عنوان الموضوع : روايتي الاولى ( حبك دمرني ) ... بقلمي -رواية
مقدم من طرف منتديات نساء الجزائر

روايتي الاولى ( حبك دمرني ) ... بقلمي






السلام عليكم ورحمة الله وبركاته
هذي اول روايه ليه واتمنى انها تنال اعجابكم
اتركم مع الروايه :

ليس المهم ان نهوى المهم ان يشعر بنا
من نعشقه.........
لان الحب من طرف لايدوم طويلا
نظل نتعذب من اجل لحظة لقاء نتمناه
وفي نهايه لاشئ نحصل عليه
سوى الالم..........
في عز ماكنت محتاجك تخليني
هذا جزاء الطيب والمعروف يالغالي
تدري في قربك تموتني وتحييني
اليوم بالذات تكفى لا تجافيني
محتاجك اكثر واكثر من نظر عيني
الله يعلم وش اللي صاير فيني
ابيك تجمع حطام اللي انهدم فيني
انا دخيلك علي ضاقت احوالي
( البارت الاول )
في حي من احياء الرياض الراقيه وفي قصر من افخم قصور الحي يدور الحوار :
...: اه يابندر تدري اني احبه لحد الحين ومهما مرت الايام والله ماانساه
بندر : فهد ترا وربي الي تسويه حرام بالله بالعقل ولد يحب ولد كيف تجي مادري ؟
فهد : والله هو الي خلاني احبه هو الي علقني فيه ( وجلس يبكي )
بندر : فهد عاد خلاص كل مافتحت السالفه ذي جلست تبكي ترا مو حاله هذي
فهد : ....
بندر : طيب مممم وش رايك نسافر وندوره يمكن نلقاه ؟
فهد قام وكله امل انه يلقاه : والله من جدك بنروح خلاص ؟ انا الحين اتصل على المطار ونحجز ونروح لاقرب رحله
نخلي فهد واماله ونروح لعايله كمان من ارقى العوائل في المملكه
كانت نازله من الدرج وعلى وجها ابتسامه رقيقه تدل على رقة تلك الفتاه تذكرت جوالها نسته في غرفتها رجعت بكل هدوء ورقه دخلت غرفتها الي كل البنات يحلمون تكون لهم غرفه مثلها اخذت جوالها الي كان على سريرها الفخم لكنها تذكرت انها مافتحت الرساله زي ماتسوي كل يوم راحت لدولابها فتحته وخرجت صندوق باين عليه انه قديم فتحته واول مالقت الرساله فتحتها وبدت تقراها حفضتها من كثر ماتقراها لاكن تحب انها تقراها من الورقه وتشوف خط حبيبها تشوف حب الطفوله الي كان بينها وبينه
نزلت دموعها وهي تشوف خطه وتتذكر اخر يوم شافته لما كان عمرها 13 كانت جالسه في حديقة بيتهم القديم جاها من ورى وغمض عيونها وقالها بكل حب : احبك ياصابرين واموت فيك
صابرين : وانا بعد احبك واموت فيك بس تكفى فهود لاتروح وتخليني
فهد : والله لو اقدر كان جلست العمر كله معاك بس شسوي اليوم لازم ننقل لاكن ولا يهمك كل بعد شهر بجي الرياض واشوفك وتشوفيني وش رايك
صابرين نزلت دموعها خافت لايتركها زي ماتركها ابوها وهي صغيره
فهد مسح دموعها وقالها : لا تخافين مراح اتركك ( وطلع من جيبه رساله )
فهد : خذي هذي الرساله وكل مااشتقتي لي شوفيها
صحت من ذكريات طفولتها على صوت الخدامه : ماما تحت في قول انت انزل
صابرين : طيب الحين نازله
نزلت صابرين بعد ماغسلت وجها من اثر الدموع ولقت امها واخوها جالسين يتعشون جلست على الطاوله بكل هدوء
امها : وينك ياصابرين من اول ننتظرك العشاء برد وانتي مانزلتي وين كنتي ؟
صابرين : مامي كنت فوق في غرفتي
اخوها عبدالله : دلع زايد امي ماتخليني اكل الا لما تجي ست الحسن والدلال
صابرين : والله مو مشكلتي اذا مامي تحبني
امها : هي انت وياها خلاص انا احبكم كلكم ويشهد علي الله انكم اغلى ماعندي
صابرين : واحنا نحبك واااااايد ونموت فيه ( وقامت سلمت على راس امها وقام عبدالله وسلم على راس امه )
رجعت صابرين مكانها : الا اقول يمه خالتي متى بتجي
امها : الله يذكرك الشهاده نسيت لاتصل عليها واشوف متى بتجي هي اول كلمتني وقالت اتصلي علي لان جوالها خلص شحن خليني اقوم اتصل
صابرين : خلاص انا الحين اقوم واتصل عليها اصلا انا شبعانه
امها : براحتك

