عنوان الموضوع : انا عنيده و هو صاحب كبرياء مجابة
مقدم من طرف منتديات نساء الجزائر

انا عنيده و هو صاحب كبرياء



السلام عليكم
انا مشكلتي يا ناس ان صار لي 4 سنوات اكلم صديق اخوي الي اعترف لي بحبه و انا شفت
هالشي بعيونه .. لو بقول لكم وش كثر هو مجنون فيني مابتصدقون .. حتى بيتهم من كبيرهم
لصغيرهم عارف بعلاقتنا و يحبوني..
انا في البدايه ماكنت حابتنه لأن كانت عندي قناعه ان الي يحب يجي من الباب .. بس مع
الأيام شفت حبه الصادق لي و اصراره و تمسكه فيني .. حتى لما اخوي عرف راح له و مانكر
بالعكس وقف في وجه الكل وقدر انه يرجع علاقته في اخوي نفس ما كانت و في نفس الوقت ما تخلى عني..

لكن المشكله ان بعد 3 سنوات لنا .. زادت مشاكلنا و صار يزعل , يسافر بدون مايقول لي !
ومايكلمني بلأيام حتى لو هو غلطان مستحيل يعتذر وبعد مايرضى يقولي انه يكابر لأن اهم شي
عنده عزة نفسه!!!!
لكن والله بمجرد ما نتصالح يصير انسسسان ثاني !

صار لنا سنه تقريبا واحنا على طول مشاكل والله العظيم نتصالح يومين بس و نزعل اسبوع ..
قال لي مره ان الحين هذي مشاكلنا عجل شلون لو تزوجنا .. وصار يكرر هالجمله في كل
خلاف بعدين قلت له اذا انت خايف من بعدين خلاص خلنا ننهي كلشي الحين / وغير هذا انه
في كل مره يحسسني انه قادر يتخلى عني يعني كأنه وجودي والعدم واحد و لو اكلمه مايرد .. واذا
يرد بس يقول لي كلمتين ويسكت

(هو بيني وبينكم انا انسانه عنيده و ما ارضى اسوي له كل الي يبغيه ! بس بصراحه اي وحده
متربيه مابترضى تطلع مع شخص غريب! مهما كانت السنوات الي كلمته فيها .. طالما مافي
عقد رسمي مابقبل اطلع معاه او اوريه صوري بدون عبايه وشيله)


امه كلمتني قبل شهر تقريبا قالت لي في ربيع بنجي نخطبك تجهزي .. بس انا خايفه
اوااااااااافق بصراحه متردده من تصرفااااته
اختي مطلقه ومابي اصير مثل مصيرهاا..قولو لي اوافق او ارفض ؟؟ شلون اتصررف
تتوقعوون كلشي بيتغير عقب الزووواج ؟ انا محتارررره


سسلاآآمي للجميع و دعائي للي تساعدني

>>>>> ردود الأعضـــــــــــــــــــاء على الموضوع <<<<<
==================================


الصراحة اذا كان يحبك ما كان يستنى 4 سنين ليتقدم لخطبتك,و هو الحين شايفله شوفة ثانية لذلك تغير,اظن,و اذا هو متكبر و انتي عنيدة ما راح تضبط,المهم استخيري قبل الموافقة,ذي حياة باكملها مو لعبة,موفقة


__________________________________________________ __________

تتكلمي عنه كانه زوجك عجيب بتقولي يسافر من غير ما يقولي طب يقولك بصفتك ايه خطيبته زوجته اخته امه
يعني اله الحق يسافر وما يرد عليك لانكم مابينكم شيء يربطكم مع بعض وليش ظليتزا 4 سنوات من غير ولا شيء
المهم الان قوليله امك قالتلي جهزي نفسك نجي نخطب يا ترى انت موافق ولا هدا بس كلام امك
وبعدين فكري ادا انتي توافقي ولا لا


__________________________________________________ __________

لاتزوجينه ..
نصيحه من اخت واقطعي علاقتك فيه واشغلي نفسك بمعهد وادرسي اي شي او توظفي لاتعلقي حياتك برجال ابد ولاتقولي يحبني فعايله مو فعايل رجال يحب ..
والي يحب جد مايشوف كبرياء وذي الخرابيط .. وانتي تقولي اخر سنه مرا كثرت مشاكلكم لانه ببساطة مل منك حاس انك شي ملكه وانتي باين عليك تحبينه ممممره هو صح حبك في البددايه بس حبه برد ويكمن انتهى ..
بتقولي هو خطبني واهله يعرفون .. صحبتي نفس حالتك انخطبو وهي تحب ولد عمها وكانو يكلمو بعض والله فسخ الخطبة بدون سبب انا انصدمت تةقعت انه يحبها اقل تقدير يقلها مااقدر اتخلى عنك بس للاسف عند ال مشكله تركها كيف انتي الغريب ..
وفي النهايه هذى حياتك محد بيعيشها غيرك شوفي الي يناسبك واسسسسسسسسستخييييري


__________________________________________________ __________

استخيري كلما استطعتي لا مرة و لا اثنين و لا ثلاث

و اذا فيه خير رح يتيسر كل شي

و اذا ما فيه كل شي ما رح يظبط


و بالتوفيق

.


__________________________________________________ __________

المشاركة الأصلية كتبت بواسطة bellissima
الصراحة اذا كان يحبك ما كان يستنى 4 سنين ليتقدم لخطبتك,و هو الحين شايفله شوفة ثانية لذلك تغير,اظن,و اذا هو متكبر و انتي عنيدة ما راح تضبط,المهم استخيري قبل الموافقة,ذي حياة باكملها مو لعبة,موفقة


الشهاده لله هو وده اليوم قبل بكره يتقدم لي بس انا كنت ارفض لان ودي ادرس اول
شكرا اختي بحط كلامك في عين الأعتبار ..