عنوان الموضوع : وجهوني بحل يريحني مجابة
مقدم من طرف منتديات نساء الجزائر

وجهوني بحل يريحني



بسم الله الرحمن الرحيم
انا مشكلتي انا غلطت على نفسي قبل اغلط على احد بس صدقوني اني وصلت الى مرحله التيهان ماعاد عرفت اضبط تصرفاتي بسبب الضغوط النفسيه الي مريت فيها ، انا موجالسه ابرر لنفسي انا عارفه اني غلطانه بس ابيكم تكونو في الصوره وتنضرو لحياتي بعيني وبعدها احكمو وقبل انت تحكمو قولو لي الحل الي يخخرجني من الحاله الي انا فيها ويخلي عقلي هو الي يحكمني مو عاطفتي .
انا بنت تحملت المسؤليه من صغري وعمري 11 سنه بحكم انفصال والدي بالرغم اني عشت في مشاكل عائليه من ابوي وزوجته خلتني احاول الانتحار تقريبا ثلاث مرات وكبرت وانا من مشكله في مشكله وضرب وتعذيب واهانه وحرمان بس كنت اتحمل الي يصير لي بس اهم شي اخواني ما يتضررون ، ومضت السنين وانا كل دقيقه وكل ثانيه ادعي ربي اننا نرجع نعيش مع امي والحمد لله استجاب ربي دعائي وعمري وقتها 27 سنه وفعلاً رجعت لامي بس ماتوقعت ان البعد يولد الجفا ، امي صارت تنسب كل تصرفاتي لأبوي ووقتها كنت اعيش صراع نفسي بين حياتي مع امي الي هي محتاجه لي بسبب مرضها وبين اخواني الي رحت وتركتهم عند ابوي وزوجته ، وكنت كل ليل لما اجي انام اتذكر اخوان واتذكر معاملت ابوي لي هو وزوجته وعياله اجلس ابي لحد ما اصدع واجلس امشي في البيت بطريقه هستيريه من القهر والخوف على اخواني ، وما احد يحس فيني ، المهم اني اصبحت اكره الليل وعشان ما ارجع افكر اصبحت اشغل نفسي بالنت والتلفزيون ، وكنت ادخل ع الشات عشان القا احد اتكلم معاه لان امي ما تبيني ولا تبي تتكلم معاي ، لاني اصبحت عصبيه وامي كرهتني وكرهت عصبيتي وكانت كل يوم تقول انتي مجنونه ابوكي جننك ورماك علي بالرغم اني احب امي حب جنوني بس حرماني من اخواني وحياتنا المشتته وتخليها عني في اول مشكله بيننا خلاني احملها الذنب هي وابوي ، لحد ماجا اليوم الي قررت اني انتقم منهم واصبحت اكلم شباب وكل مره اكل فيها احس اني انتقمت منهم بخيانتهم ، ماكنت ادري اني غبيه لاني انتقمت من نفسي انا بس ، لان حياء البنت الي كان عندي انقرض ، واصبحت اتكلم مع اي احد يرقم لي في الشات حتى الي يغلط ويدق علي ويرجع يتصل ويقول انه معجب بصوتي اصده مره مرتين وبعدين ارد عليه واشبك معاه ، بس للأمانه ماكنت اسمح لهم يتجاوزون حدودهم في الكلام معاي ، بس كنت ابي اسمع منهم حبيبتي وحياتي من دونك ولاشي ، وادمنت لهفتهم علي ويعجبني عتابهم لي لما اطول منهم ، واستمريت على كذا سنتين تقريباً ، بعدين حسيت اني حقيره كيف اسمح لابوي ولامي يدمرون حياتي وشخصيتي ، فقطعت كل الي كنت اكلمهم وغيرت جوالي والحمد لله وجلس فتره مو قصيره لحد ماتوظفت وعمري 32 سنه ومن خلال عملي يتوجب علي اكلم اشخاص في عملي بحدود العمل فقط لحد ماجا شخص متزوج واكبر مني بسنه وكانت له وقفات معاي وخدمني في امور ماخدموني فيها اخواني وصار يراسلني على الواتس وكنت اتحرص انه مايتجاوز حدوده معاي بس كنت مطمنه انه متزوج وانه مو لعاب ، وكان قمة الاحترام معاي وكان يقول لي اعتبرك اختي وانا للأمانه اعتبرته مثل اخوي بحكم انه مدير في شغلي وكنت الجاء له لما يكون عندي مشكله في الشغله وهو يساعدني فيها بصلاحياته ، والله اني مانظرت له اكثر من كذا بس بعد فتره صار يسأل عني ويحسسني انه اخوي ويخاف علي ويهمه امري وانا للأمانه تعودت على حرصه واهتمامه الي كنت افتقده في بيتي بس كنت احاول ما اخليه يتجاوز حدوده ولا اسمح لنفسي اتجاوز حدودي معاه ، بس كان مره حنون وطيب لدرجة كان يرسل لي في الصباح ويقول قومي واشربي حليب قبل تداوم ، بس بالرغم من دلعه لي كنت الوم نفسي اني ساعدته