عنوان الموضوع : للانوثه احكام في الحركه والكلام موضة
مقدم من طرف منتديات نساء الجزائر

للانوثه احكام في الحركه والكلام



مساء الخير للي عندهم المساء اور صبحكم الله بالخير للي عندهم الصبح
يالله حيهم كلن بيوزره ,,





ملينا صح من مواضيع الميك اب .. صبغات .. عنايه شعر ..عنايه رجولك .. الخ … خلااص احس كلن يعرف بالمكياج وكثير الحين يصبغون شعورهم بلا مشاغل وحتى حفظنا بعض المواضيع من كثر مايتكلمون فيها ..موضوعي اليوم باين من عنوانه ,,
الأنوثة و ما أدراك ماالانوثه .. الانوثه لها رونقهاا الخااص وجاذبيتها المتميزه .. جمال المراه وانوثتها محسووبه عليهاا وهذا الشي يقيد حريتنا في كثيييير من الاوقاات ..ونصير ننتبه لتصرفاتنا خوف اننا نسوي شي يخرب البرستيج بتاعنا .. بس نلاحظ أي تصرفات تلقائية منا مثل ((مشيتك على الدرجه مادري كيف كنك تسحبين رجولك ..كثيره حركاتك وانتي تسولفين ..سمعتي لك نكته وضحكتي بصوت مره عالي وصجيتي خلق الله على هالضحكه ..ولا العكس سمعتي خبر مره شين همن صرتي تصيحين وتشاهقين يحول وكلن يشوفتس ..وانتي تشربين يطلع صوت ...الخ ))مثل هالتصرفات نخسر معها صورتنا الملائكيه وزود على تسذا صعب اصلح اللي خربته وشوهته بثواني يحول ...حتى لو كان شكلي شيااكه ومرتب وحلوو ..
فقالو خبرا الاتيكيت انه لزوم انه يكون فيه مناهج او مدارس بكبرها تهتم بتعليم هالسلوكيات للبنت مع اللباقه والشياكه (( ياليته والله يحطون لنا هالاتيكيت بكبره بمناهجنا اسنع لنا من موادهم البايخه ))
لان الجماال مو بس على بوهتك او لابسك وخلاااص لااااااا يتعداه لتصرفاتك وسلوكياتك كلهاا …طريقه جلوسك ووقوفك .. لباقتك بالكلام .. ضحكك .. مشيتك ..طريقه بلعك .. الخ
كل هالنواحي تعطي انطباع جميل لطرف الثاني للي يشوفونك
الزبده بموضوعي اني بطلق بعض من النصائح اللي قالوها خبراء الاتيكيت بخصوص سلوكيات مظهرنا الخارجي .. واللي يعتبر من ضروريااات الانوثه ومكمل للجمال


اتيكيت المشيه الصحيحه




راح ابداء بالمشي لانه اكثر شي يلفت انتباهنا اذا شفنا أي وحده .صح ولا لا ؟؟. يمكن نشوف بنت تكون حليوه وانيقه .. بس مشيتها غلط في غلط تسحب رجولها .. ولا مجلعده ,, اول انها تقلد مشيت وحده من النجوم او انها حتى تقلد عارضات الازياء حتى خخخ طبعا قالو ذا شي غلط اننا نقلد النجوم وغيرهم في التلفزيون .. لان حقين الدعايه والمخرجين فارضين عليهن مشيه خاصه .. لزوم الدعايه يعني وبس شكل ..ولا هن مايمشن كذا في حياتهن العاديه
طبعا في قواعد عامه للمشي للي نسويه وللي نحذر منه لزوم نطبقها زين بصوره عفويه بدون تكلف وبدون تقلييييييييييييييييييييد
اول شي
احذري
إحذري هالاشياء
-لاتقلدين مشية أي وحده شفتيها كانت نجمة أو غيرها حتى لو عجبك شكلها

لأن اغلب هالمشيات تحسين فيها تصنع بالحيل واصلن اوقات احس انها يرقصن مايمشن
-تمشين وكتفوك متجه قدام ..ذا غلط مره
-الركبه .. انتبهي تحركينها بشكله الدائري مو لزوم تثنينها يعني

-أنتبهي تمشين بخطوات مره واسعةوكبيره او أنك تمشين بخطوات قصيرة
-برضو خصرك موب لازم تحركينه مره يمين ومره يسار وهز ياوز مير ياكثر اللي سوون تسذا

هذي الأشيااء اكبر غلط نسويها نحاول نتجنبهاا اكثر

هذا اللي راح تتحاشينه
طيب تعلمي كيف تمشين بيكوون عكسه
-رجولك وانتي تمشين خليها بشكل مستقيم قدام الثانيه
-برضوو ذراعك حركيها بنتظام وانتي تمشين مثل اليد اليمنى مع الساق اليسري والعكس بالعكس
-وانتي تمشين حاولي ترجعين كتوفك على ورا
-عودي نفسك على المشي بجذع مستقيم على قولتهم رزي عمرك بدون تصنع , ورأسك يكون عالي بس انتبهي مووب معناتها تكبر يعني

