عنوان الموضوع : للآسف تغيروا للآسوء -تم الرد
مقدم من طرف منتديات نساء الجزائر

للآسف تغيروا للآسوء



السلام عليكم


اخباركم حبايبي


انا بموضوع ببالي خاطري اتناقش وياكم فيه

معليش مااعرف اكتب بشكل منظم

بكتب عشوائي وان شاء الله تفهمون علي

.,

انا لاحظت بمجتمعنا تغييير كثير من ناحيه ملابس

مثلا .. بنات عماتي كانوا اول ماشاء الله عليهم

لبس ساتر

بس ماتوقعت يوم من الايام يتغيرون

الحين احسهم وربي تفسخوا مو معقوله كذا

بنت عمتي في اجتماعنا لابسه تب لين الركبه وعادي عنها

مع انا عمتي لو تشوفونها تذكر ربها وشديده

واذا امي تقولها استري ع بناتك تقول استغفر الله استغفر الله

وتغير الموضوع

تدري وش اللي قهرني من عمتي والله للحين جالسه ع قلبي من تصرفها

قبل كم سنه كنا اناواخواتي نلبس كم ربع

تروح لابوي تقول بناتك متفسخات ولا تقول ضيق

كان ابوي يصارخ ع امي وش ملبسه بناتك مع انه يشوفنا قبل لانطلع

ولا يقول شي نرجع البيت ينقلب نكد من سبب اللبس

صرنا نحرص ع البس علشان مانسبب لنا مشاكل

والله ثم والله البس ساتر بس الاكمام

وشوفوها الحين وش تلبس بناتها بناطيل وتنانير لين الركبه

وبلايز ياكت ياتب والوضع عادي وبناتها كلهم بالجامعه

وحتى المتزوجات من بناتها صاروا اردى مدري ليه تغيروا للاسوء

وعمتي الثانيه في زواج كانت بنتها لابس مره عاري وهي بيضا مره

ومليانه قالت امي خافي ع بنتك قالت عادي قدام حريم

وامي سكتت قالت هذا ردها لي

قالت لهم رب يحاسبهم مالنا دخل فيهم
.....

نجي لبنت عمت ابوي انا معاهم مره يعني قربين لهم

توها متزوجه من تقريبا لها 5 شهور

اقسم بالله يابنات انا تنورتها اذكر انها تزحف زحف

حتى يوم تملكت نفس لبسها يزحف

وماشاء الله عليها هاديه وحبوبه

بعد ماتزوجت انصدمت صدمه

يعني تعرفون شي كان مختبي وطلع لك فجاءه وفتحتي عيونك

تدرون وش كانت لابسه تنوره نص الفخذ وعادي عندها

واسولف مع اختها يوم جيتهم مره ثانيه تقول اهل زوجها كذا

قلت اي حفره بيدخلونها تدخل معهم ليه ماتغيرهم هي

سكتت

....

مااقول الا ماشاء الله ع بنت عم ابوي

انا حاضره زواجها

العايله اللي مناسبينهم صح لبسهم لاتعليق فيه مره عاري

واخت المعرس وربي تشوفونها تقولون لابسه قميص نوم الله يهديها

ووحده شفتها تقرب لاهل المعرس وربي تدرون يوم جلست ع الكرسي

اقسم بالله انا المؤخره حقت طالعه انا شايفتها بعيوني

تدرون بنت عم ابوي انسانه ذوق ومحترمه

بعد زواجها علمتهم ع الاحترام وخلتهم يتسترون صح

حتى زوجها رافعها بالقمه قولوا ماشاء الله تدرون ليه

لان بعد زواجها سافرت ماليزيا

وكانت عبايتها ع الرأس زوجها استغرب وين عبايتك الكتف

قالت انا ع ماتعودت عليه ليه اغير يعني هنا لي رب مايحاسبني

وبالسعوديه لي رب يحاسبني

سكت يوم رجعت للسعوديه يقول والله ماشفت مثلك انتي فوق فوق

وغير كذا ماشاء الله عليها ربي يحفضها توها عروس

وكانوا جالسين بالصاله والمكان مليان كان فيه تلفزيون وجت اغنيه

قامت والكل يناظرها واخذت الريموت وحطتها ع الصامت

تقول المكان كله يسولف سكتوا جلسوا يناظروني حتى خالي ابو زوجي

انصدم مني ماتوقعوا اني بسوي

هالحركه وشوفي خالاتها حاطتها فوق راسها

لان فرضت عليهم الادب والاحترام

هي اثرت عليهم هم مااثروا عليها


....

