ام تغير أسلوبها مع بنتها بالتربية والنتيجة -للأطفال

عنوان الموضوع : ام تغير أسلوبها مع بنتها بالتربية والنتيجة -للأطفال
مقدم من طرف منتديات نساء الجزائر

ام تغير أسلوبها مع بنتها بالتربية والنتيجة



https://uploads.sedty.com/imagehosti...1393702164.jpg






تعالوا شوفوا تجربتى مع بنتى بعد ما غيرت أسلوب معاملتها



السلام عليكم يا بنات



يارب تكونوا ف أحسن حال




انا جاية النهارده علشان اقولكم تجربتى مع بنوتى ربنا



يحفظها ويخليها لى يارب





هى عندها سنة وعشر شهور تقريبا دلوقتى .. طبعا اول ما



كملت السنة زاد الزن جدااااا ما كنتش بستحمله وبقيت يا




إما اعند معاها يا إما اديها اللى هى عاوزاه وخلاص



علشان أريح دماغى وأخلص من الوش .. و كانت



فظيعة كل حاجة تشبط فيها وتصمم عليها بطريقة غريبة ..



طبعا انا ما كنتش بتعامل بهدوء وكنت بزعق لها علشان



تفهم ان ده غلط وكتير كنت بتعصب عليها زى ما معظم



الناس بتعمل تقريبا مع ولادها للأسف



لحد ما لقيتها بقت تقلدنى ف كل حاجة وما تسمعش الكلام



و ازعق لها تزعق لى هههههههه وأقولها ده غلط عيييب




تقولى إييييييب هلط .. وبرضو مش بتسمع الكلام فقلت



مش نافع النظام ده



طبعا لان محدش غيرى بيعلمها فبقت نسخة منى



اللى زاد وغطى بقى انها بقت لو متضايقة منى ممكن



تخربشنى أو تقرصنى .. طبعا كنت متنزفزة جدا وقلت انا



اللى استاهل طبعا من عصبيتى هى بقت كدة مع انى عمرى



ما ضربتها ولا طبعا قرصتها ولا حاجة بس ده رد فعل



طبيعى منها



المهم قررت انى إتغير معاها تمااااااامااااا واصبر جدا



عليها علشان أبطلها العصبية دى وأتعامل معاها



بهدووووووووء وم الاخر ما أطلعش عصبيتى عليها ..



ففكرت بالراحة وقلت هو إية اللى بيخلينى اتنرفز عليها



غير زنها مثلا او إنها بتشبط فى كل حاجة أو بتعمل حاجة



تضر نفسها




لقيت إن المشكلة عندى أنا كمان لإنى ببقى متوترة من



المسئوليات اللى وراى فى شغل البيت وعاوزة أهم حاجة



أخلصها من غير ما هى تعطلنى فطبعا شيلت كل الحاجات



اللى بخاف عليها منها زى الماكياجات والفازات والكماليات



كلها .. و بدأت واحدة واحدة أشركها معايا وبلاقيها



مبسوطة وانا كمان طبعا ببقى عاوزاها مبسوطة وف نفس



الوقت أخلص اللى وراى والبيت يبقى نضيف



فمثلا مرة وهى صغيرة كانت لسة بادئة تمشي أول مرة



تقريبا وقعت حاجة ع الارض انا اتضايقت جدا .. بس



فهمتها بالراحة ما اتنرفزتش عليها يومها خالص علشان



تتعلم قلت لها ينفع كدة يا رورو ؟؟؟ نرمى كخ كدة ع



الارض .. يععع ... وحش وحش يلا هاتى فرشة وجاروف



ننضفها




طبعا رورو جريت ع المطبخ وقعدت كإنها بتلم يعنى



وتنضف معايا .. قلت لها ما نوقعش تانى علشان الكخ



وحش



من بعد الموقف ده بقت تلقائي أو حصل موقف شبيه



تجرى بسرعة تجيب الفرشة و الجاروف علشان تنضف ..



انا طبعا ببقى فخورة بيها .





وفى حاجات تانية برضو كانت بتعصبنى كل شوية زى



تغيير البامبرز ولبس الهدوم ما بتحبش تغير هدومها غير



بالعافية والبامبرز كذلك فكان ليل نهار نرفزة .. ده غير



بقى شعرها مش بترضى خالص تخلينى أنا بالذات أسرح



لها إنما إخواتى أو أى حد غريب توافق وطبعا معظم الوقت



اسرح لها بالعافية تقوم شايلة التوكة .. قمت واحدة واحدة



أقولها تعالى يا رودى نبص فى المراية تسرحى لماما ..



وبصى انا بسرح إزاى وانتى كمان بصى منكوشة وحشة



ازاى تعالى اسرحلك وأحط لك كريم .. عجبها أوى موضوع



المراية و الكريم بقيت أسرح لها وأقعد أضحك معاها أقولها



شايفة القمر .. شايفة شعرك متسرح وجميل الله حلو اوى




أما البامبرز بقى فكنت بتبع أسلوب تانى هو لوى الدراع



بس نفع معاها .. أقولها هدخل الحمام وأقفل الباب على



نفسي لو ما لبستيش .. طبعا بتيجى جرى تغير علشان ما



أسيبهاش .. أنا قريت إن الموضوع ده المفروض ما



نعاملش بيه الاطفال قبل السنتين بس هو تخويف بس مش



أكتر وطبعا لو قفلت على نفسي بفتح على طول علشان أنفذ



كلمتى تفهم إن ده ضرورى وبيزعل ماما و بابا .



