عنوان الموضوع : مشكلتي مو مشكله! ادخلوا الله يسعدكم -لصحتك
مقدم من طرف منتديات نساء الجزائر

مشكلتي مو مشكله! ادخلوا الله يسعدكم



السلام عليكم و رحمة الله وبركاته
اتمنى تقرأون قصتي زين وتعلقون عليها.. انا عشت قصة حب قديمة مع ولد عمتي بالطفوله انا گان عمري تقريباً 12 وهو 17 كنت احبه من زمان بس ما كلمت أحد إلا اخته اللي كانت بعمري وكانت قريبه مني..بعدين هو أرسل اخته تقولي انه يحبني وانه متعلق فيني و كتب لي رساله كلها احبك يا فلانه اهواك يا فلانه..الخ.. انا أكيد فرحت بس وصيتها لا ترد عليه..كان يحبني بجنون حتى انه كلم اخواني انه يحبني..واذا جا اخوي عندهم البيت يقوله جيبها معاك..يعني اهله واهلي يدرون اننا نحب بعض.. كان يحتفظ بأغراضي بالسر.. ويعلم الله اننا ما كلمنا بعض لا بالجوال ولا بالايميل ولا بغيره..**
لما تخرج هو من الثانوي حسيته تغير! ما صار يجي بيتنا وقلبي حسسني انو في شي متغير.. بعدين اكتشفت انه يكلم بنات! وانه على علاقه مع وحده اجنبيه ساكنه بالرياض وسافر عشان يقابلها!!..في البدايه انفجعت بس قلت قلعته زين انه انفضح قبل لا يوقع الفاس بالراس!**
مرت السنين وانا تجي علي فترات كثيره افكر فيه ومرات حسيت اني لسه احبه! ومرات ادعي ربي انه يصرفه عني لاني ما عدت اثق فيه.. كنت مشوشه مره
لحد ما صار عمري 18 وهو 23 سمعت انه خطب بنت جيرانهم! لما سمعت الخبر وكأن واحد عطاني كف.. بس ما بينت اني مصدومه.. ما ادري كيف كان شعوري هذاك اليوم؟! شعور غريب.. بعد هالخبر بكم اسبوع جاني اكتئاب للمره الثانيه ..رحت عند دكتوره نفسيه وقالت انو بسببه جاني الاكتئاب!! وانه هو لخبط حياتي وتفكيري! انكرت طبعاً لانه ما جا فبالي انه هو السبب ابداً! كنت اظنه بسبب الوسواس القهري اللي عانيت منه..
مرت الايام وتحدد زواجه،، ما كنت ابي احضر ابداً لاني احس اخواته يناظرون فيني بنظرات شفقه.. حتى اذا تكلموا عن خطيبته وانا مدري عن مين يتكلمون واسألهم.. يقولون فلانه وهم يناظرون وكأنهم ما يبون يجرحوني
.. والله ان حبه بقلبي مات جرحني جرح خلا حبه الكبير ينقلب كره اكبر منه! كفايه منظري بين العيلتين،، هم يعرفون انه كان واعدني بالزواج بس بعد خطبته حسيت شكلي غلط!(هذي البنت اللي وعدها بالزواج وتركها!)**
اليوم الصبح سمعت انه فسخ الخطبه بسبب مشكله تسببت فيها اخت خطيبته.. والغى موعد الزواج.. لما سمعت الخبر خفت وفرحت!
خفت انه يتقدم لي وابوي اكيد ما بيرفضه لانه يبي يزوجني اليوم قبل بكره ولانه ولد اخته.. وفرحت لانه انكسر قلبه زي ماهو كسر قلبي.. اللهم لا شماته انا مابي اتشمت لكنه جرحني وكسرني بشكل فظيع!! وهو الحين صار فيه زي ما صار فيني.. صار له سنتين خاطب ويكلم خطيبته يعني اكيد حبها وتعلق فيها،، بالله عليكم لو مكاني وش بتكون ردة فعلكم ؟ انا فيني فرحه ان ربي نصرني عليه لكن هالفرحه ما تكمل اذا حسيت انها شماته
انا والله ما عدت احبه،، بالعكس هو الد الد اعدائي! ولو جا لاقدر الله وتقدم لي اكيد برفض! ولو ابوي غصبني باكلمه هو واخواته اني مااا ابيه! كفايه ما راح من كرامتي!**
ادري مشكلتي مو مشكله بس حبيت اشاركم فيها لان ما اقدر افضفض لاحد غيركم.
علقوا علئ موضوعي رجاءً وبدون تجريح دعواتكم ان ربي يرزقني الزوج الصالح اللي يعوضني عن ولد عمتي وشكراً^_^

>>>>> ردود الأعضـــــــــــــــــــاء على الموضوع <<<<<
==================================


حاولي انك تنسيه ما يستاهلك فيها خيرها باذن الله استغفري وصلي قيام الليل واطلبي من ربك يبعثلك الاحسن منه


__________________________________________________ __________

والله مايستاهل حتى تفكري فيه أو تنزل دمعة من عينك بسببه

ولا يستاهل حبك ابداً ... إنسيه مثل مانساكِ ,,,

ربنا يوفقك ويرزقك بالزوج الصالح يارب


__________________________________________________ __________

الله يوفقك ويصبرك.. لاتفكري فيه اعتبري الوضع عادي مايهمك
الله يرزقك الزوج الصالح اللي يسعدك


__________________________________________________ __________

الله يعوضك واحد مثل اخلاقك ومن مستواك واشطفيييه لا تفكرين لو جاء لو ايش
خليها على الله اذا صار شي تحلونها في وقتها


__________________________________________________ __________

لاحول ولاقوة الابالله أختي بنصحك نصيحة لوجه الله تعالى
ان كان ظلمك وقهرك والله عالم بحالك والدنيا هذي زائلة بفرحها وحزنها ومايبقى للانسان غير عمله الصالح
اغتنمي هالفرصة واعفي عنه اي اعفي عنه لوجه الله وأجرك عند الله كبيييير باذنه تعالى قولي يارب انا عفيت عن هالانسان وسامحته ابتغاءا لمرضاتك ورغبة في ثوابك حتى نفسيا راح ترتاحين وهالكلام عن تجربة شخصية والحمدلله فكري بكلامي وابي أشوف ردك وادعي الله دائما(اللهم اكتب لي الخير حيث كان وارضني به)..اسال الله ان يوفقك وان يرزقنا الازواج الصالحين...آآمين يارب