عنوان الموضوع : الكل بيقول اني حليانه>>>الجزء الثالث -بشرة صحية
مقدم من طرف منتديات نساء الجزائر

الكل بيقول اني حليانه>>>الجزء الثالث



السلام عليكم و رحمة الله
كيفكم يا صبايا يا حلوين ؟ ان شاء الله تكونوا جميعا بخير و سلام
اليوم رح أكمل موضوعي عن الجمال و تجربتي مع التغيير الشامل ..
انتوا عارفين انه الوجه اللي بيطلع فيه حبوب ...لا بد و يكون فيه طبع و آثار للحبوب حتى لو راحت الحبوب نفسها....طيب ..في حل؟؟؟؟
طبعا في حل!
المفاجأة اللي حضرتلكم اياها اليوم فهي قناع مقشر و تونيك صنع بيتي أخدته من بنت يابانية بس أحلى من هيك و أروع من هيك للبشرة ما لقيت.
فايدته انه مو بس بيشيل البقع و آثار الحبوب....و كمان بنقي البشرة و بيرطبها و بينفع كمان للتبييض بس انا ما بهتم للتبييض لأنه بشرتي بيضاء أصلا بالوراثه عن امي..و حتى لو مو بيضا ما بهتم ...أهم شي تكون صافيه..
و بالنسبة للي بشرتها حنطية بقول يا عزيزتي كوني معتزة بما خلقك الله عليه..و ما احلى من البيضاء الا البنت الاسمرانية أم عيون وساع ... والله بيتغزلوا فيها في الاغاني الشعبية عندنا حتى اني بغير منهم أحيانا ههههههه

المهم نرجع لموضوعنا:
المقشر هو عبارة عن 5 ملاعق سكر و (هو مقشر و فيه غليسرين طبيعي مرطب للبشرة)
-ملعقة عسل( يجدد الخلايا)
–ملعقتين الى 3 ملاعق منقوع الشاي الاخضر و( هو يحافظ على شباب البشرة و يمنع تكون الحبوب ثانية-)
ملعقة خل تفاح و فقط خل التفاح ..ما ينفع نوع خل ثاني ..(و هو يساعد على ازالة البقع و توحيد اللون.)
ممكن اذا بشرتك جافة تزيدي ملعقة زيت زيتون..و لكنه غير ضروري للبشرة الدهنية ..
بالنسبة للبشرة الحساسة خففي الخل و زيدي الشاي الأخضر..
اخلطي كل المكونات و السكر رح يظل نصفه بدون ما يذوب و هو المطلوب..لأنه النص اللي ذاب مرطب و اللي بقي دون ذوبان مقشر..
ادهني وجهك بالمزيج و حاولي افركيه بلطف علشان يقشر و ما يجرح بشرة وجهك..و خليه لمدة 10 دقائق..
الباقي حطيه في مرطبان و في الثلاجة لأنها كمية رح تكفي لشهر تقريبا
في هذه الاثناء اعملي التونيك البيتي :
جيبي قنينة زجاج أو مرطبان زجاج صغير (مهم يكون زجاج حتى ما يتفاعل الخل مع البلاستيك)
ضعي 3 ارباع القنينة شاي أخضر و الربع الباقي خل تفاح و اخلطيهم منيح..
لكن اذا بشرتك حساسة قللي من خل التفاح
ملاحظة:استخدمي قنينة صغيرة...مو تجيبي قنينة كولا لترين!!! هههههههههههههههههههههه
..
بعد 10 دقائق اغسلي وجهك من المقشر و جففيه ثم امسحيه بقطنة مبلله بالتونيك اللي عملناه..و بعدين حطي من المرطب اللي بتستعمليه دايما على وجهك..
هذا القناع اعمليه مرتين في الاسبوع ..أنا ما كتبته الا بعد ما جربته و استفدت منه كتييييييييييييييييييييييير..
كنت اعمله المسا علشان اعرف حالي ما رح اطلع من البيت لأنه ريحته قويه شوي..ريحته مو بشعة ...عادي بس في ناس حاسة شمهم قوية مثل اخوي..كنت لما احط القناع على وجهي يقول: يا جماعة في ريحة اشي غريب..
المهم ..وين كنا؟؟
تذكرت...و هيك بعد ما داومت على التقشير و الترطيب صارت بشرتي ناعمة (اللهم صلي عالنبي) , مو مثل الحرير...أنعم كتير من الحرير..بالذات وجهي ..و بطلت أحط مكياج إلا فيما ندر.. لما اطلع بحط المرطب مع واقي الشمس(مهم جدا) والكحلة و بس.. اللهم لا حسد بسم الله ما شاء الله لا قوة الا بالله....

