السلام عليكم ورحمة الله وبركاته
موضوعي باين من أول كلمة بأول سطر
وهو عن ( الســـــــــــــــــلام )
نظراً لما أراه بالمجتمع من حولي حبيت أصنف و ابين انواع السلام لدى الحريم , بين الصح وبين الخطأ , وبين الذوق و اللي مو ذوق , طبعا احتمال تكوني من بين هالاصناف واحتمال لأ , بس مايمنع ان هالاصناف موجودة فعلاً , عموما هالموضوع للإفادة وليس فقط للانتقاد !
أنواع السلام لدى الحريم :
1- نوع الـ(ختم) تجيك فيه الحرمه حاطه روج لامع + قلوس , و إذا سلمت عليك تلف وجهها بزاوية 90 درجة عشان تبوسك , وتتأكد إنها طبعت الروج على خدك !! لوسمحتي هذا سلام مو ختم معامله
!!
2- (تكسير ضروس) اذا سلمت الوحده تضرب حنكها بخدي لدرجة اني اتفقد ضروسي بعدها !! شوي شوي ماله داعي العنف
!
3- (مشوار الألف ميل) اوووه لا .. قصدي الألف بوسه , ليش؟ لأن الوحده تعطيك 1323004309050 بوسه ورا بعض ليـــــــــــــــــــــــــــــــــــش ! صارلك سنه ماشفتيني مثلآ ! اعتقد انو يكفي 3 أو 4 بوسات .
4- (على الصامت) نوع بقممممممممممممممممممة البرود , تسلم عليك الوحدة ولا تتكلم ولا تسأل شلونك , شخبارك, كيف الاهل......الخ , يعني جثة صامته! مدري كل هذا حياء او غرور او ضعف شخصية
!
5- (من سبق لبق )عاد هذا اللي يرفع الضغط ! هذا النوع تنط من حرمه لحرمه
تبي تسابق من يسلم اول , يعني لو فيه جماعة توهم داخلين يمشون بالدور يسلمون ع المجلس , تكون صاحبة هذا النوع ما تحترم الطابور, تنط من وحده لوحده مالها دخل بمن حولها , وخصوصآ اذا صارت صغيرة ونطت تسلم قبل الكبار , احس ودي اسطرها !
مافيه شي طاير اركدي وجايك الدور واحترمي الكبار اللي حولك .
6- (الجالسات)
- سواء كبار بالسن أو حوامل أو مريضات -
ينقسم هالنوع الى نوعين :
الأول : تغصبك تبوسينها , يعني ما تكتفي بسلام اليد لمجرد انها جالسه وانتي واقفه .. لا .. تجرك بيدها لتحت عشان بالغصب تبوسينها , اذكر وحده سوت معي نفس الموقف وكنت لابسه كعب والمكان كان حديقه(" ثيل ") بغيت اطيح عليها , فقدت التوازن
, لكن تداركت الموقف ولله الحمد .
النوع الثاني من الجالسات : فيه منهم تُـقّـدر جلوسها وعجزها وتمد يدها وتقول : "عز الله مقامك و ما يحتاج تنزلين" ... عاد هذه ذوووووووووووووق .
7- ( الحلق الكبير ) اخ من هالنوع اخ !! اذا كنتي لابسه حلق كبير و مدندش وفيه حركات وكريستالات كثيره , لا تسرعين بالبوسات ورا بعض , لأنه مع السرعة يدخل الحلق بفمي ولا يبط عيني !
8- (الاستحمام بالعطر ) تجيك الوحده من هالنوع اذا سلمت تحسينها متحممه بالعطر وتخنقك , معليش .... بس فيه ناس عندهم حساسية من عطور معينه أو الآم أسنان , مايمنع تحطين العطر اللي يعجبك بس مو لازم تتحممين فيه !
9- (المدحدره ) هذه اذا سلمت عليك توطي راسها حيـــــــــــل , يعني كأنها تسلم بجبهتها , احسها قادة تنطحني مو تبوسني , ارفعي راسك شوي لو سمحتي !
10- ( طقطقة العلك ) هذه الفئة الحمد لله نااااااادره , تكون فيها الوحده تطقطق بالعلك اللي بفمها وهي تسلم عليك , يعني الكل عارف ان العلك بحد ذاته مو ذوق , فليش تتعلكين وانتي تسلمين ؟ وحتى اذا كان بفمك وقت السلام , حاولي ماتبينين .
و أخيراً وليس آخراً .. حابه لو فيه ( سلام جماعي عام
) كيف ؟ يعني لو المجلس كثار اللي فيه حيـــــل ماله داعي أقوّم كل اللي بالمجلس واقعد ابوسهم وحده وحده , أتمنى لو بس تكفي قولة ( السلام عليكم ورحمة الله وبركاته ) خصوصا اذا الجماعة كثاااااااار , بس طبعا المجتمع موب على كيفي !
أكرر: انا بس حبيت اطرح الموضوع للإفادة وليس للانتقاد فقط !
واعرفي انتي أي نوع منهم , اسألي خواتك ولا اهلك , صدقيني بتتفاجأين .
وانشاء الله الموضوع يعجبكم
انواع السلام لدى الحريم -تم الرد
رد مع اقتباس