شوفو يقولون هذي الحركه مفروض نتدرب عليها .. تعرفون العاب السرك . هماه في حركه للبهلوان يبسط ايده على الجنب ويبدا يمشي على اطراف اصابعه على الحبل ؟؟؟ ايووووه بس ...كل يوم امشي عشر دقايق بالبيت بس خلي مشيتك زيه بالضبط واكيد موب على الحبل عاد ..هذي المشيه تخليك تحافظين على توازنك بصوره طبيعيه.. واصلن تشوفونها دايم بالتلفزيون يتدربون عليهااا
وبروضو حتى فيه طريقه ثانيه .. انك تحطين كتاب فوق راسك لمده خمس دقايق وهمن تمشين وانتي رازه روحك ورجولك تكون مستقيمتن وياويلك اذا طاح ..
اخر شي لاتستصعبونها .. مع الوقت بيكون شي عادي بس عودي نفسك عليها وبتصير كنها جزء من حياتك




*الصعود والهبوط مع الدرج له قواعد واصوول *




ياربيييييييه يافيه بنات مايعرفن يمشن مع الدرجه !! يانك تسمعين صوت طقطقه نعلتها بقوووووه مره ولاا تنتظرينها علبال ماتعد الدرجات كلها او اذا جت نازله طمرت درجتين سوى .. ابد مثل البزران موب بنت ذي
الصعود والهبوط برضو له اتيكيت خااص ولزوم نهتم بمشيتنا وحنا على الدرجه علشان يكون مضهرنا كوويس على الاقل
في الصعود لازم ننتبه على هالملاحظات هذي
انتبهي
-لاتصيرين ماسكه الدرابزين بقووه وانتي ماشيه تقل عجيز يحول يادووبك تمشين .. لا امسكيه بشكل رقيييق موو بقوه يعني .. ولاتخافين منتي بطايحه
-انتبهي تنحني لقداام كثيرر حتى على الدرجه لزوم الرزه وترى موب مشكله لو تنحني شوي لان اوقات يصير صعب عليك
-المشيه الصح انك ترفعين رجولك الى مستوى الدرجه بس ..همن نزليها بشويش وبدون صوت وعقبه ادفعي جسمك للاعلى وانتي رافعه رجلك الثانيه << عساني عرفت اشرح بس
برضو في النزول للازم ننتبه اكثر احس انه اهم من الصعوود
-احذري وانتي نازله تكون ركبتك بعيدات عن بعض ..وضهرك جاي على قدام .. يعني المشيه ذي اشوف انها لرقاله بشعه حتى لو عندهم اسباب خاصه .. موب عاد انتي
-لاتضربين الدرجه بكعبك وتزعجين خلق الله على هالطقطقه
-برضوو خلي قوامك منتصب ومتزن .. وانحني بس شوي علشان تشوفين الدرجات ..وعلشان ماتتطيحين وتبلشين بعمرك يعني مجرد انحنااء بسيط
-اخر شي طبعا إثني ركبتك الخلفيه يهدوووووو ولطف وانتي نازله

>>>>> ردود الأعضـــــــــــــــــــاء على الموضوع <<<<<
==================================


*الجلووس *



الجلوس موب بس له اتيكيت خااص بس.. لا طريقه جلستك تعتبر من فنون لغه الجسد ..من طريقه جلستك يدري الواحد وش اللي بداخلك ويعطيك اوضح فكره عن اللي في بالك ..حتى فسرو شخصيه الواحد من جلسته .. فاكثر شي اهتمو فيه خبراء الاتيكيت هوو الجلسه حاطينها نمبر ون عندهم
علشان كذا قالو الخبراء على كل فتاه تبي تظهر بشكل لايق وحليوو لازم انها تتعلم اصول اتيكيت الجلووس اول شي ..هذا غير عن بعض الجلسات المخزيه
حتى قال واحد منهم
إذا كان الجلوس السيء بالنسبة للرجل ظاهرة تدعو إلى الإنزعاج فإنه بالنسبة للمرأة يعتبر (( كاارثه << هو صادز )


