محيميد وحصيصه تموت ضحك لاتفوتكم ....

عنوان الموضوع : محيميد وحصيصه تموت ضحك لاتفوتكم ....
مقدم من طرف منتديات نساء الجزائر

محيميد وحصيصه تموت ضحك لاتفوتكم ....



هذي قصة
تفقع من الضحك
اذا مااعجبتكم قولوا ترا
عادي ماراح ازعل
: حصيصة و محيميد :.

قبل لا ابدأ ((القصة منقولة))


الأبطال..هم:
محيميد // شاب وسيم أسمراني طويل ودب بس مشكلته طعس
طعس بالعربي للي ما فهموا يعني= بدوي
حصيصة// بنوتة مملوحة نحيفة وطولها متوسط بس مشكلتها تحب المشاكل وثقيلة دم
فهد
أبو حصيصة
أم حصيصة
عبود
سويرة

ونبتدي........بسم الله

:.: الجزء الأول :.:

في يوم من الأيام محيميد غرق لشوشته بحب حصيصة وحصيصة مادرت عنه الولد قعد يراكض وراها من مكان لمكان وكل ما خطبها واحد راح لأبوها وقعد يسب فيه ويقول
يا عمي تراه سربوت تراه... !!! الين ما يرفضونه ..
طبعا كل هذا وحصيصة ماجابت خبر ومرة من المراريت .. كان محيميد مطيح عند بيت عمه
أبو حصيصة بالملحق ولا يطلع منه حتى أبو حصيصة كان بيحط أسمه بدفتر العايلة بس الأحوال رفضوا.
المهم طلعت حصيصهة تودي القهوة لأبوها بالملحق زي كل مغرب وفجأة إلا تشوف واحد منسدح يتفرج عالتلفزيون البنت تروعت وقفت تناظر بدون ماتتحرك .. محيميد فز واقف وقعد يناظر قامت هي من زود الحيا ورمت الصينية باللي فيها .. عاد هو ما درى إلا و الدلة اللي جته طااااااااااااايرة طععععع بجبهته والقهوة حاااااارة بوووووم .. طبعا هو ما عنده مشكلة مقابل إنه شافها نسى كل الألم يا زينها من صقعة عسل على قلبه هي راحت تركض جوا وتنادي أخوها الصغير فهد.
حصيصة// فهيداااااااان.
رد فهد وهو قاعد يلعب بلي ستيشن//نعم وش تبين إنتي؟؟
حصيصة // يا الحمار ليه ماعلمتني إن فيه واحد بالملحق ؟؟
فهد وهو متحمس// يختي ما ينفع!!
حصيصة// وش اللي ما ينفع؟؟
فهد// أنا مختار لاعبين والحين المفروض يصير دوري طلع دور اللاعب الثاني والله ظلم .
حصيصة//كل تبن أنا أسألك وأنت مو لمي!!
فهد//أقول تعالي شجعيني أصرف لك،يا حبك للمشاكل أحس إنك تقربين لكراش!
حصيصة//وش دخل كراش أقول أنطم بس الشرهة مب عليك عاللي يعطيك وجه ويعتبرك رجال أروح أسال عبود أصرف لي ..
حصيصة//عبووووووووووود الحين منهو ذا للي مطيح عندنا بالملحق ؟؟
عبود// أقولك أصصصص خليني أنام نعنبو أبليسك بالعة رادو؟؟
حصيصة// طيب اللي بينام ليش حاط سماعة الجوال بأذنه؟؟ ولا يسمع إذاعة القرآن؟؟
عبود//حصيصة لو سمحتي أطلعي لا أقوم الحين أفقع وجهتس أخليه كباب فاهمه؟؟
حصيصة//طيب أوريك يا عبيدوه.
طلعت حصيصة ضايق صدرها وتفكر بهاللي بالملحق منهو؟؟
شوي إلا وتجي أختها الصغيرة سويرة
سويرة// حصيصة الحقيييي..
حصيصة// وشو؟؟
سويرة// تو رحت للملحق وكان فيه ولد عمي محيميد،وقال لي سلمي لي على حصيصة وقولي لها، ياااااااااا زين القهوة.
بس .. وش يقصد؟! هو دايم يتقهوا عندنا وش معنى _اليوم؟
حصيصة//الحين اللي بالملحق محيميد؟؟
سويرة//إيه إيه دايم يغثني يسألني وش أخبار حصيصة ووش تحب ووش تكره حتى مرة سألني.... ولا تدرين خلاص!!