يخون زوجته ، فكنت احضر رقمه وماعاد ارد عليه بس اجلس فتره وبسبب قلقه علي واتصالاته المستمره ارد عليه واتحجج باي شي ، ومايدري اني حضرت رقمه ، ولما يسال ارجع افك الحضر وجلست في صراع داخلي مابين احساسي بأخوته وشهامته معاي وبين خيانه لزوجته الي انا ساعدته فيها ، حتى مره اشتكى من زوجته وقال انه يبي يتزوج الثانيه عصبت عليه وانبته وقلت انتو يالرجال مالكم امان ، وهو زعل علي من ردي عليه ماكنت ابيه يتزوج على زوجته وربي يشهد علي لاني حسيت انها زوجة اخوي ، المهم استمرينا على هذي العلاقه لحد ما اكتشفت اني مو قادره اخليه يوم من غير ما نتراسل لو بفيسات بس ، ومع الوقت اكتشفت اني حبيته ، فصارحته وقلت له ان الي خفت منه صار وماعاد ينفع نكلم بعض حبي لك غلط واكبر غلط لا انت لي ولا انا لك ، وقررت اقطعه ، قال لي لا تقطعيني بس بنخفف من الرسايل بالتدريج وتعمدت احياناً ما اخش على الواتس عشان ما اضهر عنده وجلسة فتره اعود نفسي على بعده ،( لا تلوموني الله يخليكم لما حبيته انا انسانه ومعاملته لي حببتني فيه ولا تنسون كم عمري بس ماكنت ابي اخرب بيت احد وحاولت اضغط على نفسي وابعد ) المهم يوم ارسل لي وكان معصب كثييييييييير اضطريت ارد عليه قام قال لي تتزوجيني ؟ لانه تخاصم هو وزوجته ، انا ما اخفيكم قلبي كان بيطير من الفرحه بس مابينت له وحاولت اهديه ، قال بكره رح يجون اهلي يخطبونك قولي لي وين بيتك ، قلت له ابشر بس هد بالك وبعد يومين على الاقل بقول لك وين بيتي ، كنت ابيه يهدا في هاليومين ، وتنازلت عن كرامتي لأبعد درجه ودست على قلبي وقلت له بعد يومين اذا هديت وضبطت امورك عادي لو صرفت نظر عن الموضوع ، انت اللحين معصب وقراراتك غلط ، وما وافقت له بالرغم انه ربي يشهد علي اني اتمنى اتزوجه بس مستحيل ابني سعادتي على سعادت غيري واصتطاد في الماء العكر ، وحاولت اهديه من ناحية زوجته واذكره بمحاسنها ، بس كان مرررررره عصبي وبالعافيه اسيطر عليه وعلى عصبيته واخليه يستوعب الكلام ،المهم انه ختم المكالمه انه رايح للبحر ويتمنى انه يغرق ، انا عرفت انه كلام وقت زعل بس بصراحه والله كنت خايفه عليه يتهور ، المهم نمت وقتها بالرغم اني قلت له طمني عليك ولما صحيت الفجر اتصلت عليه يصحى يصلي واتطمن عليه لاني بصراحه خفت يتهور ، اتصلت اكثر من مره مايرد بديت اوسوس اتصلت واخيراً رد بس المصيبه مو هو الي رد ، زوجته الي ردت واسمي كان محفوظ عندها لما سمعت صوت حرمه قفلت الخط واستلمتني رسايل سب وشتيمه خفت يكبر الموضوع بينهم قمت اتصلت عليها احاول اهدي الموضوع بس بدون فايده كانت كل مره تنعتني بكلام بذي ويجرح ، حاولت الى اخر لحظه بس بدون فايده ، المهم هو اتصل علي اليوم الثاني يعتذر لي ويقول لي اني حطيته في موقف المحقوق بدل ماكان صاحب حق ، انا ندمت كثير بس والله وقتها ماكنت اقصد شر كنت ابيه يصلي الفجر لانه اعتدت احياناً لما يكون وحده يقول صحيني الساعه الفلانه ، المهم المشكله هذي دمرتني نفسياً ، سمعت كلام جارح واسأت لانسان ، واصبحت ترسل لي من ارقام غريبه وتهددني ، وحاولت اطنش بس كانت تهددني بانها رح تفضحني عند اهلي وانا مو ناقصه مشاكل لانه احتمال ابوي يرجعني خدامه لزوجته ، جلست ابكيثلاثه ايام ، وهو بعد عني فجأه بعد ماعودني عليه والله اني عارفه اني غلطانه اني تعلقت فيه بس غصب عني حاولت انساه ماقدرت واصبح اللحين مايعرفني وساحب علي ، انا بصراحه مو فاهمه نفسي مشاعري ملخبطه مابين حب له ومابين كره له لاني انهنت بسببه وتخليه عني جرحني ، الي ابيه منكم كيف اقدر انساه وكيف اقدر اعيش في حياة كلها مشاكل بعد ماكان فيه انسان يقاسمني همومي ويسمعني ويساعدني على حلها ؟؟؟ اسفه على الاطاله 😔