الجلسه الغلط بحد ذاتها اساءه لشكلها وانوثتها
بعضهن يجلس وهن مبعدات رجولهن عن بعض بشكل وحش مره ولا جلسه رجل حتى وزود على تسذا ركبتها طالعه لبرااااااا
ياربيييه حتى جلسه رجل على رجل صارن يلفلفن سيقاانهن على بعض و اذا صارت سيقانه عصقولات حيل مهنا فرق بينه وبين الحيه ... وكثيرر نشوف تجلس على اخر عضمه من الضهر !! ماله مادري وشسمه تجلس عليه ..حتى في جلسات تحسين انها قمه العربجه والله .. تجي حانيه ضهرها وهمن حاطه ايدها على ركبتها .. تخيلتو الشكل باللهي ,, واتسبدييه وين الانوثه بس
كل هالجلسااااااااات خطأ ×خطأ
الجلسه الصح اللي مثل الصوره الي فوق ..
يكون ضهرك قائم وراسك منتصب ..وكتوفك رجعيها على ورى ..وعادي رجل على رجل بس كلن يعرف انها جلسه موب بصحيه ...احسن شي خلي الركب بجنب بعض وميليها يايمين او يسار مثل الي بالصوره وحذاري مووب يعني خلاص تصيرين زي الصنم وماتتحركين يحول .. لا
سوي اللي تبين بس بحدود اللي قلناه ..مير انشالله اني عرفت اشرحه
واذا ودك تتدربين على الجلسه الصحيه سوي هالتمرين اللي شفته .. بكتب لكم خطواته كله مثل ماهو علشان تفهموونه صح وواضح اصلن مو لزوم شرح .. اذا شرحته حستها لكم ..مير مهناا احسن من النسخ والصق ..يمديكم على هالاسلوب بس

إقتباس »
إذا أردت أن تتمرني على الأوضاع الصحية الجمالية فمارسي هذا التمرين..

1- ضعي مقعداً ذا مسند قائم في ناحية من الغرفة.

2- تقدمي منه برشاقة , وعندما تصبح المسافة بينك وبينه هي ثلاثون سنتيمتراً ,

ألقي عليه نظرة خاطفة ثم أديري ظهرك إليه , ثم إزلقي إحدى قدميك وراء الأخرى
واثني ركبتيك ,

واخفضي وركك , وظهرك منتصب , ثم إجلسي براحة دون أن تضعي ساقيك
على بعضهما ..

وهذه هي الجلسة المثالية....

ضحك المراه له اصول واتيكيت




ه ه ه ه ه ه ه ه ه ه ه ه ه ه ه ه ه ه ه ه ه ه ه ه ه ه ه ه ه ه ه ه<< ضحكه متقطعه ..
كثير نسمعهاا ولا ..هذا من غير المؤثرات اللي وراها
الابتسامه بشكل عام من اسرار الجمال والجاذبيه عند المراه بس الضحك لااااااااا
الضحك مثل غيره من التصرفات له قواعد واصول واتيكيت .. اولهااا ..
-خلي ضحكتك بعيده عن التكلف .. اذا قالو لتس نكته بايخه موو لزوم تضحكين وتشاهقيين كنها اطلدز نكته سمعتيها ..ياحبي لتس تبان الضحكه المتصنعه ترى
-الضحك الهستيري سالفه ثانيه .. بعضهن والله مايمسكن نفسهن تتطلع الضحكه غصب يعني بلشانه بعمرها ههه المهم تبين تفتكين منه .. تاكدي ان كل اللي يشوفونك تسذا بيقوولون الحمد لله والشكر هي وش سرى عليها ويبدون يتشكرون الله على نعمه العقل ههههه علشان تسذا امسكي نفسك اذا جتك نوبه ضحك
-لا تخلين أجزاء جسمك تهتز معك وانتي تقهقهين << ((متعوبه على هالكلمه ))،.. افضلتس أن يصير جسمك ثابت علشان تطلع الضحكة ثابتة ، عاقلة ، متزنة ، وعلشان مايقولون أن ضحكتك وراها نفسيااات
-ابتعدي عن الضحك بينك وبين نفسك ، وأنت مع أي احد ، لان يخيل لهم أنك تستهزئين وتضحكين عليهم ... علشان كذا خلي ضحكك مع الناس موب لحالتس .. ولا هو قبلهم ولا هو بعدهم
* -لا تشتركين في ضحك الطناازه من أحد ، أو ضحك استهزاء ومسخره ... ، علشان ماتتركي انطباع للي معتس بأنه ممكن يمر يوم تتسوين معها الشيء نفسه

الاتيكيت بوضع المكياااج




pngاسمحوولي فيه خطاا اشووفه كثييييييييييييييره حيل .. في القاعه في الكافتيريا حتى عند الممرات اللي فيها مرايات كلن يعدلن مكياجه !! اصلن المكياج شي من خصوصياتك كيف تخلين خلق الله يشوفونك بمكان عام وانتي تعدلينه والبلاا ان كلن تسذاا اول مايخلصن من الفطور طلعن العده كلهاا ماكن فيه مكان ثاني يعدلن مكياجهن فيه
ياحبي لتس اذا جلستي بمكان عام وحسيتي انك بحاجه انك تعدلين مكياجك من الادب والذوق انك ماتتطلعين ادوات المكياج كلهاا همن رحتي تشتغلين ..في هالحاله يمكن تقوومين بدون ماتلفتين الانظار وتروحين للمكان المخصص علشان تعدلينه على راحتك ..
ومثله مثل الشعر لاتمشطين شعرك بمكان عام او على الطاوله حتى مايطيح بالاكل روحي لدورات المياه وضبطيه على كيف كيفك

