عنوان الموضوع : يوميات مدام عنايات (كوميديا ) حياة زوجية
مقدم من طرف منتديات نساء الجزائر

يوميات مدام عنايات (كوميديا )






السلام عليكم ورحمة الله وبركاته
مدام عنايات زوجة مصرية متجوزة ابن خالتها الأستاذ عبده بعد قصة حب عنيفة وخلفت محمد7 سنين ومي5 سنين وعلاقتها حلوة جداجدا مع جارتها في العمارة ( ما عدا اتنين تلاتة كده....)
القصة بتبتدي يوم الاحد الصبح الساعة 6 بيضرب جرس المنبه بصوت عااااااااااالي :

عنايات :يا ربي على صوت المنبه ده مش ممكن يا ساتر
عبده :اطفي البتاع ده حرام عليكي مش عارف أنام
عنايات:اهوه طفيته (مش عارف تنام ؟ ده انت نايم من الساعة9 بالليل وبتشخر كمان )
دخلت عنايات الحمام غسلت وشها وصلت وابتدت اليوم كالعاااااااااااااده
عنايات :يلا محمد يا حبيبي الباص قرب يجي
محمد :يا ماما انا عينيه مش راضيه تفتح حتى شوفي!!!
عنايات:يلا يا حبيبي اغسل وشك وألبس هدومك
محمد :طب ممكن أغيب انهارده ؟
عنايات : قوم بقولك ولا أقومك بطريقتي؟؟؟؟
محمد :طب خلاص خلاص هقوم (كل يوم مدرسة امتى بقى الأجازة تيجي عشان انام براحتي )

عنايات :يلا يا ميوية يا حبيبتي اصحي
مي :صباح الخير يا ماما أنا صحيت مش أنا اشطر من محمد؟

عنايات:طبعا يا حبيبتي ده انت حبيبة قلبي
وبعد ما الاولاد لبسوا هدومهم وسرحتلهم شعرهم ورشتلهم برفيوم أكلوا الفطار وشربوا اللبن ونزلت ركبتهم باص المدرسة وطلعت عشان تصحي جوزها....
عنايات :يا صباح الخير يلي معانا يلي معانا ده الكروان غنى وصحانا وصحانا
يلا يا عبده أصحى كده هتتأخر على الشغل
عبده :خخخخخخخخخخخخخ
عنايات:يلا يا عبده كل ده مشبعتش نوم؟ انا عايزة أعرف انت بتجيب النوم ده كله منين؟
عبده :حاضر انا صحيت خلاص بس جهزيلي الحمام والهدوم اللي هلبسها
عنايات: كل حاجة جاهزة أصحى بقى
عبده: صباح الخير يا عنايات
عنايات : صباح الخير يا حبيبي
عبده يروح الحمام ويخرج يلاقي على السرير قميص مكوي وزرايره مفكوكة والحزام جوه البنطلون والشراب موجود وجاهز للبس
عبده احسن حاجه فيكي يا عنايات انك مدلعاني هههههه)
عنايات:الساندويتشات جاهزة يا حبيبي
عبده :انتي فاكرة أول مرة قولتيلي يا حبيبي؟
عنايات : متكسفنيش بقى يا عبده انت لسه فاكر؟
عبده :بموت فيكي لما وشك يحمر بتفكريني لما كنت بتكلم معاكي على سلم بيتكوا فاكرة؟
عنايات : يا راجل كده مش هتروح الشغل انهارده( وتضحك ضحكة ليها معنى )
عبده : وايه يعني ؟ مفيهاش حاجة لما أغيب انهارده
عنايات : بلاش دلع يا راجل ويلا بقى
عبده :طيب يا ستي يبقى نكمل كلامنا بالليل لما الولاد يناموا
اسيبك بقى يا جميل انا ماشي
عنايات: خلي بالك من نفسك وابقى هات فاكهة معاك وانت راجع
عبده :من عينية يا عسل
عنايات:مع السلامة
وتبدأعنايات تشوف شغل البيت وهيه بتغني (يا جميل يا عسولة يا شخصية متتكررش بسهولة مش معقولة يا لذيذ يا شرباته معاك يا حبيبي عايشة الدنيا ببساطة .....)
ويرن جرس التليفون
عنايات : يا ترى مين اللي بيتصل بدري كده اللهم اجعله خير
ألو ألوالو
اهلا اهلا يا طنط

