عنوان الموضوع : اول مره اكتب مشكله لى مجابة
مقدم من طرف منتديات نساء الجزائر

اول مره اكتب مشكله لى



السلام عليكم ورحمه لله وبركاته


صراحه اول مره بحياتى اكتب لى مشكله بالنت لانى متعوده انى انسا السالفه وما اعطيها حجم اكبر من الى تستحقه بس خلاص طفح الكيل وللعلم انا عمرى 16
مشكلتى مع امى الى ماتنتهى صج انها طيبه وزينه وتشتريلى اى شئ ابيه وتجيبه لى وتقصر على نفسها علشانى بس هى على بالها انه افضل ام الى تشترى حق عيالها كل شئ يبونه
وانا مابى الاغراض والفلوس الى تجيبها لى بس ابى المعامله الطيبه دايمن تقولى الى يفهمنى يعرف شلون يخلينى زينه
انا كل شئ سويته بالنهايه الانسان مو كامل الكمال لله هى تنطر منى الكمال ولا تبينى اغلط انا اغلط اعترف بـ غلطاتى الى الكل يتعرض لها وماتحتاج زعل ولا تكبير للموضوع وابسط مثال قبل 3 ايام كنا بمجمع امى شافت بدله غريبه شوى ماينعرف لها تلبسها شلون قالت البسيها وورينى شلون شكلها عليج
رحت انا لبستها غلط وهى تقوم الدنيا ماتقعدها وللحين زعلانه صارلها 3 ايام ولا تكلمنى ولا حتى تضحك وياى ولا تكلمنى مثل خلق لله ... شككتنى بنفسى قالت يمكن انا مسويه مصيبه عشان كل هذا للحين احس مو من صجها تزعل على بدله لبستها غلط
انا انسانه زينه مامدح نفسى احاول اطيعها واخدمها واذا سويت اى شئ زين تقولى اهااااا اكيد تبين تطلبين منى طلب ولا مو من عوايدج تكونين زينه
طيب ليش جذى ؟؟
زين ليش ماتشجعنى وعلى الاقل تمدحنى تقول ولله خففتى على او ساعتينى حتى لو مو من قلب
تخلى الواحد يكره يسوى الاشياء الزينه عشان ماتحس انه نبى مقابل اتجاه هالشئ
انا كل مره اتأسف لها وترضا وكل شئ اوكى مايصير يوم او يومين الا مطلعه سالفه تافهه تزعل على بالايام انا خلاص ماصرت مثل اول اروح اتأسف واراضيها لانى مادرى شنو الغلطه الى ارتكبتها مادرى شنو المصيبه الى سويتها بـدنيتى
وابوى من صوب ينصحنى بحسن معامله الام لانه يشوفنى دايمن معصبه منها لانه تقول كلام مو فينى وتطلعنى انا اسوء شئ من بين اخوانى
ابوى مو من النوع يقعد بالبيت وقت طويل بس دايمن الحق مع امى حتى لو السالفه مايعرفها يقول مهما كان ام
صح ام صح هى الى ربتنى وتعبت على الفرووض احترمها واقدرها وانا اسوى جذى
بس انا بالنهايه انسانه لى طاقه تحمل لى صبر محدود
لا تقولون لى اقعدى معاها ياكثر ماقعت وياها تلف وتدور وبالنهايه تطلعنى غلطانه وتطلع اسباب مالها وجود من الاصل بس تجينى بطريقه حلوه عشان تقنعنى انه انا الغلطانه
وانا من النوع بسرعه ارضا وماكنت اكبر الموضوع واقولها انتى الى غلطانه كنت امشى الامور واقولها معاج حق انا الغلطانه وراح تغير واتعدل بس لي متى لى متى ؟
الام مو الى تشترى حق عيالها مو الى تعطيهم فلوس
لا الام الى تحسس عيالها انهم تحبهم انها تعاملهم عدل عشان يحسون انهم غالين عندها

مرات احس انها تشتريلى كل شئ ابيه من بين اخوانى عشان تحسسنى انه ماتفرق بينا
او تبى ترضى نفسها اتجاه التفرقه الى تسويها وكل ماقعد وياها تقولى انا اشتريلج كل شئ انا اعطيج فلوس كثر ماتطلبين ترجع وترووح على هالسالفه وانا الغرض من القعده ابى معامله زينه وبس
وانا الحين مايهمنى الى يزعل منى او يرضا او شسالفته بس اتمنى انها تصير مثل شخصيه ابوى يوم واحد بس جان كل شئ زين بالدنيا