والمناسبات برضو مو من اللائق أن تطلع الوحده لسهرة أو عرس وتحط نفس مكياج الصباح‏، .. حتى ولو لكل مناسبة أسلوب وألوان مكياج.
وانتم ابخص عاد





إذا كانت بشرتك دهنية حطي في شنطتك دائما البودرة الشفافة واسفنجة لانها أفضل شيء لإزالة الدهون،..
وإذا كنتي من صاحبات العيون الحساسة فخوذي قطره للعين قبل تسوين المكياج ..‏ وإذا طلعتي علشان تبلعين يمكن تثبيتين الروج بوضع شوي من البودرة الشفافة بعد ماتحطين الروج علشان مايطبع على الأكواب والفوط‏،...اهم شي .
واذا مانفع عاد وطبع عادي امسحيه دايركت بالمنديل
واذا بتحطين كريم الأساس اختاري نفس درجة وجهك او افتح بدرجه بس علشان يطلع مضهرك لائق ......... الخ.. هذا اهم شي قلته


اتيكيت الملاابس والاكسسوار ( قااعده 13 )





كلن وذوقه
اهم شي انتبهي من البقع في الملابس .. حتى لو توك تشوفينها وحاولتي تخفينها راح تبان
وراح تعطي عنك انطباع قذاره
وملابسك تكون على حسب : سنك + المناسبة أو الموقف .. والجوّ أكيد

بس بتكلم عن قاعده شفته في كتاب اسمها قااعده 13 !!وهي اصلن مثل خلاصه الحتسي
يقولون علشان تكونين انيقه لازم مايزيد الاكسيسوار في ملابسك عن 13 قطعه
مثل ازرار البلوزة تعد كل واحد قطعة
الجاكيت برضو قطعه مثل البلوزة.....
الحلق الاثنين كلهم يعدون قطعة....
السلسلة تعد قطعة...الدلايه فى السلسله قطعة....
الساعة قطعة....ومايصلح لبس اى شيئ بجنب الساعة....
الدبلة قطعةوالخاتم فوق الدبلة قطعة...ولا مايصلح نلبس اكثر من خاتمين فى اليد الوحده .
الحزام قطعة....الشنطة قطعة....
اذاكان الحذاء بوه اكسيسوار فيعدون الاثنين قطعة....
التوكه في الشعر قطعة.....
هذي للي تحب البسااااااااااااطه وطبعا البساطه سر الاناقه


__________________________________________________ __________

انتبهي لحركاتك فكل حركه لها معنى
كل منا له عاداته وطريقته في التعبير عن رأيه كان بالكلام أو بالحركة ومرات كثيرة نشوف أنفسنا نقوم بحركات لا إرادية ينتبه لها الاشخاص الثانيين ، بعض الحركات لها معنى عندنا علماء النفس ماتركو شي بذ الوقت كل حركه فسرو معانيها الكامنه في النفس وجدوا تحليلات لكل حركة والي يمكن الانسان مايعرفها اصلن من الحركات اللي مووب زينه وتقلل من جاذبيتك هذولاا كل حركه وتفسيره

تحريك الخواتم أو الحلق:
تعبير عن حرجنا وقلقنا من الكلام الذي نسمعه وكأننا نبي نمنع أنفسنا من قسوة هالكلام أو ماودنا نسمعه حتى .. يااي حتى تحسين مايسوونها غير اللي كنهن مستحيات

تحريك السلسله:
يااه ياكثر ماسويها ذي
طبعا قالو انها من الأشياء التي تقلل من جاذبيتك انك تلعبين في السلسله اللي برقبتك هذي مافسروها بشي قالو انها بس مثل القافه يوم انها تمسكينها وتحركينها مير كنهاا سبحه موو بسلسله

عض الشفايف :

كلن يسويها ذي .. طبعا فسروهاا انننا نمنع أنفسنا بالقوة عن قول أي شيء وكأننا نحاول إبتلاع الكلام ...واذا صارت عادة دائمة فهي تدل على المقاومة للانفعالات الداخلية.
برضوو حركه مش كويسه ابد ابد


ضم اليدين عند التحدث :

هالحركة تعني رغبة ملحة في الدفاع عن النفس وحمايتها من رد فعل الطرف الثاني ووبعد تحسين اللي يسويها فيه شي بداخله وده يقوولوه بس كابته . وهذه الحركة بعد تدل على أن المتحدث خجول جداً وموب قادر على انه يتحكم بنفسه وقت وهو يسولف على اللي معه .. اكثر مايسوونها المبزره ولا

