على نقل القصه


__________________________________________________ __________

مبارك لك حملك
والله يتمم على خير ويرزقنا وإياكم الذرية الصالحة
أختي بدي أسألك : بفهم أنو كان سبب تأخر الحمل هرمون الحليب وأنتي مو عارفة؟


__________________________________________________ __________

بارك الله فيك وجزاك خيرا


__________________________________________________ __________

[center]السلام عليكم ورحمة الله وبركاته[right][indent]والله العلي العظيم الذي خلق السماوات والارض ليس لنا غير الله الرحمان الرحيم القادر المقتدر هو وحده الذي يقول للشيئ كن فيكون هو وحده القادر ان يرحمنا برحمته ويرزق كل محرومة مستغفرة لذنوبها تقربن من الله فلن يردكن خائبات
أسأل الله العظيم رب العرش العظيم ان يرزقني ويرزقكن وكل المؤمنات الحمل السليم عاجلا غير آجل آمين يا رب العالمين