عنوان الموضوع : ارجوكم ساعدوني
مقدم من طرف منتديات نساء الجزائر

ارجوكم ساعدوني



انا (ش) عندي 25 سنه قصتي ابتدت من يوم ما دخلت الجامعه اتعرفت هناك على زميل ليا و بما اني كنت بعيده عن اهلي (في مدينه تانيه) كنت بقضي تقريبا كل وقت فراغي معاه بصفتنا اصدقاء و اتعرفت عليه جدا حتى اني بقيت بعرف هو عايز يقول ايه من غير ما يتكلم و بقيت بعرف رد فعله حيكون ايه تجاه اي حاجه حتحصل المهم كملنا الجامعه و اخدنا الاجازه و سافرنا مع بعض و عزمني لبيتهم عشان اتعرف بامه و ابوه و عيلته و وافقت و رحت معاه و رديت له العزومه بانه ييجي يتعرف على ماما و بابا بس اللي ما كناش عاملين حسابه ان مامته اعجبت بيا و صممت انه يتقدم لي رغم محاولاته الكتيره في انه يوضح لها مدى علاقتي بيه و انها ما تتعداش الصداقه
هو كان متعود انه يسافر لاهله كل اسبوع او 10 ايام بس انا لاحظت انه انقطع عن زيارتهم بشكل نهائي فسالته. في الاول ما رضيش يقول بس بعدين قال لي انه كل ما بيروح لبيتهم امه بتقعد تقول له ليه ما تتجوزش (ش) و بان اللي تعرفه احسن من اللي ما تعرفوش و من الكلام ده .
ساعة ما صارحني انا انصدمت في الاول بس بعدين لما سمعت مره مكالمه كانت بينه و بين امه عني طبعا و كان فاتح السبيكر عشان ما تعودناش نخبي حاجه عن بعض سمعتها بتخيره يا اما يتجوزني يا اما يخسرها ساعتها ما عرفتش اتصرف ازاي فقمت قلت له ليه ما نجربش مش حنخسر حاجه و فعلا تمت الخطوبه و الفرح و كنا من اسعد الازواج بس بعدين بقينا بنلاقي مشاكل في صراحتنا مع بعض يعني انا كنت بعرف كل اللي حبهم و هو كمان يعرف كل علاقاتي فبقينا لما بنقابل حد من اللي كانت بتربطنا بيهم علاقات قبل كده كل واحد بقى بيشك في التاني و في مشاعره و حتى موضوع اننا فاهمين بعض قوي بقى بيشكل لنا مشكله كبيره يعني لما بتمر من جنبنا واحده من النوع اللي بيحبه على طول ببقى متنرفزه و مش طايقه نفسي و هو كمان لما بيمر من جنبي شاب حليوه رغم اني ما بهتمش بس ما بيقدرش يتحكم في نفسه اللي خلى حياتنا جحيم و اضطرينا اننا ننفصل عن بعض بس المشكله اننا رجعنا سكنا في شققنا القديمه عشان الشغل و اللي متقابله مع بعض و في نفس العماره يعني لا مع بعض مرتاحين ولا بعيد عن بعض كمان مرتاحين زي ما بيقول عبد الحليم بعدك نار قربك نار و اكتر من نار
اسفه لو كنت ازعجتكم بس نفسي حد يساعدني و يقول لي ايه العمل في مشكلتي كل اللي يعرفنا بيقول اننا فاهمين بعض اكتر من اللازم
بس انا بقيت بحبه و هو كمان ارجوكم حد يساعدني و يقترح عليا اي حل يكون في نظره ملائم

>>>>> ردود الأعضـــــــــــــــــــاء على الموضوع <<<<<
==================================


الحل يا اختي انك تحاولي ترجعي لزوجك والاشياء اللي تعرفيها عنه اويعرفها عنك خلاص خصكم تنسوها الماضي لا يعاد وانتم انتقلتم من حياة الدراسة والصداقة الى حياة اخرى حياة فيها حب ومسؤلية وحياة دائمة مع بعض يعني بلاش تخلطو حياتكم الماضية بحياتك الجديدة حاولي تتاقلمي معاه كزوج مش كصديق حاولو اول شي تغيرو من نظرتكم لبعض ومادام انت بتحبيه حاولي انك تحافظي عليه وانكم تغيرو افكاركم عن بعض وربنا يصلح الامور ويوقكم ان شاء الله