خلص البارت الاول
مع تمنياتي لكم بقرائه ممتعه
ماحلل من بنقلها الا لما يكتب اسمي عليها ( حلاتي بغروري )
واذا شفت تفاعلكم معي طولت البارت الثاني
توقعاتكم
وش قصة حبيب فهد وفهد بكبره ؟
وهل حبيب صابرين هو فهد نفسه ولا غيره ؟
وبندر وش يقرب لفهد هل هو اخوه ولا صديقه ؟

>>>>> ردود الأعضـــــــــــــــــــاء على الموضوع <<<<<
==================================


( البارت الثاني )
تعريف بالشخصيات والابطال :
الجد ( راشد )
من اغنى الاشخاص في المملكه عنده ثلاث شركات وحده بجده ووحده بالرياض ووحده بالشرقيه شديد مره بس بعض الاوقات حنون مايحب احد يعصي كلامه ولو حرف مستقر في الرياض وعنده بيوت في انحاء المملكه عمره 85
الجده ( مريم )
حنوونه لابعد درجه اغلى ماعندها اولادها وبعض الاوقات شديده تخاف من زوجها بالذات اذا عصب وهي امراه اجتماعيه وطيبه حيل عمرها 82 سنه
( اولادهم )
محمد ( ابو مشعل ) : رجال شديد مرره وعصبي طالع لابوه مستقر في الطايف وابوه حارمه من حلاله واملاكه عمره 65
متزوج حرمتين الاولى :
فاطمه( ام مشعل ) : انسااااانه حنونه بمعنى الكلمه وماترضى بالغلط مهما كان صبوره لابعد حد واهم شي اولادها وزوجها يكونوا مرتاحين عندها اربعه اولاد وثلاث بنات
مشعل : اكبرهم متزوج وعنده بنتين وولدين عمره 34 سنه ماخذ القسوه من ابوه شديد مره بس عند زوجته يصير اطيب انسان
نوره : متزوجه وزوجها معذبها بس اهلها مايدرون عن الي يصير عمرها 32 سنه
فيصل : متزوج وتوه عريس ورايح شهر العسل في باريس عمره 30 سنه
خالد : توه شاب يدرس بكلية الملك عبدالله عمره 28 سنه هادي مره اهم شي عنده دراسته ومستقبله
لمياء : بنوته ستايل اهم شي عندها الكشخه والموضه حنونه وايد عمرها 25 سنه لحد الان ماتزوجت
منال : بنت عربجيه لكنها كيوت حبتين تحب افلام الاكشن والرعب ودايم استايلها ولادي عمرها 23 سنه
نجي لزوجته الثانيه : ميسون ( ام فهد ) طلقها من يوم ولدت فهد انسانه تحب ترفهه عن نفسها وماهمها احد وتحب تشكل وكل يوم متزوجه لها واحد عمرها 45 سنه
فهد : ولدها الوحيد لاكن مايهمها وهو حاليا ساكن عند جده في الرياض عمره 21 وهو بطل روايتنا
عبدالله ( ابو محمد )
رجال صبور مايحب الغلط ودايم مع الحق في كل الاحوال حنوون مره ويحب اولاده مستقر في الرياض وهو المسؤؤل عن املاك ابوه عمره 60 سنه
زوجته نوال ( ام محمد ) : زوجته طالعه عليه صبوره وحنونه وتحب اولادها ولو طلبوا روحها عطتهم اياها عمرها 43 وعندها ثلاث اولاد وبنت
محمد : هو اكبرهم دااشر وصايع بمعنى الكلمه ويحب الحياه بشكل جنوني اجتماعي وكل من جلس معاه حبه عمره 20 سنه
عبدالمجيد : توه صغير عمره 4 سنوات وشهرين
احمد : كمان توه صغير عمره سنتين
مناوي : بنت دلوعه مرره ومحد يقدر يعصي كلمتها لكنها محترمه ومخطوبه من واحد من جماعتهم عمرها 19 سنه
ثالث اولادهم صقر ( ابو ناصر )
رجال بمعنى الكلمه يحب الاطفال الله مارزقه بااطفال لاكنه مقرر انه يتعالج بالخارج هو مساعد ابوه في املاكه ومدير شؤؤنه ماخذ ولد من الحضانه ومخلي الدلال كله له وياويل الي يقرب من ولده عمره 45
زوجته : حنان اسم على مسمى حنونه وايد وتحب ولدها ( الي من الحضانه ) وتحاول تسعده بكل ماتقدر عمرها 39
ناصر : ولدهم المدلل والي كلمته ماتنكسر يحب ابوه وامه اكثر من نفسه عمره 15 سنه
(وبقية العوائل ان شاء الله اعرفكم عليهم بعدين)


