نبض الفهد ((ذكريات..عزة ضما..صباحك ورد..كذا.... -خواطر
عنوان الموضوع : نبض الفهد ((ذكريات..عزة ضما..صباحك ورد..كذا.... -خواطر
مقدم من طرف منتديات نساء الجزائر
نبض الفهد ((ذكريات..عزة ضما..صباحك ورد..كذا....
السلام عليكم
منتداي الغالي
سيدات المنتدى العزيزات
بحكم اعجابي بديوان الشاعر فهد المساعد
حبيت انزلكم القصايد وارائكم تهمني
>>>>> ردود الأعضـــــــــــــــــــاء على الموضوع <<<<<
==================================
صــــدفـــه,,,
الشوق مالـه عمـر , يفنـى وينعـاد
له في الضلوع أن عاد وأن غاب رجفه
مع كل فرقا , له ورى الجفـن ميـلاد
وأن ماتت الفرقا لقـى الشـوق حتفـه
جيت أقتل الفرقـا مـن بـلاد لـبـلاد
مـلّ الطريـق يشيلنـي فـوق كتفـه
وأنا بعد مليت مـن كثـر مـا أرتـاد
هالشارع اللي كان لـك فيـه شرفـه
تظمأ عيوني شوفك , وتشبـع سهـاد
عيّا الزمن يقطـع ظماهـا بـرشفـه
لاوجهـك أسقاهـا , ولا ذاقـت رقـاد
ماغير طيفـك , طيفـك اللـي أعرفـه
كنّه ظبـي , وعيونـي ظـلال صيـاد
يجفـل قبـل يرتـد للجفـن طـرفـه
مشكلته أنه كـل مـا أشتقـت يـزداد
حتـى مـلا جـدران وقتـي وسقفـه
وأصبحت أشوفه فـأول الغيـم لاجـاد
وفـأقصى الشفق لاطاحت الشمس خلفه
وفي الأرض لانامت عقب صوت رعـاد
وفي كل شبـاك ٍ صحـت منـه درفـه
أتعبت طيفـك لـوم , واللـوم مافـاد
ويوم الأمل في شوفتـك مـات نصفـه
نويت أسافـر عنـك بجـروح ٍ جـداد
وعمر ٍ من أوراق الزمن حـان قطفـه
نويت , لكـن جابنـي الشـوق منقـاد
وجابك حنينك , والزمن سـال عطفـه
شفتك تبسّم لـي خجـل مـدري عنـاد
وفي نظرتك شوق ٍ من الظلـم وصفـه
حسيت كني طفـل , وعيونـك أعيـاد
ياعيدي اللي لـه ورى الصـدر رجفـه
سمّ اللقـا صدفـة , وأسمّيـه ميعـاد
أنا أنتظرتـك , وأنـت مريـت صدفـه
بــاب النسيان
كل مافي الأرض ينذر بالمفارق والغياب
اللقى والشمس وحروف الرسايل والقبور
وش بقى يوم اكتشفت ان آخر الدرب السراب
والبحر دمع لسواحل هاجرت عنها الطيور
ما لحزني صوت مدري هو خطا والا صواب
بس أعرف اني حزين وصوتي الليله جهور
من يدثر صوتي الليله ويكسب له ثواب؟؟
ما لها يالشعر غيرك أنت يا جبر الكسور
يكفي إني لا بكيت بدونك أشعر بإرتياب
وكل ما ابكي فيك أشوفك لي عن اللي في سور
ادري بيوتك عرايا لكن اوزانك ثياب
لبس جروحي من أحزانك وألبسك الصدور
كان ياما كان والنسيان للعشاق باب
عاشق لا شد درفة باب صاح بلا شعور
يقدر النسيان ينزع غصن من فوق التراب
بس مايقدر يقرب للتراب وللجذور
كيف ابنسى ذكريات الطيش الأول والشباب؟
ورفقة الليل العتيقه وأول الفجر الطهور
والمواعيد وشغبها والوله قبل العتاب؟
وساعة كم كنت احاول في عقاربها تدور
والمطر لا لون الشارع وقلنا للسحاب
بلل يدينا ترا العشاق أياديهم زهور
والمكان اللي وهن سقفه من الفرقى وشاب
من بعد ما كان يحضنا مثل طفل غيور
كيف ابنسى والرياض لسيرتي مثل الكتاب
حافظتني بيت بيت وحي حي ودور دور
من كثر ماكنت ادور في شوارها جواب