بس بدي احكيلكم عامل مهم أثر في تغيير شكلي للأفضل ...هذا اذا ما كان هو السبب الاساسي .... و انا بدعوكم كلكم تجربوه و تلتزموا فيه و تجربو
و هو موضوع (الحواجب) ...
انا زمااااااااان كنت اشيل حواجبي _يعني ايام المراهقة_و ما كنت اعرف انه حرام ... و بعدين صرت اسمع من ناس انه حرام و من ناس انه جائز دون مبالغة و في ناس بيحكوا انه تنظيفهم و ترتيبهم حلال بس تحديدهم بشكل معين حرام....و من هالحكي كثيييييير
و انا دعيت ربي انه يبين لي الامر بالضبط...
و في يوم من الايام كنت واقفه بغرفتي امام المرآة و كنت ناويه ارتب حواجبي بالملقط و فجأة ارتفع التلفزيون في الصالة فجأة بشكل كبير لحد انه وصل لعندي و اللي سمعته هو صوت الشيخ عبد الله المصلح و هو بيقول نتف الحواجب حرااااااااااام ...لعن الله النامصة و المنتمصة ....
انا وقتها حسيت انها رسالة من ربنا .....والله العظيم هذا اللي صار... يمكن لو حدا حكالي اياها الا اقول يمكن قصة مؤلفه ....لكنها صارت معي والله و انا ما بحلف على اشي بسهولة ....لكن يعلم الله اني صادقة
و من يومها عاهدت ربي اني ما اشيلهم ابدا ....حتى كنت احكي اني ما رح اشيلهم حتى لو صاروا جدايل جدايل....
و ظليت استغفر ربي ....بستغفره كثير كثير
يعني ايمتا ما كنت ساكته ...بستغفره
في السيارة ...في البيت ...و انا بشتغل....و انا قاعدة عالبلكونه وقت العصرية ... في كل وقت ...
و طبعا ما بدكم حدا يحكيلكم عن عجائب الاستغفار
في الاول ..حواجبي كانوا موكتير مرتبين لأنه القصير بلش يطلع لكن لما صار شعر حواجبي بنفس الطول صاروا مرتبين بدون أي شي...
حتى والله كثير كانوا بنات و نسوان يحكولي انه مبين اني ما بشيل حواجبي لكنهم مع هيك مرتبين و جايين مع تدويرة وجهي.
انتو يا بنات عمركم سمعتوا حدا بيمدح حواجب حدا؟؟؟
انا والله سمعت كثير مدح لرتابة حواجبي ...بعد ما بطلت المسهم!!!
يمكن تحليل الموضوع:انه اذا الواحد او الوحدة مننا تركت شيء لوجه الله عوضها الله بشيء آخر يسر بالها ...و هذا اللي صار معي..
ايام ما كنت اشيل حواجبي ....ما كان حد منتبهلي....لكن الآن زي ما حكيتلكم ...الكل بيحكي عني اني حليانه ....

موضوعي ما تحول من موضوع عن الجمال لدرس ديني أو خطبة.. لكن و الله يا اخواتي ....كل شي بتعمليه لله بيأثر عليكي من الداخل و من الخارج كمان...
يعني نصيحة اليوم لجمالك سيدتي: توبي عن نمص الحواجب و استغفري الله ....و شوفي كيف رح ربنا يخليكي حلوة ....

خلص بيكفي لليوم .... و المرة الجاية رح اخبركم عن الريجيم اللي عملته و عن وزني اللي خسرته بالصحة و العافية..... و اهم شي عن الكرررررررررررررررررررررررش

لا تنسوا تدعولي بالرزق الحلال و راحة البال و العفو و العافيةِ
و ردودكم و آرائكم بتهمني كثييييييييييييييير
مع تحيات اختكم زهرة خريف القدس

بحبكم

>>>>> ردود الأعضـــــــــــــــــــاء على الموضوع <<<<<
==================================


شكراااااااااا كتير على هالموضوع الرائع والحمدالله حواجبي حلوين طبيعي واحلى شي اكيد الي ربنا خلقنا علي


__________________________________________________ __________

الى الامام اختي
اتمنى التفاعل من الجميع
سلمتي


__________________________________________________ __________

تسلمييييييييييييين يا قمر ع النصائح

وأن شاء الله را أجربها

وأحلى تقييم لعيونك يالغلا


__________________________________________________ __________

تسلمييييييييييييييييين يا قمر ع النصائح

وان شاء راح اجربها .. وأحلى تقييم لعيونك يالغلا

والله يرزقك يارب ويريح بالك


__________________________________________________ __________

ابدعتي يالغلا
الف الف شكر لمجهودك الرائع