يتبع


__________________________________________________ __________

( البارت الثاني )
عايله مستقره في الطايف وعلى فد حالهم والكل يعرفهم باخلاقهم الطيبه
...: ياربي الولد هذا مادري وين راح له يومين ماجاء البيت وانت جالس هنا ولا همك ولا كانه ولدك قوم دوره شوفه وين راح
...: يام بندر الولد كلمني وقلي انه راح الرياض بيقدم على اوراق الجامعه لعل وعسى يقبلوه لاتشلين هم بس
ام بندر : وشلون ماشيل هم وانا ماسمعت صوته هاه قلي علمني ؟
ابو بندر : خلاص بس اذا على كذا الحين اتصل لك عليه وتسمعين صوته ومايصير خاطرك الا طيب
( طلع ابو بندر جواله من ثوبه واتصل على بندر )
بندر: الوووو هلا يبه
ابو بندر : هلافيك كيفك ياوليدي عساك بخير
بندر : ايه الحمد لله بخير يبه انت كيفك وكيف اخواني وامي
ابو بندر : بخير ماعليهم وشوف امك فوق راسي تبي تسمع صوتك وانت الله يطول بعمرك رحت وماقلتلها
بندر : هههههههه توني ادري اني غالي
( ام بندر اخذت الجوال من ابو بندر متلهفه تسمع صوت ولدها )
ام بندر : يمممه بندر وينك حبيبي كذا تروح وتشغل بالي عليك ليه يايمه ليه ( وبدت تنزل دموعها )
بندر : العذر والسموحه منك يايمه والله كنت مستعجل مره عشان كذا رحت وماقلت لك لاكن ان شاء الله اسبوع اسبوعين واكون عندك
ام بندر وهي تمسح دموعها الي مو راضيه تتوقف : ليه يايمه اسبوعين حشى مو اوراق ذي يايمه
بندر : اقول يمه انا الحين مشغول اخلص واكلمك اوكي
ام بندر : ان شاء الله يمه بس دير بالك على نفسك
بندر : ان شاء الله يالله مع السلامه
ام بندر: بحفظ الرحمن يايمه مع السلامه
( وسكرت التلفون ودموعها على خدها )
ابو بندر: مو قلت لك ان الولد بخير لاكن انتي ماتسمعين
ام بندر : عاد انت وش عرفك هذا قلب الام
( تعريف بعايلة بندر )
ابو بندر : انسان يطلق عليه الطيبه طيب درجه فوق ماتتصورون اغلى ماعنده بندر وهو ولده الوحيد عمره 60 سنه
ام بندر : طييبه وكافيه خيرها شرها تحب الخير للناس اغلى ماعندها بندر عمرها 55
بندر : ولدهم الوحيد وماشاء الله عليه كل من شافه حبه صديق عمره فهد عمره 21 سنه
(في احد فنادق الرياض الي ساكن فيها بندر )
بندر : يالله يالله انا الحين نازل بس اصبر بلبس وانزل
فهد : لحووول لحد الحين مالبست بسرعه ترا باقي ساعه على الطياره شوفني انتظرك تحت لاتتاخر
بندر : طيب هالحين نازل دقايق بس يالله باي
فهد : باااااي ولا تتاخر
فهد كان جالس في السياره ينتظر بندر مر على خياله صورة البنت الي حبها قبل ست سنوات ( يالله وش جابها ذي على خيالي بعد بس صبر صبر مو كنت احبها انا واموت فيها وش الي غيرني وخلاني احب عمر ) قطع خياله صوت الباب القوي الي تسكر
فهد قام يصارخ باعلى صوته: هييييييييييييييه انت تراها سياره مو لعبه
بندر : الا تستاهل مو انت من اول الطياره الطياره هي خلي تنفعك الطياره
حرك فهد السياره وهم في الطريق حاول انه يهدي اعصابه ويكلم بندر بكل هدوء : اقول بندر تتوقع نلقاء
بندر: انت تحسب بريطانيا صغيره وبعدين وش ياكد لك انه في بريطانيا مااسافر دوله ثانيه
فهد : احساسي يقول انه في بريطانيا لحد الحين
بندر : ماذابحنا الا ذا الاحساس
فهد ناظر فيه بنص عين وكمل طريقه