شغل البيت بقى بقيت أعمله معاها واحدة واحدة يعنى مثلا



ما كنتش بعرف أطبخ ولا أغسل مواعين نهااااااااائي وهى



صاحية تقعد تزن ولازم أشيلها فبقيت أفتح لها المطبخ



وتطلع البلاستيكات وأقعد أكلمها وأنا بشتغل أقولها طلعتى



الطبق يا رورو .. عاوزة المعلقة والشوكة ؟؟ واقعد أديها



حاجات خشب أو بلاستيك لحد ما أخلص .. لإن طبعا إهمال



الطفل بيخلية يزهق ويزن ع الفاضى والمليان




وأحسن حاجة أحسن حاجة إننا نصحى بدرى شوية قبل



ولادنا نخلص الحاجة اللى ما بنعرفش نعملها منهم يعنى



نرتب الاولويات ونفوق لهم أما يصحوا مش يادوب نقوم



متكركبين و نخلص شغل البيت بالعافية وبزهق وكمان



نتوتر ونوتر ولادنا معانا



حتى لو مش ورانا شغل كتير بجد صدقونى اليوم بيفرق



جدا والنفسية بتختلف وبنلاقى وقت نلعب معاهم و نجهز



كل حاجة .. ندخل نت براحتنا



وكل فترة للتانية نلعب معاهم حتى لو مش قادرين اانا



شخصيا ماليش تقل خالص على لعب الأطفال بس بحاول



أجيب لها المكعبات وأعلمها تعمل أشكال و أشجعها جدا



وأقعد أصورها ع الموبايل وأوريها أقولها رورو



شطووووورة عملت حاجات جمييييييييييلة




وأقل حاجة بتفرحهم فى ألعاب سهلة مش بتحتاج مجهود



زى مثلا فتحى يا وردة .. أو لعبة البيضة واللى أكلها هم



هم هم .. بجد بتبسطهم أوى .



وحاجة مهمة جدا لازم نعلمها لولادنا أسلوب كلامهم لإنهم



بيقلدونا ف كل حاجة يعنى أنا ملاحظة بنتى نسخة طبق



الاصل منى فى طريقة الكلام فلازم نعلمها الصح من



صغرها علشان نغرس جواها طريقة التعامل بذوق مع



الناس ومعانا إحنا كمان .. يعنى مثلا تقول إتفضلى ..



شكرا .. لو سمحتى




يعنى انا بنتى كانت كل شوية تقولى ماما هودى يعنى



خدى .. بقيت أقولها اتفضلى قولى إتفضلى تقولى هضلى ..



وواحدة واحدة هتستجيب بإذن الله .




وكمان لازم ندلعهم برضو و نعمل لهم اللى هما عاوزينة



طالما حاجة مش هتضرنا يعنى نحكيلهم حدوتة حلوة أو



نغنى لهم أغنية كل ده بيحسسهم بإهتمام وحب



لازم إننا نحترم ولادنا وننصت ليهم كويس جدا ونسمعهم



بيقولوا اية علشان نعودهم يصاحبونا ويحكوا لنا كل حاجة



أما يكبروا .



طبعا موضوع التربية ده صعب جداااااااا جداااااااا وناا



عمرى ما تخيلت انه صعب كدة إلا لما جربت وبقيت أعذر



الناس اللى ولادهم مش بيسمعوا الكلام واللى بيعندوا و



شايفاه فى عناد بنتى أوى بس ربنا يقدرنا كلنا ونحاول



نعلمهم الصح ونقوم سلوكهم ..



وربنا يهدينا ويصلح حال أولادنا


يارب الموضوع يعجبكم وتستفيدوا منه ولو بحاجة بسيطة

الموضوع منقول للإفادة

اوى.. ياريت كمان لو عندكم حلول لمشاكل الأطفال فى السن ده نبادل خبراتنا

>>>>> ردود الأعضـــــــــــــــــــاء على الموضوع <<<<<
==================================

صح الكلام
هاد الطريقة الانسب للتعامل مع الاطفال
وتربيتهم ونغرس فيهم اخلاق حلوة وحميدة
مو بالعصبية والضرب والنرفزة

انا مابحب هيك تعامل الى بيعملوها بعض الاباء والامهات
احيانا لما بشوف اي وحده بتخانق عيالها بدي اكلها اكل ههههه
اموت فى الاطفال وما احب هيك تعامل يعاملوهم
الله يهديهم
مشكوورة

__________________________________________________ __________

الله الله يا ام مروان

من اجمل ما قرات اليوم حبيبتي

اعشق جدا المواضيع التي تنبع من خبره الام في كلام سلس و بسيط و نصائح سهل ان كل ام تعملها مع بنتها و ايضا نصائح واضحه ممزوجه بالامثله

موضوع رائع للغايه يستحق وسام الموضوع المميز + النجوم

جزاك الله الخير كله و في انتظار المزيد من مواضيعك الهادفه و التميزه

__________________________________________________ __________

موضوع مهم جدا ويارب يقدرنا ونمسك نفسنا وما نعصب

جزاك الله خيرا

__________________________________________________ __________

يسلم ايدك موضوع حلو ومميز ...

__________________________________________________ __________

السلام عليكم اختي
بجد بجد طرح حلو و جميل و مبسط للفهم
يعني حلو ان الطرح كانه رسالة من ام او مجرد حكي منها
رااائعة