بدون مقدمات أنا عندي مشكلة وأنا التمس مواساة أكثر من اني التمس حل لان ما عندي أحد أخبره عن شعوري ولاني عجزت عن حل هذي المشكلة تماما أنا بنت عمري 14 صف 3 متوسط ؛ مشكلتي اللي هي سبب تعاستي وسبب اهتزاز شخصيتي وسبب اني أحيانا اخاف حتى أتكلم والله أحيانا بدون سبب أحس اني إذأ تكلمت مع أحد بابكي .. هذي المشكلة مع أمي وما ابالغ اذا قلت اني اكرهها حتى وان ما قدرت أقول لهذي المتسلطة شعوري لانها بعيدة عني قلبا وقالبا ، وما عمري استودعتهأ سر من اسراري وما أحب اجلس معها إذا مافيه أحد معنا تحب اختي وعلاقتهم ممتازة وتعاقبني لاتفه سبب أحس بجفافها وبعدها يقتلني وأحس بحيرة وعجب من هذا القلب وابكي لما اسمع عن حنان الأم وقلب الأم باصير مجنونة إذا مالقيت سبب لهذي المعاملة لحد اني مرة صرخت في وجهها قلت خلي هذي العبده تنفعك - كنت اقصد اختي - لأنها سمراء بعدها صاحت في وجهي تشتمني وتتوعدلي وفقدت اعصابها ولولا الله ثم اني كنت في أعلى الدرج وهي تحت كانت ضربتني !!
حرمتني من المصروف 6 شهور والحين مرت شهرين ومازلت تحت مدة العقاب ، جاافة ياناس وقسم بالله ما أتذكر اخر مرة حضنتني فيهاا والا مسحت على راسي قبل ما ادخل المدرسه والحين صرت اتحسس ما ابيها تلمسني حتى لو بالغلط يقشعر جسمي
وتفتش دولابي وجهازي كاني خدامة والا وحده من الشارع ما يوثقون فيها ......... !! نست انها اللي ربتني تشك فيني وتقول لي قليلة أدب ورافعة خشمك ومستواك في المدرسة ما راح ينفعك وأنا مستواي عالي ع مستوى المنطقة كلها لكن ما قد شجعتني ولا عطتني هدية والمدرسة باختصار هي الجزء الحلو في حيأتي رغم اني اواجه صعوبة في اني احصل صديقة أنا والله لو بغيت اسوي الغلط اقدر اسويه بدون ما تدري وتفتيشها ما راح يفيدها ولا راح يكشفني ، أنا لمين ابكي ؟؟ مع مين اتكلم ومين اسأل واستشير إذا صارلي مشكلة والا ازعجني شي ؟ والله أنا عاقلة ومابي ادخل في طريق نهايته مظلمة لكن مضطرة اني ابحث عن اللي يحتويني ويحتوي مشاعري ويعطيني حب لأني اكتشفت انه شي ضروري خاصة في الفترة الأخيرة حسيت بالفراغ اقوى واعمق وينهش داخلي وملييت من البكي ولو ان البكي انسان كان مل مني ! لما تدخل علي الغرفة وأنا ابكي ادفن وجهي في الوسادة وما ارد ع كلامهأ لين تروح لاني ما ابيها تشوفني ضعيفة بسببها ، وباختصر على اللي بيكتبون هذي امك وهذي اللي تعبت وحملت وربت وشقت واقولهم لا تعيدون هذي الاسطوانة المزعجة لأن اللي يحب يقول الحب ويسوي الحب ! الحب ما انخلق عشان ينكتم ويتخبى ويقسى صاحبه. وحب الأم المفروض انه بحر ما ينضب زي ما الكل يقول !! ، واللي بتقول امك يمكن جاهلة ومو متعلمة لااااا ابشرك أمي متعلمة ومشرفة تربوية في وزارة التربية وعندها 3 لغات وتوعظ الناس وتنسى نفسها ، آآه بس متى تجيني بنت والله اغرقها حب واهتمام وما ابكيها واعلمها كل شي ما اخليها تتعب وتشقى وتحتاج لأحد !! واللي يوجعها ادعي عليه ان ما يسلم فيه شي؛ واللي بتقول تقربي منها ! أنا ما اقدر حتى افتح معها حوار هادي بدون خناق وشد وجذب ينتهي بشيئين إما انها تجرحني أو اني اتجرأ بكلمة عليها أو اتهام وتضربني أو تطردني مع دعوة الله لا يوفقك ؛ تحرقني هذي الدعوة واخاف ؛ أنا بمجرد ما اشوفها اكتأب واحاول ما اشوفها والازم غرفتي حتى لو ما عندي شي وهذا يزيد شكهاا تحس اني مسوية جريمة إذا سكرت باب غرفتي ادعولي ان ربي يعوضني خير ويوفقني ف حياتي لاني اخاف من الجاي
هذي هي مشكلتي واعتذر عن الاطالة لكن من هم نفسي وتعبي طولت وأتمنى اني لملمت كل أطراف المشكلة رغم اني ما اظن وإذا فيه شي مو واضح أنا مستعده اناقش
مشكلتي مع امي -لصحتك
(
رد مع اقتباس
