قصة حب واحد أردني -قصة قصيرة

عنوان الموضوع : قصة حب واحد أردني -قصة قصيرة
مقدم من طرف منتديات نساء الجزائر

قصة حب واحد أردني


https://uploads.sedty.com/imagehosting/1_1402432992.gif



قصة حب واحد أردني :icon108:
***********
هذ أنا جتني مكالمة بالليل ..كنت نايم و بعالم الأحلام هايم..ما بعرف في شو كنت بحلم..
كان الجو بارد ..و كنت متغطي و شارد..و فجأة رن التلفون .. و علىسيرة التلفون أبوي مش مقصر..
مش مخلّي إلا ثلاث أرقام الواحد و التسعة و الثمانية..يعني ما بتقدر تحكي إلا مع الشرطة و الدفاع المدني..
المهم أنا رفعت السماعة و قلت نعم و إلا جاني هذاك الصوت..صوت ما توقعته و لا في خيالي تخيلته..
صوت بنت بتقول ألو..و اخوكم طريخم إذا سمع صوت بنت بطنو يوجعه..
أنا عاد ما عرفت إيش أحكي ..و رديت و قلت ألووو و سألتني مين معي ؟؟قلت من اللخمة معكي أنا !!!
و بلشت تضحك..و بعدين سألتني سوسو موجودة ؟؟قلتلها ما بينفع حوحو ؟؟؟
قالت مين حوحو؟؟؟قلت هذا اسم الدلع تبع الحمار يلي هو أنا..و ضحكت مرة تانية..
و قالت شكلي غلطانة ..طيب أنا آسفة..قلتلها لا عادي..و سكرت السماعة....
تصدقوا؟؟؟؟
مش عارف شو صار فيي ..حسيت بقشعريرة في جسمي و صار نفسي أنبطح على العشبات و أكتب قصيدة غزلية..
لا يكون هذا هو الحب يلي الناس بتحكي عنه!!!يلعن أبو الحب...
ما هي القصة إنو أنا مش متعود على البنات لأنو ما شاء الله بيتنا فيه اربطعش زلمة اللي هما أنا و أخواني و ابوي..
يعني انا و أخواني مش متعودين عالبنات..و هذا يلي سبب عندنا عقدة تسمى العقدة الطريخمية..
المهم ..قررت أكسر هاي العقدة ..بس في مشكلة وحدة هي إني ما عندي أسلوب ..
ما لقيت قدامي غير شب صاحبي اسمه عبود ..و عبود بتنطبق عليه غنية كل البنات بتحبك...
أخذت مفتاح السيارة و رحت لعند عبود ..شرحتله وضعي في الحياة و حكيتلو عن رغبتي في فك عقدتي قبل ما أموت..
قال لي عبود:الموضوع بسيط إذا أعجبت ببنت حسسها إنها أحسن وحدة في العالم..
قلتله يعني كيف؟؟ أقلها غنتي احسن من رونالدينو ؟؟؟؟
راح رد علي عبود و هو معصب و لك إنت تور ....شو دخل رونالدينو يا غبي!!!!
أنا قصدي غنك تحسسها بأنوثتها..و إنو مافي بنت في العالم غيرها ..
قلتله:برضه ما فهمت بدك ياني أذبح كل البنات في العالم و أخليها لوحدها !!!
عبود بلّش يلطم و قال لي:شوف إنت حمار و ما رح تفهم إلا بالدروس العملية..
و فجأة طلّع موبايلو و ضرب رقم و حكالي شوفكيف رح أحكي معها و تعلم..قلت له طيب..
شكلها ردت عليه و بلش هو يحكي..بحبك و بموت فيكي..
أنا بدونك مثل التلفون بدون حرارة..مثل السواق بدون سيارة..أنا البنزين و إنتي الشرارة..
أنا الشعاع و إنتي الإنارة..أنا الرومنسية و إنتي الإثارة..أنا مبنى التجارة العالمي و إنتي الطيارة..
الصراحة أنا حسيت بدي أضمه و أبوسه لما سمعت كلامه ..كيف هي عاد ؟؟؟