حصيصة//وجع وش سألتس عنه؟! بسرعة قولي لأمسط ظهرتس بالعقال الحين.
سويرة//مرة سألني قال لي وين حصيصة؟ وقلت له إنتس بالحمام.
حصيصة//يا المليعينة قسم بالله ما أخليتس يا حيوانة وش ذا الصدق الزايد الحين طول عمرتس تطلعين كذبات كبر راس أبوي والحين لازم تصيرين صادزه ؟؟ قسمن بالله خلي أهلي يطلعون من البيت وشوفي وش أسوي بس؟؟
المهم راحت حصيصة لغرفتها وتفتح الإف إم وتلقى أغنية أصالة (أنا أدري أكثر من شهر حاول وحاول ما قدر .. مدري وشو مدري وشو .. قولوا له واصلني خبر )<<< بتعتزل أصالة إذا سمعت أغنيتها بهالشكل
المهم قعدت تفكر معقولة محيميد يحبني؟؟
يوء والله إني خاشة جو أحسبني بفلم هندي أخس يالسعوديين والله يطلع منكم ناس رومنسية<<< غاسلة يدها
المهم نست الموضوع ومرة من المرات وهي جالسة تغسل الحوش ورافعة القميص والسيقان طالعة ويقال لها الحين إغراء جا الأخ محيميد وطبعا يمون ما يحتاج يدق الجرس معه مفتاح على طول دخل!
حصيصة إنهبلت وصرخت يممممممااااااااااااه محيميد عجز يتحرك هو خاق أصلا وهو ما شاف سيقان ويوم شاف السيقان بغا يتشنج عاد تشجعت هنا وقالت ..
حصيصة// إطلع أنت ما تستحي!! البيت فيه حريم و أنت داخل طالع على كيفك ؟؟
ودخلت تركض وصكت الباب حق البيت وراها ..
ويوم وصلت غرفتها وتفتح الشباك إلا محيميد جالس برا عند الباب ومدنق قاعد يفكر ..
هنا البنت الضعيفة رحمته .. قالت في نفسها يا ربي ليش هاوشته يمكنه يحبني وعشان كذا يسوي كذا يووووه والله إني قسيت عليه ..
نزلت من غرفتها تنادي أمها // يمااااااه يماااااااه
أمها// وما إن شاء الله وش تبين يا ملا العمى اللي يفقع عظامتس<<< كل العيلة أخلاقهم تجارية
حصيصة//أبيتس بموضوع ..
أمها// البامية مجهزتها برا عالطاولة والدجاجة شوفيها الحين عالنار بس أنتبهي لها ما بقى عليتس إلا كان أخوانتس يبون سلطة سويها لهم هاه تبين شي ثاني؟؟
حصيصة// لا ما أظن بس هذا اللي أبيه!
جت حصيصة للشغالة وقالت لها نور// الحين ليش أنتي في زواج؟
الشغالة// عشان لازم في يجيب عيال!
حصيصة//طيب ليش أنتي في زواج من هذا النفر اللي أعرستي عليه <<< عز الله فهمت الشغالة خاصة كلمت (أعرستي) خخخخخخخخ
الشغالة//عشان هذا نفر في زواج أنا ..
حصيصة//قسمن بالله ما فهمت شي ..<< (لسا ما وصلت للي تبيه)
طيب إسمعي لو هذا نفر زوج مال إنتي فيه موت إنتي أيش في يسوي؟؟
الشغالة//أنا في زوج واحد ثاني ..
حصيصة//على تبن .. صح نسيت إنتس ما تفهمين وجع قسمن بالله ما فيه أحد رومنسي
حتى إنتي يا ذا الإندونيسية.
طلعت حصيصة من المطبخ وتلقى سويرة بالصالة ..
حصيصة//سويرة قلبي حياتي كلها بسألتس سؤال..
سويرة// قسمن بالله ما أخذت شي من أغراضتس عبود اللي سرق الجل عشان بيروح للإستراحة حقت أخوياه وقال لي لا تعلمين بعد ..
حصيصة// عبووووووود يا حمااااااااار يا قليل الأدب <<<<<<<< نست سالفة محيميد
المهم عدت الأيام ويوم عن يوم حصيصة حبت محيميد وصارت ما تستغني عن طاريه
جا يوم وانخطبت حصيصة ..
__.__.__.__.__.__.__.__.__.__.


