عنوان الموضوع : تفكيري ذبحني .. ساعدوني -تم الرد
مقدم من طرف منتديات نساء الجزائر

تفكيري ذبحني .. ساعدوني



صباح / مساء الخير جميعا دون استثناء ♡
الله يسعدكم بكتب مشكلتي بس ابي الكل يتفاعل معي ويساعدني ﻻنه ماحصلت اي شخص اقدر افتح له قلبي ..

مشكلتي انه حساسه بشكل كبيييير و اي كلمه احد يحكيها قدامي اتأثر واتحطم منها وممكن توصل فيني انه ما اكل بسبب هالكلمه وازعل واتضايق واجلس اصيح بفراشي لما اشبع وبعدها اطلع ل اهلي ..
فقدت صديقاتي كلهم بسبب اني اوضح حزني وابي احد يتعاطف معي واحب اكون قدامهم انا البنت المسكينه الضعيفه وللاسف كلهم يحبون البنت الفرفوشه اللي تنبسط وتسعدهم معاها ، لكن انا مريت بظروف صعبه الله وحده يعلم فيهاا وغيرت حياتي وغيرت كل مافيني حتى مستواي الدراسي انخفض بشكل كبير ، و في بالي انه مو هذول الصديقات اللي انا ابيهم ومااحسهم مثل تفكيري بس لما اشوفهم مع بعض ومبسوطين ابي اصير معهم وادخل معاهم بكل شيء يصير ، بس خلاص احس تعودت على اني احب ابقى بروحي ومااحب اسال عن احد ومااحب اتواصل مع احد بس بنفس الوقت يجيني شعور انه انا بنت طيب ليه ماعندي علاقات كثير وليه البنات كلهم مع بعض اﻻ انا ! واحيانا افكر اقول اصلا هم مو متقبليني معهم ك صديقه و ﻻ يبوني مثل ما يبون بعضهم ودائما احسب حساب لكل حركه يسوونها واقول ايه اكيد يقصدوني
مع انه مع خواتي وحريم اخواني جدا ااجتماععيه وبالعكس يمكن انا دائما احمسهم بالطلعات والدخلات وباللبس وبكل شيء بس مشكلتي غريبه ما اعرف شنو اصنفها احيانا لما افكر فيها اجلس اصيح لحد ما انام ﻻنه بجد مااعرف اذا انا مو اجتماعيه واﻻ انطوائيه واﻻ مو واثقه من نفسي ومااحب اواجه اللي برا محيط بيتنا ومرات اقول ﻻ انا مو كذا ..

تعبببببت والله تعبت وماحصلت احد ياخذ بيدي

عطوني انا شنو من هالبشر وايش اللي فيني وهل بيدي اقدر اغيره ؟ اذا ايه طيب كيييف ؟ وهل فيني ارجع مع صديقاتي بعلاقه قويه ﻻنهم شبه قطعوا فيني لما ما سالت عنهم
الله يفرج همومي وهمومكم اجمعين ♡

>>>>> ردود الأعضـــــــــــــــــــاء على الموضوع <<<<<
==================================


6 مشاهدات وﻻ رد !
الله يسامحكم


__________________________________________________ __________

شوفي اول شي خليني ششجاعه الضعف والبعد عن الناس
ما ينفعك ابد والله بذا الزمن خليكي قويه وأرجعي لصديقاتك
وأول حاجه تعمليها انك تحطي ببالك انك شجاعه وقادره تحقيق الي
تبيه وانك قدها وكل شي بيرجع حلو واكثر
انتي مؤ انطوائيه ولاشي بالعكس انتي مشكلتك التشاؤم
والضعف خليكي قويه بمواجهه الحياه وتأكدي لو تبي تكوني شجاعه
وترجعي علاقاتك لازم بالاول تكوني صبوره ومع الوقت يرجع كل شي كويس
الله يسعدك ويفرج عليك يرب


__________________________________________________ __________

الحل انك تبتلعين حساسيتك الزايدة ..!!

الحين اللي بيتحسس من كل شيء ماراح يعيش ..؟!

اذا تحسستي من شيء وبدت دموعك تصبصب امسحيها غصب واذا صوت شهقاتك وصراخك بدا يطلع اكتميه جواك ..!

وتمتمي لنفسك انا اقوى من اني ابكي على هالشيء .. انا الاحسن انا الافضل .. ووش ذا اللي يبكيني ؟ ( استنكريه ولا ترضين فيه ) .. من هو اصلاً يقدر ينزل دموعي ؟ انا اقوى من ذا .. وقوي نفسك بـــ نفسك ..! ولا تسمحين لها انها تبكي على كل شيء وتنكسر من كل شيء ..!!
النفس مثل الطفل اذا ربيتها على شيء تبقى عليه عشان كذا يقولون ابعدو عن الحرام لن النفس اذا تربت عليه ظنت انه النهج الصحيح ..!!


