عنوان الموضوع : زوجي ممايعرف يحل المشاكل الي بيني وبين اهله مجابة
مقدم من طرف منتديات نساء الجزائر

زوجي ممايعرف يحل المشاكل الي بيني وبين اهله



السلام عليييييكم

باختصار يابنات متزوجه وعندي يهال وساكنه مع اهل زوجي

قبل ماكنت اشتكي من اهل زوجي بس عقب ماحسيت انهم مصلحجين ويحبون يشاركوني بكل شي

ولايوقفون معاي بمرضي تغيرت وصرت رسميه اكثر والحمدلله ارتحت

المشكله ان بين فترة والثانيه تصير الاشياء ماتعجبني واذاكلم ريلي عشان يفهمهم هالشي
بس اهوه فيه طبيعه مايحب يعلق لامه عن اي شي حتى لو بسيط
اعطيكم مثال امه تغسل بغسالتي وهي عندها غسلتين غيرها وانا مره جيت اغسل بغسالتها مارضت
زين هذا مايقهر مشيتها وصبرت واشوفهم زادوا حاولت اوصل لهم عن طريق الخدامه ان ماابي حد يغسل بغسالتي يطنشون وبعد مازنين براس ريلي توه بعد شهور يالله قال لامه

هذا ابسط مثال طبعا مايمر اسبوع الا نتهاوش على هالسالفه لان كان ساكت مايبي يتكلم

فتخيلوا عاد الاشياء الثانيه شلوون

والمشكله الاكبر يجبرني اسولف واضحك معاهم وانا اكون توني مفوره واعصابي تعبانه منهم

ريلي احسه طريقته غلط يحملني فوق طاقتي يبني بس اضحك واسولف ممنوع اتشكا من اهله

زين هم بشر ويغلطون شلون ماتشكا

شنو برايكم الطريقه الصح عشان نعدل امور والمشاكل ال بينا

>>>>> ردود الأعضـــــــــــــــــــاء على الموضوع <<<<<
==================================


حبيبتي عمري قلبي انتي سمي بالرحمن واذكري الله وصلي على سيدنا محمد عليه الصلاة والسلام،، شوفي حياتي تبين اتكلم باللي يرضي ضميري ولا اجامل واقص عليج؟؟!! انتي سألتينا عن رأينا يعني دخلتي ذمتنا وراح ننصحج مثل امج واختج بالضبط .. ياقلبي انتي شغلتج بسيطه وسهالات ،، انتي عايشه معاهم وطبيعي بتحتاجون بعض،، يعني الصراحه مو شايفه فيها شي لو امه جت وغسلت في غسالتكم ترى ماراح تنقص اقصاها غساله.. انا لو مكانج اخذهم انا واغسلها بدالها تدرين ليش؟؟ عشان تكسبين زوجج واللي بروسهم ماراح يوصلونه اذا قصدهم يرفعون ضغطج ويسوون مشاكل ،، واذا شفتي امه جت سلمي عليها وبوسي راسها وسويلها الشاي وقلطيها بنفس زينه ورب الكون لو في راسها زلزال الا يطخ ويهدى ،، حبيبتي خليج ذكيه واكسبي بدال ماتخسرين ،، عامليها مثل ماتعاملين امج ولاتزعلين منها حتى لو تكلمت عليج .. انتي تزعلين من امج اذا هاوشتج؟؟،، بعدين هم شافوج تتضايقين من بعض الامور صاروا يتعمدون يسوونها عشان يقهرونج،، والزوج انتبهي تزنين عليه بسيرة اهله لا وبالناقصه بعد،، حبيبتي امور بينكم خلصوها بينكم بدون مايتدخل هو خليه بعيد عشان حتى لو هم راحوا وتشكوا يصف معاج انتي صدقيني لانج ساكته وماشكيتي كلش.. حبيبتي العيشه مع اهل الزوج مثل اللي عايشه حرب بارده بالضبط لعب بالاعصاب والشاطره اللي تسوي كنترول على اعصابها وماتفرحهم بموقف عليها.. خليهم يغسلون بالغساله عادي وانتي لاتاخذينها بعناد ولازم تغسلين انتي بعد بغسالتهم .. والله تقدرين تكروتينهم وتاكلين بعقولهم حلاوه وتخلينهم مايعرفون شلون يلاقون عليج نقطة ضعف.. حلو العلاقه بينكم رسميه بس لاتخلينها تكون بطقاق ،، وزوجج معاه حق يبيج تضحكين معاهم عشان مايعرفون شنو اللي بقلبج صج،، يختي ابتسمي الابتسامه صدقه واللي بالقلب خليه بالقلب.. والله بيجي يوم وتصير ذكريات فخلي لج الذكر الطيب غصبن عن الناس ولاتخسرين مهما كان شغلي كيد النساء والشغله لاهي نفاق ولا شرك بالله القصد درءا للمشاكل بينكم وحقنا للدماء خخخخ.. يعني الحلول كلها بيدج ولاعاد تقولين لزوجج حلني مع اهلك الا بالشيء اللي فعلا يسوى فهمتي؟؟!! موفقه وريي يسخرهم لج امين ويهدي بالج غناتي.


