عنوان الموضوع : ها الاخ نكد حياتي -لصحتك
مقدم من طرف منتديات نساء الجزائر

ها الاخ نكد حياتي



السلام عليكم ورحمة الله وبركاته

-

انا عندي اخوان لكن مايساعدوني ب شي ابد الا هالاخ يعني مايقصر يوديني مكان مابي الحمدالله لكن الشي السلبي اللي فيه انه كثثيير الكلام تقول بالع راديو <مشاء الله
لكن الشين ان اكثر كلامه بالناس
هو متزوج وعنده 2اولاد وبنت صغار الله يحفضهم والمشكله ان عمله بالليل يعني من بعد الساعه11 الى الساعه 8صباح وبنفس عمله عنده تلفون وهالتلفون بلاش
عاد هو ماكود من يدخل العمل رفع السماعه وهاك يالاتصالات مرا يتصل ع اخوانه واللي يلقى صاحي منهم مرا على زوجته بس ابد محد يعطي وجه كثري بالليل يرقدون واذ كلموه مرا سحبو عليه عشره الا انا الضعيفه اذ رفعت السماعه معاد يخليني اصكرها سالفه تروح سالفه تجي احاول اعتذر ابي اقفل ابي اصلي ركعتين ابي اشوف اشغالي ماشي فايده يرد يفتح لي مواضيع وسوالف لين ياذن الفجر وكل يوم على هالحاله ماهذي المشكله انا اشتكي من كلامه كله حش يتكلم عن جماعتنا عن بنات خيلاني وبنات خالاتي وذي شايفه نفسه وذي ضعيفه وذيك جسمها حلو المشكله انهم يتغطن منه كيف يعرف مدري حافظهم حافظ سواليفهم وفلانه كلامه كذا وفلانه شخصيتها كذا يتكلم كانه عايش معهم كيف يعرف مادري اقوله يقول اذكرهم وانا صغير وحافظهم زين وبالعقل تنفهم بعد يقول وذيك ابوهم ماايبي لهم الا عيال امراء كل ماجاء احد رده وبنات خالك هذاك فلان مسوين اعمارهن بنات القبايل رافعت انفسهن على الاوادم روحي قولي لهم ونعم لكن اخوالك من وين يرجعون لكن احنا احسن القبايل وشوي يقول ذيك كم عمرها وذيك لين اللحين ماتزوجة الا بسالك فلانه حلوه وكيف تحسين شخصيتها وذلك الضعوف عايشات بالبر بدو ابو جهل النعمه باقي ماوصلت لهن وخلص من بنات جماعتنا راح للجيران ابو فلان يخاف من مرته كل ماقالت شي قال تم وفلانه ماتستحي وذاك يزوج ببنات على اللي يسوى واللي مايسوى لو عطاه حد ريالين زوجه يعني ماسك خط بالدور ورد على المجتمع مسوي نفسه مصلح اجتماعي عاد مدري وش حكم الحش بالاغراب مهم يقول رحت السوق واشوف حال الناس واشوف ذيك البنت نازله هي وخويتها معهن سياره وسواق وعطها واحد رقم كان تاخذه خويتها وتقذع به شكلها مخاويتها وتغار عليها وتكلم وتكلم عقب قال حتى زمان يخاون جدتي كانت مخاويها استغفرالله الحرمه ماتت بدل ما تقول الله يرحمه انا لله لايبقي حرمه ولا رجال ولا حي ولا ميت حتى ارحامه حتى الجيران وفلان وفلانه وانتي ومرا وزمان واللحين
ويرد يسالني عن الكليه وعن الاستاذات وعن وش صار وش يسون وصراحه انا مااتكلم عن سوالف بنات اتكلم بشكل عام او مشكله صارت لي وصراحه يفيدني كثير ويعطني حلول لان هو يفهم بالبشر وطباعهم وهالسوالف بس يستغل الموضوع ويرجع يحش وينبسط ان حصل شخصيات يضيفهم بمحور حديثه اللي ازعجنا به
ويابنات لاحد يسبني ويقول ان اعطيه سواليف انا اتكلم بشكل عام يعني بعطيكم مثال عشان تفهمون :
مثلا اقوله ان بطاقتي ضاعت وكل يوم الحرس ماسكيني ونكدو علي مااقصدي الا اني ابيه يعطيني حل لان نظام زفت عندنا حتى وقت الاختبارات ماعندك بطاقه روحي بيتك ومايدخلونك الا بقلة حيا ومابي اطلع بطاقه جديده لان ماله داعي بطاقتي ببيتنا اللي بمدينه ثانيه نسيتها وماكان عندي الا اختبارين وبخلص بعدين لصار دوام ثاني بجيبها معي عادي مهم هو عطاني الحل