وضع اليدين في الجيوب وقت الحديث :

على بالي عاديه ذا الحركه ماتوقعت تفسيرها تسذا واحس لها كذا تفسير !!هالحركة قالو انها تدل على موقف محدد ضد الطرف الآخر ورغبة ملحة في عدم مصارحته يحول يعني كنها نفس شينه !!. وفسروها بعد انها حركة فيها لامبالاه وكبرياء وكأنه تقول بقرريح سوي اللي تبين ماهمن

وضع الأصابع في الفم:

ههههههه واتسبديه مادري كرهتها ذا الحركه من درويش مادري وشسمه يوم انه يقلد هيفااء مصيبه عاد لو بيفسرونها على التميلح ههه المهم فسروها غير وقالو انه دليل على التفكير تفسير صح


شد إحدى خصلات الشعر :

كلن يسويه ذي مير ابلشنا شعرنا من هالتمعيط ..المهم فسروها على انها تواصل مع الأفكار الداخلية واستحضار كل جزئية في هذه الأفكار. وانه إبحار مع الذات ومحاولة للاختلاء بالنفس... احس بس نسويها تسذااا مافيه ولا شي صح من هالكلاام !!.إلصح اذا تحولت ذا الحركه لعاده فهي دليل على انك متوتره وصايبك قلق

طرقعة الأصابع:
مابها شي ذي رد فعل طبيعيه ويمكن تكون محاولة منا للتعبير عن رغبتنا في إنهاء الوضع او الاسراع فيه أو بالعكس محاولة لتهدئته.
مثل اذا طفشنا من المراجعه قمنا نطقطق اصابعناا

اتيكيت تناول الطعاام



-قبل كل شي أجلسي على الكرسي او الارض وظهرك مشدود للأعلى ولاتنسين تسمين قبل ماتاكليين
*-لا تأكلين وفمك مفتوح وكلن يشوف عمليه الطحن وانتبهي لاتتطلعين اصوات وانتي تاكلين
-لاتحطين ايدك على الطاوله حطيه على فخذك واذا خلصتي اكل بكيفك يجوز تحطينها

*-افضل لك ما تشفطين الشوربة بالملعقه اشربيها مباشره بعد ماتحسسين حرارتها برشفة صغيرة..
الملعقه مو مشكله اهم شي مايطلع صوت..
اما اذا قدمووه في فنجان فعادي تشربين بالملعقه منه بمرة أو مرتين بعدين تشربين منه مباشرة ويمكن تستعملين الملعقة مرة ثانيةعلشان تاكلين الخضار او اللحم اللي باقيه بعد كذا رجعيه وحطي الملعقه على الطبق اللي بجنبه موو داخل الفنجان
*-الافضل بوقت العزايم ماتشربين مشروبات غازيه وقت الأكل علشان ماتتطلع الغازات من فمك بشكل مزعج. وان كنتي مشتهيه تشربينه عاد حطي طرف المنديل على فمك وياليت تطلعينها بدون صوت

*-لو علق شيء بين اسنانك وانتي تاكلين .. لاتحاولين تحركين لسانك حتى لو مقفله فمك .. اصبري لين تخلصين او اذا مضطره عادي اطلعي وسوي شغلك عاد قدام المرايه

*-لاتكثرين الكلام والضحك على الطاولة او ترفعين صوتك

*-كولي من اللي قدامك واذا فيه طبق بعيد عنك لاتقومين وتاخذينه .. اطلبي من اللي حولها الطبق تعطيك اياه
-شرب السوائل يكون بدون صوت وقبل ماتشربين الاحسن مايكون في فمك شي ويفضل بعد تجفيف الفم بالمنديل قبل
شرب الماء علشان بعض الاكل يكون دسم ويطبع على الكاسه بعدين
-اذا كانت الدعوى بوفيه يفضل ماتخلين أنواع مختلفة من الاكل في صحن واحد اذا مضطره عااد بكيفك
-لا تملين الشوكة أو الملعقة من الاكل لان بيدخل في الفم دفعة واحده وبرضو. لاتاخذين قطعه كبيرة من الاكل على الشوكة همن تجلسين تاكلين منها على دفعات
-الخبز اذا جيتي بتقطعينه لاتقطعينه بيدينك الثنتين .. اذا بالبيت عطيها الشغاله تذبحها لك من النص بالسكين ..او قطعيها انتي باطراف اصابعك اليمنى بس
-اذا خلصتي كرمشي المنديل وحطيه على منديل ثاني .. او حطيه على طرف الطبق اللي اكلتي منه ..ولاتنسين تحمدين ربك

