عنوان الموضوع : رواية تضحياتي -قصة جميلة
مقدم من طرف منتديات نساء الجزائر

رواية تضحياتي






الجزء الأول

نور عمرها 22 سنه طيبه وينطبق عليها مثل الطيب ما يعيش .. متواضعة ظروف اهلها المادية ما خلتها تختلط بالعالم مثل غيرها
من بنات سنها كانت ايام المدرسه تمشي حالها مع البنات مع انها تشوف اشياء امام عينها تكون ودها تسوي مثلها بس لظروف
والدها ابو مازن الي على جد حاله.. ما كانت تقدر تطلب شيء الا في الضروره و الأكيد ان الشيء الضروري يجيها بعد تعب فبعد
الدراسه نور جابت نسبه زينه بس ما حصلت قبول في اي مكان كانت نور قنوعه للظروف الي مرت فيها .. وبقت فالبيت تساعد
والدتها ..

لنور ثلاثة خوات عبير و فاطمة و عالية عبير الاخت الصغيره صف الخامس الابتدائي وهي اصغرهم وفاطمة بتدرس في الكليه سنه ثنيه و هي اكبر خواتها وعاليه في ثاني الثانويه واخوهم مازن الي اصغر من نور بسنه مخلص ثانويه وبيشتغل شغل مشي الحال لأنه ما جاب نسبه

نور وهي تنظف المطبخ وعبير بتكتب جنب ثلاجه المطبخ:تخيلت دايم ان تكون بيتنا قصر كبير فيه مزرعه كبيره و حديقه فيها
ورود واشجار و عصافير .. وفي وسط الحديقه نافوره تجعل المنظر احلى وتعكس الوان الاشجار على الماء .. وانا اميرة في هذا
القصر وافتح نافذة القصر التي تطل على هذا المنظر واشوف هلمنظر الحلو يالله كيف بيكون حماس
عبير : هدي علي شويه الحين اكتب بيكون حماس واكتب واشوف هذا المنظر كيف بتجي؟
نور: لا لا هههههه هذك عشت الجو شويه كتبي وأرى هذا المنظر
عبير: معده تعبير هذا حاسه الاستادة بتقولي انتي بتحلمين
نور: خليني اكمل
عبير بملل: زين كملي
نور وهي تمثل لعبير تطلع فوق طاوله صغيره في المطبخ : وانا انظر من نافذه بيتنا لأرى فارس احلامي على حصان ابيض
ام مازن: هذي كي يا نور بتسوين اش ؟
عبير: هههههههههههه يا نور هدي شويه امي امي
نور برتباك: هاا يمه هذك بساعد عبير في التعبير مالها
ام مازن : والحين بتقولين لختش فارس احلامي ايش من كلام هذا
نور: لا لا هذك اصلا التعبير عن شيء خيالي
ام مازن : المهم خلي عنش الخرابيط ووالدش بينادي ما اعرف ايش يريد
نور: زين وخواتي وين
ام مازن: فاطمة بتذاكر وعاليه ما ادري ايش بتسوي روحي شوفي والدش اش يريد
نور : ان شاء الله ..
ابو مازن بعصبيه: ساعة حت تردن اش من بنات انتن ما تساعدن حد .؟
نور: خير يبه انا كنت في المطبخ بنظف وبساعد عبير
ابو مازن: اذا ناديتش تجين ولا تسوين لي كلام
نور بنفسها : وليش يعني معصب؟
نور : ان شاء الله ولا يهمك
ابو مازن: سوي عشاء بيجينا رجال بيتعشي عندنا .. وسوي شاي وكذا
نور وهي تمسك الضحكه : زين ان شاء الله
ابو مازن: ايش فيش بتضحكين ؟
نور: لا لا ماشي ان شاء الله بسوي كل شي تمام ...
نور بنفسها: والله حاله الله يهديك يبه الحين هذا الصراخ كله على عشاء ورجال بيجينا.. كأنك ما تعرف
ان المطبخ كله نواقص وعادنا اول الشهر .. بس يالله بمشي الحال وان شاء الله اببيض وجهك قدام الرجال
نور تنادي: عاليه عاليه
عاليه وهي تمشط شعرها: هاااااا ايش تريدين ؟
نور: تعالي ساعديني في رجال بيجي والدي عازمه يمكن
عاليه: ههههههههههه الحين والدي على اش عازمه يعني ع الخواريف الي طبقنا بهن في الفريزر ولا ع جمال مجلسنا
ياربي عشان بس نتفشل قدام الرجال
نور :خلي الكلام الزايد انا حسيت ان والدي معصب شكله من هلشيء ويمكن لأن الرجال عزم نفسه هههههه
عالية: هههههههه سوري انا ما بساعدش لأني بكوي ملابس مال المدرسه وما اريد اخرب اظافري ما شفتي منال صاحبتي كيف
اظافرها روعه .. اكيد لأنها ما تمس شي في البيت مو نحن مالت بس
نور: عاليه شوفي نحن قد مشينا حالنا مع البنات في المدرسه و لله الحمد ما كنا اقل من حد خليش من هلكلام وخليش واثقه بنفسش
ولا تتأثري بحد شوفي اظافرك كيف قصيهن احسن والله
عاليه: لوين تريدين توصلين شوفي مساعده ماني مساعده حد.. اختصر عليش السالفه مافيني اغسل صحون واقص بصل
وعارفتش اذا طبختي نص الطبخه بصل لأنه بيكون المطبخ كله نواقص ههههه والشي الوحيد الي اضمن لش موجود هو البصل
نور : انتي الكلام ضايع معش ما فيني اضيع وقت
نور بنفسها: الحين فاطمه ما بقدر اطلب منها شئ بتكون بتذاكر . . وهي طالعه احسن وحده فينا ما اريد احسسها اننا نريد نزعجها
يالله امري لله بسوي كل شي وحدي
ام مازن: نور انا بطلع عند خالتش ام يزن ما اعرف اتصلت تريد شي وبروح لها مع مازن ..
نور: يمه والدي رجال بيجيه وعازمه ع العشاء
ام مازن تقاطع نور: اعتمد عليش سوي الي عرفتي به برايه حد قاله يعزم الرجال وعارف الظروف كيف برايه
نور بقلق : اوك زين
نور بنفسها: الله يهديش يمه عارفه بتروحين عند خالتي ام يزن علشان تخذين منها شيء او ع الاقل تشوفين بيت حلو كبير مرتب