المهم أنه خلص المكالمةو صار يتطلع علي و حكالي:
يله دورك بعطيك رقم بنت و بتحكي معاها..و احكيلها نفس الحكي اللي سمعته قبل شوي..
بعدين راح عبود ضرب رقم و عطاني الموبايل عشان أحكي معاها ..رحت حكيت:
ألووو و لحظة ما سمعت صوتها ضاعت دروسي و نسيت كل الكلام و قلت لها بابا فين!!!
و ما حسيت إلا بجزمة عبود على وجهي...و همسلي:قول نفس الكلام اللي قلته أنا يا تور..
رحت قلتلها كيفك حياتي؟كيفك عمري؟ردت علي و قالت:طيب و بعدين؟؟؟؟
قلتلها:أنا بدونك متل الكيبورد بدون ماوس..متل التقاطع بدون إشارة..متل الحمار بدون حمارة..
متل السلطة بدون خيارة..أنا الولاعة و إنتي السيجارة..أنا...طوووووط
سكرت الخط بوجهي..سألني عبود:مالك سكتت؟؟قلت له:لا ولا شي!!شكله الخط مشغول ..
و فجأة ما صحيت على حالي إلا و أنا شايف عبود خابطني على وجهي بالجنوة..المهم...
رجعت على البيت و وجهي مشطبمن ورا راس عبود لدرجة اللي بيشوفني ما بيعرفني!!
دخلت البيت شوي شوي عشان ما حدا يشوفني!!!
و طلعت على غرفتي و سكرت الباب و نمت..و صرت بعالم الأحلام هايم..ما بعرف في شو كنت أحلم..
كان الجو بارد و كنت متغطي و شارد..و فجأة رن التلفون..رفعت السماعة و لا هي نفس البنت يلي حكت معي أول مرة
قلتلها نعم؟قالتلي:سوسو موجودة؟؟قلتلها شوفي بيتنا كله شباب و ما فيه أحد اسمه بحرف السين ..
أنا و أخواني كلنا اسمنا طريخم..و ما في إلا اخوي الصغير ليث اسمه فيصل و بناديه عبد الرحمن..
و البنت تفرط من الضحك..و بتقلي دمك خفيف..مفكرتني عم بتهبل!!مش عارفة إني بحكي جد!!
و قلتلها شكراً..عامل حالي مؤدب يعني!!سألتني إيش عم تسوي؟؟قلتلها:و الله كنت نايم..
قالت:إيه بتنام في الليل إنته؟؟؟قلتلها:آه..ليش إمتى الواحد بنام؟؟قالت:أنا بنام في النهار و بسهر في الليل..
قلتلها:ليش الأخت بومة!!قالتلي:لا..بس بحب الليل لأنو رومنسي..إنت بتعتبر حالك رومنسي؟؟
قلتلها:لا و الله..ما بعرف بنات..سألتني إيش اسمك؟؟قلتلها:طريخم!!سألتني:إيش معناه؟؟
قلتلها:هذا اسم كلب كان عند جدي و سماني أبوي عليه لأني بشبهو!!!
و سألتها:إنتي إيش اسمك؟؟قالت:أليسا..قلتلها:بدي اسك الحقيقي مش المستعار(عامل حالي فاهم يعني)
قالت:هذا اسمي ..و ألفتلها قصة إني حبيت وحدة بس انتهى الحب لأنها خانتني مع أعز صحابي..
سألتني مين هي اللي حبيتها؟؟قلت:حبيت عنزة جيراننا و خانتني مع تيس!!
و فجأة البنت قالتلي أوكيه..بحكي معك بكرة لأني أمي بتناديلي..قلتلها:مو مشكلة..
و تطورت العلاقة و صرنا نحكي مع بعضكل يوم ..و انقلب حالي و لاحظ الجميع إني تغيرت..
يعني نكوم قاعدين على الغدا أو العشا و أنا دايماً ما بدي آكل..سرحان طول الوقت و بنسى تمي مفتوح..
و لاحظ الجميع إني صرت إنسان مؤدب..و صرت أقرأ كتب الشعر و الحب و الطبخ..لا تستغربوا..
لأن كتب الطبخ أتعلم منها كلام حلو متل يا عسل يا حليب يا كريم كراميل..المهم..إنه في ليلة من الليالي..