هو صحيح الحب أعمى أو عيون الناس عوور؟
كنت اشوف الحب عذب وهم يشوفونه عذاب
كان هذا الحب سر وقلته وكلي سرور
علموني فالمدينه كيف لا حبيت أهاب؟؟
لكن القريه قمرها قال كن الحب نور
في بلادي كنت عاشق بس شاعر بإغتراب
لين صرت الشاعر اللي تعشقه كل البحور
علميني يالقصايد هو خطا والا صواب ؟؟
لا رفضت انسى عيون عشتها شعر وشعور؟؟
هذا انا لحالي هزيل الحال وأشعر بإكتئآب
كن قلبي جال بحرن هاجرت عنه الطيور
اجرع الفرقى واقول الحب عذب وللعذاب
كل قلب لا حرمه الوقت من خله يبور
ولين هذا اليوم أدور فالمدينه عن جواب
ليه في شرعك يكون الحب معنى للفجور؟؟
اسباب الضياع
ماني على كثر الضياع انا حزين
انا حزين لكثره اسباب الضياع
مثلي مثل مجداف تبحر به ايدين
ماجف من راحاتها دمع الوداع
مثلي مثل ماي انفطر صوته حنين
بيعود لعواد القصب ولا استطاع
مثل الحديث اللي نسوه العابرين
ومن هلعته في عيون الاطفال الجياع
رايح ولا ادري وين انا وروح وين
ضاقت على خطواتي الارض الوساع
مافيه باكر وانتظر باكر تزين
العمر يوم لاانتهى باكره ضاع
ياطير يلي في قفص صدري سجين
ماظن بعد هالفرقى اجتماع
قم نطوي الليله وجوه الراحلين
وننسى الوداع اللي قبل دمع الوداع
وقل للضياع والحزن الي سنين
كانوا معي في كل ارض وكل قاع
اليوم يمكن ابتسم لاني حزين
اكثر من الحزن ومن اسباب الضباع
الـــريــح والنــأي
ليله فراق وبرد وبروق ورياح
وصوت المطر يفصل خطاها عن خطاي
نقرب .. وتنبت فـالوطى بيننا رمـاح
حتـى تلاقينا..لقـا الريـح والـنـاي
آخر لقا يغـزل مـن الغيمـة وشـاح
وأول لقا يمضي .. بلا موعـد جـاي
مسحت عن وجناتهـا صبـر وجـراح
وأنا جراحي كانت أكبـر مـن بكـاي
قلـت أذكرينـي ماهمـا بـارق ولاح
وأيّاك تبكينـي تـرى الدمـع نسّـاي
إذا سألوك الناس .. قولي لهـم : راح
بالك يجي طـاري وداعـي وفرقـاي
ترى الفراق الموحش .. فراق الأرواح
أما الجسد لـو غبـت تحييـه ذكـراي
صدّت .. و في وجناتها الدمـع ذبـاح
وأنا أعتـذر لعيونهـا عـن سوايـاي
تبكي وأنا أمسح دمعهـا كـل ماطـاح
كنت أحسب كفوفي بتمسـح خطايـاي
لو اجرحتني وقتهـا .. يمكـن أرتـاح
لكنهـا.. وبـدون كلـمـة ولا راي
أقفت توّدع عمرهـا اللـي معـي راح
وأقبلت أودّع عقبهـا عمـري الجـاي
الدمـــع..
الحزن وحشه نار وارواحنا شمعه
نزداد نور ينشب فينا ظلام
يهون طعم الحزن لاصاحبه دمع
الموت حزن صاحبه ابتسامه
القلب غصن طاح من كثره الرمع
جاروا عليه اهل العتب والملامه
واحترت يوم انفض من صدري الجمع
ما ادري الوم الغصن والا الحمامه
ياوقت وش سويت في العاشق الطمع
علقتني بين الرجا والندامه
اشم ريح الصمت يوم ارخي السمع
يشبه ندى ديم بقى من غمامه
مرت وكان الومضه بروقها لمع
وراحت قبل ماادعي لها بالسلامه
لكننا عشاق وارواحنا شمعه
مهما الحزن يسدل علينا ظلامه
بدري عليه يشوف في عيوننا دمع
حتى الفراق مقابله الابتسامة
__________________________________________________ __________
كــــــذااا....