يفتح نفسش .. مع ان خالتي تقول كلام يجرح احيانا بس ما اعرف ليش امي تتجاهل الكلام الي ما يعجبها .. اكيد لمصلحتها .. الله

يعين بس


نور حاولت بكل ما عندها علشان تسوي شيء يظهر بمظهر زين امام الرجال ..
مازن دخل المطبخ: نور اووو اش هذا ؟ معكرونه
نور: سكت زين جاء كذا على الله والدي يرضي بالي سويته ..
مازن: عادي اطعم؟
نور: لا طبعا.. يلا برع متى ما راح الرجال خير
مازن: وهذا كله واحد بياكله؟
نور: مازن لا تصدع بي رجال اول مره يجينا لازم نسوي شئ حشمه
مازن: زين

في هلحظه رن تلفون مازن وعلى طول طلع من المطبخ ..
نور : هذا ايش فيه على كذا مدري من اتصل به وما يريدني اسمع .. والله حالة
نور بنفسها: نفسي اعرف من هذا الي ما قصده يجي يتعشي عندنا

بعد ما نظمت نور السفره حاولت تخلي المجلس المتواضع شكله حلو ونظيف

نور: عبير انفداها جيبي المجمر ودخني المجلس
عبير: زين

رجعت ام مازن قبل ما يجي ابو مازن وضيفه للبيت ودخلت المجلس وعجبها ترتيب نور

ام مازن وهي تضحك: ما شاء الله ايش من حماس هذا
عبير: هذي نور سوت كل هذا

وبهلحظه دخل ابو مازن البيت ..

ابو مازن : ما شاء الله ما قصرتي يا ام مازن ترتيبكن زين ان شاء الله العشاء يكون كذا
ام مازن: ههههه
عبير: هذا نور سوت ..
ام مازن تقاطع عبير: ما قصرت نور ساعداتني..

عبير تطالع في والدتها بستغراب..

ابو مازن: بعد شوي بيجي الرجال ما اريد ازعاج
ام مازن : من هذا الرجال ؟
ابو مازن: ابو حامد
ام مازن بنفسها: ابو حامد ايش ذكره بنا اليوم
عبير لوالدتها: يمه لش كذا يعني ما سويتي شيء معنا ولا حت عارفه ايش العشاء تقولين نور ساعداتش؟
ام مازن: انتي عارفه ان والدش بيحاكم اذا عرف اني رحت عند خالتش ام يزن تعرفين انه ما يبغيني اروح عندهم لأنهم احسن منه
وما عد يرتاح اذا جيت خبرته بشيء جديد في بيتهم ..
عبير: اممم لكن نور تعبت من العصر وهي بتحاوج وعاليه غلبت ما تساعدها
ام مازن : ما يقول شئ نور فاضيه ما معاها شغل ..

وصل ضيف ابو مازن وكان مو متوقع .. كان ابو حامد جارهم رجال مرتاح وعنده خير يصلي مع ابو مازن في المسجد قريب بيتهم

ويجلسون دايم على دكه المسجد بس الغريب انه اول مره يزور بيت ابو مازن في بيتهم وهو عارف ظروفهم .. يعني لو دخل

مجلسهم ما يتوقع انه بيشوف الثريات وطقم الكراسي والجبس الي متعود يشوفه في بيتهم ...