__________________________________________________ __________

شوفي في اية بالقران الكريم (وَلَا تَسْتَوِي الْحَسَنَةُ وَلَا السَّيِّئَةُ ادْفَعْ بِالَّتِي هِيَ أَحْسَنُ فَإِذَا الَّذِي بَيْنَـــكَ وَبَيْنَهُ عَدَاوَةٌ كَأَنَّهُ وَلِيٌّ حَمِيمٌ . وَمَا يُلَقَّاهَا إِلَّا الَّذِينَ صَبَرُوا وَمَا يُلَقَّاهَا إِلَّا ذُو حَظٍّ عَظِيمٍ )

كل شيء خذيه من القران الكريم واتعلمي منه افضل من مليون اخصائي وشوفي قصص الرسول صلى الله عليه وسلم


ومن كل هذا نستنتج انه اذا احد عاملك بعداوة قاصد او مو قاصد نتعامل معاه بالحسنى كانه ولي حميم , ادري صعبة مرة بس برضه حاولي , ومافي شخص يعامل شخص ثاني بلؤم الا بسبب
1- اخلاقه وتربيته كده وممكن يتغير مع الوقت بالذات اذا احد علمه ونصحة وديننا يامر بالحسنى .

2- ماخذة فكرة سيئة عن هذا الشخص ممكن سمع كلام وقصص وتخاريف خلته ياخذ فكرة سيئة عنك او اي سبب اخر مثل الخوف ان تعامليها بالقسوة لانه البعض يصدقوا الصورة التقليدية عن البعض مثل اذا احد قال دائما الكنة تكره حماتها فالبعض يصدق هالمقولة وعلى طول من يوم تجي كنة يكرهونها وهنا الدور كامل عالكنة يا تصدق الصورة التقليدية عن الحماة انها تكره الكنة وتبادلها نفس الشعور او تثبت للحماة الغلطانة انه هيا غير عن كل الكنات .

3- في اسباب غير كثير

المهم انه حلها المعاملة الحسنى ممكن تغيري الفكرة السيئة عنك و ممكن تربيها من جديد اذا اخلاقها كانت سيئة كل هذا اكيد بياخذ وقت لكن نهايتها حلوة منها تاخذي اجر عالصبر وتثبتي للكل انه انتي اخلاقك راقية وعالية وتقتدي بالسنة وتثبتي للكل انك افضل كنه .


__________________________________________________ __________

اعطيكي مثال في وحدة اعرفها الله يهديها ولدها كان يبغا يخطب فلانة وهي تبغى علانة والولد زن الين ما وافقت غصب عنها مو من قلبها هو باس رجولها عشان توافق ووافقت بالقوة المهم جات الكنة والحق ينقال ما كانت تعامل كنتها تمام وتتكلم عنها وكل ما عمل ولدها اي غلط تحطها براس البنت يعني معاملتها سيئة وحطت براسها انه كنتها تكرهها ومنجد خلت حياة البنت الله لا يوريكي والبنت ااخذت موقف واذا الحماة قالت كلمة البنت ترد عليها واحتدم الموضوع والمسكين الولد ضايع بين امه وزوجته ولو ارضى هذه الثانية زعلت , والبنت ابوها الله يرحمه مات واتغيرت تماما وصارت مو فاضية للرد و المشاكل وتاخذ حماتها على قد عقلها وعاملتها باالحسنى وسبحان الله حتى لما تقهرها عيني عينك قدامنا البنت مسكينةتسكت وتعاملها بافضل من كلامها وتصير الحماة تنحرج ومع الوقت الحماة اتعلقت بالكنة وصارت تمدحها قدامنا وتقول افضل وحدة بين كناتي وتاخذها بكل مناسبة وطايرة بها .

يعني اذا عاملتيها بالمثل بيصير الوقف اصعب والعن خذيها قد عقلها واكسبي فيها اجر وعامليها كانها بنتك اسالي عنها دلعيها كل ما تعاملك بسوء عامليها بافضل مليون مرة وشوفي كيف بتتغير باذن الله لا تنسي الدعاء .