طلبت مني البنت أوصفلها شكلي!!!ياحبيبي على هالبلشة!!إيش بدي أحكيلها هسع؟؟أقول إني قرد؟؟
أعترف لها بالحقيقة المرة؟؟أحكيلها إني زي الحيط بدون ملامح؟؟بس بعدين حكيت لحالي ما تسوي زي كل الشباب و أعرّض عليها..
يعني بتلاقي واحد من الشباب شنيع..و لما تشوفو بالشارع ما بتعرف هر رايح و لا جاي لأن وجهه ماله أي معالم..
يعني المفروض يحط لوحة على وجهه و يكتب عليها هنا وجهي..عشان الناس تميز وجهه من.....
المهم..إني قلت لها :أنا عيوني متل عيون توم كروز..و طولي متل فلان و منخاري متل علان
و مهضوم كتير...سألتها و إنتي أوصفيلي شكلك..قالت:أنا ما بقدر لما تشوفني رح تعرفنيلأنو ما في زيي..
و قلت لها يعني راح أشوفك؟؟قالت أكيد..أنا بكرة رايحة على مكة مول و بنتقابل هناك..قلتلها:بكرة خميس!!
و الخميس بس للعائلات..قالتلي:إنت زلمة و بتقدر تدبر حالك..قلتلها:أوكي..مش مشكلة..
بس كيف بدي أعرفك؟؟حكتلي:في بينا الموبايل..أول ما توصل إحكي معي و بنتفق وين نشوف بعض..
و قلت مالي إلا عبود..أتصل و أتفاهم معه..رنيت عليه و رد علي و هو معصب و حكالي:نعم؟؟؟؟
إيش بدك يا غبي؟؟حكيتله شو إللي صار من طقطق لسلام عليكم..فحكالي:و الله وضعك صعب..
ما هو بكرة خميس..و مكة مول يوم الخميس و الجمعة بس للعائلات..قلتله:شو رأيك تلبس عباية زي الخليجيات
و تعمل حالك وحدة و ندخل مع بعض..رد علي بعد ما تغير صوته:أنا بدك تخليني آخر العمر بنت؟؟
حكيتلو:يا زلمة كلها يوم..و بعدين مين راح يعرف يعني؟؟حكالي:لا يا طريخم..هذا الطلب ما بقدر عليه..
و إذا انكشفت القصة شو بدي أحكي للشباب؟؟حكيتلو:يا عمي كيف بدها تنكشف منتى حتى وجهك ما راح يكون مبين..
حكالي:ليش مش إنت تلبس العباية و تسوي حالك وحدة و أكون أنا الشاب؟؟حكيتلو:يا عبود أنا ما بقدر..
لأني حتى لو غطيت حالي رح يكتشفوا إني مش بنت من ريحة جراباتي الذكورية!!!
حكالي:خلص بس أوعك حدا يعرف..حكيتلو:و لا يهمك..بس جهز حالك بكرة هسع بشتريلك عباية من البلد و بمرقلك ياها..
المهم..ثاني يوم أخذت السيارة و رحت لبيت عبود..و لقيت عند باب بيتهم شحّادة و نزلت الشحادة تدق على إزاز السيارة..
رحت طلعت من جيبي نص دينار كنت ناوي أشتري فيها تويكس إلي و للصبية..بس حكيت مو خسارة..عشان تدعيلي الله يوفقني اليوم..
و أول ما فتحت الشباك بدي أعطيها المصاري..و لا هي بتحكي:افتح الباب الله ياخدك يا رب..
الصوت مش غريب علي!!يييييييي عبود!!حكالي:آه عبود الله لا يبارك فيك..افتح الباب بسرعة قبل ما ييشوفني حدا من أهلي..
فتحتلو الباب و ركب..و انطلقنا لمكة مول..و يوم جينا ندخل..وقفنا الحارس و قال لحظة!!لازم مرتك تتفتش عند التفتيش النسائي..
حكيت:ليش إحنا في المطار و لا شو؟؟راح حكالنا اليوم إجا بلاغ ممكن يكون كاذب إنو في واحد يتنكر بزي جلباب و بدو يفجر المول..