يوم رفعت خصلاتها طار الشذا
ويوم جمعت خصلاتها طار الفراش
قالت وش الاحلى كذا ولا كذا
قلت البراءه ياكذا والا بلاش
اذا زعلت ازعل على الدنيا
واذا رضت احس الليل يتساقط رشاش
في قلبها جرح ومواعيد واذى
وفي عيونها حلم خذوا روحه وعاش
حبيبتي الله عطى والله خذى
ليه الحزن في نظرتك والاندهاش
قولي لدمع العين يسكت لو هذى
عيشي ترا الدنيا عصافير وعشاش
الله خلق في ضحكتك ورد وشذا
ولو ماابتسمتي يمكن يموت الفراش
وانا كذا والا كذا والا كذا
مااقدر اقول الا كذا والا بلاش
هفهفات الهوى
العام جابت له قفص داخله طير
وعيونها من هفهفات الهواء شرد
قال اكره اللي يسجنون العصافير
فك القفص والبنت ماتت من البرد
واليوم جابت له ورود ونواوير
ومن الحيا خبت له الشعر في طرد
مكتوب فيه ابيك تذكرني بخير
ياللي بدونك ضاعت سنين الجرد
اشر على يدها ولا تمتم بغير
اللي يعرف الحب مايقتل الورد
راحت ودمع عيونها سر في بير
والذكريات تمرها صدر ورد
مره تقول لنفسها يمكن يغير
ومره تقول الا رمى لغيري النرد
ومره تقلب في رسايله وتطير
من حبه اللي كان طاغي على السرد
وترجع تضم أقفاص فيها عصافير
كانت هدايا منه لعيونها الشرد
وتسقي الرورد اللي قطف والنواوير
وعلى مكان كفوفه تقبل الورد
عــــــزه ظمااا
اللي بعد ماغاب عنكم بكيتوه
كم صار لـه معكم ولحدٍ درابه
ياليتكم ملتوا عـليه وسألتوه
سؤالكم يمكن يغـيّـر جوابه
لكن خذيتوا كل شي وتركتوه
لضيقتة ولعزلته واغترابه
اليوم بس اليوم يعـني فـقـدتوه
وهو له سنه من يوم ما اقفت ركابه
لو كان فيكم خير .. كنتوا ذكرتوه
قبل الزمن يسرق ملامح شبابه
يعني عشانه ما اشتكى .. ما سمعتوه
هذا الخطأ اللي ما حسبتوا حسابه
ما قد عرض شكواه حتى على أخوه
شلون اجل يشكي عليكم صوابه
طبعه يموت ولا ألحق الغيم مشروه
عــزة ظـمـأ .. ولا مـذّلـة سحـابـه
اقفى .. عساه مجار من كل مكروه
راسه عزيز .. وراس ماله ثيابه
وعفّة يديه اللي خذاها من أبوه
و صبره على جوعه وقلّة زهابه
خلّه يتوه بكيفه .. احسن ولا يتوه
بـ يدين ناسٍ شرعها شرع غابه
الذيب فيها من سلك درب مشبوه
واللي ما هو ذيبٍ كلته الذيابه
يا ما أنبنى من حلم فينا وهدّوه
وقتٍ غريب وناسٍ أكثر غرابه
صدق القناعة كنز .. لكن هم أفنوه
و حتى الأصابـع علمـوها تشابــه
ما دام صوتك من ورى الباب مسفوه
يا ريـح هـدّي باب مـن سـدّ بابــه
والصاحب اللي غاب لو هم تناسوه
قـولــي لـهـم لا يفـرحـون بغيابـه
هـم حصّـلوا في غيابه اللي تمـنّـوه
بس الوعد لا من برى من صوابه
اربــــعة...
أنا حبيبك أو حبيبْك هو أو َمالك حبيب
والا( تحبيني ) ’ أنا ويآهـ و ، أمرك َمن سَعه ..