اذا توهقتي وصارت لك مثل هالحالات هذي .. وش تسوين ؟؟
اكلتي طعام كان حااار مره !!
لاتطلعينه من فمك ولا تتطلعين اصوات تلفت النظر لك ، اشربي موويه ولاتنهبلين كلها شوي وبيخف .. ولاحظي انها الحاله الوحيدة التي يمكن فيها شرب الماء والطعام موجود بالفم
اذا حسيتي طعمه غريب ومو حلو وماقدرتي تاكلينه حتى !!وش تسوين !!
حاولي ماتسوين شي علشان ماينتبهون عليك وحطي الي في فمك على المنديل وحطيه على طرف الطبق وولفي المنديل ولو تغطيته بقطعة فوق المنديل احسن اهم شي محد يشوفه
قعدتي تعاطسين والناس الي على الطاوله يشوفونك كلهم!!
لا تحاولين تاسفين علشان ماتلفتي الانظار زياده .. خوذي منديل وغطيه اذا عاطتستي.. ولو حسيتي انها ماراح توقف اتركي الطاوله احسن لك
اذا قدمو لك طبق وانتي اصلن ماتحبينه ولا عمرك اكلتيه!!
اعتذري بدون ماتعلمينهم وراه ماتحبينه وبدون ماتعلمينهم السالفه كلها .. قولي ماشتهيه وبس


__________________________________________________ __________

اتيكيت البااااااااااقه


قبل الكلام مع الآخرين تذكري
- تأكدي ان خير الكلام ما قل ودل ، قللي كلامك واهتمي بكلام الآخرين.
- اذا أردت ان تكون مهما فعليك أن تكون مهتما.
- طريقة كلام تعبر عن شخصيتك وثقافتك وبيئتك.
- فكري بلي بتقولينه قبل ماتنطقين باي شي
- خلي نفسك مكان الآخرين همن سمعيهم من كلامك
- خلي محدثتك تسمعك كلامها (( الله يعين لاتكون ثرثاره بس )) ، وخليك مستمعه جيده
- وتذكري كم وحده حبيتيها من حتسيها ، وغيرهم ماكرهتيهم الا من كلامهم !!
- تكلمي ببساطة وبدون تكلف

وقت الحديث:
- طالعي بالشخص الي تكلمينه مو تسولفين عليه وعينك بشي ثاني واذا كنت تسولفين مع مجموعة وزعي النظر على الكل او انك توك تشرحين على البنات طالعي فيهن كلهن
- في المناسبات افضل لك انك تتكلمي مع الي بجنبك
- تكلمي بصوت معتدل ماهو عالي ولا قصير واهم شي واضح كلامك وبهدوء
- استمعي ضعف ما تتكلمين، شوفي عندك ضروسن كثيره علشان تصكين فمك وعندك اذنين علشان تسمعين بس
- انتبهي انتبهي لا تكذبين أي احد حتى لو متاكده اصلن دخلتك بتحسين انها انواع الغلط
- لا تجادلين .. وتذكري دايم افضل السبل لكسب جدال هو تجنبه.ولا تتدخلين من العنيده او الثرثاره اذا صارت جنبك إنسانة قرقر .. ثرثاااارةو بايخه وحقنه ماغير سوالفه مضيعه وقت ودك تقولين خلاص اووووص ..على بلااطه خخخ وبنفس الوقت ما تبين برستيجك يخرب أو تجرحينها بكلمة .. موب من صالحتس انك تجلسين وتسمعينها بتدوخك وتضيع وقتك علشان كذا مافيه حل الا ان تقاطعينها لين تسكت.. مثل تسولفين مع اللي بجنبك . طالعي بساعتك كل شوي ..عدلي جزمتك .. شيكي على جوالك وشوفي من اللي ماكلمتيه من زمان وكلميه خخخخ احس كل الحلول اللي قلتها فيها وقااحه خخخخ اهم شي افتكي منها .. وشسمه اللي تعرف حل لاتبخل علينا

