ماتلاحظون قاعدين نتنازل عن قيمنا بالتدريج ... لوين بنوصل ؟؟؟
عنوان الموضوع : ماتلاحظون قاعدين نتنازل عن قيمنا بالتدريج ... لوين بنوصل ؟؟؟
مقدم من طرف منتديات نساء الجزائر
ماتلاحظون قاعدين نتنازل عن قيمنا بالتدريج ... لوين بنوصل ؟؟؟
https://uploads.sedty.com/imagehosting/1_1402432992.gif
ماتلاحظون قاعدين نتنازل عن قيمنا بالتدريج ... لوين بنوصل ؟؟؟
السلام عليكم ورحمة الله وبركاته
من زمان وأنا أفكر بكتابه عن هالقضيه اللي دايم تشغلني ... واليوم بالذات قررت اكتب عنها بسبب هالموقف ..
أمس كنت طالعه لمطعم ...عادي ... عوايل وازعاج وبزران تعرفون يعني ...
لفت انتباهي بنات بين الـ10 - 15 سنه .. متزبرقين نوعا ما .. عباياتهم ع الكتف وبدون طرح مع أن بعضهم كانت بارزه فيها معالم الأنوثه ... كانت معهم حرمه كبيره .. حقيقة أنا ماشفتها لكن اللي معي شافوها ...
كان واضح انهم مدهرين ومشغولين وأصواتهم طالعه شوي ... يمكن لأنها كانوا قريبين مننا مدري ...
شوي الا صوت (( تششششششش)) ... تصفيق حااار ... صراخ .. هابي بيرثدي تو يو ... ألخ
الزبده كان عيد ميلاد ... الذي تم تحريفه مؤخرا وصار يوم ميلاد ... فرقت يعني خخخخخ
من متى حنا نحتفل بأعياد الميلاد ؟؟ ...
ليش حنا نتقبل أي ثقافه غريبه علينا وممكن نتلهف عليها بعد ..
صايرين زي الأسفنجه نمتص كل شي لين ماقربت هالأسفنجه تصير سودا ...
هذا غير عيد الأم ... عيد زواجنا ... كريسماس .. عيد الحب ...
اللي قهرني بالسالفه أنو كان معهم وحده كبيره .. يعني أكيد بمباركه منها ...
هذولي بزران انتي تطاوعينهم ليش ؟؟؟
.
.
خلو الأعياد ... يمكن أنا كئيبه وماحب استانس
مظاهرنا ... للأسف أمهاتنا يربونا على شي ولما نكبر نشوف العالم شي ثااااني ..
وبالغصب نبي نصير مثله ... وما أستثني نفسي من هالشي الله يعفو عنا أجمعين
ملابسنا صارت تشمر سنه بعد سنه ... اغلب اللي نبطي عنهم ونشوفهم في اجتماع القى ثوبها اقصر من اللي قبل >> وبرضو ما استثني نفسي .. واتمنى من كل قلبي ارجع مثل ماكنت والبس الطويل والساتر بكل فخر واعتزاز
واللي عبايتها كانت واسعه مثل أمهاتنا ... بعدين صارت بكم ... بعدين كتف ... بعدين صارت أطرافها ملونه ..
وربي الحين اذا رحت السوق افرح اذا شفت متسترات احس بالأنتماء ..
والله صرت اخاف على نفسي وأخاف يجي يوم وا اتنازل عنها >> يارب تثبتنا يارب
وعلى طاري العبايات ... يرحم زمان أول يوم كان مايجي خامس سادس ابتدائي الا البنت متغطيه وويين تحس نفسها كبيره اذا لبستها ..
أما الحين الوحده توصل المتوسط وهي ماتتغطى ... واذا جاء الثانوي لبسوها نقاب على عبايتها
وحجة أمها >> بنتي توها صغيره ... تنتظرينها تشيب مثلا !!
.
.
التلفزيون ...
ماراح أقول مالي أهتمام فيه ... لكنه محدود جدا ... أول كنت أتابع حت التشويش خخخخ ... لكن الحين النت اخذ وقتي ... واحاول اشغل نفسي عنه .. وانا ما اقصد التلفزيون عموما اقصد المسلسلات والبرامج التافهه ...
اللي اخذت من وقتنا الكثيييير للأسف .. تدخين على ناس برمضان ماشفتيهم بتباركين لهم بالشهر ...
مالك مجال تسولفين ... شفتي البرنامج الفلاني؟؟ شفتي المسلسل الفلاني ؟؟ .. بنات اسمعوا هالبرودكاست اللي وصلني عن برنامج فلانه ... شفتوها وش لابسه !!!