و بتمنى إنكو تتعاونو معنا..و إنو هاي الاجراءات لسلامتنا و من هالحكي..حكيت للحارس:ممكن تتركني شوي مع مرتي بدي أحكيلها شغلة..
المهم ..مش عارف ليه..فجأة الحارس غيّر رأيه و حكا بعتذر عن سوء التفاهم خلص مش مشكلة..تفضلو..
و أول ما دخلنا حجزنا طاولة في طابق المطاعم و تركت عبود قاعد هناك و رحت أدور عل أليسا..حكيت معاها عالموبايل و سألتها وينها؟؟
حكتلي إنها عند المطعم اللي جنب السينما..و أروح هناك و أقعد ساعة بدور عليها و مش لاقيها..رنيت عليها عالموبايل سألتها وين صارت؟؟
صارلي فوق الساعة بدوّر عليها..سالتني إنتا وين بالزبط؟؟حكيتلها:أنا واقف جنب كيس الزبالة و إنتي وين؟؟حكتلي:
أنا واقفة جنب واحد شكله و لا طخة..و فجأة التفتت ورايي..أوبس..هاي هي..يعني أنا طلعت اللي و لا طخة و طلعت هي كيس الزبالة اللي حكيت عنه..
و لو تشوفو الصدمة على وجهها!!!!هذا أنت؟؟هذا و لا خص بالوصف اللي وصفتلي ياه عن شكلك!!!!!
حكيتلها:أنا فعلاً متل ما حكيت و أنا ما بكذب..بس صار لي حادث من يومين و هاي آثاره على وجهي زي مانتي شايفة..
بس صدقيني أنا كنت حلو..حكتلي مش مشكلة أنا ما بهمني الشكل..أنا بهتم بالمضمون طبعاً..
أنا طول هالوقت من اللخمة ما قدرت أميز شكلها..و أول ما شفت شكلها حسيت إنو الأرض عم تدور فيي..يا حبيبي ما أبشع هالوجه..
و أنا كان بدي أحكي كلام رومنسي..قعدت ساعتين أحفظ فيهم عشان لما أشوفها أحكيلها إياهم..
بس أول ما شفتها ضيعت كل الكلام اللي حفظته..و بلشت أخبّص بالحكي..
سألتها:ليش الصمغ على عيونك؟؟جاوبتني:من الأرق..سألتها:طيب شو هالبيبسي المكبوب على بنطلونك؟؟
جاوبتني:هاي مش بيبسي..هي مرقة لحمة..سألتها:ما عندك غيرهالبنطلون؟؟حكتلي:كان عندي بس انسرق..
سألتها:ما دامك بشعة ليش بتعاكسي بالتلفون؟؟حكتلي:أنا كنت حلوة بس وجهي انحرق..بعدين سألتني:إيش رأيك فيي حلوة زي ما تخيلتني؟؟
بيحكوا إني بشبه باسكال مشعلاني..جاوبتها:بتشبهي باسكال؟؟؟؟ليش هي كان جدها غوريلا؟؟حكتلي:و لك روح طير..
أنا أول كنت مصدقة إنو الديناصورات انقرضت..بس أول ما شفتك اليوم عرفت إنو هذا الكلام حكي فاضي..و على الأغلب إنو إشاعات..
حكيتلها:شوفي ياآنسة جرادة أنا بدي أجاملك و أحكيلك حكي حلو بس وجهك مش مساعد بالمرة..حاسس إنو عبارة عن دعاية لا للمخدرات..
المهم كل واحد فينا قعد يجرح بالتاني لحد ما تركنا بعض و رحنا..و أنا من الصدمة راح كل تفكيري و كل آمالي و أحلامي راحت..
و ركبت السيارة و رجعت عالبيت و أنا متحطم..كنت متخيلها متل أنجلينا جولي..لا لا خلاص حرّمت..
بديش أتعرف على بنات..سكرت باب الغرفة و نمت و صرت بعالم الأحلام هايم..ما بعرف في شو كنت أحلم..
كان الجو بارد و كنت متغطي و شارد..و لأ ما رن التلفون هاي المرّة..ما حسيت إلا في اليوم التاني بيي عم يحاول يكسر باب الغرفة..
و أقوم فجأة من التخت..إيش في؟؟شو القصة؟؟و ليه أبوي عم يصرّخ؟؟افتح يا طريخم..افتح يا حيوان..و فتحت الباب..