واقولك افضل شيء لا تدخلي زوجك باي موضوع لانه بالنهاية بيمل من المشاكل ومهما كان مو الكل يوقفون مع زوجاتهم ضد امهاتهم نادرين ذول وبعد تعرفي الواحد صعبة يقول لامه هذا غلط وهذا صح حتى لو بارقى اسلوب البعض بالذات اذا شخصياتهم شديدة بياكلونا بقشورنا الله يهداهم و يحطون الغلط بالنهاية عليكي .
شوفي اختي حلي كل مشكلة بطرق ما تخطر عالبال وما تزعج احد مثلا قضية الغسالة :

اذا هي غسلت بغسالتك اعرفي دايما هي الساعة كم تحط الملابس , وكل يوم قبل ما تحط الملابس حطي ملابسك قبلها و حطي الملابس من بدري من وقت ما تكون هي نايمة و مثلا اذا مرة تبي تغسلين وما قدرتي لانه ملابسها موجودة قوليلها بارقى وافضل اسلوب مثل يا خالتي يا حبيبتي تعرفي ولدك ( دائما خلي الموضوع على ولدها لانها تحبه وما ترضى عليه ) عنده دوام , عزيمة , الخ , وما ترضين انه يروح بملابس متسخة وانتي يا خالتي تستخدمين الغسالة ممكن لو سمحتي تسمحين استخدم غسالتك او اغسل الملابس بغاسلتي اونتي غسلي بغسالتك او نوزع الوقت بيننا على غسالتي ما رضت خلاص لا تغسلين ملابسه هو وغسلي ملابسك ببيت اهلك مؤقتا فقط عشان لما هو يشوف ملابسه دايما مو نظيفة وكلمك قوليله غسالتي دايما مشغولة فين اغسل يا انه نعطيها لوالدتك تستخدمها وتشتريلي وحدة خاصة بيا اغسل بيها او انه استخدم غسالة والدتك انا كلمتها وما رضت خلاص اشتري لي وحدة او تحمل الملابس فين اغسلها ؟؟ وهو بيتصرف .


__________________________________________________ __________

اشكركم يااخواتي والله كلامكم علي العين والراس
بس والله اهم يحاولون يستغلوني ماديا يبوني اصرف عليهم
مثل مرت حماي تقط عليهم الالاوف وانا كنت غبيه مثلها بس يوم طحت مريضه بخلوا علي بصحن كافي وتفشلت قدام اهلي من بخلهم
المثاليه ماتمشي معاهم واذا سكت او جاملت يتمادون
انا خدامتي الي جبتها بفلوسي وسيارتي مشاركني فيها
بنظرهم هذا من حقهم
انا ماقصرت مع امه كل ماراحت السوق اشتري لها خام والا ذهب بس والله مايبين في عينهم
وامه تقول اني معلمه الخدامه ماتشتغل لها وانا والله كان قلت لها شي
الي قلتوه مايمشي معاهم


__________________________________________________ __________

ياعمري خليج ذكيه ،، مو مجبوره تقطين فلوسج عليهم.. كل اللي مطلوب منج تصيرين شاطرة لسان ولاتخلينهم يعرفون شنو وراج ياغناتي.. وياعمري احتسبي الاجر واعتبري استفادتهم من اغراضج صدقه عنج وعن عيالج ،، فيه ناس جذي لصقة عنزروت لا منهم ولاكفايه شرهم ،، شكواج لله الشغله يبيلها وقت وصبر ومنو فيكم اطول من الثاني نفس،، وخليج رسميه اكثر ولا تمونين انتي على اغراضهم عشان بالمقابل هم مع الوقت يبطلون يمونون على اغراضج .. صدقيني مهما طالت بينكم بيجيها وقت وتنتهي وتتفارقون وتصير ذكريات اهم شي انتي لاتحملين نفسج فوق طاقتها عشان ماتجيج امراض العصر والظهر والصبح والقايله بعد خخخخ والزوج دام عرفتيه وعرفتي ردت فعله لاتقولين له شي بينتفخ عليج انتي صدقيني .. طولي بالج ووسعي الصدر فديتج.. وام زوجج بيهدها الزمن صدقيني .. اخيييه لو اسولف لج عن ربع الاشياءات اللي كانت تصير وياي والحمدلله صارت ذكريات والان مابينا الى كل احترام وود وامه صارت تعزني وتحترمني عقب ماكنت عمى عينها لكن الحمدلله ايام وراحت في حال سبيلها وكسبت الناس غصبن عليهم يافديتني انا بطله خخخخخ وعقبالج انتي بعد تصيرين بطله وتخف معاناتج اللهم امين..