طيب مَن أولْ من سَكن أنا والا َالغريب
يعني تخونينْه معَي ولا تخونينْي معَه
ولو خيروك يظلْ منَا واحدَ و واحد يغيبْ
من فيه منا ( غيُبته ) لو غاْب غيٌبه موجعَه
انا اذكر ان البنتٌ فيَها رقه وطيبْه وطيَب
وامَا يجْي’ فيَها دلعْ ولا تجيَك مدلعهْ
والبنَت هذي ( أمرهْا من كثَر ما أشوفْه )غريَب
سألتَها ي الفاتْنه : قلبَك قبلْ ما أودعهَ
وشلون خلاناَ كذاَ اثنيَن يجمعْهم نصيَب ؟
قالت لي قلبك لا عْصاك اعصهَ واذا طاعَك طعْه
قلت ومنَ اللي ُبين ه الاثنيًن لك حبيَب ؟
قالت اذا تبغى الصراحه ؟ كلكم َيا الأربعه
__________________________________________________ __________
احتياج...
يوم هب الوقت واعماني عجاجه
الفرج عيا وانا بصبر راهي
ويوم مال وطال ميله وأعوجاجه
رحت أدوّر شي ٍ يشد إنتباهي
وشفت زولك مقبل ٍ مثل إنفراجه
كنّه اللي جايبٍ عزّي و جاهي
ياه ياضيقات صدري وإبتهاجه
تذكر آخر مرة ٍ شفتك ..متى هي
صاحبك من يومها زاد إحتياجه
وأمتطى ظهر المصايب والدواهي
سولف الليله على قلبي و ناجه
من بقى لي غيرك أفخر به وأباهي
يابعد من كدّر غيابي مزاجه
ويابعد من مرّت حروفه شفاهي
رغم حيرة قلبك ورغم إنزعاجه
الزمن .. ماغيّر احساسه تجاهي
ورغم وحشة بعدك وقسوة سياجه
كل حاجه فيك ظلّت مثل ماهي
الخجل في وجهك أول مـ نتواجه
والبراءه في عيونك وأنت ساهي
وبسمتك لامن بغيت تقول حاجه
وغيرتك لاشفت كنّي عنك لاهي
قبل أشوفك .. والزمن عاقد حجاجه
أسأله : وش فيك ؟! وألقى العذر واهي
ويوم شفتك قلت للوقت وعجاجه
هيه ياللي في طعونك كنت راهي
أنت لو غيّرت فينا ألف حاجه
القلوب البيض تبقى مثل ماهي
ذكـــريـــات
كلن يغني على ليلاه
وانا على حالي اغني
احيان عقلي احسه تاه
واحيان افكر واقول اني حزين
صدري مداين اه
ضايع بخت من صغر سني
غريب ربع وطريق وجاه
وحيد محدٍ درى عني
غاوي شعر والزمن شلفاه
تنهش ضلوعي وتطعني
واهاه ياشعر يوم اقراه
وش جاب لي وش خذى مني
اضماه واشربه لين اضماه
وبموت ضاميه
لكني لو موزنه منكسر لرضاه
راحت قوافيه تلعني
في الذاكره شيء لو انساه
يمكني اعيش متهني
في الذاكره دمع لاوالله
في الذاكره طفل يغني
ليت الاماني جبل وارقاه
وانسى همومي وينسني
مايدري اني على ذكراه
يمكن اني ابقى
ويمكني اترك طريق الشعر واجفاه
بياااع الورد
تغيرت من بعدها الدنيا وطوقها الظلام
وانا ولهت اكثر من اللي كنت اخافه من وله
اثر غيابه في سواليفي وضيعت الكلام
حتى حروف اشتقت لك بدلتها بشتقت له
من كثر ما اقرا ذكرياته كل ليله قبل انام
حبيته اكثر من قبل وادركت كم كثر اجهله
هنا تلاقينا وجيت اسلم ورد السلام
وهنا ابتسم لي بسمة الشوق الخجول الاوله
هنا مشينا مع بعض اول مشاوير الغرام
وهناك كنت اختار من ورد المواعيد أجمله
واليوم امر اللي يبيع الورد وملقي بالسلام
اخاف يسألني وانا ماني بناقص اسئله
بنت..
فقدت في الشده حبايب وخلان
هانت عليهم عشرتي بس ماهنت
خانوا وقلت أن الزمن مثلهم خان
لكن بعد ماشفـت زولـك تطمّنـت
عرفت من فقدي لهم أني إنسـان
ماعاد باقي له من العالـم الا أنـت
تقلب الدنيا على اشكال والوان
وتبقى الوحيد اللي معي ماتلونت
أنت السبب ياقلب في كـل ماكـان
مشكور ياقلبي على الطيب وأحسنت
في خاطري كلمه على حد طوفـان
بقولها .. واليوم شفتـك وهوّنـت
لكن تذطر للأسف قدر الإمكان
إن الجفا رجال وإن الوفا إنت
ابوااب الزمان..