لا عبده لسه نازل من شوية

مع السلامه
عنايات : (يا ترى عايزاه في اية على الصبح يا حماتي....ربنا يستر )

يا ترى حماتها كانت بتتصل عايزة اية؟ واية الحاجة المهمة دي ؟

هكملكوا المرة الجاية ان شاء الله

>>>>> ردود الأعضـــــــــــــــــــاء على الموضوع <<<<<
==================================


الحلقة اللي فاتت خلصت ان خالة عنايات اللي هيه حماتها كانت عايزة عبده في موضوع مهم جدا وطبعا عنايات الفضول هيموتها عشان تعرف!!!!!!
عبده لسه موصلش الشغل والموبايل رن لقى مامته بتتصل بيه واستغرب وقت المكالمة
عبده :صباح الخير يا ماما واحشاني اوي يا حبيبتي
مامته :صباح الخير يا حبيبي (بترقق صوتها من كتر الحنان هههههههههه)
عبده : اية اللي مصحيكي بدري كده؟
مامته : لا ابدا اصلي عايزاك في موضوع كده
عبده : خير يا ماما؟
مامته: بص يا حبيبي أخوك كلمني إمبارح وهوه محتاج منك مبلغ كده عشان يكمل ويشتري عربية فقالي أكلمك
عبده : هوه محتاج كام.
مامته:10000جنيه ياحبيبي
عبده :يـــــــــــــــاه ده كتير اوي ....طب هوه عايزهم امتى يعني يا حبيبي
مامته :اول الشهر
عبده : حاضر يا امي ان شاء الله هحاول أحضره المبلغ من عينيه
مامته : يسلموا عينيك يا حبيبي اه على فكرة عدي عليه بالليل عشان عايزة آجي عندك يومين لاحسن العيال وحشوني اوي
عبده : حاضر يا حبيبتي هجيلك بعد المغرب ان شاء الله
وصل عبده الشغل وهوه بيفكر هيدبر المبلغ ازاي بس قال مفيش غير عنايات حبيبتي هيه تفكر معايا وقعد يبتسم لما افتكر ازاي حس بحبها اول مرة لما كانت راجعة أجازة مع اهلها من السعودية وكانت في أولى ثانوي وهوه في أعدادي هندسة
وأول ما شافها لقيها كبرت خالص وبقت جميلة جدا ولأول مرة حس أنها بتتكسف وهيه بتسلم عليه ومن يومها قرر ان عنايات مش هتكون غير ليه هوه وجط عنايات هدف لازم يوصله.... ياه ذكريات جميلة وفجأة قابله صاحبه المهندس أحمد
أحمد : صباح الخير يا عبده
عبده : صباح الخير يا أحمد خير مالك سعيد أوي كده ليه؟؟؟
أحمد : اصلك مش عارف اللي حصل
عبده : خير ان شاء الله
أحمد : جت أنهارده مهندسة جديدة بس ايه حاجة ولا في الخيال
عبده : يا راجل عيب كده ده انت مراتك ست زي الفل
أحمد : وحد جاب سيرة مراتي دلوقتي أنا قصدي إن المكتب بقى ليه طعم تاني
عبده : طيب يلا عشان نشوف شغلنا
ودخل عبده المكتب ولقى واحده مدياله ظهرها وشعرها طويل وبني ولابسه جينز ضيق لونه ازرق فاتح وقميص بكم وحاطه حزام عريض فضي وريحة البيرفيوم واصله لحد باب المكتب......