لكن عقب مسك عليهم بصفه عامه وعلى هذي بالذات هي كيف شكلها هي وش اسمه هذي تلقينه معصبه ماتزوجه قلت له اسكت مرا عصبت عليها ودخلت غصب كارهتني من تشوفين مدة بوزها ولفت وجها قال تبينها تحبك وتحترمك قولي لها بزوجك اخوي من تدخلين تلقينه مبتسمه وتشلك فوق راسها
قلت ليش اكذب عليه يقول عادي هي اللي غلطت عليك
وهذي قصته ذكرتها بالمختصر ^ ياخي مشكله هالاخ غصب عنك يخليك تتكلمين ماتكلمتي تكلم هو
بتقولون انا سبب وانا عطيته وجه
اي صح
بس لو تدرون ليش اتساهل معه واجاريه كان عذرتوني
لان مرا قلت مابردعليه بالليل بقول اني راقده لكن صار مايرد على اتصالاتي بالنهار يعني انتي ماتردين انا بعد ماابرد ويكنسسل كل مواعيدي وخرجاتي حتى لو شي ضروري
وانا صراحه مااعندي احد غيره يوديني ويجيبني بدونه انا مسجونه سجن تام
اخواني اخر اهتمامهم انا ويكثثر ماعنيت منهم لو عندي اختبار نهائي مايودوني يفصلونك يخلونك تموتين تحيين ماهميتنا
لو الله ثم اخوي هذا قسم بالله كان انا بحاله يرثى لها
هو طيب ومو مخلي علي قاصر لا انا ولا امه <لان احنا ماعندنا بنات كثير اختي الكبيره متزوجه
ومثل ماقلت بس عيبه انه يحب يسوولف كثيير ويتكلم بالناس

وماطرحت مشكلتي ووضحت لكم اسلوب اخوي الا عشان تعرفون شخصيته واسلوبه وتعطوني الحل المناسب للتعامل معه



انا موب ناقصني ذنوب حياتي خلقه منكده الحمدالله على كل حال ابي الله يوفقني ابي يفرج همومي ولا اقعد احش بالاوادم واخذ ذنوبهم

مابيه يقعد يحش بالناس عندي ويشاركني ذنووبه
يااداره الله يسعدكم نزلو موضوعي مللييت ابي حل ذنووب الناس كلها علي

>>>>> ردود الأعضـــــــــــــــــــاء على الموضوع <<<<<
==================================


للييش تردين عليهه؟؟
تستااآههلي


__________________________________________________ __________

لا لا لا

تكلمي معاه وحاولي تتجاوبين معاه لأنه الوحيد الي يقدرج ويطلعك من البيت ويسفرك


__________________________________________________ __________

باين انه وناااسه وفله ليش تضايقين تسلي معاه ولازم تجارينه لانه الوحيد اللي يحترمك وينفذ طلباتك


__________________________________________________ __________

حبيبتي تحجي معاه بهدوء ولازم فيس 2 فيس , خبريه انج تبين ترتاحين وتذاكرين ومب فاضيه تتحجين معاه طول الليل , تتعبين , وما تركزين في شيء طول اليوم عشان سهرانه,,
تحجي معاه بهدوء وبعقل وان شاءالله موووووووفقه


__________________________________________________ __________

كلميه عن الغيبة و النميمة و آثارها و مضارها و حاولي توصلي له المعنى و المفهوم و من ثم النصيحة
الله يوفقك يا رب