عنوان الموضوع : قصة ولادتي باجمل توام - للحمل و الولادة
مقدم من طرف منتديات نساء الجزائر

قصة ولادتي باجمل توام



السلام عليكم ورحمة الله تعالى وبركاته
حبيت احكيلكم قصة ولادتي
هذا يا سيدي من وقت ما حملت وانا مهددة بالولادة المبكرة ولاني عندي تمزق بعنق الرحم عملتي الدكتورة ربط عنق الرحم(سيركلاج) وطلبت مني ما قوم من السرير طول فترة الحمل ،يعني فترة حملي كانت كثير صعيبة خاصة وانو عندي بنتين وولد من قبل
المهم ، لما دخلت الشهر الثامن حددتلي الدكتورة موعد مشان تشيل الربط وكان بالاسبوع36 من الحمل اللي وافق يوم الاحد 19 من رمضان، يوم السبت جلست على طاولة الفطار مع زوجي وانا اتحدث اليه وقولو : بكرة ان شاء الله لما اشيل الربط رح اجي مباشرة على المطبخ ، شو بدك اطبخلك ، لاني ما كنت اقدر اطبخ كان يجيب اكل من عند اقاربه
وصرت قولو : رح اطبخلك هالاكل وهالاكل واعملك حلو ، وهو عم يضحك
قلتلو ليش عم تضحك ، قالي خوفي بكرة اذا شلتي الرط رح تولدي على الفور
قلتلو لا تخاف رح كمل التاسع
بالليل عملت دش مرتب يعني استحميت وحضرت حالي كاني رح اولد ، ولما خرجت من الدش رحت اتفقد شنطة المستشفى واغراض البيبيات ، نمت بعد صلاة الفجر وما قدرت فيق بكير وموعدي كان الساعة 9 معناتو فات الموعد ولقيت الدكتورة دخلت غرفة العمليات فاضطريت استناها ، وما اخذت معي على العيادة ولا غرض لانو كان املي اكمل على الاقل اسبوع ثاني
طلعت الدكتورة من غرفة العمليات الساعة 12 ونادتلي اول وحدة ، لما دخلت قالتلي اذا لقينا الرحم مو فاتح مارح نشيل الربط رح انزيد اسبوع ثاني ، ولما كشفت علي قالتلي الرحم فاتح2 سانتي وخايفة ليصيرلك تمزق ثاني مشان هيك رح نشيل الربط هلا
بعد ما شالت الربط كشفت ثاني قالتلي هلا صار 3 سانتي رح ابعثك لتحت يحطولك جهاز قياس الطلق ونشوف اذا فيه طلق قوي رح انولدك اليوم
انزلت لتحت وحطولي جهازين واحد جهة البنت والثاني جهة الولد، كان الطلق جهة الولد اقوى لانو البنت كانت نايمة وحركاتها قليلة مو مثل الولد ما شاء الله عليه كان يتحرك كثير
ظلو يراقبوني شي ساعة وبعدها قررتلي ولادة
طلعت لعند زوجي مشان خبرو وطلبت منو يروح على البيت مشان يجيبلي الاغراض
وقع اوراق دخولي وراح
وانا نازلة على غرفة الولادة اتصلت فيني ماما رديت و سالتني اذا شلت الربط والا لسا ، قلتلها لساتني عم استنى دوري لانو فيه ناس كثير قبلي و لما كمل رح اتصل فيك انا, لا تتصلي ثاني
ما حبيت خبرها اني رح اولد مشان ما تقلق كثير
لما دخلت على غرفة الولادة بلشو يحضرو فيني لبسوني مئزر وحطولي سيروم وركبولي اجهزة قياس الطلق ثاني
وبعدها دخل دكتور التخذير ، الحمدلله اني بقيت حاطة خماري على راسي والدكتورة كانت مغطيتني مليح
قالي انا جيت مشان ابرة الظهر، قلتلها للدكتورة بس انا قلتلك ما بدي اعملها ، قالتلي لا تخافي ما رح يصير عليك شئ وبعدين لاتنسي انو معك توام يعني رح تساعدنا كثير
انا من قبل كانت الدكتورة اعطتني تحاليل مشان ابرة الظهر قلتلها ما رح اعملها قالتي اعملي التحاليل وبعدين انشوف ، انا وقتها صليت استخارة وفوضت امري لله ، وقدر الله وعملتها من غير ما طلبت بس الحمد لله فادتني كثير ورح تشوفو ليش
بعد ما عملي الابرة طلع, وتركتني دكتورتي مع القابلة والممرضة وراحت تعاين مرضاها، وكانت تجي تشوفني مرة على مرة
اتصلت باختي ، هي مو متزوجة يعني مع ماما، وقلتلها اني رح اولد بس لاتخبري حدا مشان ما يقلقو ،كان وقت الظهر طلبت منها تدعيلي بالصلاة ، وبعدها اتصلت بام نهال وخبرتها وطلبت منها تخبر العضوات بالمنتدى وتطلب منهم الدعاء
بقيت اقرا قران وادعي الله وكثرت من الاستغفار وقول ﻻ حول ولا قوة الا بالله
جات الدكتورة وشافت الطلق زاد عندي والرحم صار 10 سانتي هذا بعد ما حطولي ابر بالسيروم ، قالتلهم خلاص جهزولي كلشي رح ولدها ، وكان زوجي كمان جابلي الاغراض
صارت تراقب الطلق ولما يقوى تقولي يالله ادفعي وانا عم ادفع بكل قوة ولما يخف تقولي خلاص وقفي ضليت على هاذي الحالة وشي خمس مرات لطلعت البنت لانهم كانو الاثنين بروسهم وحابين يطلعو مشان هيك طولت شوي لطلعت البنوتة ، حطتها على بطني وقطعت الحبل السري وهي عم تصرخ فرحت فيها كثيييير
بعدها قالتلي ارتاحي شوي ، ولما زاد الطلق قالتلي ادفعي ، بديت ادفع حتى سمعتها تصرخ وتقولي
وقفي لاتدفي ، وتغير لون وجهها
وصارت تتمتم مع القابلة والممرضة وانا خفت كثير ، وبعدين فهمت انو الحبل السري ملفوف على عنق الولد،صرت ادعي ربي انو يسلكنا انا وابني على خير وصرت قول لاحول ولا قوة الا بالله كثير ، والدكتورة متوترة وعم تشوف كيف رح اطالعو ، وانا خايفة ليصير للولد شئ او ياخذوني اكمل قيصري
وبعدها الله هداها للدكتورة وركزت ولقت طريقة ،دخلت ايدها في رحمي لين المرفق وصارت تمسك الولد من رجله وتدور فيه لحتى طلعته من رجليه ، قلتلها ما بكى ، قالتلي لاتخافي رح يبكي مسحتلو وجهه وبكى ، افرحت كثير وحمدت الله وكمان الدكتورة فرحت ورجع وجهها طبيعي وصارت تحضني وتقولي مبروك مدام ، قالتلي اياها شي 20 مرة
اتصلت بزوجي وخبرته اني خلص ولدت فرح كثيييييييير وصاريتصل باهله ،لما قطعت المكالمة مع زوجي اتصلت اختي اللي متزوجة ، لما شفت رقمها ضنيت انو اختي الصغيرة خبرتها ، قلت ياه هاي ما تنبل بفمها فولة ، رديت سالتني شو خلصتي ، قلتلها ايه ولدت ، صرخت في اذني :شو ولدتي ؟ انا كنت اسالك اذا شلتي الربط ، صح ولدتي ؟ قلتلها ايه ولدت
طلعت مو قايلتلها ههههه
اتصلت باختي الصغرى وخبرتها وهي خبرت امي اتصلت عليا امي وبهدلتني هههه لاني ما قلتلها.
المهم الجميل في الولادة اني عملت ابرة الظهر بفضل الله ، يعني لو كنت احس بالالم ما كنت خليت الدكتورة تدخل ايدها وتنقذ ابني ، الحمد لله اني عملتها
واهم شئ الدكتورة ولدتني من غير غرز يعني ما في خياطة
الفضل كله لله وبعدين لدكتورتي الشطورة
طالعوني على الغرفة واجا زوجي وبايدو باقة ورد كبيرة وكثييييييير حلوة ، وعلى فكرة هاي اول باقة ورد يهديني اياها زوجي بعد 13 سنة زواج ،لانو مومن النوع الرمنسي كان يهديني ذهب وعطور فرنسية بس ورد بنوووووم هههه
تصدقو حسيتها اجمل هدية بحياتي ما بعرف ليش
لما تشكرتو وقلتلو ليش ما كنت تجيبلي ورد من قبل ؟قالي ما كنت بعرف وانت ما قلتيلي انك تحبي الورد اكثر ، قلتلو لو انا طلبته ما كنت رح افرح فيه ، قالي خلاص رح صير جيبلك ورد في كل مناسبة هههه
المهم هذاك اليوم كان اسعد يوم بحياتي وحياة زوجي وفرحتنا بالتوام ربي يحفظهم ما كانت توصف
وهاي قصة ولادتي باجمل توام اسيل و ايهم بالتفصيل الممل اذا عجبتكم قيموني
وما تنسو تدعولي ربي يحفضلي اولادي ويجعلهم من الصالحين
اسفة على الاطالة وشكرا
سلام

