عنوان الموضوع : انصحوني وادعولي بضهر الغيب
مقدم من طرف منتديات نساء الجزائر

انصحوني وادعولي بضهر الغيب



السلام عليكم انا عندي مشكله وحكايتي طويله جدا وكنت محتاجه اتكلم مع حد خبير او عنده وعي كافي وفي نفس الوقت يكون ميعرفنيش معرفه شخصيه علشان ميجاملنيش او يصبرني بأي كلام وخلاص .. وبصراحه ملقتش حد اثق فيه وف رأيه اكتر منكوا

انا بنت عندي 21 سنه .. حكايتي بدأت من 7 سنين تقريبا كنت في الثانوي وقتها وكان في واحد جارنا اكبر مني بسنه ونص بيحاول يقرب مني بجميع الطرق بس انا كنت رفضاه تماما وكنت مش بطيق سيرته .. بس هو كان مصمم يتعرف عليا وكان بيجيلي عند مدرستي كتير لاننا ساكنين في منطقه شعبيه واهلي صعبين جدا ومش هيقبلوا فكره اني اقف مع واحد في الشارع من غير ما يكون من عائلتنا .. وقدام اسراره ومحاولاته المتكرره انا وافقت اني اقف معاه واشوفه عايز ايه .. ساعتها قالي انه معجب بيا ونفسه نبقي اصدقاء ونتعرف ع بعض اكتر .. بس انا قولتله انا اسفه مش هقدر ومينفعش تيجي هنا تاني لان انت كده هتخلي الناس تفتكر ان في حاجه بينا ويتكلموا عليا .. وهو بصراحه احترم رغبتي وبطل يطاردني وكان بيكتفي بنظراته ليا وكان دايما يقعد تحت بيتنا بالساعات علشان بس يشوفني وبصراحه انا بدأت اتعلق بيه او جايز حبيت اهتمامه الزايد بيا خصوصا اني كنت مراهقه .. ومع الايام بدأت اغير عليه جدا لو شوفته بيكلم اي بنت حتي لو متأكده ان مفيش بينهم حاجه وبعد سنه تقريبا اتقابلنا صدفه في مكان بعيد عن بيتنا وهو جه سلم عليا واتكلمنا شويا وبعد كده طلب رقمي وانا ساعتها وافقت حتي هو كان مش مصدق اني وافقت بسهوله كده وكان فرحان جدا وبعد فتره قصيره اعترفلي بحبه ليا وانا كمان اعترفتله وبدأت علاقتنا .. كان بيحبني جدا وانا كنت بعامله بقسوه علشان كنت عارفه انه ميقدرش يستغني عني وهو كان بيستحمل قسوتي وعنادي وكان دايما بيحاول يرضيني حتي لو انا الغلطانه .. بس بعد كده عرفت عن طريق الصدفه انه اتعرف ع واحده غيري ولما سألته مأنكرش وقالي انه فعلا عرف واحده غيري وقالي انتي اللي خلتيني اعمل كده وعاتبني جامد وقالي انتي حتي عمرك ما قولتيلي كلمه حلوه ودايما بتهدديني انك هتبعدي عني .. طبعا بعد الموقف ده انا بعدت عنه فتره علشان خاين بس في نفس الوقت كلامه فوقني وحسيت انه هو الضحيه مش انا .. وهو طول الفتره دي كان بيحاول يصالحني وفعلا صالحته وبدأت اعامله كويس جدا وبدأت اتعلق بيه اكتر وبصراحه هو كان بيحاول يسعدني بكل الطرق ولو طلبت عينه مكنش هيتأخر .. وع رغم اني كنت بعشقه بس كنت متأكده ان هو بيحبني اضعااااااف حبي ليه وكان كل اللي يعرفونا رأيهم من رأيي .. كان دايما يكلم اهله انه عاوز يخطب بس كانه يقولوله انت لسه صغير وبعد حوالي 4 سنين من ارتباطنا .. كان ساعتها انا عندي 18 سنه وهو 19 سنه ونص فاتح اهله في موضوع الخطوبه والحمدلله وافقوا وجه كلم اهلي وقالهم انه قدامه سنتين جيش وسنه يفرش شقتنا يعني 3 سنين .. ووالدي كان متردد بس لما لاحظ اني متمسكه بيه وافق .. واتخطبنا وكنت اسعد انسانه في الدنيا انا وهو اخيرا حلم حياتنا اتحقق .. بس بعد حوالي سنه من خطوبتنا كان خطيبي دخل الجيش بس كان دايما يتصل بيا وكان بيعرض نفسه للخطر وياخد التليفون معاه رغم ان ده ممنوع خصوصا كان في ثوره والبلد بايظه واتعاقب اكتر من مره بسبب التليفون بس برضوا كان بيخاطر علشان يكلمني كل يوم زي ما اتعودنا بس انا كان بدأ يحصلي حاجات غريبه منها الصراخ الدائم واعصابي كانت دايما تعبانه وناس يقولولي انتي معمولك عمل وناس يقولولي انتي محسوده بس الله اعلم ايه السبب .. بدأت اكرهه خطيبي اللي كنت بعشقه وبعدت عن الناس كلها لدرجه مبقاش ليا ولا صديقه وكنت كل همي اني اسيب خطيبي وهو رغم كل حاجه كان متمسك بيا وكان بيتوسلي اني افضل معاه رغم ان اي واحد مكانه كان هيراجع نفسه خصوصا اني بقيت اتصرف بعدوانيه وبحاول اضر اقرب الناس ليا بدون سبب وهو كان اولهم .. بس رغم كده فضل