>>>>> ردود الأعضـــــــــــــــــــاء على الموضوع <<<<<
==================================


اختي احسن شيء تسوينه لنفسك إنك تنسين الرجل هذا انسيه والباب اللي يجيك من الريح سده واستريح ادري الموضوع ماهو سهل لكن في النهاية انتي ماراح تبقين تنتظرينه العمر كله خاصة وانك من البداية عارفة مصير علاقتك فيه والافضل تشغلين نفسك بأمور أكثر فائدة لك في المستقبل يعني مثلا كيف تطورين نفسك في الوظيفة كيف تطورين من شكلك وجاذبيتك كيف تزيدين من دخلك والاهم من هذا كله اقنعي نفسك إنك لازم تنسينه حتى تتمكني من الارتباط بغيره وتكوين اسرة سعيدة تعوضك عن الماضي القاسي والمفروض انك تفكرين كذا لأن هذا هو المستقبل الحقيقي ماهو العلاقات الفاشلة وقصص الحب الهشة واذا قدرتي خلال هالفترة انك تزورين اخصائية نفسية وبسرية تامة يمكن تفيدك في تجاوز المرحلة الحالية ونسيان الماضي اللي واضح جدا انك مانسيتيه


__________________________________________________ __________

يعني ماأقدر أقول شي بعد اللي كتبتيه لأنك كبيره وعارفه الصح من الغلط
مع انه فيه أشياء كثيره غلط صارت منها الشات ومنها مكالمتك للرجل
بس بالاخير الحمدلله عرفتي اللي يضرك من اللي ينفعك
وتاكدي مهما سويتي مالك الا ربك ادعييه ادعيه بكل وقت التجأي له سبحانه
ومسالة كيف انك تنسين الرجل مالك الا انك تغيرين رقمك وساعتها لوفعلآ يبيك راح يدورك ويجيك من الباب ويخطبك رسمي
واذا ماسوا شي أعرفي انه مايستاهلك وربي راح يعوضك باللي أخير وأبرك منه ان شاء الله ..


__________________________________________________ __________

انتي الي فتحتي على نفسك ها الباب اقفليه وخلاص ولا تفكري ان أي علاقه بين البنت والولد راح تنجح لا هذا أصلا زيه زي أي شب حب يتسلا عليك واستغل ضروفك لا تفكري انه راح يترك زوجته عشانك اهو لما عرفت بلي بينكم سحب عليك اهتمي في نفسك حبي نفسك راح تلاقي كل شي حولك حلو وحاولي تتقربي من أمك شوي وخففي من جلساتك على النت وحتى لو غيرتي مكان شغلك يكون احسن


__________________________________________________ __________

السلام عليكم ورحمة الله وبركاته أختي حبيبتي أنا فاهمة وضعك منيح . أطرقي باب الكريم الذي لا ينام وانسي كل هم لأن جنة الدنيا الإيمان أقوى وأكبر من كل هم أختي أنعم الله عليك بعمل شريف خلاص إنسي كل العلاقات كلنا بنغلط بس المصيبة إننا نستمر بهاد الغلط عيشي حياتك ولي بيحك يخبط عالباب مو متخبي بالتلفونات .إبدي صفحة جديدة مع الدعاء والقيام والإستغفار كلشي رح يكون تمام حبيبتي . أحبكم في الله


__________________________________________________ __________

حبيبتي الله يعينك حاولي انك تنسيه

والله الموفق