يتبع


__________________________________________________ __________

( بيت صابرين )
امها : صابرين يمه يالله ترا تاخرنا على خالتك
صابرين : يمه ترا باقي كثير على ماتوصل خالتي وبعدين لسع انا ماخلصت مو حلوه يشوفوني يشكل مو حلو
امها : انتي حلوه لو ماحطيتي شي بس يالله بسرعه
صابرين : طيب خلاص انزلي السياره وانا الحين نازله
امها : يالله بسرعه ولو مانزلتي ترا بطلع اسحبك مع شعرك
صابرين : هههههه طيب
فتحت صابرين دولابها بتغير لبسها لانه موعاجبها لبست بنطلون سكيني جنز فاتح وبلوزه اورنج وكعب عالي اورنج
اساور ملونه وحلق ملون طلع شكلها خيال خصوصا انها فاتحه شعرها حست انها اليوم بتلاقي مفاجئات ( ياربي وش فيني اليوم متفائله كاني بسلم على الملك عبدالله ماكاني رايحه مطار عادي اوووف لااتاخر بس وتطلع امي تسحبني مع شعري )

وصل فهد وبندر مطار الملك خالد الدولي بالرياض لاكن للاسف لسوء الحظ كان فيه رياح شديده وغبار
وعشان كذا جلسوا ينظرون ساعتين على الاقل لما تخف الرياح والغبار
فهد : ياربي وش ذا الحظ يعني لما فكرت اني اجي وادوره تجي الرياح يعني مالقت تجي الا الحين
بندر : ههههههههههههه
فهد : انت وش فيك من اليوم بس فاضي لي ضحك وتريقه عليه ؟؟؟؟
بندر : ياخي انت ماخذ في نفسك مقلب وقوي بعد مصدق انك راح تلقاه اقول شوف المزه الي هناك والله انها خقه
لف فهد وجهه يشوف الي ياشر عليها بندر : يالبيه والله من جد خقه تتحداني مااروح وارقمها لك
ابتسم بندر ابتسامة خبث : اتحداك بس اذا ماعطتك وجهه تعطيني اقل شي خمس مئة ريال
فهد: ايه عاد انت ماتفكر الا بالفلوس يالله بقوم اقول شكلي تمام
بندر رفع حاجبه : مممممممم يعني
فهد عطى بندر كف خفيف : انتي اصلا الي يجلس معك يجيه الضغط والسكر وكل امراض الدنيا يالله بقوم وباذن الله اجي والرقم معي
بندر : يالله نشوف
(عند صابرين وامها )
كانت جالسه وطفشانه وتحاول تسلي نفسها باي شي مره تلعب بجوالها ومره تسولف مع امها ومره تناظر الي حولها بس لفت انتباهها واحد من بين كل الي جالسين في المطار واحد ماشاء الله عليه كل مواصفات فارس الاحلام فيه جميل بمعنى الكلمه وكل عيون البنات عليه بس الي لاحظته انه يناظرها بس هي ماهمها اذا يناظرها ولا لا بس تحس انها تعرفه ومن زمان بعد بس مي راضيه تتذكر وين شافته ولا من وين تعرفه حست ان في داخلها فضول كبير انها تعرف مين هو مع انها متاكده انها تعرفه زييين
صابرين : مامي انا بروح دورة المياه بسرعه وارجع اوكي
امها : اروح معاكي والا انتي تعرفي مكانه
ارتبكت صابرين بس حاولت انها ماتبين : لالا انا اعرف مكانه افا عليك مامي خبيره انا ترا
امها : هههه نشوف خبرتك وين توديك يالله روحي بس انتبهي لنفسك
صابرين : طيب مامي مراح اتاخر كثير دقيقتين واجي
انتى البارت الثاني
تمنياتي لكم بقراءه ممتعه
توقعاتكم :
وش راح يصير في المطار ؟
وهل فهد وبندر بيسافروا بريطانيا ولا ولا ؟


__________________________________________________ __________

(نحن في البدايه ومازلنا في البدايه )