راح اكمل القصة بعد الردود

>>>>> ردود الأعضـــــــــــــــــــاء على الموضوع <<<<<
==================================

حمستيني

بليز ابي اعرف وش صااار

قصه حماااس

<<متااابعه

__________________________________________________ __________

ابشري يابعدي راح اكمل

__________________________________________________ __________

:.: الجزء الثاني :.:

أمها // حصيصة يا بعد أمتس أنتي ترا اللي خطبتس رجالن تكانه وعنده فلوس وأمه ميتة يعني ما فيه مشاكل!<<< صارت أخلاق الحين
حصيصة//يمه مو أهم شيء الفلوس!!
أمها//يوووووووه جانا شغل الأفلام و المسلسلات أهم شيء الحب والأخلاق هذا وأنا أمتس إسمه فقر،يعني اللي وجهه وجه فقر يقول أهم شيء الحب والأخلاق، أقول وخري بس الشرهة مو عليتس،أنتي وجهتس وجه فقر وكرف لا تقولين لي أحتري عيال عمي من زينهم عاد أكبر مطفرين بهالديرة،تروحين بكرة تغبرين بعبايتس وتقعدين أنتي وياه تطرون عند الإشارات ..
حصيصة//يمه خلاص هذا أنا ماأبيه وما أنتم غاصبيني عليه وأنا كيفي وترا قسمن بالله لو تغصبوني عليه راس مالها لا أشرب كاس كلوركس ولا أسيد أحسن لي ..
وطلعت حصيصة لغرفتها تصيييييييح ..
وتقول أكيد أبوي بيرفض عشان محيميد وأصلا محيميد أكيد مب ساكت ..
عبود يناديها بصوت عالي //حصووووووووص .. الحصييييييي تعالي أبيك..
حصيصة طمرت إلا وهي بغرفة عبود يمكن عنده سالفة عن محيميد،قال عبود أحلى يا حركتات الحين حصيصة بتزوج؟! لا ما أصدق أنا أحس إنك أنتي المفروض تروحين تخطبينه مب هو خخخخخ
حصيصة//الحين مناديني عشان كذا؟؟
عبود//لا
حصيصة وهي مبسوطة// وش أجل؟!
عبود//قومي سوي لي شاهي مصدع.
حصيصة//كل تبن والله ما أسوي لك أحسب عندك سالفة!
طلعت حصيصة متضايقة وهي طالعة الدرج نادتها سويرة..
وقالت //حصيصة دريتي عن ولد عمي محيميد ؟؟
حصيصة// لا وش فيه ؟
سويرة// يقولون إنه منوم بالمستشفى!
حصيصة// ليش؟؟ وش فييييييييييييييييه وش صاير له؟؟
سويرة//مدري بس يمكن أكل شاورما منتهية ؟؟
حصيصة//طععععع صكت سويرة على دمجتها وقالت:أقول أنطمي بس مسوية ذكية وخري عني بس.
سويرة // لا لا والله بصراحة أنا أدري وش السالفة وبأقولتس بس بشرط!
حصيصة//بشرط؟! إيه طيب تعالي.
سويرة//وش تبين وش بتسوين لحظة .. لحظة حصوصة لا حصيصة آآآه .. حصيصة وشو؟؟
أأأأأأأأأأأأأأأأأأأأأأأآآآآآآآآآآآآآآآآآآآآآآآآآآآ ي خلاص قسمن بالله بأتكلم ما أبي شيء خلاص.
حصيصة//إيه هذا الكلام السنع ما تجون أنتم إلا بالعين الحمرا يلاااا أخلصي وش السالفة؟
سويرة// أنا كنت جالسة أمس بالمجلس عند الرجال وسمعتهم يقولون إن محيميد تهاوش مع واحد وفلقه ومحيميد الحين بالتوقيف والثاني بالمستشفى ..
حصيصة//وانتي تو تقولين إن محيميد بالمستشفى ؟؟
سويرة//ايه أنا يوم كنت أكلمتس قبل شوي كان بالمستشفى بس الحين ودوه للتوقيف!