لو دريت انك اللي ينتظرني خلف ابواب الزمان
كنت شلت سنيني اللي عشتها قبلك وجيت
ليتني والله دريت
انتي اللي من عرفتك ماذكر اني قلت ليه
الا ليتني عرفتك من زمان
وادري اني كنت اعرفك
اشعر اني قبل احبك فوق هذي الارض
قد عشقنا وافترقنا
في مكان غير هاذي الارض
كنت اعرفك لين نادت لي الحياه
وقلت لك بكرى بسافر
واذكر انك قلتي عني وقتها قاسي وجافي
قلت وكفوفي تبلل من دموعك لاتخافي
انا مدري وين رايح بس احس اني بشوفك
ورحت قبلك وجيتي بعدي
جابك الله مثل ما في أعذب اشعاري
وصفتك كنتي نفس الملامح
واذكر اول ماصدفتك
كنت افكر واتسائل .. وين شفتك وين شفتك
اذكرني قد عرفتك اذكر اسمك ضحكتك صوتك كلامك
هذي انت وهذا رسمك
جابك الله كنت هايم في نهاياتي
وشفتك وابتديت
اه والله لو دريت انك اللي ينتظرني
خلف ابواب الزمان
كنت شلت سنيني اللي عشتها قبلك وجيت
ياجمل أقداري اعذريني
لو تاخرت ونسيت
يااجمل اعذاري اعذريني لو تاخرت وقسيت
واعذريني يوم جيت الارض لوحدي
وعشت هذا العمر دونك
بس والله كنت دايم اشعر بلليل الطويل
واشعر بحزن غريب
واشعر اني انتظر فجر مااعرفه
مادريت انه عيونك
اعذريني انتي اجمل بيت قلته
الا انت الشعر كله بيت بيت
اعذريني كنت جامع لك كلام وحب واهات واغاني
وابتسمتي لي ونسيت
__________________________________________________ __________
تغــريبه..
ضحكتي غابت وهدتني وبانت شيبتي
والطفولة ودعتني وأبتديت أفقدها
مابقى لي رغبة الا رغبتي في غيبتي
بشّروا عني قلوبٍ غيبتي تسعدها
هاجسي,طيشي,شبابي,حلم عمري,ريبتي
كنتي أكثر شي يبهج روحي ويسندها
وين أشوفك بعد ماحلّت علي تغريبتي
وأجبرتني أترك ايدينك .. ومدّت يدها
عاد أنا سمّي , وداي , وعلتي , ومصيبتي
لاكبرت بدون مدري بالزمن والأدهى
لادريت إني كبرت وصارت أكثر هيبتي
وصرت طفلٍ شوفة الأطفال لي .. تبعدها
ماأحس إني صغير الا إذا (حبيبتي) ..
أرفعت لله يديها .. جعلني ماأفقدها
أمي اللي لو تحس شوي طالت غيبتي ..
تنتظرني .. لين أجيها ثم أقبّل يدها
جنّتي أنها تشوف أني طفل ..
ومصيبتي ..حزني اللي في عيوني لابغيت أسعدها
الحـــســـد...
الشعر ابوي ولابعد قلت لبيه
الا لبحة وزنه وصوت قافه
ماقبلي أحدٍ قد تربى على يديه
ولاغيري أحد ٍ سمع صوته وشافه
أغليه .. وأخافه .. وأحبه .. وأداريه
وأخاف لاأفقد دهشتي فـ أكتشافه
وعلى كثر ما أبيه.. وأتعب.. وأنا أبيه
ماقد شكيت لغيمته من جفافه
إن ألتفت في حالي .. الله يحييه
و إن ما ألتفت .. ما ألحقت عمري حسافه
ياما على غفله غرقت فـ شواطيه
وياما رمى في قاع صوتي ضفافه
وأمسيت أغني له .. وأشيله .. وأشاكيه
كني مكوّم ..كل ماكان طافه !
أحاول أقوى شي ...مانيب قاويه
وأحاول أقبل شي... نفسي تعافه
اسمع من هروج العتب والمسافيه ..