اما انا الكل بيستغرب مني يمكن تقولون غريبه بنت بالعمر 20

تتكلم كذا

انا اقولكم انا الحمدالله لبسي كان محافظ

بس كنت البس بناطيل

والعام الماضي كان باقي يوم ع العشر الاواخر

كنت لابسه بنطلون

وكنت انا وامي رايحين السوق

كنت اتسوق ماكنت ادري اذا طلعت من السوق وش بيصير لي

تدرون وش لي انا وامي واخوي

مالنا تقريبا دقايق طالعين من السوق

صار علينا حادث

اقسم بالله يابنات اني تشهدت وانا بمكاني

ايقنت انه الموت لامحاله

طبعا بوقتها مدري عن امي واخوي لان كل واحد في حاله ماادري وش

صار له

طبعا انفتحت عبايتي من الصدمه

واشوف البنطلون اللي انا لابسته

وجاء ببالي اني لو الحين مت وعلي بنطلون كيف بيغسلوني ولا كيف

بقابل ربي

الحمدالله انا ربي عطاني وعطا امي واخوي حياه جديده

احسه تنبيه من ربي يحذرني

والله جلست اصيح ايام وايام

صح تركت البس بنطلون بتاتا بس علي هفات البس اذارحت الملاهي

ومااروح الا بالسنه مره او مرتين

وان شا ءالله اتركه نهائي

يا بنات انا ماقلت لكم قصتي الا ابيكم تنتبهون علي انفسسكم

لايغركم البنات وش لابسات ولاتقلدونهم

والله اني اشوف ملابس بالسوق وقلبي يتقطع عليهم تقولي امي

تذكري من ترك شي لله عوضه الله خير منه

والبسي عن زوجك اذا تزوجتي واسكت


...

ولاتظنون يابنات انا ملابس الساتره خلاقين

اقسم بالله لكم يابنات كل من شافني من بنات عماتي ولا اي شخص

من وين شريتي لبسك والله انه ساتر

وهم ×××

الله يستر عليهم بس..

حطو ببالكم قبل لاتطلعون ولاتسسسون شي خلي ببالك ملك الموت

فوقكم قولي لو لبست هالبس يمكن الموت يأخذكم وشلون تقابلون ربكم

وانتو كذا

,....

والحين جتني عقده من شي اسمه سياره اركب مع اخوي تقولون انا اللي

اسوق كل شوي انتبه شوي شوي الله يخليك مره يضحك ومره يصارخ

يقولي انسي خلاص اقوله مااقدر والله مااقدر

حبيت افضفض لكم عن التغيراللي شفته ..وعن التغيراللي حصلي

مااقول غير الله الهادي

وانا الحمدالله اهتديت عقب الحادث اللي صار لي لابناطيل ولاخرابيط

الموت الموت وبقبرك محد نافعك انتي مسؤله عن نفسك


وبس .,‘

>>>>> ردود الأعضـــــــــــــــــــاء على الموضوع <<<<<
==================================


الله يعينا ع تغييرات هالزمن ... ويستر علينا وعلى بنات المسلمين

والف حمد الله على سلامتك وسلامة امك واخوكي يا ارار

وتسلمين ع النصيحه والتذكير

ربي يسعدك ويهنيك ياااااااارب


__________________________________________________ __________

المشاركة الأصلية كتبت بواسطة bint hazeenah
الله يعينا ع تغييرات هالزمن ... ويستر علينا وعلى بنات المسلمين

والف حمد الله على سلامتك وسلامة امك واخوكي يا ارار

وتسلمين ع النصيحه والتذكير

ربي يسعدك ويهنيك ياااااااارب


امين الله يستر علينا دنيا واخره

والله يسلمك يارب

امين يارب ويسعدك.,‘


__________________________________________________ __________

الحمد على سلامتك وجزاك الله الف خير عاى النصيحه اما بنسبه لي انا لبسي مرات ساتر مرات لا وان شاء الله ربي يهديني والمشكله عندي اخويه الكبير يتمسخر على لبسي قدام زوجته لانها متعريه وتقول عادى والبنطلون مو حرام


__________________________________________________ __________

المشاركة الأصلية كتبت بواسطة هنو الدلوعه
الحمد على سلامتك وجزاك الله الف خير عاى النصيحه اما بنسبه لي انا لبسي مرات ساتر مرات لا وان شاء الله ربي يهديني والمشكله عندي اخويه الكبير يتمسخر على لبسي قدام زوجته لانها متعريه وتقول عادى والبنطلون مو حرام


الله يسلمك يارب

الله يهديها يارب ., صدقيني كانت امي تمنعني .. بس كنت اطنش

بس ابي اكشخ زي البنات


.,‘


ارجع واقولك والله ثم والله محد يتعض من الكلام الا نادرا


بس لو صار لها موقف صدقيني بتندم قد شعرها


...

اقسم بالله والله الشاهد ع كلام

اعرف وحده تقولي في وده تقرب لهم ., تقول مره لبسها عاري

اللبس اللي تلبسه محد يلبسه الا قدام زوجها

نصحوها مره مرتين والبنت عادي مطنشه

تبين تعرفين حالها الحين

الانسانه تعيش بحاله جيده لكن





لكن ..ماله ركبه ., جاها مرض بركبتها

.,


ذي الايام يسعون لها او ركبوها مدري عن البنت ماكلمته


بيركبون لها ركبه صناعيه


وشوفيه مانفعها شي .,


عين واصابتها .,.

أو

تقدرين تقولين عقاب من ربي يبي لها الستر

وبس .,.


__________________________________________________ __________

الحمد ع السلامه...

الناس تغيروا....تولي لهم استري نفسك ؟؟؟؟ قالوا شوفي المتخالفهــ

لاعدمنااااااااااااااااااكـــ....