حصيصة// ما شاء الله وانتي الحين مرسلة إذنتس هناك تجيب الأخبار أول بأول أقول وخري لا أمحط وجهتس الحين أخليه تقل طماطة منفقعة من الحر..
مرت الأيام وانحاش طبعا العريس الجديد .. وجا يوم المنى يوم الخطبه ..
محيميد كاشخ وجالس عند أبو حصيصة .. مستحي ..
حصيصة تناظر مع شباك غرفتها فوق تطل عليهم وتقول يا رب أبوي يوافق يا ربي تكفى خل أبوي يوافق..
في مجلس الرجال ..
محيميد وهو مستحي // شف يا عمي أنا بأجيبها لك من الآخر أنا رجالن ما ألف وأدور أنا أبي حصيصة بنتك .. تبي تزوجني إياها الله إنه مير يسلمك وإن كانك بتعيي قسمن بالله
لأخطفها وما تشوفونها ولا لأفجر بيتكم عليكم وعليها <<< أخس يالأسلوب
أبو حصيصة//والله شف أنا بأشاور البنت وأمها وأرد لك خبر إن شاء الله وحنا ما حنا لاقين
أحسن منك وخبرك عاد المتعوس ماله إلا خايب الرجا <<< يعرف يذب
محيميد من كثر ما هو مدنق من الحيا غط شماغه بالفنجال حق القهوة.
عبود//أقول محيميد سمعت إنهم يمدحون القهوة على الشماغ المكوي يقولون أزين من النشاء!
محيميد// يوه ما انتبهت ..
أبو حصيصة//عبود قم صب لنسيبك فنجال.
عبود//أخس يا النسيب أمس يتتن ويعسل بالقهوة مع الشباب ويلعب بلوت واليوم صار نسيب محترم!! يا نسيب الفلس والله خلني أسكت بس خلوا الطابق مستور.
محيميد//لعنة يا الخايس قسمن بالله لو تقول لعمي شي لأوريك،على الأقل أنا أوسع صدري بس بحدود مب أربع وعشرين ساعة مطيح بالبحرين والمغرب بغوا يحطونك سفير هناك!!
عبود// هاها ضحكتاااني أجل سفير !! طيب منهو اللي أول مرة سافر فيها للبنان رقم المضيفة اللي بالطيارة يحسبه وصل للبنان وهو توه بطيارة الخطوط الجوية السعودية <<< من زين الوجه أول مرة يركب طيارة بعد..
محيميد//عبود ترا عمي بيسمعك قسمن بالله لأصكك بالدلة الحين بعدين أنا عطيتها الرقم عشان لو احتجنا شي نناديها تجيبه ماقصدت شي!
عبود//طيب ومنهو اللي أول ما ركب دش ديجيتال راح حط عليه شبوك تقل شبوك غنم من الفرحة خايف لاأحد يسرقه .. يا شين القراوى بس ما ودك إنهم يتطورون!
محيميد//عبييييدوه الدش كنت حاطه عشان قناة المجد!
عبود // إييييييييييييه قناة المجد أجل كل يوم تسمع نشيد يا مكة ..
طيب ورا قناة المجد خربت صارت تجيب حريم يرقصون ولا تقول لي بعد فيه أحد مهكر عالقناة
<<< أنواع التضيييييع
محيميد// عبود شف تراني ساكت لكن والله لو وصلت معي لا أقول لأبوك إن السماعة اللي بإذنك هذي سماعة بلوتوث مب الضعيف لاعب عليه قايل له إنها تقوي السمع تلقاه بكرة رايح شاري درزن وموزعها على شياب الحارة <<< بيدشرون على آخر أعمارهم
وترا ما نسيت العام يوم إنك تسافر لفرنسا وتقول لأبوك بأروح الشرقية والضعيف كل يوم
فاتح فعاليات الصيف يحتري يشوفك بأحد هالمنتزهات على نياته يا ويلي عنه بس ..