دخل ابو حامد المجلس مع ابو مازن ومازن وتعشى وكان مرتاح من العشاء وطريقه التنظيم مع انه كان متواضع جدا ومع هذا كان

ابو مازن شايفه كثير
وشئ مفتخر فيه بشكل ما يوصف ..

ابو حامد: مشكور يا بو مازن ما قصرت العشاء شغل مرتب جزاك الله خير
ابو مازن: ماشي من قيمتكم يا بو حامد تشرفنا بأي وقت
مازن بنفسه وهو ماسك الضحكه: ما سمعاتك نور وانت بتقول تجي بأي وقت محد بيشتقي الا هي ..

وبهلحظه دقت عبير الباب وكان في يدها صينيه فيها ايسكريم وفيه فواكه سوته نور ع اساس حلو بعد العشاء..

فتح مازن الباب واخذ الصينيه منها وقرب للضيف ..
ابو حامد: ما شاء الله ليش معذبين نفسكم .. انا معي السكري ما بقدر اكل الحلاوة ..
ابو مازن: الله يساعدك ..
ابو حامد: المهم يا بو مازن انا حاسك مستغرب من زيارتي لكم بس انا لي طلب عندكم وان شاء الله يكون خير
ابو مازن بنفسه: طلب عندنا ونحن ايش عندنا علشان يطلبه منا
ابو حامد : اشوف وجهك تغير يا بو مازن ترى انا بعدني ما طلبت شئ
ابو مازن: لا ما فيني شي كمل طلب وان شاء الله ما نردك بشيء خير يا بو حامد
ابو حامد: انا جايكم اريد اخطب وحد من بناتك
ابو مازن بفرحه: حياك الله وما نحصل احسن منكم
مازن بنفسه: الحين معقوله حامد يريد حد من خواتي ؟ ؟
ابو مازن: يا بو حامد انا عندي اربع بنات من فيهن تريدون ؟
ابو حامد: الي ترضي بي انا راضي بها
مازن بتعجب: ليش انت بتخطب لمن ؟
ابو حامد: لنفسي انا اريد اتزوج
مازن: ايش؟ ومن قالك خواتي بيتزوجن رجال كبير متزوج وعنده اولاد اكبر منهن ؟
ابو مازن يقاطع مازن: ابو حامد ما يصير خاطرك الا طيب وما عليك من كلام مازن . . انا بشوف البنات وبرد عليك ان شاء الله
ويشرفنا نكون مصاهير يا بو حامد وما نحصل احسن منك
ابو حامد: جزاك الله خير .. ولكم الي تريدون لو ما رديتوني .. وبعيشها اميره اذا الله اراد وما لها دخل بأم حامد واولادها وبتعيش
هي وأهلها بنعمه ان شاء الله ..
ابو مازن: ما يصير خاطرك الا طيب بشوف البنات وبخبرك ان شاء الله بأقرب وقت ..

بعد ما طلع ابو حامد من عند ابو مازن ..
مازن ما تحمل الموقف وكلم والده بكل صراحة..
مازن: الحين من صدقك قلت له ما يصير خاطرك الا طيب ؟
ابو مازن: انت تعرف ابو حامد ايش عنده ؟
مازن: ما يهمني .. خواتي مو للبيع .. الرجال مريض و عنده اولاد اكبر منا بيتزوج وحده اصغر من بناته ؟
ابو مازن: شوف انت ما عد لك دخل انا ما بغصب خواتك اكيد برضاها الي بتتزوجه ماشي بالغصب..
مازن ما عجبه كلام والده ..
مازن بعصبيه: سو الي تريدون انا قلت الي عندي انا طالع مع الشباب ..
قام مازن وطلع من البيت ..

ابو مازن فاتح ام مازن بالموضوع .. وكانت ردة فعل ام مازن موافقه بكل ما فيها
ام مازن: والله يكون فتح لنا باب الفرج يا بو مازن
ابو مازن : انا ما اريد اظلم بناتي
ام مازن: ما فيها ظلم ولا شيء بالعكس انت بتسعد بنتك وبتشتري راحتها وراحتنا في نفس الوقت يعني عاجبك الحال الي نحن
فيه ؟ ابو حامد يريد يساعدنا ونحن بنساعده بالي يريد
.
..
.

يتبع

ان شاء الله تكون البدايه عجبتكم تابعو الجزء الثاني بقلم
متذوق الابداع ^^...

>>منتظرين التكملة من متذوق الابداع بحماااس ترى انا مثلكم ما اعرف ايش بيصير لاني ما اعرف كيف متذوق بيغير مسار الروايه...
بنتظار أرائكم ^^

>>>>> ردود الأعضـــــــــــــــــــاء على الموضوع <<<<<
==================================


حلوووووووووه كملي بليز


__________________________________________________ __________


__________________________________________________ __________


__________________________________________________ __________


__________________________________________________ __________