عنوان الموضوع : قصوا راسي واقطعوا يدي ان سويت كيكتن مرتن ثانيه -للعيد
مقدم من طرف منتديات نساء الجزائر

قصوا راسي واقطعوا يدي ان سويت كيكتن مرتن ثانيه



حياتس الله انتي ومواعينس..

لحوول ياذا الكيكه اللي طلعت براسي الشيب توبه اسوي في ذا الصينيه اللي كنها دوار العويضة مغير اشقلب فيها واهبد فيها تهبيد واخضها خض وليتها طلعت زينه على كل هالتعب لا طلعت مفتته ونص ناشب والنص الثاني ظاهر واعود ادق على الدكان واشتري كيكتن ثانيه واسويها ونفس المشكله في المره الاولى اللهم ان المره الاولى كنت قالبتها وهي حاره من الدباشه اللي فيني والمره الثانيه وهي بارده ونفس المشكله مدري وش سالفتها يقطع بليسها ياهي شغله ..
والظاهر السبب اللي خلاها تخرب اني كنت مطنقره ومسويتها بدون نفس وتوني قايمتن من النوم ..
ولاه بعد ماحقرت عمري كالعاده بعلمكم المقادير عشان تسوون مثلها .. البلى موب في المقادير البلى فيني انا اصلا منيب وجه طبخ بس قلت بشارك واجرب لعلي اطلع بشين زين وكنت متأمله في نفسي بس طلعت العكس .. المهم اخليكم مع الجريش قصدي الكيكه الوهـ بس ..



المقادير كيك بيتي كركر مدري شسمه ذا الله لايبارتس في ذا اللي اخترعه وشذا الكيك اللين الخكري من تمسكه وهو متعفط ومتفتت المفروض يقسونه شوي عاد --> خليهم يصلحونه ازين ويجيبونه لتس جاهز .. ! ونستله تراني لحست منها ولطيت --> الله من المطرسه ! ونسكفيه وجبن كيري اربع حبات موب كله راعي البقاله جعل ماجاه تكفير مني جايب ذا الكبير عشان خاف يجيب الصغير واغثه ارجع جب الاكبر منه مايكفي ..



نخلط ذا المقادير اللي فودز في الخلاط ونخليها على جنب لين نشوف لها صرفه بعدين !



همن نسوي بيتي كركر وندجه في ذا الصينيه المعاقه اللهم لك الحمد بس ..



عاد يوم طلعت من الفرن وش حليلها وش زينها مشقره ولا سوت شي ! يوم اني تحمست وقلبتها وطقيتها بالنجر لين قالت خلاص بطلع بس تراتس فقشتي راسي



هذي حالها يوم طلعت يااني انقهرت قهر متحمسه وتسذا واخرتها تخرب --> بلاتس منتي وجه طبخ ..
عاد قمت صبيت ذا اللي في الخلاط ورشيت عليها جالكسي فلوتات عساها تزين وتستملح شوي كنها زانت الا شوي --> تواسي عمرها !



مايمديني انا على ذا الزاويه الاحترافيه .. --> انتحري تكفين !



نص امداني اخفي عيوبها واستر عليها والنص الثاني قضت الخلطه تسنه جدار بيت يرمم ..



تسنه بركان بيطلع منه نار --> وش بيطلع منه في ضنتس جح !



صوره من فوق السطح ..



احاول اقلد انا وذا الفرشة الحمراء حقتنا ..
لاه وبعد اعزم خلق الله من زين الطبايع انا وخشتي



ذي مره وحلتيته زينه للتسبد في حاله انكم شفتو كيكتي وامترت تسبودكم انقعو مره والا حلتيته والا اخلطوها مافيه ايه مشكله والهموها تريح ! --> لحد يسمع كلامها ويخلطها تراها قويه مابي استاثم فيكم ..
عاد يوم قضيت وتسذا حلفت وقسممممممت اني ماسوي كيكتن مرتن ثانيه لو وشو والا بسوي بس موب في ذا الصينيه اللي تقلب الراس --> ابرك واسعد ..! هذا لون الفاشلين مثلي في الطبخ ونفسهم مخيس وغير تسذا جفسين عاد اكتشفت بعدين ان الكيكات يبي لها ناس رايقه وعندهم ذوق وفن وانا منيب وجه ذا كله حدي احط خسه في شاهي اختصار للملعقه ويخب هههههههه .. هذي مشاركتي داخلتن من ضمن اللجنه اللي بيقيمووني صفر من عشره ..


والله يعافي عايله ال وهـ بس ماقصرو جعل عمرهم طويل .. ---> اطلعي برى بس !

>>>>> ردود الأعضـــــــــــــــــــاء على الموضوع <<<<<
==================================


اختي وه بس انا في بداياتي في الطبخ ياما كيكات تطلع من الفرن على الزباله ومسكين الوالد الله يرحمه خسرته من البيض والطلبات الثانيه واكتب له ويجيب الطلبات ما طفش مني واخر شي سماني ام الحلى هههههههههه بس الكيك الجاهز لا تحطين مقادير الماء كلها انا كذا تزبط


__________________________________________________ __________

هههههههههههههههههه والله بتفكريني بنفسي
نفس حكايتك بالظبط هههههههههههههههههه



__________________________________________________ __________


ههههههههههههههههههههه موتيني من الضحك

فعلا دمك عسل والله انك توسعين الصدر

تكفين لا عاد تصلحين كيك هههههههه راح تروح ميزانه أبوك على هـ البقالة وتطلعون على أساس الفقر والسبة أنتي

بقااايا روح



بقااايا روح



__________________________________________________ __________

يالبى قلبتس ويالبى كيكتس الحلوة
شوفي ياقمر المنتدى كفري عشانتس حلفتي ماتسوين كيك
ثاني شي حبيبتي اخفقي البيض مع السكر كويس وعشان ماتلبق الكيكة المصونة بالصينية ادهني الصينية بزبدة ورشي عليها دقيق قرابة نص ملعقة وماجاتس عندي اذا لبقت بالقالب حزتها جيبي خزرانة ومسطيني لين ينجح لحمي
وشكرا


__________________________________________________ __________

قعدت ساعه اقراء الموضووووع حسبي الله على بليسك
على العموم اهم شيء النتيجه النهائيه الشكل حلو لكن مادري عن المضموووون
يعطيك العافيه وتسلم يداااااك ,,,

كــــدووووو,’’’