عبده :صباح الخير
المهندسه لفت مخضوضة ووقعت أوراق من ايديها وضحكت وقالت
المهندسه:صباح الخير انت خضتني انا المهندسه منى وحضرتك مين؟
عبده لقى ان وشها جميل اوي وطفولي وضحكتها حلوة و....ورد عليها
عبده : أنا آسف أنا المهندس عبده مدير القسم هنا احنا سعدا انك هتكوني معانا وأي استفسار انا تحت امرك
منى :ميرسي اوي أنا كنت بشتغل في شركة بس قدمت هنا لما لقيت الاعلان وحسيت اني هنا هاخد خبرة اكتر
عبده :أن شاءالله تكوني مبسوطة معانا
منى وهي بتضحك:ان شاء الله
وقعد عبده يشتغل واندمج في المشروع اللي بيخلصه ولقى موبايله بيرن
عبده : ايوة يا حبيبتي فطرتي ولا لسه؟
عنايات :اه يا حبيبي الحمد لله أنا بس كنت بطمن عليك انك وصلت بالسلامه
عبده :الحمد لله ,على فكرة ماما هتيجي تقعد معانا يومين كده
عنايات ياااااااااااالهوي )تنور يا حبيبي ده حتى بقالها اسبوعين مجتش والولاد بيسألوا عليها
عبده : طيب يا حبيتي اسيبك انا وهكلمك وأنا راجع
عنايات :مع السلامة يا حبيبي
وبدأت عنايات تنظف الشقةعشان حماتها جايه غيرت الملايات ونظفت الحمام والمطبخ ولمعت الارضيات وبخرت الشقة
كل ده وهيه بتحضر الغدا عشان الولاد قربوا يوصلوا من المدرسه
جرس الباب بيرن عنايات راحت عشان تفتح.....
عنايات:اهلا يا هدى اتفضلي يا حبيبتي (هدى ده جارة عنايات وصاحبتها من يوم ما سكنت في العمارة)
هدى :انا عطلتك ولا حاجه
عنايات :لا ابدا انا قربت اخلص اصل حماتي هتيجي عندنا انهارده
هدى : هيه مش كانت لسه هنا من اسبوعين ؟ ربنا معاكي طب اساعدك في حاجة؟
عنايات : شكرا انا خلصت البيت والاكل بيستوي,المهم انت اخبارك ايه؟ اتصالحتوا ولا لسه؟
هدى : مش راضي يصالحني مع اني عملت اللي انت قولتي عليه بالضبط مصمم اعتذرللست هانم اخته وانا مش موافقه
عنايات :يعني الاغاء مجبش نتيجة معاه ممممممممممم لازم نفكر في حاجة تانية.....
عنايات: لقيتها هعمل كوبايتين شاي وهقولك تعملي ايه بالضبط
هدى :قولي الله يخليكي ده انا غلبت معاه هاااااااااه دبرني يا وزير
عنايات:بصي يا ستي انتي تلبسي لبس دلع عالآخر واول ما يرجع تقوليلوا أنا فكرت كتير وقررت اني اسمع كلامك يا
حبيبي
هدى : لايمكن ده هيه اللي غلطت
عنايات:اصبري بس وبعدين تحضنيه حضن خفيف وتمسكي سماعة التليفون وتتصلي بالرقم بس قبل آخر رقم تعملي انك اغمى عليكي زي فيلم سيدة القصر بس أوعي تضحكي وطبعا هوه هيتخض عليكي ويشيلك والباقي عليكي انتي بقى
هدى : تسلم أفكارك انا مش عارفة من غيرك كنت هعمل اية ربنا يخليكي ليه

