السلام عليكم سيداتي الحبيبات :033:
صارلي يومين افكر بموضوع جديد ومفيد يصلح لقسم الحياة الزوجية
وقررت اخر شي اني ارتجل الكلام وبالطريقة هذي انشاء الله توصلكم افكاري بسهولة وسلاسة وبشكل طبيعي يعني كأني قاعده اسولف مع وحدة من صديقاتي عادي
راح اتكلم عن اهمية التجديد في الحياة الزوجية
ولما اقول تجديد ما اقصد فيه بس تجديد بلبس وتسريحة وعطورات لا
اقصد تجديد حتى في اسلوب الكلام
تجديد في طرح المواضيع الي تتناقشونها انتي وزوجج
قبل لا نتوغل بالكلام عن التجديد خلونا ندرس مع بعض طبيعة الرجل
طبعا كل رجل يختلف عن الثاني بأطباعه وباهتماماته وبهواياته
ولكن في امور يتفقون عليها كل الرجال
شلووووووون
انا اقولكم شلون
مو صح كل وحده فيكم تحس في بعض الاحيان ان زوجها يصير مثل الطفل ؟؟؟؟؟؟
ترا هذا شي طبيعي ، كل رجل في داخله طفل صغير مهما كانت رجولته طاغية
يظل بين يدين زوجته مثل الطفل الصغير الي يحتاج الى الحنان والاهتمام الدائمين
وعلى فكرة
الرجال يختلفون في التعبير عن هذا الاحساس
كل واحد فيهم له طريقة يعبر فيها عن احتياجاته لهذا الاهتمام
يعني في ازواج يطلبون الاهتمام من زوجاتهم ودائما يبون يسمعون الكلام الحلو
وفي ازواج ممكن يعبرون عن حاجتهم لهذا الحب بطريقة اخرى غير الكلام مثلا يلمح لزوجته
وفي ازواج ما يتكلمون ولا يلمحون ، طبعه جذي صامت
وهالنوعية لابد للزوجة انها تلاقيلها مدخل لقلب زوجها
لابد انها تكتشف بشطارتها مداخل قلب زوجها والاوقات الي يكون فيها محتاج لها من غير ما يتكلم
تكلمت وياكم عن طبيعة الازواج واكيد ما ذكرت كل النوعيات لانهم كثار ولكن بشكل عام كل رجل بحاجة ماسة الى اهتمام وكل واحد فيهم له طريقته في التعبير عن هذي الحاجة الماسة الي بداخله وعلى كل زوجة معرفة هذا الشي في زوجها ومعرفة كيفية ارضائه ...
والحين نرد لموضوع التجديد والى اهو المحور الاساسي من كلامنا
يمكن تقولون شعلاقة التجديد في الي ذكرته قبل شوي
علاقة كبيرة جدا
ذكرت قبل شوي ان التجديد مو بس بالتسريحة ونوعية العطر وطريقة اللبس
التجديد حتى بالمواضيع الي تطرحينها للمناقشة بينج وبين زوجج
حاولي كثر ما تقدرين ان ما تخلين حبل الوصل ينقطع بينكم
دايمن تحاوري معاه وخليك متابعته ومتابعه اخبار شغله وهواياته وعلاقاته مع الناس
خلييه لما يسولف يسترسل بالكلام ولا تقاطعينه واذا خلص كلامه لابد من تعقيب عليه
حتى لو كان رايج ضد رايه ما فيها شي
فالخلاف بالرأي لا يفسد بالود قضية
بالعكس
راح يضفي على حياتج شوية اكشن
وبجذي راح تكسبين ثقته بكلامج وبأفكارج النيرة ، وبدال ما يشكي همومه لاصدقائه راح يشكيها لج انتي لأنج انسانة صاحبة رأي وفكر ..
والأهم من هذا كله ان راح يحس باهتمامج فيه وحبج له ..
وسلامتكم ..
اتمنى اكون خفيفة عليكم
واتمنى تكونون استفدتوا من كلامي وانشاالله يكون اسلوبي خفيف ومفهوم
تحياتي لكم حبيباتي
جديد X جديد -لحياة سعيدة
رد مع اقتباس
