عنوان الموضوع : خناقة رومانسية
مقدم من طرف منتديات نساء الجزائر

خناقة رومانسية






هي- يقطع فلان على علان
دي الناس بقت مالهاش أمان
أصحاب الشوم.. وحبايب اللوم
مليون خناقة يا اخواتي فـ اليوم
ما حدّ يا اخواتي غلَّبني
على الشناكل لعَّبني
غير مضروب الدم داهوه
اللي ملقَّح هنا هوه
دايبة فـ هواه.. قال مش عاجباه
وحياة داهو لانا مورياه

هو- بالراحة عليّا.. يا حبيبتي شويَّة
والله عاجباني.. لكن أحزاني
على طول غالباني.. ومش بإيديا
بالراحة عليا.. يا حبيبتي شويَّة
مابلاش تهديد.. وزعيق ووعيد
دانا كنزي أكيد.. حُبِّك ليّا

دانا حتى بأقول للناس إنِّي
مش بس حبيبِك لأ طفلك
ومافيش فـ الكون حدّ لازمني
غيرِك وتمللي بألِّفلِك
فـ أغاني كتير وآدي أغنية
ييجي من إسبوع شغَّال فيها

هي- لأ مش معقول
هو- لأ جدّ بأقول
هي- ونا قال زعلانة عشان مشغول
هو- كان غرضي إني أفاجئك بيها
هي- دي مفاجأة خطيرة ما حصلتشي
وحياتَك عندي تغنِّيها
هو- بس الأغنية ما خلصتشي
هي- أرجوك يا حبيبي تغنِّيها
هو- مش حلوة ولسه ما كملتشي
هي- دي ضروري هـ تطلع وهمية
وكمان هـ تكون أحلى هدية
أرجوك أرجوك بقى غنِّيها
هو- أمرِك يا حبيبتي خلاص يمشي

هو- إتجرئي إتجرئي
إنهي الليالي وإبدئي
بُصي فـ عيوني ودققي
هـ تلاقي فيهم طفل خايف
هـ تلاقي طفل هزيل بريء
مفزوع ومش لاقي الطريق
هربان من الموت البطيء
مع نبض اسمِك ع الشفايف

خايف لا يصرخ
حدّ غيرِك يسمعُه
مابقاش بيرسم
غير وشوش بتودَّعُه

إتجرئي اتجرئي
وماتبعديش عن طفل تاه
بُصي فـ عيونُه ودققي
فـ عينيكي هـ يشوف الحياه
مافهاش حيطان مستنياه
مالهاش ضوافر توجعهُ
فـ عينيكي هـ يشوف الحياه
مالهاش ضوافر توجعهُ

هي- مع إني فرحانة بغُناك
خلّيت عيوني يدمَّعوا
إياك تخاف أنا هو معاك
هو- الخوف معاكي بأودَّعُه

هي- إياك تخاف أنا هو معاك
هو- الخوف معاكي بأودَّعُه
هي- إياك تخاف أنا هو معاك
هو وهي- مع بعضنا هـ نودَّعُه

..........................
كلمات وألحان: أنطونيوس نبيل
توزيع: وليد ميمني

الافتتاحية:
جزء من مونولوج (يقطع فلان على علان)
كلمات: بديع خيري
ألحان: العظيم سيد درويش

>>>>> ردود الأعضـــــــــــــــــــاء على الموضوع <<<<<
==================================



__________________________________________________ __________


__________________________________________________ __________


__________________________________________________ __________


__________________________________________________ __________