عبده قرب يخلص شغله وبيجمع اوراقه ويشيل اللاب توب فلقي منى بتبصله وبتضحك وبتسأله


__________________________________________________ __________

منى :انت هتروح علطول كده ؟
عبده : اصل الولاد مش بيتغدوا من غيري
منى :ربنا يخليهوملك عندهم قد اية؟
عبده :محمد 7سنين ومي 5 سنين,وانتي عنك اولاد؟
منى :للاسف انا مطلقة وربنا مش كاتبلي اني أخلف
عبده :انا آسف جدا
منى :لا ابدا الموضوع ده بقاله سنتين
عبده :طيب استأذنك أنا بقى
منى : اتفضل,أشوفك بكره ان شاء الله
عبده : ان شاء الله
وفضلت منى تفكر في عبده ومستغربه انه بيكلم مراته بأهتمام كده وبيرجع البيت علطول وحست انه مختلف خالص عن طليقها واهماله ليها طول فترة جوازهم وقالت يا بخت مراتك بيك يا عبده.....
ورجعوا الولاد البيت وغيروا وبدأوا يساعدوا عنايات في تحضير السفرة ورن جرس الباب وجريوا الاولاد عشان يفتحوا
عبده : اهلا اهلا يا حبايبي عملتوا اية انهارده في المدرسة
محمد: الميس ودتني عند المشرفة انهارده
عبده:ليه يا حبيبي؟
محمد :كنت برسم في الحصة
عبده : حاول ترسم في حصة الرسم بس ومتزعلش الميس تاني
محمد :حاضر يا بابا
عبده : وانتي يا ميوية؟
مي : انا الميس ادتني استيكر عشان كنت مؤدبة
عبده : شاطرة يا حبيبتي , فين ماما يا ولاد؟
عنايات : انا هنا يا حبيبي,حمدلله على السلامة يلا غير هدومك السفرة جاهزة
وقعدوا عشان يتغدوا سوا ويتكلموا عن الليحصل انهارده لكل واحد فيهم
عنايات :على فكرة مامتك كلمتك بعد ما نزلت
عبده :اه ما هي كلمتني
عنايات :خير في حاجة؟
عبده :لا ابدا ده ابراهيم أخويا عايز مبلغ سلف عشان يكمل ويشتري عربية
عنايات:وماله محتاج كام؟
عبده: 10000جنه
عنايات :ده كتير اوي هنجيبهم منين؟
عبده :دبرني يا وزير فكريلي في حل يا حبيبتي
عنايات : طيب سيبني أفكر شوية
عبده: ربنا يخليكي ليه
عبده:على فكرة يا ولاد تيتا هتيجي تقضي معانا يومين اصلكوا وحشتوها اوي
محمد:يييييييييييه
عنايات :عيب كده يا ولد
محمد : يا ماما تيتا بتشخر بصوت عالي مش بعرف انام
مي :وكمان بتنام جنبي وانا مش باخد راحتي في السرير
عبده يضحك ويقول حتى انتي يا مي بتعترضي طيب انا زعلان منكوا
محمد ومي :لا يا بابا اوعى تزعل ابدا احنا آسفين
عبده : خلاص لما تيجي تيتا تكونوا مؤدبين اتفقنا
محمد ومي :اتفقنا
عنايات :هتروح تجيب مامتك امتى؟
عبده :بعد ما اصلي المغرب ان شاء الله
عنايات:ان شاء الله (يا رب عدي اليومين دول على خير وميحصلش مشاكل ياساااااااتر لو بس حماتي تبطل ترمي كلام زي الرصاص كانت تبقى احسن حما في الدنيا ...)
عبده: اعمليلنا شاي يا حبيبتي
عنايات:حاضر ,يلا يا ولاد ساعدوني في تنظيف السفرة وبعدين كل واحد يعمل الواجب بتاعه وانا هتابعكم كل شوية
مي : انا عملت الواجب في الباص
محمد:انا عندي واجب كتير اوي
عنايات : يا ابتدي عشان تخلص بسرعة وتلعب مع اختك
وتاخد عنايات الشاي وتروح تقعد مع عبده في البلكونه
عنايات: اتفضل الشاي
عبده : تسلم ايديك يا جميل
عنايات : ها احكيلي عملت ايه في الشغل انهارده؟
عبده : عادي زي كل يوم بس جت انهارده مهندسة جديدة
عنايات : والله ....وشكلها ايه بقى ؟؟؟؟
عبده :ايه شكلها ايه؟ شكلها مهندسة
عنايات: يعني كبيرة ولا صغيرة ؟ حلوة ولا وحشة؟تخينة ولا رفيعة؟ بيضا ولا سمرا
عبده : انت بتغير عليه يا جميل؟
عنايات: أنا مش بهزر دلوقت
عبده : وأنا مش بهزر ,ما تيجي اقولك كلمة سر في الاوضة جوة
عنايات : يا سلام يا اخويةاضحك عليه بكلمتين
عبده : انا بتكلم جد والله
عنايات: طيب روح وانا جاية
محمد : ماما في حاجة مش فاهمها تعالي ساعديني
عبده : ما تعتمد على نفسك شوية انت كبرت خلاص
محمد: كبرت اية ؟ ده أنا لسه في تانية ابتدائي
عنايات:حاضر يا حبيبي انا جايه اساعدك وانت يا عبده قوم نام وانا شوية وهجيلك
عبده :طب متتأخريش
عنايات:من عينيه
وبعد ما محمد خلص الواجب راح يتفرج على الكارتون
عنايات دخلت الاوضة لقيت مفاجأة!!!!!!!
هكملكوا المرة اللي جاية ان شاء الله


