عنوان الموضوع : كيف تحمين ابنك...اخوك ...قريبك...من التحرش الجنسي رعاية الطفل
مقدم من طرف منتديات نساء الجزائر

كيف تحمين ابنك...اخوك ...قريبك...من التحرش الجنسي



السلام عليكم ورحمة الله

اخواتي وحبيباتي حبيت اطرح اليوم موضوع التحرش بالاولاد سيما اننا على مشارف الاختبارات
ومع الاسف في هالفترة تزداد حالات التحرش خصوصا مع الاولاد...
يمكن يستغرب بعضكم ليش خصيت بالذكر التحرش بالاولاد دونا عن البنات
واقول لان حالات الشذوذ انتشرت بين الشباب والعياذ بالله ...
فالولد اكثر عرضة للتحرش نظرا لان خروجة واحتكاكه بالعالم الخارجي اكثر من البنت ...
وبطبيعة كونه ذكر فالاهتمام به بيكون اخف
اما البنت من المعروف انها ماتطلع الا مع امها او احد قريباتها بستثناء المدرسة
بعكس الولد فهو يطلع للمدرسة والمسجد والبقالة والشارع والنادي والجيران والاصدقاء وغيره


بصراحة من خلال اطلاعي على قصص التحرش من خلال وسائل الاعلام او من خلال مدارس اولادي شاب راسي وحسيت ان الامر بدأ يستفحل وينتشر في اوساطنا الاجتماعية..صحيح ماعندنا احصائيات معتمدة عن نسب التحرش في بلادنا
لكن انا متأكدة انهم لو سوو احصائيات بننصدم من الواقع

يذكر لي ولدي انه يشوف اشياء بمدرستة خطيرة سواء بين الطلاب او اثناء خروجه من المدرسة
يقول يمه انا لازم اتلطم اذا جيت للبيت لاني لو افك اللثمة فيه كثير شباب بسياراتهم حول المدرسة يحاولون يتحرشون فينا فهو يطق اللطمة عشان يفكرونه كبير


طيب ايش اسباب انتشارالتحرش الجنسي..؟؟!
طبعا فيه اسباب كثيرة لكن
مافيه شك ان قلة الوعي لدى الاهل وعدم تثقيف الطفل عن ماهية التحرش هو من اهم اسباب انتشاره

قبل ايام كنت جالسة مع اخواتي وكنا نتكلم عن قصة تحرش...
ففاجئني ابن اختي بسؤال غريب وقال خالة ايش يعني تحرش..
حقيقة اني انصدمت من سؤالة خصوصا ان عمرة 12 سنة ومايعرف معنى هالكلمة

مع الاسف ان فيه اولاد كثير مثل ولد اختي يجهلون ومايعرفون ايش هو التحرش...
والاعظم انهم قد يكونون تعرضو لحالات مشابهه ومع ذلك ضلوا ساكتين
والسبب انهم يعتقدون ان الخطأ خطأهم بالدرجة الاولى...
او انهم يخافون من الحديث مع اهلهم ويقع اللوم عليهم..او انه تجيهم تهديداد من المتحرش نفسه

حبيباتي من خلال احتكاكي باقارب لي يدرسون في مراحل دراسية مختلفة
سواء ابتدائي او متوسط او ثانوي..ظهرت لي قصص مرعبة عما يحدث في اروقة المدارس
والله يا اخواتي انه فيه اطفال بالمرحلة الابتدائية تعرضو لمحاولات تحرش من زملائهم في الفصل
او من مدرسيهم اواثناء خروجهم من المدرسة..وهالشي يتكرر بشكل يومي


والسؤال الاكثر اهمية من هو المتحرش...؟؟!