اذا احد قالك كلمة مو زينة اقلبيها عليه .. بس بطريقة
(مادري كيف ممكن اصفها لك) .. طريقة ما تأذيه بس تسترجعين فيها كرامتك ولا تقلل من قدرك واخلاقك قدامه فهمتيني ..!

بكذا تسكتيهم بدون ما تخسرين شيء ولا مستواك نزل لمستواهم ^^ ..


بس تذكري : كل شيء له حدود واللي يزود على حده ينقلب ضده ..!


اذا في يوم ضاق صدرك ولا تقدرين تتحملين اللي فيه قومي من مكانك وتوضي وافرشي سجادتك وصلي ركعتين واقرئي دعاء الكرب ..!! بعدها صيحي على سجادتك الى مايروح اللي بقلبك والى مايهدأ وعيدي اقرئي دعاء الكرب وقومي اغسلي وجهك ولا تسمحين لنفسك بعدها تبكي على اللي كان بقلبك لانه دنـــيـــا فــــــــــــــــــــانيه .. واقرئي قرآن وبتستريحين .. ذا شيء عن تجربتي وكان اجمل شعور شعور كامل بالرضى مجرد التفكير باننا فقط في مكان سنفنى منه ..!! ومجرد الاحساس بان من يسمعنا هو الله سيجعلنا سعداء بلا حدود ..!!

...

بالنسبة لصديقاتك .. انا بقول لك شيء من قلبي عمري ما قلته لاحد والله يشهد علي ..!!
انا لي صديقة مثلك صديقة شكاية طول وقتها بس تشتكي بس حزينة بس تفكر بالانتحار من لا شيء بس لان حياتها مو عاجبتها ومشاعرها كانت مختلطة كثير بداخلها .. صديقتي سمعت لها بكل مافيني نصحتها ومنعتها تنتحر كانت تاكل كل ادوية البيت عشان تبي تنتحر ..!!
بس انا بعده تعبت من صديقتي لان انا كمان كنت مثلها بعمرها لي همومي وودي كمان احد يسمعني بس مافي طول وقتي اقضيه اداريها واهتم فيها عشان لا تأذي نفسها وانسى حالي ..!!

بس ذا شيء خلاني اتعلم اشياء كثيرة .. منها .. تعلمت كيف نكون اصدقاء اوفياء ؟! كيف لازم نعامل اصدقائنا ؟!

لان اصدقائنا بشر مثلنا لهم احاسيسهم ويملون ويتمنون ويبحثون عن السعادة ليتشاركوها من اصدقائهم .. صديقتي مافكرت اني ممكن امل من شكاويها واتعب من مداراتي لها على الرغم انها كبيرة بس تتصرف بطفوليه جدا وتجبرني اكون لها الام ..!
وسابقى وفيه لها الى ان تشعر بي ..! هي سبب ذكرى؟؟ وسبب شغفي بحل المشكلات حتى احل مايواجهها من صعوبات واختار افضل حل لها .. واحيانا اصارخ في ردودي على البنات مو قصدي اجرحهم بس يذكروني بصديقتي و طريقتها بتحطيم نفسها وطريقتها بجعل الامور معقدة وضدها حتى لو كانت معها ..!!

...

انتي بدون مايقولون لك صديقاتك تعبنا او طفشنا من شكاويك قلليها عليهم واحتفظي بالمحزن بداخلك وشاركيهم الفرحة اكثر من الدمعة لانهم مثلك يحزنون بس يكتمون ..!!
وذا مامنعهم من انهم يبتسمون لبعض ويبحثون عن اسباب تسعدهم ..!!

انتي كمان ابحثي عن اسباب تخليك سعيدة اقرئي قصص او اكتبيها اذا كنتي من محبين القصص .. اطلعي اكثر حتى تفهمي اكثر اللي حولك واذا كنتي من محبين الطبخ اخترعي وصفات وخلي صديقاتك يشاركونك اللي تسوينه اذا كنتي من محبين الرسم ارسمي اذا تحبين الديكور وتنسيق الملابس والموضة تابعي وصممي لك اي شيء لو اسوارة ولو كنتي تحبي الاعمال الفنية صممي لك علب تحفظي فيها ادواتك وترتبيها اي شيء سويه بس لا تخلين وقتك كله تفكير لان صديقتي اكثر ماكانت تسويه هو التفكير بسلبية الى ما تردى حالها ..!
ذكرت لك تجربتي اتمنى تستفيدي منها ..!



__________________________________________________ __________

حبيبتي لا تقهري نفسك و تعاملي على سجيتك زي ما تتعاملي بالبيت اتعاملي مع صديقاتك و الله يوفقك


__________________________________________________ __________

حلم غامض ، مره شكرا الله يوفقك يارب ♡

ذكرى ، كلامك ريحني كثييييير الله يسعدك والله ماقصرتي و ان شاء الله راح اسوي اللي قلتي لي عليه ♡

حلاوة الاحساس ، ان شاء الله بطبق كل اللي قلتوا لي عنه ، امين ي عيني ويوفقك ♡