__________________________________________________ __________

المرة اللي فاتت ووصلنا لغاية ما عنايات دخلت الأوضة عشان تحصل عبده عشان كان عايز يقولها كلمة سر وبعديــــن
لقيته نااااااااايم في سابع نومه وشخيره عامل زي الشكمان المخروم فقعدت تضحك ونامت جنبه وبصتله وقعدت تفتكر يوم فرحهم لما دخلوا الاوضة في الفندق وحصل اللي حصل وهوه نام وهيه لسه هتنام سمعت صوت الشكمان المخروم فاتخضت جدا وصحته بسرعة
عنايات: عبده عبده اصحى يا عبده
عبده: سيبيني انام شوية يا ماما انا تعبان خااااااالص
عنايات:أنا مش ماما أنا عنيات اصحى بقولك
عبده :يقوم مخضوض اية يا حبيبتي مالك في حاجة بتوجعك؟
عنايات :اه جسمي بيوجعني بس مش هي ده المشكلة
عبده :امال ايه يا حبيبتي المشكلة؟؟؟؟
عنايات:انت ازاي متقوليش انك بتشخر؟؟؟
عبده :أنا بشخر عمري طبعا !!!!!
عنايات : نعم انت مش سامع صوتك وانت نايم؟
عبده : ده أنا حتى بنام زي البيبي ,ماما كانت دايما تقولي كده
عنايات : اه طبعا بيبي عنده شكمان في مناخيره
عبده : قصدك اية يا حبيبتي؟ انتي مش بتحبيني ولا اية؟
عنايات : طبعا بحبك بس كان لازم تقولي انك بتشخر انا مش عارفة انام
عبده :طيب واية الحل دلوقتي ؟
عنايات : طبطب عليه لحد ما انام وبعدين ابقى نام انت وشخر براحتك
عبده : بس كده من عينية يا جميل
عنايات(كانت أيام جميلة وحضنت عبده وناموا وأول ما حضنته حس بيها وصحي وقالها انتي جيتي ده انا كنت مستنيكي وحضنها و........)
عبده : انا هقوم آخد دش عشان اروح اجيب ماما وانتي حضرلنا عشا على ذوقك
عنايات : طيب يا حبيبي
عبده يدخل الحمام وتفضل عنايات تفكر فيه وفي قد اية هوه حنين معاها بس لو كانت امه تبطل تدايقها هاااااااا دنيـا
وينزل عبده يجيب مامته وهيه والولاد يستنوا في البلكونة
محمد :بابا جه بابا جه
مي :تيتا اهيه يا ماما
عنايات: طيب يلا نفتحلهم الباب
الباب يتفتح وتدخل ام عبده وتسلم على الولاد وتبوسهم وتديهم شوكولاته وبعدين تبص لعنايات وتقول
أم عبده :ازيك يا عنايات عاملة اية؟ مخدتش بالي منك معلش
عنايات:لا يا طنط مفيش حاجه نورتي البيت
ام عبده:طبعا ده بيت ابني لازم ينور بيه يا عنايات أنا عارفة اية اللي خلى ابوكي يسميكي على اسم جدتك ده اسم تقيل اوي
عنايات:معلش يا طنط نصيبي كده (وبعدين بقى انتي كل ما تشوفيني تتريقي على اسمي يعني ان ما كنش اسمك نبوية كنتي عملتي فيه اية؟؟؟؟صبرني يااااااااااااا رب )
عبده :يلا يا ماما عشان تغيري ونتعشى
ام عبده :طيب ساعدني يا حبيبي مش قادرة أقوم
عبده :حاضر يا امي
عنايات تدخل المطبخ تحضر العشا وترص السفرة وتقولهم اتفضلوا الاكل جاهز وكالعادة تقعد ام عبده مكانها جنب عبده
وبعد الاكل تروح تقعد معاه في البلكونة وعنايات تقعد تتفرج على التلفزيون والولاد يروحوا يناموا وبعد ساعتين يجي عبده يسألها
عبده:اية يا حبيبتي مش قاعده معانا ليه؟
عنايات :لا ابدا اصلي متابعة الفيلم ,تشربي حاجة يا طنط؟
ام عبده: اه اعمليلنا شاي بس بالنعناع
عنايات :حاضر يا طنط (كل مرة تقولي حطي نعناع مع اني طول عمري بعملها الشاي بالنعناع )