لو داري قايل له يروح دزني يشوف البلاوي اللي مهببها هناك الله لا يفضحنا أجل مسوين لكم عرض وش حلاته وأنت طايح قززززززززززز بالرايحة والجاية حتى بغيت ترقم سواق التاكسي اللي وداكم هناك نعنبو ابليسك مافرقت بين رجالهم وحريمهم هععععععععع
عبود// إيه طيب مقهور لأنك ما قدرت تروح فرنسا إنت حدك شقرا وضرما والمذنب خل عنك فرنسا إنت لو تروح هناك إن يحسبونك من المحاربين المغبرين اللي عام 1900 ناسينك عقب فلم <<<<<<<< أخس يالتفكير وين ديجي م ستار عنك بس خخخخخخخخخخخخخخخ
محيميد// هع مسوي نكوتي !! يوووه كرشي بتنفقع من الضحك.. أجل إنت ناسينك عقب طاش ما طاش ولا عقب عيلة خمس نجوم هعععععع
عبود// لا عقب فلونة ولا كابتن ماجد هعين
محيميد// لا عقب ماوكلي ثلاث هعات
ابو حصيصة//أنتم وش بلاكم يلااا أخلص إنت وياه أشربوا قهوتكم نبي نتوكل عندنا شغل!
محيميد وهو ماد فنجاله على عبود // صب لي فنجال..
عبود// ترا ما صارت إنت ووجهك وجه العنز نعنبو ابليسك عشر فناجيل قهوة ما شبعت
مركب ببراطمك عوازل إنت ؟؟
_على الأقل حس بالحرارة مب تشفط تقل تشرب عصير هبوووو ياوجهه الملتوي ..
أبو حصيصة راح يكلم حصيصة وأمها ..
وافقوا وجا يوم النظرة الشرعية..
محيميد جالس بالمجلس ويناظر للباب يبي يشوف كل شي ما يبي يفوته شي منها
حصيصة واقفة ورا الباب ترجف تقول لامها يمه مستحية وش أسوي وش أقول؟؟!!
أم حصيصة//كولي تبن ما تكلمين ولا تقولين شي ولاتعطينه وجه حطي قدامه العصير مب تمدينه عليه حطيه على الطاولة واطلعي على طول مب تخلينه يتمقل فيتس فاهمه؟؟
ما أبيه يشوف تقويمتس نعنبو ذالخشة لتس ثلاث سنين حاطته ما تعدلت سنونتس كل واحد بجهه تقل متفجرة فيهن قنبلة نووية الظاهر بأقول للدكتور المرة الجاية يحط بالتقويم مغناطيس عشان يتلاصقن!
حصيصة//طيب وإذا قال لي إقعدي بأسولف ؟؟
أم حصيصة// مب قايل هو من يشوف خشتس مب قايل إنثبري أخاف هو يقرط بثوبه وينحاش<<<أنوااااااع التحطيم
المهم حصيصة مترددة يا ربي تدخل ؟؟ لا تعدل شعرها شوي وتجر الخصلة على جبهتها
عشان تصير جبهتها صغيرة .. وتلتفت يمه راح الروج ؟
أم حصيصة// ما راح إنتي ووجهتس تقل فاركة براطمتس بزفلت إخلصي بس أدخلي ..
حصيصة//طيب طيب بأدخل بس لحظة ..
هنا أمها دفتها دفة مب صاحية يقال لها بتكسر حاجز الخوف والحيا .. البنت طاااااااااع على وجهها قدام محيميد والعصير أنكب على ملابسها .. وعلى الأرض ..
محيميد أنصدم قاعد ساعة يناظر من بيطلع له من ورا الباب إلا وفجأة وحدة منسدحة قدام الباب على خشتها ..
حصيصة قامت ركض ودخلت جوا وأنواع الصياح ..
__.__.__.__.__.__.__.__.__.__.__.__.__.__.__

راح اكمل القصة بعد الردود

__________________________________________________ __________

روعة يعطيك العافية خيتو

__________________________________________________ __________

حراااااااااام عليك

بليززز قلبووووو كمليها

<<< انواع الحماس