- حافظي على مشاعر الآخرين ، واختاري كلماتك بعناية.وذا اهم شي اتذكر شفت قبل اسبوعين وحده هنا كانت تشكي من تصرف صقيقتها .. تقول من زمان ماشفنا بعض واول ماشافتني وقبل ماتسلم علي قااالت ياااااااااه يانك صايره دوووبه مره ليش سمنتي !! وهي اصلن مووب عارفه وش صايرن فيهاا قالتها تسذا على بلاطه مفروض ماتقول تسذا ..اذا كان عندك رد سلبي خليه لنفسك .. قدمي الرد الايجابي
اذا ودك خلق الله يسولفون معك ويكونون مهتمين وهم يسولفون عليك تكلمي عن اهتمامات الشخص الثاني .. مثل الي معك مشالله تفت الكمبيوتر .. خلي حتسيك عنه .... وهذا الشي يعتبر مهاره انك خليتيه تسولف معك
اذا احد يسولف معك ويسألك لا تكررين كلمة لا ولا ايوه كثيرا .. رحتي لسوق ايه.. شفتي الفلم لا .. الخ...كنك بزر .. تبي حلوى ايه تبي عصير ايه خخخ .. يعني سولفي شوي موب بس ايه لا ايه لا
عادي انك تسخدمي بعض المصطلحات الاجنبيه .. بس الاحسن يكون عند الضروره .. وقبل ماتتكلمين بالمصطلحات تاكدي ان اللي تكلمينه يفهم فيها .. احسن من انك تحرجينه
برضو الي يادوبه فاهمه بعض اللغات .. لاتنطقين كلمه الا وانتي متاكده منها علشان ما تنحرجين .. يعني تخيلو هالسالفه
وفد عربي من شركه راحو لصين ، المهم عند الوليمة سأل الرئيس الموجودين وش تشربون ، قال واحدن منهم كلمه صينيه توه متعلمها بس مايعرف ينطقها صح قال : تشي تشي (كان يقصد الحليب) ، الرئيس طير عيونه وانقلب وجهه واضح ان الكلمه غير ، ويوم سالو اللي معهم هو وراه عصب .. قالو ان هالكلمة معناها حليب الأم.!!!(( ياشين بعض النكبات ))

أبتعدي عن نقل الاخبار الا وانتي متاكده مليون بالميه .. لان نقل خبر تسذب يؤثر على مصداقيتك .. ومارح احد يصدقك لو تكرر
ابتعدي علن هالاشياء هذي وقت الحديث التكرار.. حلف الأيمان.. المراهنة "دليل ضعف الحجة".. الغيبة والنميمة (الغيبة أشد من الزنا ، والفتنة اشد من القتل)...لاتتكلميين في جانب يتعلق بحياة شخص غير موجود...الاشمئزاز ..المواضيع الحساسة.. - اشارات اليد - لا تجاوبين عن سؤال موجة لشخص آخر..
حتى وانتي تسمعين ابتعدي عن التثاءب وشخص آخر يتكلم
..المقاطعة .. شخص كل ما تكلم انط واقول أنا اكمل عنك ...لاتنشغلين بالبيبي او انك تنظفين نظارتك
وبس
طيب اذا وحده تسولف على الكل ونطقت كلمه غلط كيف تتصرفيين ؟؟؟خصوصا العجز ياحبي لهن ياهن يدبلجن الكلمه غيرر
لاتعلقين عليهاا ..انطقي الكلمة بشكلها الصحيح وانتي تسولفين حتى لو كانت الكلمه تضحك لاتضحكين

شطحه

..مره امي عازمه حريم الحاره كلهن .. المهم كنت جالستن عندهم.. وكانت فيه وحده منهن عجوز وكبيره مره وكانت هي اللي تسولف .. المهم مادريت الا هي تسالني !! قالت انتي ماشفتي بنت فلااااان وين تعينت ؟؟ عينوهاا بالمريييييخ !!!!!!!!!(( فيس عيونه طايره ))
تتدرون المسكينيه وش تقصد .. تقصد خرخير .. مير وش جاب لجاب معينه بالمريخ مره وحده خخخ وبيني وبينكم ماتسذبت والله مقلوعه هي والمريخ سوا .. بس انا عاد فطينه بسم الله علي فهمتها على طول .. قلت لها خرخير خرخير .. وبس ومير تخلص السالفه .. وشسمه ترى ماضحكت اول شي كلن ضحك وماقدررت امسك نفسي عاد



طيب لو طحتي بموقف ان احد سالك سؤال محرج !! وش يتسوين !!
من اكثر الاسئله المحرجه هي اذا احد سالك عن العمر او يتعلق بالفلوس
لا تنحرجين ولا شي يمديك تهجين من الموقف خخخ لا يعني فيه كذا طريقه تصرفينها
اذا سالك عن العمر قولي فوق 20 او فوق 30 اهم شي ماتحددين او قوولي عمر كبيرررر مرره واضحكي .. ماتوقع عاد انه بتصير حقنه وبتقول كم .. اذا سالت عاد ابتلشي فيها
اما لو سالتك كم ثمن أي شي لابسته .. قولي له ماذكر ولا قدري ثمن من عندك قولي اقل من 800 وزي كذا عاد

اتيكيت براا البيت
شكر من يقدم لك المساعده .. مثل لما نشتري شي موب عيب انك تشكرين البايع على مساعدته لك

اذا كنتي في السوق بعد .. وخقيتي على كولكشن غالي او حليو لا تبيني خقتك عليه وياي وجونان ومادري وشو
- لاتفعلين ولاترفعين صوتك اوتحركين ايدك عن أي مشكله تعاملي معها بهدووو

لاتاشرين باصبعك اذا عجبك شي برضوو او تاشرين للبايع عطن . وهذاه .. الخ
من التيكيت انك ما تاكلين او تشربين وانتي تمشين بالشارع << علمي روحتس

