لمحبي الكشري المصري من مطبخي بالصور
عنوان الموضوع : لمحبي الكشري المصري من مطبخي بالصور
مقدم من طرف منتديات نساء الجزائر
لمحبي الكشري المصري من مطبخي بالصور
السلام عليكم ورحمة الله وبركاته
اليكم الكشري المصري من مطبخي ويارب يعجبكم
ولحبيبتي الفراشه عشان كانت عايزة طريقته صورته عشانها ونزلته
بالنسبه للمقادير هي علي حسب الافراد فتعالوا نقول الطريقه بالصور علي طول
اول حاجه بجيب العدس ابو جبه زي ما بنقول عنه في مصر وهو العدس البني الغامق وبنقيه ونغسله كويس وبحط عليه ميه وبنسلقه نص سلقه بس لانه هيكمل سواه مع الرز
وبعدين نجيب البصل وكميه كبيره للتقليه ونحطه في الكبه يتقطع شرائح رفيعه جدا عشان يكون مقرمش وجميل
هنحطه علي النار مع شويه زيت
ونحمره اوووي يعني لونه يكون بني غامق
هنا طلعته علي ورق المطبخ ليمتص باقي الزيت منه معلش الصور غامقه بس هو مش محروق
علي طول مكانه وفي نفس الزيت نحط الشعريه شويه صغيرين ونحمرهم
وبعد الشعريه ما تتحمر انا غسلت الرز وصفيته كويس وحطيته عليه وكمان العدس المسلوق نص سلقه
هنا حطيت الميه زي ما بنسوي الرز العادي بالظبط وحطيت الملح وسبته لغايه ما ميته نشفت وهديت عليه النار خالص عشان يستوي كله مع بعضه
المكرونه بنسلقها عادي خالص زي اي مكرونه في ميه وملح ومعلقه زيت انا بعمل مكرونه صغيره اوي بتاعت الكشري ومعاها شويه اسباجيتي
هنا صفيتها ورجعتها الحله تاني
نيجي للصلصه
فرمت التوم ناعم اووي وكميه كويسه عشان نصها للصلصه ونصها للدقه او الكمونيه زي ما بتحبوا تسموها
حطيتها علي النار مع شويه زيت
ولما اتحمرت حطيت الطماطم المضروبه في الخلاط
وحطيت عليها الملح والفلفل الاسود والشطه وبسيبها تتسبك براحتها وتتقل
وكنت ناقعه الحمص في ميه وبعدين حطيته علي النار يتسلق
نيجي للدقه او الكمونيه
بجيب التوم في طبق عادي وبحط عليه ملح وفلفل وكمون مطحون وكسبره مطحونه ناعم وشويه خل وازود ميه وادوق لغايه الطعم ما يتظبط
وياسلام لو تتفضي في زجاجه زي المحلات بتكون روعه (نسيت اصور دي وهي في الزجاجه)
خلاص كده خلصنا كله هنغرف بقا الرز بالعدس الاول وبعدين عليها المكرونه والحمص والصلصه ونحط التقليه او البصل عليه وبالف هنا وشفا
>>>>> ردود الأعضـــــــــــــــــــاء على الموضوع <<<<<
==================================
ماشاء الله شوشيت ابهرتينى بطريقتك الجميله المميزة
تسلم ايدكى يا قمر
ينقل لمطبخ العضوات ويقيم واحلى شعار
ياريت تبقى تكتبى اسمك عالصور
__________________________________________________ __________
وااااااااااااااااو
تسلم ايديكى حبيبتى شوشيت بيجنن والله
بالرغم من انى مصريه لكن مش بعرف اعمله
لكن اهو منكم نستفيد
وان شاء الله هاعمله بنفس طريقتك
بس ربنا يستر هههههههههه
__________________________________________________ __________
ما شاء الله رائع
نفس الطريقه بتاعت ماما بالظبط
الله يعطيك العافيه
__________________________________________________ __________
المشاركة الأصلية كتبت بواسطة لؤلؤة وردية 
ماشاء الله شوشيت ابهرتينى بطريقتك الجميله المميزة
تسلم ايدكى يا قمر
ينقل لمطبخ العضوات ويقيم واحلى شعار
ياريت تبقى تكتبى اسمك عالصور
ربنا يخليكي يا قمر ولا يحرمني منك
شكرا حبيبتي علي المرور وعلي النقل وعلي التعليق الجميل
باذن الله هبقي اكتب اسمي بعد كده
__________________________________________________ __________
المشاركة الأصلية كتبت بواسطة الطيور المهاجرة
وااااااااااااااااو
تسلم ايديكى حبيبتى شوشيت بيجنن والله
بالرغم من انى مصريه لكن مش بعرف اعمله
لكن اهو منكم نستفيد
وان شاء الله هاعمله بنفس طريقتك
بس ربنا يستر هههههههههه
شكرا حبيبتي فروحه يلا اعمليه وصوريه ونزليه عشان تبقي شطورة هههههههههههههه
رد مع اقتباس