مع الاسف المتحرش ليس عليه علامة نعرفه بها فهو ممكن يكون بيننا ومن اقرب الناس لنا ومع هذا لانعرفه وهنا تكمن الخطورة
ممكن يكون من الاقارب او في محيط الاسرة(اب -اخ-عم-خال-جار-خادمة او سائق...)
ممكن يكون في محيط المدرسة(طالب في نفس المستوى الدراسي او اكبر-معلم-عامل)
ممكن يكون شخص غريب(في الحديقة في الشارع في البقالة في السوق في النادي في اي مرفق عام )


كيف احمي ابني من التحرش..؟؟!

طبعا يمكن فيه كثير من اللاباء والامهات يرفضون ان يكلمون اطفالهم بمثل هالموضوع الحساس..
خصوصا اذا كان الطفل صغير..والسبب على حد قولهم انهم مايبغون يفتحون عيون اطفالهم على مثل هذي الامور
اللي ممكن ترسخ بمخهم وممكن تسويلهم ازمة نفسيه
ولكن اللي حبيت اوضحه ان لكل فئة عمرية طريقة خاصة في توصيل المعلومة...
يعني من الخطأ اني امسك طفل ب6 سنوات واشرح له موضوع التحرش الجنسي وكأني اكلم مراهق عمرة 15


طيب كيف افهمه..؟؟!
الطفل في سن 5 سنوات او لما يكون في سن الدوخول للروضة..
المفروض يعلم كيف يستر ويحافظ على نفسه..
ومايسمح لاي شخص يتكشف على اجزاء جسمه او يلمسه بمناطق معينة...
لانه بكل بساطة جسمه ملك له ومايحق لاي شخص يتكشف عليه
ايضا فهميه انه ممنوع لاي شخص يدخل معه الحمام..
حتى ولو كان اقرب الاقرباء..فهميه انه مايكون لوحده سواء في المدرسة او النادي او حتى عند بيت اقاربكم والافضل انه يكون مع مجموعة
عوديه على الصراحة معك ولاتخوفينه او تهددينه لما تلاحظين عليه اي شي..
كلميه بهدوء وحب حتى يثق فيك
طبعا ممنوع منا باتا انه يجلس بحضن اي احد وفهميه بطريقة قد عقله
وقولي لانك كبير والكبارين مايجلسون بحضن احد
فهميه انه مايكلم اي شخص غريب حتى ولو حاول يستدرجه (بحلاوة او انه يعرف ابوه او انه صديق)

والشيء بالشيء يذكر
اذكر لما كنت متغربة في احدى الدول وكنا طالعين منتزة فشفت بنوته تلعب في الراجيح فقلت لها: ايش اسمك؟
فردت علي بدون ماتناظرني وقالت: ما ابغى اقولك اسمي
قلت: ليش<<<'طبعا انا ماكان في بالي ان اهلها مفهمينها هالامور
قالت: لانك غريبة وامي قالت لا تتكلمين مع الغرباء..وراحت وتركتني >>بصراحة انا تفاجأت من ردها وبنفس الوقت اعجبتني ردة فعلها
البنت عمرها 5 سنوات لكنها عرفت كيف تتصرف التصرف الصحيح لحماية نفسها


اين دورك كأم..؟؟
يا اخواتي استغرب من بعض الامهات اللي تعتمد على الشغالة بتلبيس ابناءها او تحميمهم او الدخول معهم للحمام اعزكم الله
استغرب من الامهات اللي اولادها يروحون الصبح للمدرسة وهي نايمة
والمصيبة انه ممكن اولادها يجون الظهر وهي لازالت نايمه..
فهي ماتدري عنهم او حتى تسألهم عن يومهم الدراسي
الولد ممكن يطلع العصر للبقالة او حتى الظهر وهي آمنه ولاتهتم حتى لو تأخر
يحلف لي واحد من اقاربي انه يشوف رجل ابو عيال يدخل البقالة لما يشوف فيها اطفال
ويتحرش فيهم ولاهو لاقي من يردعه ..لان مافيه احد يقدر يثبت عليه جريمته



