عنوان الموضوع : قصه ولادتي -الجمل و الولادة
مقدم من طرف منتديات نساء الجزائر

قصه ولادتي



اولا اود ان اشكر المنتدى الفاضل وعضوات المنتدى لانه بصدق كان ملاذي في غربتي ووحدتي وحملي الثاني .. اللهم لك الحمد
بيقطع من جهة ويوصل من الاخرى

الان نيجي للجد يمكن اغلب حبيباتي في المنتدى خاصه تجمع الحوامل بيعرفوا ان المشيمه كانت عندي نازله اقل من 1 سم ووضعي ما بده حركه نهائي لاني بكل حركه بيصير فيها نزيف لازم اروح للمستشفى واخد ابره انتي دي لان دمي سالب(o-)
طبعا الكل بيعرف شو معنى انه يكون عندك عيله وبيت و طفل ...
المعنى بلش مشوار المستشفى وخدلك على ابر وانا طبعا احب ما على قلبي الابر بس الحمدلله عكل شي ...
للشهر السادس وانا يصير معي نزيف وما كنت متوقعه هالحمل يكمل ومشان هيك ما بلغت حدا نهائي خاصه امي..
لانه كل ما كنت اكون في المستشفى ما اصل البيت الا وترنللي تطمن علي وهيا ما بتعرف شو فيني بس قلبها مش مرتاح وهاد اللي خلاني اعمل هيك ....
المهم بلش عندي هاجس اني رح اولد عالشهر السابع ههههههههههه ما بعرف من وين اجى.. يمكن قد ما قرات عالنت عن وضعي واللي عزز هالشعور كان عندي وجع مو طبيعي بظهري .. فقلت الوضع ما بيطمن
ولازم اجهز حالي...
كتبت قائمه المشتريات والاغراض اللي بدي ياها وبلشت حمله التجهيزات وجهزت كلشي ابيض لاني ما بعرف شو جنس البيبي ...الاموره مستحيه
والحمدلله ربنا يسر الامور و مشت الشهور من السابع للتاسع على خير

هلا بلش التاسع وبلش الترقب وصراحه كنت حابه اولد باوله (عاساس عخاطري يعني) هههههههه
لاني كنت حابه اصوم لو يوم من رمضان بس حمدلله عكل شي كان اخر موعد الي 3\8 واجا رمضان بواحد الشهر وصمت اول يوم منه وقلت شكلني رح صوم نصه (متفائله كتير )ههههههههه قلت متاخرة متاخره خليني استفيد شوي ههههههه .....
طبعا ما كنت متسحره وصار معي حرقه بالبول مو طبيعيه ووجع ظهر وتعب مو طبيعي ... حمدلله عدا النهار وجهزت الافطار واجا زوجي ولما شافني قللي لو شايفك هيك فطرتك غصب عنك .. بس الحمدلله اني صمت منه ولو يوم...
هلا عالافطار ما اكلت بس تمره وشربت مي بس بشكل خرافي ولله كنت عطشانه بشكل مو طبيعي وبعديها ما قدرت اتحرك صليت ومديت حالي شوي لريح من كتر التعب...
هلا انا شكلوا الوجع اللي كان معي وجع ولاده بس انا من التعب ما ميزت هوا من الصيام والا ولاده...
المهم طول الليل ما عرفت انام من التعب هاد يللي خطرلي ما خطرلي انه ولاده قمت رتبت بيتي و صليت الفجر ومديت حالي شوي لحد ما اجا ابو الشباب من المصلى قللي ريحيلك شوي قبل ما تصحى البنت رن المنبه عالساعه 8 الصبح قام زوجي مشان يطلع بده يعمل ترخيص السياره قبل ما يروح عالدوام كان دوامه يومها متاخر شوي (هاي اجت من حظي والا ابصر شو صار فيني) جهز حاله وطلع وما صارت الساعه 9 و عشره والا نزل عليي اشي دافي انا متت من الخوف ورنيت على زوجي قلتله تعال هيك صار معي قام قللي استنيلك شوي بس يخلصوا الفحص لاني عندهم هلا طبعا انا هيك بس قلتله على راحتك هيك شفتوا التناقض هههههههههه
قمت جهزت البنت وطلعت الشنته لبرا وفتت اخدت شور مي سخنه وما لبست الا واجا زوجي رن عالمستشفى وقالهم انه نزلت ميه الراس اخدت منه البيانات وطلبت تحكي معي المهم قامت تسال ومن الاسئله اللي سالتها كان لون المي فلما قلتلها اصفر مخضر صفنت ..فخفت من رده فعلها قالتلي حطي كوتيكس جديده لحتى اشوف المي..
هلا النهفه التانيه انه عالعشره كان عنا inspection للبيت وبده يجي موظف يعمل معاينه للبيت وانا على اعصابي بس الوجع اللي كان معي من مبارح راح واختفى بعد ما نزلت المي....
المهم هوا خلص من هون ونحنا ركاض عالسياره وعالمستشفى عمل زوجي اجراءات الدخول ودخلت عقسم الولاده
وحطوني بغرفه لحالي تحت المراقبه لانه البيبي كاينه عامله ككا جوا وهاد اللي غير لون المي فخافوا عليها يصير فيها شي لا سمح الله...
ركبت الممرضه الجهاز وعملت تخطيط للنبض وضل الجهاز مشبوك عليي والوجع كل ماله يشد ... هلا اجا دور العذاب بعينه واللي هوا الفحص الداخلي عملتلي ياه قالتلي توسع 2 سم ... وضليتني للساعه 2 وانا اتوجع ولسا الوجع مستمر... خلص شيفت القابله اللي كانت معي واستلمت وحده تانيه بدالها لما شفتها يا صبايا خفت بشكل مو طبيعي منها ما بعرف ليه صارت الساعه 3 وما في اي تقدم قالولي بدنا نركبلك طلق صناعي حتى نسرع العمليه لانه خطر تطول اكتر من هيك جوا .. قلنا ساوو اللي بتشوفوا مناسب ركبتلي ياه الممرضه ونقلوني على غرفه الولاده وهون قالولنا لازم الصغيره تطلع(لاني بنتي و زوجي معي) الله يقطع الغربه شو بتعمل بالبني ادم...
المهم قلت لزوجي خدها وروحوا وانا بضل لحالي .. قالوا لا الافضل زوجك يضل معك وبنتك تطلع ...
اخدها زوجي ووداها لبيت صحاب النا وانا قلبي مو مرتاح ...مو لشي بس بنتي مو متعوده على حدا...
المهم رجع زوجي وكنت مشغله الموبايل على سوره مريم بصوت السديس
اكثر شي ريحني هيا ... اعطوني مسكن الغاز ما عرفت استخدمه نهائي ولما شد الوجع اعطتني ابره مورفين بس ولله كله عالفاضي ... هلا عملتلي فحص داخلي وقالتلي يلا ادفعي انا ما كنت قادره بالمره خاصه انه اليوم اللي قبله صمت وما اكلت نهائي وبرضه هاد اليوم ما اكلت او شربت عاساس صايمه برضه...
المهم مع الدفع حسيت اني لازم استخدم الحمام اكرمكم الله بس غلبه لاني مشبوك على ايدي الابره.. بعد الحاحي اخدتني عالحمام ولكن ما في شي قامت قالتلي قومي يلا بسرعه عالسرير هاد الراس وانا من عندي لا تعليق يلا ادفعي ادفعي حمدلله تمت الامور على خير وجابتها للاموره وحطتها على صدري ما احلاه هالشعور الله لا يحرم كل مشتهي يا رب....
بعديها اخدوها ولبسوها واخدوا البيانات وانا اخدت شور وقلت لزوجي جيبلي بنتي التانيه واجا هوا واياها ومعهم الشوكليت والحمدلله على نعمه الامومه