واهم شي لاتتطولين صوتس او تنادين اللي معتس خصوصا اذا صارو معتس مبزره .. يا ك..... يا و.... اج.... << اكملي الفراغات بما يناسبها من الاحرف خخخ

لاتخمخمين أي احد من معارفتس اذا شفتيه في السوق
اذا صار ورحتي لحفله ديجي او زواج .. وكان فيه ردح هنااك.. لاتنهبلين زود وتبالغين برده فعلك .. اردحي مرتين همن كملي بالبيت خخخ .. اما لو انه زواج ومتنقبه عادي سامحه لكم احسن حاجه التنكس..هو صدز محدن بعارفك ميرر الاحسن تركدين




[واخيرااا اتيكيت فن التعامل في المنتديات
المنتديات عالم جميل لمن يحسن ولوجه و الابحار فيه. .و لنصل الى مرفأ الابداع
^
^
كلمه دايم نسمعها وكلن يعرفه ..

اللي خلان اكتبه غير ..السالفه موب على المنتدى كله السالفه على التقييمات وبعض الردود
يافيها جفاصه وجلافه ووساعه وجهه .. مير عادي تمونون وزياده يعني مشالله صرنا نشوف تقييمات نموذجيه للجفاصه خخخ مع انهن كلهم داخل مملكه المراه اشك والله ان ورى هالتقييمات شنب لابس برقع ..طبعا احتسي عن التقييم الاخضر .. الثاني بكيفه اذا ودك تمدحينه قولي كلام حليو موب خهخخههخخ يامجنونه او ياحقيره .. ماعرفنا لكم على هالاسلوب مادري يعني كيف نضحك ولاشلون .. ميرعلمون هي مدحه ولاسبه !!!
طبعا كلامك ومواضيعك و مشاركاتك المنشورة في المنتدى"صورة" عنك بالنسبة لجميع الاعضاء.. وهي المرآة العاكسة لشخصيتك من اسلوبك بالمنتدى بيعرفون شخصيتك .

طبعا علشان نراعي شروط الاتيكيت في المنتدى لازم نلتزم بهالاشياء ذي
لكل منتدى شروطه و حرماته..فلا تخترقينها..لأن أي تجاوز قد يكلفك عضويتك في المنتدى
قايلنه موب تروحين عند منتدى الهلاليين وتقولين ياروحي يالنصر



-يحصل للاعضاء مشكلات في المنتدى..ويكمن تكونين طرف فيها ..
في هذه الحالة تجنبي الملاسنة الكلامية مع أي عضواذا غلطت عليك ..اتركيه بكيفه خليه تحتسي ولاتردين عليها .. فيه مشرفات يتفاهمون معها بطريقتن الخاصه ..كلنانعرف نرد ترى مير صيري احسن منها انتي متربيه وماله داعي الالفاظ تتعبين عمرك وتردين و احسن لك من انه يمرمطونك انتي وياه...هي بتاخذ جزاها

اذا طلبتي من احد مساعده لاتتجاهلين اراء من ساعدوك حتى لو انه شي بسيط وماستفدتي منه اشكريهم لاي مساعده قدموها لك
اذا قريتي موضوع عبري عن فهمك له على على نص او انقد يدل على التفاعل
اذا اختلفتي مع شخص وماعجبك راي له .. احترمي رايه واعترفي فيه اولااا ...بس خبريه انك تختلفين فيه
صرحي عن اراءك بدون هجووم.. وبدون قمع لاراء الاخرييييين
واخر شي لمحباات اللطش والنسخ والصق ..اذا قريتي موضوعي وعجبك وناويه انك تنقلينه .. موب عيب انك تكتبين كلمه منقول وماهو حرام في المنتديات هذا الشي (غير الاقلاع طبعا ) اكتبي اسم الكاتب والمنتدى ...
وعلى فكره تراني مسامحه الي بتنقل موضوعي بالعكس الله يجزها خير تخلي الناس يستفيدون اهم شي ..واذا بتنسبينه لك مسامحتك برضو ولو انه شي راجع لذمه الواحد .. بس ماعليه مسامحه اهم شي الفايده راس ماله موضوع ..


تم بحمد الله ..


__________________________________________________ __________

السلام عليكم ورحمه الله وبركاته

غااااااااااااااليتي <<<اغلاهم>>> تسلم يدك على هالموضوع الرائع والمفيد بصراحه اكثر من ممتاااااااااااااز ويستحق التقييم وبقوووووووووووه كمان


وياحلاتك انتي واسلوبك بالطرح اللي يفتح النفس ويخلي العضوه تواصل بقراءه الموضوع وبدون اي تملل رغم طوله بجد عجبتيني

مشاء الله عليك

وهذي اقدمها إلك


__________________________________________________ __________

موضوع رائع كل فتات لازم تطلع عليه
مع خالص تحياتي