وياجماعه لاحد يذكرنى بفضل الام انا اعرف فضل الام ولو ماعرفه جان ماسويت كل شئ عشان ارضيها .. بالنهايه انا عندها الى دايمن مو محترمه وانا الى ماسمع الكلام وانا اسوء شئ
وانا ووانا كل يوم شئ جديد

حتى عيد ميلادى ابسط مافيها تقولى كل عام وانتى بخير اوو بسس حتى تذكرنى لمجرد ذكر فقط لا ولا تدرى عن هواء دارى بعكس اختى يوم عيد ميلادها ماخلت شئ الا وسوته وحتى الواتساب سبوع حاطتلها توبك وانا بالطقاق اصلا الحين انا ماهمنى منو علان منى ولا راضى

بس قالت يمكن عندكم حل انا غفله عنه واسفه على الاطاله بس لو عطيت نفسى وجه وكتبت اكثر بتصير روايه مو مشكله

واسفين على الازعاج

>>>>> ردود الأعضـــــــــــــــــــاء على الموضوع <<<<<
==================================


والله مدري شقول بس الحل الوحيد أنج تصارحينها بس هالمرة تقولين لها كل شي بقلبج وتخلينها تسمعج , ولا قالتلج انا اشتريلج وانا اعطيج فلوس وآنا وآانا قولي لها كل الأمهات جذي بس انا ابي معاملة زينة ما قلتلج ابي فلوس ومن هالكلام , يعني خلها تحس انا مقصرة من ناحية الحنان


__________________________________________________ __________

والله صادقه بكل كلمه كتبتيها حسيت الكلام طالع من قلبك
ياحياتي الله يعينك
والله حااااسه فيييك
الشكوى لله
المشكله انها ام وصعبه تلاقين حل مع شخصيه مثل شخصية أمك
هي مشكلتها انها حاطه براسها أنها مو مقصصره بشي أبد
شوفي مثل ماقالت الأخت اللي قبلي
لك يوم أمسكيها اذا حسيتيها رايقه أمسكيها وقولي يمه انا أبغى اتكلم ورجاء لاتقاطعيني لين ماأخلص وقولي كل اللي بخاطرك وفهميها أنك تبين حنان مو فلوس
واذا حاسه ان طريقة الكلام ماتنفع عادي أكتبي لها كل اللي تبين بورقه ودخليه عليها بغرفتها وخليها تقراكل شي وهي لحالها أو مع وجود أبوك عشان يحسون بك ..وان شاء الله يحن قلبها
وبعد عليك بالدعاء
الله يفرج همك وهمي ..


__________________________________________________ __________

مدري وش اقول الا الله يعينــــــك حببتي وي فرج الله همك ورح ادعيلك من كل قلبي .. وانتي بعد دعواتــــــك لي


__________________________________________________ __________

الله يعييييييييييييييييييييينك ياقلبي تقريبااا انا حااااااااالتي مثل حاااااااالتك انا عمري 16 وامي دااااااااايم لما تصيييييير مشكله بيني انا واخوااااااااني تخليني انا الغلطاااااااانه حتى لوكاااان انا معااااي الحق من جد خلاااااااااااااااااص مليييييييييييييييييت وربي ملييييييييييييت
بصررررراحه انا لما امي تخاااااصمني ع اتفه الاسباااااااب اقول لها الله يسااااااامحك واسكت


__________________________________________________ __________

مشكورين ياجماعه لكل من رد على موضوعى ولكم خالص
الدعوات لانه ردودكم كانت عون لى وتخفيف الالم الى احسه
وماتوقع فى حل بالدنيا ماسويته لانى تعبت قبل امس ردت تكلمنى وكل
الامور سمنه على عسل واليوم طلعت سبب استحى اقوله من تفاهته وجدا عصبت
ويمكن غلطت انا شوى مو عشان هالسالفه لا من كثر التراكمات الى بقلبى بس الحين اتمنى
انه يكون عندى ام مثلى الى اتمنا وطبعا مافى اى انسان يخلو من العيوب وصرت اتهرب من القعده
وياها بالنت النت انا اسميه بالنسبه لى هرووب من الواقع لانه يخليك تستانس بس بمجرد ماتسكره كل شئ
كما كان

الحمدلله على كل حال