__________________________________________________ __________

السلام عليكم ورحمة الله وبركاته

حبيبتى (ش)
هو الغيرة بتعبر عن الحب
ولكن اذا زاد معيارها حتقتله
المفروض انك تراجعى نفسك انت وزوجك
تقعدوا مع بعض
كل واحد يقول للتانى ايه اللى مضايقه
يعنى تعملوا تقييم لحياتكم الماضية
وتتعهدوا لبعض ببداية جديدة واسلوب جديد
ويا ريت انكم تحاولوا انكم تنسوا الفترة الماضية
ويكون الحوار بينكم بطريقة هادية لفهم المطلوب

بما ان الحب موجود يبقى كل شيء بيهون
حاولوا تشغلوا حالكم بشيء جديد فى حياتكم (بيبي)مثلا
اتمنى لكم السعادة من كل قلبى
وطمنينى عنك حبيبتى


__________________________________________________ __________

اختي العزيزه كان الله في عونك بصراحه انه رايي انكم اتجددون حبكم او اتعيشون قصه حب بس مع بعضكم لانكم ماعشتوش قصه حب انتو عشتوا الصداقه بس الحب ماعطيتوه فرصه يتكون بقوه انه من كلامك باين انكم بتحبوا بعض اوي بس لازم تعيشو قصه حب اتخليه يجي يطلبك منجديدومن نفسه,وتحسسيه انك اخترتيه لانك بتحبيه هو وبس وكل الرجاله عندك وله حاجه وانه النوع الي يعجبك وبس يعني تتنكرشي فيه لمه تتقابلو على السلم تحاولوا انكم تعملوا نفسكم بتتعرفوا على بعض لاول مره وكل يوم والتاني هديه رساله على موبايله تتقابلو بره وكل حاجه ممكن تعمليهه لمه اتعيشي قصه حب بسي على شرط الماضي قبل اي شيء تتفقوا انكم متجيبوش سيرته خااااااااالللللللللص يعني مش صفحه جديده لا كتاب جديد يعني الكتاب الاولي تحرقوه واتعيشوا حياتكم لانك مش ممكن حتلاقي حب كده انك وهو تعرفوا حتقولو لبعض ايه منغير متتكلموا دي نعمه اسمهه الحب الصادق والثقه هي مشكلتكم حسسيه انكواثقه منوه انه بيحبك انتي وبس وهو كمان والله يوفقكم ان شاء الله وعايزين نسمع الاخبالر الحلوه وعايزه اقول لك الست لمه اتحب تعمل المستحيل علشان ترجع حبيبهه ومتقوليش انه بتكسف اقولوا انعيش فتره حب جديده ده حبيبك الي حتعملي اي حاجه علشان ترجعيه ومتخليش وحده تاخدوا منك وبسرعه رجعيه ارجوكي ارجعوا لبعض ومتنسيش الرسايل الي من تحت الباب تعاله نتقابل علسطوح ارجوا ان اكون قد فدتك اختك احلى النغمات التي تتمنى ان تضيفي نغمه الحب الى قلبك ولا تعزليه .


__________________________________________________ __________

هاااااااااااااااااااااااااااااااااااااااااااااي يا جماعه انا (ش) لسى فاكريني كنت عايزه اشكركم قوووووووووووييييييييييييييييييي و اقول لكم اني رجعت لجوزي من حوالي تلات شهور تقريبا و انا دلوقتي حامل و الحمد لله قدرنا اننا نتخطى كل المشاكل اللي مرينا بيها و ننساها او نتناساها المهم اننا دلوقتي يمكن من اسعد الناس و يا رب تدوم السعاده دي على طوووووووووووووووووووووووووووول


__________________________________________________ __________

ارجوكم ساعدوني اختي الغاليه صلي صلاه الاستخاره واذا ربي رايد انكم ترجعو لبعض حترجعو صدقيني تحياتي بيبي