وتجيك وحده من أقصاها ملهوفه .. بنات وش صار على فلانه فاتني المسلسل
وينقلب المجلس الا تلفزيون وحش بخلق الله اللي بالتلفزيون ...
طيب ممكن أنا أشوف بس ليش اقعد اسوي دعايه واتحمل ذنوب خلق الله ... الواحد يالله يتحمل ذنوبه..
.
.
.
ساعات أقول ليش انا سطحيه وأركز بس ع المظاهر .. فلانه صح عبايتها كتف بس دايم ماشاء الله اشوفها تستغفر ماتخلي الأستغفار ... فلانه تلبس قصير بس تراها داخله دار تحفيظ ... فلانه على كثر ماتسولف عن التلفزيون بس لبسها ساتر وعبايتها ساتره ... الأيمان بالقلب مو بالمظهر
طيب مظاهرنا جزء من عبادتنا وطاعتنا لربنا ... أجل ليش ليش نلبس جلال أو شرشف ساتر اذا جينا نصلي
ليش مانصلي بلبسنا عادي كلها صلاة والأيمان بالقلب ..
.
.
لوين حنا بنوصل ...
لما أجلس اتأمل الصغار يكسرون خاطري ... كيف بنثبت فيهم قيم الأسلام الصحيح واللي حولهم كله غلط ...
كيف نقول للبنت عباية الراس احسن .. وكل اللي حولها عباياتهم اشكال وموديلات ..
يعني حنا بوقتنا كانت هالمظاهر شاذه .. بس هم بتصير هالمظاهر اعتياديه جدا واللي نطلبه منهم هو المستحيل والشاذ ..
كيف الأم والأب يعودن عيالهم على سماع الأغاني وبعدين يقولون لهم هذا حرام ؟..
كيف يدخلون البنت دار تحفيظ وترجع البيت تتابع برنامج لتعليم الرقص الشرقي ؟..
كيف من الأمهات خصوصا الأمهات الجدد تبي تربي عيالها تربيه نيو لوك ... تبي تدخلهم مدارس اجنبيه ... وتحتفل معهم كل سنه بأعياد ميلادهم .. ماتبي يطالعون برامج القنوات العربيه لااااا ... تبي تربيهم تربيه أجنبيه تبيهم أذكياء مثل عيال الأجانب .. بما أن الأعلام العربي اثبت فشله بهالجانب ...
.
.
يبي لنا نوقف شوي ونتأمل اللي حولنا ونعيد النظر بمظاهرنا وتصرفاتنا .. اعتقد اننا قاعدين نستغرق بمقولة الأيمان بالقلب وبنوصل لدرجة لايمكن وصفها ...
.
.
وبالنهايه أحب احيي كل مجتمع نبذ هالمظاهر عنه ومازالت شي شاذ وغير مقبول بالنسبه له >> لأن صلاح الفرد من صلاح المجتمع اللي يعيش فيه ..
أما بالنسبه اللي تجاهد بكل قواها وتمشي عكس التيار وتنبذ هالمظاهر وهي بوسط مجتمع مستغرق بهالمظاهر الصراحه هذي تستاهل بوسه ع الراس .. لأنها فعلا ي جهاد واللي يعينها ويثبتها ..
والله يهدينا أجمعين لكل مافيه خير وصلاح لنا ولمجتمعنا ولأجيالنا القادمه ..
قولوا امين
__________________
اللهم استرني فوق الارض وتحت الارض ويوم العرضhttps://said.xplainer.net/images/smi...7-yds6b3uo.gif
ان لم يكن لك في الدنيا صدقه جاريه فلا تجعل لك ذنب جاريhttps://said.xplainer.net/images/smilies/rose.gif
>>>>> ردود الأعضـــــــــــــــــــاء على الموضوع <<<<<
==================================
يسلمو ياعسل
__________________________________________________ __________
الله يجزاك الف خير فعلا الامر خطير ويخوف خاصتا لبس النساء
وكل وحده اذا البست اقصر واعرى من زميلتها تحس انها مررررررررره كيوت الله يخلف بس وصايرين اغلب النساء الا من رحم ربي على قولت مع الخيل ياشقراء ههههههههههههه الله يسترنا ويحفظ بناتنا وبنات المسلمين الله لايبلانا
__________________________________________________ __________
https://forum.sedty.com/imagehosting...1295348713.jpg
__________________________________________________ __________
__________________________________________________ __________
