عنوان الموضوع : قاطعت ابي الطبيب يجيب
مقدم من طرف منتديات نساء الجزائر

قاطعت ابي



بسم الله الرحمن الرحيم

اخواتي ..
انا بنت واحده لامي .. و آخر واحده عند ابوي .. ابوي قبل امي متزوج 5 .. مطلق منهم 3 و واحده ماتت .. و واحده جالسه عنده .. و آخر واحده امي ..
و واضح من طلاقاته الكثيره انه رجال ما ينطاق .. و ماكو احد يقدر يجلس عنده .. و عنده 9 عيال غيري .. كلهم اكبر مني و اقربهم لي بالعمر اكبر مني بـ 10 سنوات .. و اكبر واحد بأخواني اكبر مني بأكثر من 30 سنه ..
المهم ابوي رجال اناااااني مره و ما يحب احد غير نفسه .. و ما اذكر يوم انه صرف علي و لا عطى امي مصروف .. و الحمدلله امي موظفه و تسوي لي كل شي و تشتري لي كل شي .. و حتى اشياء البيت و الفواتير و كله تدفعه هي .. احنا ساكنين ببيت ابوي .. بيته كبير فيلتين قصاد بعض واحده فيها زوجة ابوي و واحده فيها حنا ..
المهم مالي اي علاقه فيه و لا هو له علاقه فيني .. و كثيييير حاولت اتقرب له بس ما ينفع .. احاول اكلمه اسولف وياه لا ما ينفع ما يبي يسولف وياي و كذا .. علاقته فينا كلها صراخ و اوامر .. و ممنوع طبعاً اطلع ويا صديقاتي لانه يشوف اذا احد ما يقدملك خدمه لا تصادقه يعني كل حياته مصالح ..
مافي واحد من اخواني قدر يعيش وياه .. لين ما تزوجوا كلهم كانوا متزوعين ببيوت اعمامي و عماتي و اهل امهاتهم او عند امهاتهم و كذا .. و زوجته اللي جالسه عنده هالحين مالها عيال .. بس لو كان عندها مستحيل كان يجلسوا ..
المهم انا عمري 19 سنه .. و انا و امي عايشين على هالحال و امي تحبه و راضيه .. مع انه حتى هي يعاملها زي الزفت و لا يسولف وياها مثل الازواج الطبيعيين الا نادر يوم يكون مزاجه حلو .. ولا يحترم اهلها حتى ان امها ترقد بالمستشفى بالشهور ولا يروح يزورها ولا حتى يسأل عليها بالتلفون .. مع ان امي ما شاء الله ما هي بمقصره معاه و لا مع عياله حتى ان يوم اختي تزوجت امي جهزتها بفلوسها و لا هي بنتها .. بس لانها بنت الغالي تقول امي ..
المهم آخر موقف صار ابوي هاوش امي لانه كان يبيها تدفع حق الشغاله ببيت زوجته الثانيه .. مثل ما تدفع لشغالاتنا .. و امي رفضت .. و ضربها و صارخ عليها و سبها و سب اهلها .. و ما صار يجي عندنا بالفيلا ..
احنا و الحمدلله مرتاحين مرررره من غيابه .. و من عدم وجوده .. و امي يوم تدخل البيت و تلاقيه جالس بالحديقه مع زوجته تسلم ما يردون السلام .. صرت انا بعد ما اسلم .. و يوم يكلمني اكلمه و انا واصله حدي و الاجابه على قدر سؤاله .. له هو و زوجته .. و اذا شفتهم ما اسلم عليهم .. و اذا جيت خارجه ما اكلمهم و لا اقول مع السلامه .. و عشان يعاقبنا ابوي قفل حمام الخدم بره البيت عشان الشغالات يدخلون معنا نفس الحمام بالبيت .. صارت امي ما تستعمل غير حمام غرفتها و انا بعد ..
ما يجي البيت عندنا الا لجل يسب و يهاوش و يروح ..
و الله يا بنات صرت اكرررررررررررهه و كل ما سمعت عن احد انصاب بمرض كبير اقول عقبال ابوي .. للعلم انه كان عنده سرطان و سافر اتعالج بأمريكا و انا كنت امتحن الثانويه و جبت 93% عشان النفسيات و كنت مره زعلانه عليه و يوم جه هاوشني و قال لي انتي شدخلك فيني مالك دخل انا مريض او لا ..
و يقول لي جلستك بالبيت تضايقني مع اني من غرفتي ما اطلع .. يقول لي روحي اجلسي بسكن الطالبات .. مع اني و الله حتى فلوس ما اطلب منه كله آخذ من امي .. و لا فلس ما خذت منه بحياتي ..
و بالجامعه كان معدلي 3.8 من 4 .. يوم خبرته و انا مبسوطه يقول لي ليه ما تجيبين 4 كان تاخذين منحه .. كأنه هو اللي يدفع فلوس الجامعه تدفعها امي 15 الف كل سنه ..
بنااات انا و الله ضايقه و مدري وشلون اتصرف .. مرات اقول لامي احنا وش جابرنا نعيش عنده .. اصلا محنا بمستفيدين منه شي .. تقولي لا منظر اجتماعي وش يقولون علينا مطلقه و بنت المطلقه ؟ خلنا كذا و الناس لا تدري عننا .. و احنا اصلاً مالنا عنده شي و لا هو له عندنا شي ..
قولولي شسوي يا بنات و ياما دعيت له ربي يهديه و يحنن قلبه علينا بس هو قلبه ما يحن الا على نفسه ..

>>>>> ردود الأعضـــــــــــــــــــاء على الموضوع <<<<<
==================================


يا عمري انت مهما يصير هذا ابوك ولا تقولين عليه كلام مو زين انت محسوبة على كل كلمة اصبري غاليتي ان شاء الله يحنن قلبه عليك وعلى امك وكل اخواتك...انت اعملي اللي بيأمر به رب العباد توددي اليه وتقربي منه بحنانك وببرك واحتسبي اجرك عند الله تبارك وتعالى.
الله يرزقك الزوج الصالح يقدرك ويحترمك
موفقة غاليتي


__________________________________________________ __________

مو مصدقه ...؟

سوري


__________________________________________________ __________

أنا أول مره اكون عاجزه عن حل مشكله بس اتمني من الله ان يهديه والحمدلله ان ربنا عوضك بأم طيبه وتعوضك بكل شئ بس اهم شئ لاتدعي علي ابوكي مهما كان ممكن يكون ده اختبار من الله في ابوكي يشوفك تصبرين وتتحملين والله كل انسان مبتلي منهم مبتلي في صحته ومنهم في اولاده ومنهم في اخواته ومنهم في امه ومنهم في الأب وانتي من اللي ابتلاهم الله في الأب ولكن احمدي ربك بكل شئ وادعي له بالهدايه


__________________________________________________ __________

المشاركة الأصلية كتبت بواسطة 9atrat nada
يا عمري انت مهما يصير هذا ابوك ولا تقولين عليه كلام مو زين انت محسوبة على كل كلمة اصبري غاليتي ان شاء الله يحنن قلبه عليك وعلى امك وكل اخواتك...انت اعملي اللي بيأمر به رب العباد توددي اليه وتقربي منه بحنانك وببرك واحتسبي اجرك عند الله تبارك وتعالى.
الله يرزقك الزوج الصالح يقدرك ويحترمك
موفقة غاليتي

مشكوره اختي و آمين يا رب ..
و الله انا حاولت اتقرب له بس و الله مافي فايده ..


__________________________________________________ __________

المشاركة الأصلية كتبت بواسطة ياحبي يا انا
مو مصدقه ...؟

سوري

حقك اختي