مازوّد حمول.. التعب.. والمسافه
ناس ٍ بلوني بالحسد ...والمشاريه
مافيهم اللي وسط.. قلبه.. مخافه
لا .. والمصيبه .. ويش أنا منحسد فيه ؟!
في الشعر , ودروب السهر , والكلافه
قولوا لذاك اللي ( سهادي ) على ايديه
وش جاه مني ؟! لعنبوها ضعافه
ان كان حاسدني على الشعر والتيه !
يجي يبادلني .. وأخط أعترافه
يعطيني راحة باله اللي تقدّيه
وأيامه اللي ماتعرف الصلافه
ونذر ٍ علي لأعطيه .. وأعطيه .. وأعطيه
حتى يملّ.. من الشعر.. والصحافه
الغــصن والطيرر..
الغصن هذا اللي على الرمل مكسور
كان اجمل الاغصان قبل المقادير
وفجأة رحل من فوقه احب عصفور
ولا رضى يستبدله بالعصافير
وقلبي مثل هالغصن مايسمع الشور
لامن رحلتي عنه مدري وش يصير
الغصن مات ودع الريح والنور
وانتي تغيبين وتمني لي الخير
الخير وينه لاغدى القلب مهجور
ولا طحت في ايدين السهر والتفاكير
كيف اشتكي باكر من الشوق والجور
وحنا اتفقنا ندفن السر في بير
لو انكسر قلبي من البعد معذور
ولا تسأليني ليه مالك معاذير
الطير مايعتب على غصن مكسور
بس الغصن من حقه يعاتب الطير
صباحك وردد
صباحك نور صباحك مدرسة
ونعاس طفل في اخر الطابور
صباحك لمت اصحاب نسوا ان الزمان يدور
صباحك ضحكه بنيه قول لصاحبتها اسرار
صباحك هدهدت اشعار
وعاشق يهمس لخله انا مااشك بس اغار
صباحك طفلتين صغار جمعهم صف
وافترقوا وتلاقوا يوم صارو كبار
صباحك ورد
صباحك رعشت الحب القديمه
في العيون الشرد
صباحك ذكريات وسرد
صباحك لهفه مسافر
رحل وانقطت اخباره
ومابين المطر والبرد
خذاه الشوق لدياره
صباحك رجعت الغياب
وشوق الاهل والاحباب
صباحك كلمتين عتاب
بعد طول السنين الجرد
صباحك ورد
اخر الصيف
تغيّرت بنـت الضلوع المهاديـف
تغـيّرت والله .. وانـا في رجـاها
مدري متى ؟! أو وين ؟! أو ليه ؟! أو كيف !؟
لكـن اعـرف أنه تغـّير غلاها
هي سلمتـني للزمن والصواديف
وانا اتذّكرها .. ولا اذكر خطـاها
شهور .. كن غيابها في الصدر ضيف
مافيـه ضـلعٍ ماتقـوّس وراهـا
حاولت فيها ترجع .. وقلت : ياحيف
هو من متى والأرض تنكر سماها ؟!
كم كان وجه الحزن في عيونك مخيف !
كم كنت أواسي دمعتك في شقاها !
نسيتي أمواج الزمن والعواصيف ؟!
وضلوعي اللي كم غفيتي وراها
ودعـتي البحر .. ورميتي المجاديف ؟!
من وصلك هذي الشواطي سواها ؟!
ياما كتبتك فوق روس المشاريف
قصايدٍ مر السحـاب وقراهـا
ويوم المطر مرّت عليـه السواليف
حوّل يبي ضحكتـك تسقيه ماهـا
وياما انجرحتي من فراق المواليـف
وقسوة قلوب الراحلين وجفاهـا
طيب علامك كل ماارسلت لك طيف
عـوّد عليّ بدمـعةٍ مابكـاهـا !!
حقـك عليّـه يالعـروق الملاهيف
دام السوالـف واصله منتهـاها
الله عطاها من هنا لآخر الصيف
إن عـوّدت للقلب .. والا نساهـا
اتمنى تنال اعجابكم ....
__________________________________________________ __________
احسنتي الاختيار)الشاعرقــــــــــــــــــــــــــــــــــ ــــــصايده روعــــــــــــــــــــــــــهـ وذوووووق
رد مع اقتباس