__________________________________________________ __________

وبعد ما شربوا الشاي الساعة12 كلهم دخلوا يناموا
وعنايات قعدت تفكر يا ترى عملتي ايه يا هدى؟؟؟ الصبح هعدي عليها عشان اطمن عليها ونامت عنايات وجنبها عبده كالعاده خخخخخخخخخخخ خخخخخخخخخخخخ خخخخخخخخخخ خخخخخخخخخخخخ خخخخخخخخخخخخخ
والصبح زي كل يوم نزلت الولاد وسلمت على عبده قبل ما يروح الشغل وفضلت في البيت لوحدها مع حماتها.....
عنايات وضبت الشقة وحطت الغسيل في الغسالة ونشرت شوية غسيل وفجأة سمعت صوت حركة في اوضة الولاد
عنايات : صباح الخير يا طنط
ام عبده : صباح الخير
عنايات :انا هحضر الفطار عشان نفطر سوا
ام عبده:طيب استني لما اصلي الاول
عنايات :حاضر طيب انا هعمل الشاي بالنعناع
ام عبده بعد ما فطرت وشربت الشاي ابتدت بقى كلامها اللي بيدايق عنايات....
ام عبده :مالك تخنتي كده يا عنايات؟؟ ده انتي لسه صغيرة يا بنتي (قال بقى حنينة اوي معاها)
عنايات : انا تخنت؟؟؟؟ ده حتى عبده عمال يقولي اتخنيلك قد خمسة كيلو كده
ام عبده :اصل عبده ذوق ويمكن مش عايز يكسفك
عنايات :يمكن يا طنط,اسيبك انا بقى وهنزل اجيب شوية طلبات للبيت
ام عبده: متتأخريش عليه لحسن اتعب وانا لوحدي ولا حاجه
عنايات : حاضر طنط
عنايات قبل ما تنزل تشتري الطلبات تعدي على هدى وترن الجرس وتفتح هدى وهيه لابسه قميص وروب لونهم أحمر مسخسخ
عنايات : صباحية مباركة يا عروسه
هدى: صباح الخير يا عنايات
عنايات :ها طمنيني الخطة نجحت
هدى : نجحت نجاح باهر كان نفسي تشوفيه وهوه مخضوض لا وايه افتكرني حامل هههههههههه
عنايات:ههههههه مش معقولة بجد
هدى :اه وانا بقى ما صدقت وزدت في الدلع عالآخر,ها حماتك جت؟
عنايات:اه تاخديها عندك يومين؟؟؟
هدى :لا يا اختي خليها عندك هههههه
عنايات :طيب اسيبك انا بقى عشان اشتري طلبات البيت
الاستاذ عبده وصل الشغل ودخل المكتب لقي أحمد ومنى منسجمين عالآخر ومقربين من بعض ومعاهم الموبايلات
عبده: صباح الخير يا جماعه
احمد: صباح الخير يا عبده
منى : صباح الخير
أحمد:على فكره يا عبده انا اديت منى رقمك عشان لو احتاجت حاجه فالشغل
منى:ده لو مكنش يدايقك يعني
عبده: لا ابدا انا تحت امرك في اي حاجة
وراحت منى رنت عليه وقالتله بدلع
منى :ده رقمي سجله عندك
عبده:اوكيه
وبعد ما عبده خلص شغل استعد عشان يروح البيت فسألته منى سؤال مش متوقع خاااااااااالص
هكملكوا المرة اللي جاية ان شاء الله


__________________________________________________ __________

لا تنسو التقييم لحتى اكمل والتشجيع اووووووووك