متمسك بيا وانا كنت خدت قرار اني اسيبه وفعلا سيبته ومرحمتش دموعه ولا عملت حساب لأي حاجه كانت بينا .. بس هو متحملش الصدمه وتعب جدا وجاتله جلطه بس الحمدلله لحقوه وربنا سترها وقام بالسلامه وانا عرفت وكنت ساعتها مش فارق معايا بالعكس كنت فرحانه فيه وبينتله فرحتي دي .. ساعتها هو مستحملش وغضب جدا وكلم والدي وحش وحصلت مشكله كبيره واتطورت وبقي في عداوه غير طبيعيه بين اهلي واهله .. بعد فتره مش كبيره بدأت افوق واستوعب اللي انا عملته وكنت ندمانه جدا ومش عارفه انا ازاي عملت كده وازاي سيبت حبيب عمري بس كان فات الاوان .. كنت عارفه انه مستحيل يبص في وشي تاني وحتي لو هو وافق نرجع لبعض .. اكيد اهلي واهله مش هيوافقوا .. وسط ندمي ودموعي دي فتحت خطي القديم لقيته باعتلي رسايل كتير كلها عتاب وف وسط الرسايل لقيت رقم غريب بيتصل .. رديت وانا عندي احساس انه هو .. قولت الو اكتر من مره بس مكنتش بلاقي اي رد بعد كده سمعت صوت حد بيعيط اتأكدت انه هو وانا كمان بدأت ابكي واعتذرله وبعد الحاح مني رد ورغم كل العذاب اللي شافه بسببي سامحني واعتذرلي انه عمل كده مع اهلي ووعدني انه هيحاول يصلح كل حاجه بعد ما يخلص جيش وطلب مني اوعده اني مش هبعد عنه تاني مهما حصل .. ورجعنا لبعض وكان فرحان جدا برجوعي وكان بيهتم بيا زي الاول واكتر .. وعدت فتره الجيش وكان فاضل شهرين بس ويخلص .. بس خلال الشهرين دول بدأ يتغير من ناحيتي وقلل اتصاله بيا ولما عاتبته قالي انه عنده مشروع حرب وبيتعب جدا ومش لاقي وقت يكلمني وقالي استحملي كلها شهرين وافضالك .. وعدوا الشهرين وخلص جيشه وقله الاهتمام فضلت زي ما هي وكل ما اعاتبه يطلعلي بألف حجه .. بدأت اتخانق معاه كتيييييير جدا .. تقريبا مبقاش يعدي علينا يوم من غير مشاكل .. بعد كده بطل يتصل غير مره في اليوم رغم انه كان بيكلمني الاول كل نص ساعه تقريبا والله ولو قعدنا ساعتين من غير ما نتكلم كانت بتبقي معجزه .. ولما سألته قال انه كان في الجيش بياخد منح واهله كانه بيدولوا مصاريف دايما وكان معاه انه يشحن كتير ويكلمني.. انما دلوقتي مش لاقي شغل وظروفه وحشه ومش معقول هيشحت من اهله علشان يشحن كل شويا ويكلمني .. قولتله مش مشكله بس انت خلصت جيش المفروض تكلم اهلي زي ما قولت .. قالي مش هقدر افتح معاهم الموضوع قبل ما اتوظف علشان اعرف اتكلم بقلب جامد .. قولتله ماشي واستنيت وعدي شهر واتنين ودلوقتي بقاله 7 شهور مخلص جيش ومتوظفش ولا كلم اهلي .. والاهمال زاد عن حده وبدأت الاحظ عليه حاجه مديقاني جدا ومحسساني بالقهره بقي يبص ع البنات ويعاكس اي بنت معديه ولما بسأله بينكر او يقولي اسباب مش مقنعه .. وكلمته كتير وطلبت منه يبطل بس مفيش فايده وخدت موقف وبعدت عنه اكتر من مره وقفلت تليفوني بالاسبوعين ومكنتش بلاقي منه اللي انا مستنياه بالعكس كنت بلاقيه مش فارق معاه وبعد كده يرجع يوقفني في الشارع ويعتذرلي ويصالحني ويحلفلي مش هيعمل كده تاني ويبطل فعلا طول ما احنا كويسين مع بعض واول ما نتخانق حتي لو ع حاجه تافها يرجع يعاكس وينسي كل وعوده ليا .. بس انا كنت بدعي ربنا دايما انه يهديه ويغض بصره والحمد والشكر لله انه استجاب دعايه وهداه ..بس قله اهتمامه واهماله بيجرحني اوي ومش قادره اكلمه واشحت الاهتمام منه .. نفسي ابعد بس مش قادره ونفسي اقرب بس قربه بيجرحني اوي بسبب اهماله واللا مبالاه اللي بقت عنده .. هو قدم في كذا وظيفه ومستني الرد وكلم اهله انه يرجعلي بس اهله رافضني واهلي رافضينوا .. انا تعبت مش عارفه الاقيها منين ولا منين .. هو بقي مهمل ومش بيعمل حاجه .. واهلي عايزين يجوزوني ويبعدوني عنه بأي طريقه .. وانا مش عارفه اعمل ايه .. بالله عليكوا ادعولي ربنا يهديه ويهدي اهلي واهله ويوافقوا ويجمع بينا في حلاله .. وياريت محدش يتريق او يرد بتجريح .. جايز في ناس كتير تشوف ان دي مشكله تافهه بس جربوا تحطوا نفسكوا مكاني قبل ما تردوا وحاولوا تقدروا معاناتي .. اسفه طولت عليكوا بس كنت محتاجه افضفض