و شفت أبوي وجه ما كان مطمئن..و بلّش فيّي تكبيس..و إخواني الأنذال واقفين يتفرجوا..ما هو فيلم مصارعة على الطبيعة..
المهم و أبوي شغّال في ضربي سمعتو بيحكي تتجوز من ورانا يا حيوان؟؟قلت له:و الله ما تجوزت!!حكالي:لا..و مكة مول
بيتصلوا فينا و بيحكولنا خلّو طريخم يمر ياخد مرته اللي نسيها امبارحة..امبارح؟؟صح..و بدي أفهم أبوي القصة..
بس كان مشغول في الضرب و ما أعطاني فرصة..بعد جهد جهيد قدرت أبعد عن أبوي و رحت لزاوية الغرفة و بياخذأبوي كندرتي و يرميها علي
و أنا بسرعة ببعد عن الكندرة و ألقطها بتمي..و أخواني شافو هالحركة من هون و هما يصفقو و يصفرو من هون..
و أنا أروح أتحمس و أنط على أبوي..و يتجمد أبوي في مكانه و أسوي له حركة طريخمية عشان يستسلم..بس ما استسلم...
و أخواني قاعدين يقنعوه إنه يستسلم..بس هو عنيد عم يحاول يزحف لعند الحبل بس أنا ما خليته يوصل..و فجأة..إجا تدخل خارجي..
أمي جابت الطنجرة و خبطتها براسي خبطة قوية..و تدخلو أخواني و طلعو أمي برة الحبل..و بعدين محسوبكم راح بعد الخبطة..
و وقعت في مكاني..و يزحف أبوي شوي شوي و يحط إيده على صدري..و واحد من إخواني ما صدّق..انبطح و صار يخبط
بإيدو على الأرض و يحكي واحد..تنين..تلاتة..و فاز أبوي..المهم إني فهمت أبوي القصة..و يصر أبوي أني لازم نمر على أبو عبود
نوخذو معنا عشان أكيد قلقان..وصلنا مكة مول و شفت عبود..و حكيتلو في إلك معي مفاجأة..قال:إني كنت متأكد إنك أصيل يا طريخم..
عبود مفكر إنو الامفاجأة هي إنو بدي أعرفو على صاحبة البنت أو أختها..أخذته على السيارة..و إلا أبو عبود ماسك هالجذمة و ينزل في عبود ضرب..
و قعدت أتفرج و مبسوط..و فجأة لقيت أبوي ماكسني هو التاني و نازل فيي ضرب..حكيت لأبوي..هاي..أبو الشباب..منتا ماقصرت في البيت..
بيكفي..حكالي أبوي..مزبوط..بس عيب الزلمة يضرب ابنه و أنا أقعد أتفرج..لازم برضو أعمل شي..ما شاء الله..طالع لابنه..
بيفهم بالأصول..المهم..بعد هالقتلة اللي أكلناها أنا و عبود..تزاعلنا مع بعضنا..
و أنا حرّمت أتعرف على بنت..
و زي ما بيحكي المتل...ابعد عن الشر و غنيله.......

>>>>> ردود الأعضـــــــــــــــــــاء على الموضوع <<<<<
==================================

السلام عليكم ورحمة الله وبركاته

يسلمو الايادي يا الغاليه

__________________________________________________ __________

مشكورة هلا هلا على الرد بعد طول انتظار

__________________________________________________ __________

حلوووووووووة واسلوب احلى يسلموو عزيزتي

انتظر جديدك حبيبتي

__________________________________________________ __________

ميرسي همس على المرور و الرأي الحلو

__________________________________________________ __________

قصة حلوة ومهضومة خلتنا نتعرف على اللهجة الاردنية يسلمو