>>>>> ردود الأعضـــــــــــــــــــاء على الموضوع <<<<<
==================================


ماشاءالله تبارك الله الله يحفضهم ويحميهم ويخليه لك هما واخوانهم مبروك الف الف الف مبروك والحمدالله على قومتك بالسلامه


__________________________________________________ __________

المشاركة الأصلية كتبت بواسطة جنو القمر
ماشاءالله تبارك الله الله يحفضهم ويحميهم ويخليه لك هما واخوانهم مبروك الف الف الف مبروك والحمدالله على قومتك بالسلامه

الله يسلمك حبيبتي ويبارك فيك ويحفظلك اولادك يا رب
عقبال متقومي بالسلامة وتفرحينا


__________________________________________________ __________

مشاء الله تبارك الله الف الحمدلله ع السلامه
يتربوا بحضنك يااااارب وينك اخذوكي التوائم عنا


__________________________________________________ __________

ما شاءالله تبارك الله يتربوا بعزكم ودلالكم يا رب .....
والحمد لله ع السلامه اختي ....


__________________________________________________ __________

ماشاء الله تبارك الرحمان ولاحول ولا قوة الا بالله

الف الف مبروووك مرة ثانية يا اسوووولة

ويتربوا التوام في عزك

وربي يحفظ لك زوجك واولادك كلهم

وتستاهلي التقييم يا بطة

تحياتي