>>>>> ردود الأعضـــــــــــــــــــاء على الموضوع <<<<<
==================================


بجد قصتك بتزبط فيلم مش طبيعي الي صار إلكم ...
اختي ما دام بحبك وانتي بتحبي بدكم توقفوا بوجه الكل مشان تحصلوا ع بعض وكمان قللي المشاكل ع الرجل واعطيه فرصه يتوظف ويزبط وضعه لحتى يجيكي بعين قويه وراس مرفوع ..
الله يهدي بالكم يا رب ويجمعكم بالحلال اختي بجد قصتك محزنه وكمان بنفس الوقت لا تفرطي بانسان بحبك هاذ الحب كله ..


__________________________________________________ __________

تسلمي حبيبتي شكرا ع ردك واهتمامك .. انتي الوحيده اللي رديتي عليا .. ربنا يجازيكي خير ويريح بالك زي ما ريحتيني بردك عليا


__________________________________________________ __________

يارب انشالله الله يهدي اهلك واهله وانشالله يوافقون والله ايساعدج حبيبتي قصتج فعلا محزنه جدا بس حاولي لتخسرين شخص ايحبج صدك لان بصراحه قليل تشوفين هيجي شخص بهاي الايام وياربي الله يوفقكم ويجمعكم بالحلال


__________________________________________________ __________

رفع


__________________________________________________ __________

المشاركة الأصلية كتبت بواسطة الخطاطه
يارب انشالله الله يهدي اهلك واهله وانشالله يوافقون والله ايساعدج حبيبتي قصتج فعلا محزنه جدا بس حاولي لتخسرين شخص ايحبج صدك لان بصراحه قليل تشوفين هيجي شخص بهاي الايام وياربي الله يوفقكم ويجمعكم بالحلال

تسلمي حبيبتي شكرا ع ردك واهتمامك وربنا يوفقك ويسعدك انتي كمان يارب