( البارت الثالث )
راحت صابرين اتجاه دورة المياه لاكن مادخلت وقفت عند الباب وكانت تنتظر الي لفت انتباهها بفارغ الصبر
طبعا هذي الحركه ماراحت عن فهد ولحقها شافها واقفه وحاطه يدها على قلبها قرب منها بكل هدوء وبدون ماتحس
وبصوت خشن شوي : هلا والله وغلا
صابرين انفجعت من ذا الصوت الي وراها ولفت على طول وهي حاطه يدها على قلبها من الخرعه : بسم الله الرحمن الرحيم
فهد : يالبى الي انفجع بس
صابرين صارت مثل الصنم بس تناظر في فهد وهي ساكته ونفس وضعها حاطه يدها على قلبها وفاتحه فمها
فهد : ( وش فيها ذي تصنمت عسى مافيني شي يخرع بس )
صابرين حست على نفسها وانها واقفه ذي الوقفه لاكن من صدمتها وهي تشوف حبيب طفولتها ( سبحان الله نفس ملامحه ونفس صوته لاكن خشن شوي نفس ستايله الي دايم يحبه بس وش جابه الرياض )
فهد : الووووو انتي معاي
صابرين : ااااا ايه معاك
فهد ( ياربي ذا الصوت والشكل ذا مو غريب علي وين شفته مادري )
فهد : ممكن اتعرف ؟؟
صابرين : طيب قبل كل شي انت شسمك ؟؟؟
فهد : انا اسمي فهد
صابرين حست ان دموعها بتنزل ( ياربي لالالا ياربي ماتكون صدفه مو معقوله بعد كل هالسنين الحين واقف قدامي ويكلمني بعد )
فهد : تدرين اني احس اني مشبه عليك بس وين مادري
صابرين : لالالا وين مشبهه انا اصلا ماني من الرياض انا من ااا الشرقيه
بس ممكن الرقم لاني تاخرت على مامي ؟؟
فهد : اه بس تبين الرقم اعطيك صاحب الرقم اذا بغيتي سجلي عندك ...05
صابرين : يالله باي
فهد : باي ياقلبي انتظر اتصالك باقرب وقت
( في مكتب الجد راشد في الرياض )
كان الجد راشد في اسوء حالاته خصوصا لما عرف ان موظفين الشركه مهملين في عملهم وان إيميل الشركه الخاص تهكر
الجد راشد كان مجمع موظفين الشركه كلهم ويصارخ عليهم باعلى صوته : شفتوا اهمالكم وش سوى ووين ودانا بس اسمعوا انت وياه من اليوم ورايح مافي تلاعب في الشغل ياتمشون عدل يااشوف موظفين يبيضون الوجه غيركم بالله عليكم قولولي وش نسوي الحين ايميل الشركه تهكر وكل شغلنا كان عليه والله يعلم وش المصايب الي بتقابلنا الحين من اهمالكم الزايد