هلا امي ما خبرتها بالحمل لقبل اسبوع من الولاده بس
كنت حابه ااجلها للولاده بس هيك صارت... وما رح تتخيلوا الصدمه والدهشه لما عرفت....


الوالد دخل المستشفى بنفس اليوم اللي كنت فيه بالمستشفى واهلي ما خبروني لبعد بمده كانوا خايفيين عليي

هاي قصتي بالتفصيل الممل ان شالله تعجبكم ودعواتكم الحلوه يا حلوات ...
كنت حابه اشارك بالمسابقه بس ما بعرف كيف؟؟؟ او حتى اذا لسه في مجال ... اذا ممكن يا ريت الاخوات المشرفات يدرجوا اسمي ... وجزاكن الله كل خير

دمتم بحب

>>>>> ردود الأعضـــــــــــــــــــاء على الموضوع <<<<<
==================================


مبرؤؤؤؤك والله يفرحك فييييهم يارب

وانشالله يجي اليوم هذاا وماننحرم من هذا الاحساس


__________________________________________________ __________

قصتك حلوة حبيبتي

ان شاء الله بتشاور انا والمشرفات وبنردلك خبر على المسابقة

يتربوا بعزك والله يخليلك اياهم يا رب


__________________________________________________ __________

قصتك حلوة
الحمد لله على السلامة تربى بعزكم ودلالكم
باين من لهجتك سورية


__________________________________________________ __________

المشاركة الأصلية كتبت بواسطة sho0o0g
مبرؤؤؤؤك والله يفرحك فييييهم يارب

وانشالله يجي اليوم هذاا وماننحرم من هذا الاحساس

يسلموو حبيبتي
الله يعطيكي يارب بيبي صحيح معافاه قريب ان شالله


__________________________________________________ __________

المشاركة الأصلية كتبت بواسطة لطيفة بكلامي
قصتك حلوة حبيبتي

ان شاء الله بتشاور انا والمشرفات وبنردلك خبر على المسابقة

يتربوا بعزك والله يخليلك اياهم يا رب

الله يخليكي هاد من لطفك ما شالله اسم على مسمى
يسلموو مره تانيه