نجي للاولاد اللي اكبر من هالمرحلة يعني بعمر 12 وفوق

بعض الامهات اللي تستحي تكلم ولدها بهالامور اوانها تقول ولدي مايعرف هالامور ويستحي ووووو...
بينما ولدها ماخذ كل المعلومات (من كتاب العلوم)ومن الفضائيات والانترنت ولاتهون المدرسة والاصدقاء

يا امي ياحبيبتي اذا انتي تستحين تثقفين ولدك بهالامور الخطيرة خصوصا في زمنا هذا
اذا لا تتستغربين لما ياخذ المعلومات بطريقة خاطئة او انه يتعرض للتحرش ويصل الامر الى ان يخدش حياءه وتكون خاتمته مواقع النت الاباحية واليوتيوب والعادة سرية و الشذوذ و الانحرافات سلوكية الاخرى لاقدر الله
عليك يا اختي الغالية انك تكونين صريحة معاه وتكلمينه عن التغيرات الجسمية الفيزيولوجية اللي جالس يمر فيها الان ..
وكيف يصون نفسه عن الحرام وتعززين عنده الوازع الديني وتبينين له السلوكيات الخاطئة اللي انتشرت بمجتمعنا وهذي ترجع لقلة الوازع الديني..وضعف الانفس واتباع الشهوات والشيطان


كوني انت ووالده قريبين منه واحتووه وناقشوه بالامور اللي يحبها واللي يتمناها وحتى لو وجدت منه
تصرف لا يعجبك حاولي انك تحسسينه بخطأه بطريقة تحترم رأيه وعقله وقراراته خصوصا في هالسن
حسسوه انكم اصدقاء له ماهو ام واب يملون عليه الاوامر فقط..
صدقوني يا اخواتي من واقع تجربة لاحد الصديقات تقول ان اولادها يفضلون الجلسة معها ووالدهم اكثر من اي شخص آخر
لان بكل بساطة هذا الاب وهذه الام عاملوا اولادهم كأصدقاء..فاصبحت علاقتهم قوية
وتعززت الثقة بين الطرفين وهذا اللي المفروض يكون بين الاهل وابناءهم

علمي ولدك الصراحة وقول الحق وانه اذا استنكر فعل قبيح من اي شخص كان انه يبلغ عنه الجهه المسئولة
سواء بالمدرسة او النادي او اي مرفق عام

استودعي ابناءك لما يطلعون البيت وكرري قول اللهم اني استودعتك اياهم فاحفظهم من كل من اراد بهم سوء
اللهم اني استودعتك ابصارهم واسماعهم وفروجهم فاحفظهم عن كل حرام يارب العالمين

يا اخواتي حنا نبغى نوصل لمرحلة رفع مستوى التوعية لدى الاهل وابناءنا بشكل خاص حتى نحميهم من كل صاحب نفس دنيئة وخبيثه
نبغى نخليهم يحمون انفسهم بأنفسهم ومايعتمدون علينا كأهل لحمايتهم
نبغى نفهمهم ان الخطأ ماهو فيهم انما الخطأ يقع على كل صاحب فعل منحرف
الخطأ يقع على كل من سولت نفسه اقتراف هذا الفعل اللا اخلاقي

ارجوكم ارجوكم يا امهات احموا ابناءكم منهم


اختكم لون الغروب

منقول للامانه

>>>>> ردود الأعضـــــــــــــــــــاء على الموضوع <<<<<
==================================


اب
للاهمييييييييييييييه


__________________________________________________ __________

يشرفني اني أول وحده ترد عليك
بصراحة موضوع مهم جداً و احنا كثير محتاجين له
الله يعطيك العافية
و جزاك الله خير


__________________________________________________ __________

مشكوره على الطرح


__________________________________________________ __________

جزاك الله خير والله يحفظ ذرياتنا من كل سؤ ومكروه


__________________________________________________ __________

الف شكر
ونورتو صفحتي يالغوالي