اسامه مدير اعماله : ياطويل العمر احنا مااهملنا شغلنا بس وش نسوي الايميل تهكر
الجد راشد صارخ في وجه اسامه خلاه ينط من الفجعه وهو ياشر عليه باصباعه :انت انت بالذات لا تتكلم هذي اخر ثقتي فيك يااسامه اصلا انت تحسبني ماعرف وش يدور وراي من تلاعب وخرابيط وعلى فكره تراني بوظف مدير اعمال جديد لعل وعسى ينظف الشركه ويكون قد الثقه الي مسلمها اياه مو انت انت حدك تمسك مطبخ الشركه وكثيره عليك بعد اسمع انا كلمتي وحده ماحب احد يثنيها الحين تروح وتجيب لي كل ملفات الحساب فاااااااااهم ولا لا ؟
اسامه وهو منزل عيونه في الارض ومخترع : سم طال عمرك
الجد راشد بصراخ عالي : انقلع عن وجهي لا بارك الله فيك من مدير اعمال والتفت للموظفين : وانتوا بعد يالله الحقوه
لحول ولا قوة الا بالله
راح الجد راشد وجلس على مكتبه ويهدي اعصابه اتصل على ولده عبدالله الي ارسله من يوم عرف بتهكير الايميل الخاص للشركه الى الشرقيه عشان يشوف الموظفين هناك وشغلهم وفي نفس الوقت يجيب ملفات الحساب
الجد راشد : الو السلام عليكم
عبدالله : وعليكم السلام
الجد راشد : هاه بشرني كيف شغلهم عساه طيب وملفات الحساب لقيتها كامله ولا ناقصه زي عادتهم
عبدالله : الحمد لله شغلهم تمام التمام وملفات الحساب كمان كامله ومافيها أي نقص بس اااا
الجد راشد : تكلم وش فيه
عبدالله : يبه ااا تذكر سالفة ميسون اليوم اتصل واحد علي وجلس يهدد واذا ماعطيناه الي يبيه خلال اسبوع بيفضحنا
الجد راشد وقف من كبر الكلام الي سمعه: هااه وش تقول انت ومين ذا الي يهدد وبعدين وين رقمه اعطيني اياه الله لا يبارك له ناقص انا فضايح عشان ذا يجي ويكمله علي
عبدالله : يبه هو متصل علي من رقم مجهول وانا اتصلت على الاتصالات حاولت انهم يفيدوني بس ماقدروا لان الرقم مجهول
الجد راشد : طيب اسمع انا راح اتصرف بس عطني الرقم واذا اتصل عليك قله اذا انت قدها اتصل على ابوي فاااااااهم ولا لا ؟
عبدالله : ان شاء الله يبه مايصير خاطرك الا طيب


__________________________________________________ __________

يتبع ...
( في مطار الملك خالد الدولي )
بندر : فهد خلينا نرجع الفندق ترا طفشت لي اكثر من ثلاث ساعات فيذا وانت جالس ولا همك
سكت بندر ولف لجهة فهد لانه حس ان فهد مو معاه
بندر : فــــــــــــــــــهــــــــــد
فهد : هاه وش فيه
بندر : لي ساعه اكلم نفسي يعني
فهد : سوري بس سرحت شوي تصدق بندر احس اني اعرفها من زمان ولا بعد لما راحت تمنيت انها ماراحت بس كان ودي اسولف معاها
بندر: احلف قال ايش قال اعرفها اقول توك مرقمها مامدى البنت سجلت رقمك عشان تعرفها ولا ( ابتسم ابتسامة خبث وغمز لفهد) حبيتها من اول نظره هاااه اعترف اشوف
فهد كان ماله خلق احد وبس يفكر بالبنت الي خذت عقله وقال : اقول بندر قوم نشوف هل الرياح هدت ولا لا راحت روحهم ان شاء الله
راح بندر وفهد يسالون عن الرحله ويشوفون اذا كانت الرياح هدت ولا لا
لاكن كانت المفاجئه الي ماتوقعوها الاثنين ان الرحله تأجلت للاسبوع الجاي
فهد وبندر راحوا اخذوا شناطهم وراحوا للسياره وركبوا الشنط وركبوا
فهد : اه كل مااحاول ادوره يجي شي وماادوره وهذا انت شفت بعينك الرحله اجلوها
بندر : خلاص عاد اصبر كلها اسبوع ويالله الحين بروح اعشيك مادري افطرك ياحلى مطعم في الرياض معني مااعرف المطاعم لاكن سمعت ان فيه مطعم واااااااو
فهد : يالله ودينا له يا واااااااو
بندر ههههههههههه
( بيت صابرين )
صابرين كانت هي وبنت خالتها شجون في غرفتها ويسولفون
صابرين : ياقلبي يجنن يجنن ياشجون نفس ماهو ماتغيرت ملامحه بس كبر شوي
شجون : انتي الحين متاكده انه هو ولا لا ؟
صابرين : قلت لك هو والله هو وقلبي مايكذبني وبعدين هو كان في يده جرح ولحد الحين الجرح فيه وبنفس مكانه
وتذكرت صابرين لما انجرح فهد كانت توها خارجه من المدرسه وكان فهد مثل عادته ينتظرها كل يوم عند باب المدرسه عشان يشوفها وكان فهد بينه وبين واحد عداوه وجاء هذاك وجلس يتحرش في فهد وتضاربوا وجرح فهد في يده وهرب
وعلى طول صابرين جات تركض تشوف وش صار لقت يد فهد مجروحه وطلعت من شنطتها قماش حق الفنيه وحطته على يد فهد

قطع ذكرياتها صوت شجون المزعج : صاااااااااااااابرين ووجع ان شاء الله وين سرحتي
صابرين : هاه معاك معاك
شجون : وين معاي ماقول بس غير الي ماخذ عقلك يتهنا
ضربتها صابرين على فخذها بخفيف : هههههه الله يرجك ايه صح ماقلت لك عطاني رقمه
شجون امااااا احلفي وينه طيب خلينا نكلمه
صابرين : والله فكره جبتيها انا ناويه اصلا ابدا من الحين علاقه معاه واشوف ترا يتذكرني ولا لا ؟؟
شجون : يالله ومن حظك قبل لاجي اشتريت شريحه جديده وبدون اسم بعد
صابرين : انا اصلا عارفه قلوبنا عند بعض يالله هاتيها بسرعه
شجون: طيب بنزل واجيبها شنطتي تحت ثواني واطلع
صابرين : اوووك
نزلت شجون بدفاشتها المعتاده مرت من جنب غرفة عبدالله سمعت الباب ينفتح على طول راحت ورى الستاره الي في الصاله وبعد ماخرج عبدالله وتاكدت انه راح خرجت
شجون : اوف الحمدلله انه راح مابغى
عبدالله : مين تكلمين ياحلوه
شجون انفجعت من الصوت ولفت على طول شافت عبدالله بس انها حاولت انها تخفي ربكتها : هلا والله بولد الخاله عبدالله اخبارك عساك بخير ؟؟
عبدالله : ههههههه بخير ياوجه الفقر بس وش عندك ورى الستاره
شجون : هاه لا ولا شي بس استعرض اااا المهم انا نازله تامر بشي اكيد لا يالله سي يو
عبدالله : سي يو ( اه ياحبي لذي البنت على شقاوتها حلوه اقول خليني اروح اتحمم ابرك)
نزلت شجون وطول الطريق تفكر في عبدالله وصلت عند شنطتها اخذتها وطلعت فوق لاكن بحذر ماتبي تقابل عبدالله تحس نفسها تستحي منه مع انها عمرها مااستحت من ولد